Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) NOBIEMBRE 2012

Ano ang Kahulugan sa Imo sang Pagpatawad ni Jehova?

Ano ang Kahulugan sa Imo sang Pagpatawad ni Jehova?

“Ang GINOO, Dios nga maloloy-on kag mainayohon, makuli sa pagpangakig . . . , nagapatawad sang kalautan kag sang paglapas kag sang sala.”—EX. 34:6, 7.

1, 2. (a) Ano nga sahi sang Dios si Jehova para sa pungsod sang Israel? (b) Ano nga pamangkot ang binagbinagon sa sini nga artikulo?

SANG tion ni Nehemias, ginbaton sang isa ka grupo sang mga Levinhon sa ila pangamuyo sa publiko nga ang ila mga katigulangan sulitsulit nga “nagdumili sa pagtuman” sa mga sugo ni Jehova. Pero sulitsulit nga ginpamatud-an ni Jehova nga sia “Dios nga handa sa pagpatawad, mainayohon kag maloloy-on, makuli sa pagpangakig kag bugana sa malig-on nga paghigugma.” Padayon si Jehova nga nagpakita sing wala tupong nga kaayo sa mga bihag nga ginpabalik sang tion ni Nehemias.—Neh. 9:16, 17.

2 Ang kada isa sa aton mahimo mamangkot, ‘Ano ang kahulugan para sa akon sang pagpatawad ni Jehova?’ Agod masabat ining importante nga pamangkot, binagbinagon naton ang mga pagpakig-angot sang Dios sa duha ka lalaki nga ginpatawad ni Jehova—ang mga hari nga sanday David kag Manases.

ANG MABUG-AT NGA MGA SALA NI DAVID

3-5. Paano si David nakahimo sing mabug-at nga sala?

3 Bisan pa mahinadlukon sa Dios si David, nakahimo sia sing mabug-at nga mga sala. Ang duha sa sini may labot sa mag-asawa nga sanday Urias kag Batseba. Ang mga resulta sini nga pagpakasala masakit gid para sa tanan nga nadalahig. Pero ang paagi sang Dios sa pagtadlong kay David nagatudlo sa aton nga mapinatawaron gid si Jehova. Binagbinaga ang natabo.

4 Ginpadala ni David ang hangaway sang Israel para sakupon ang Raba, ang kapital sang Amon. Mga 80 kilometros ini sa sidlangan sang Jerusalem, sa unahan sang Suba Jordan. Sa sini man nga tion, si David ara sa atop sang iya palasyo sa Jerusalem, kag nakita niya si Batseba, nga nagapaligo. Wala ang iya bana. Nagkaibog gid  si David kay Batseba, gani nagsugo sia nga dalhon ini sa palasyo, kag nakighilahi sia sa iya.—2 Sam. 11:1-4.

5 Sang nahibaluan ni David nga nagbusong si Batseba, ginpapauli niya si Urias sa Jerusalem nga nagalaum nga maghulid ini sa iya asawa. Pero wala gani nagsulod si Urias sa ila balay—bisan pa ginpilit sia ni David. Gani, sekreto nga ginsulatan sang hari ang pangulo sang hangaway nga ibutang si Urias “sa atubang gid sang inaway nga malapuyot” kag bayaan sia sang iya mga kaupdanan. Bangod sini, napatay si Urias sa inaway, subong sang ginplano ni David. (2 Sam. 11:12-17) Gani ang sala sang hari nga pagpanghilahi nadugangan pa sing pagpapatay sa inosente nga tawo.

NAGBAG-O ANG PANIMUOT NI DAVID

6. Ano ang ginhimo sang Dios sang nakasala si David, kag ano ang ginapakita sini parte kay Jehova?

6 Siempre, nakita ni Jehova ang tanan nga natabo. (Hulu. 15:3) Bisan pa ginpangasawa sang ulihi sang hari si Batseba, “ang butang nga nahimo ni David nagpaakig sa GINOO.” (2 Sam. 11:27) Ano ang ginhimo sang Dios? Ginpadala niya kay David ang iya manalagna nga si Natan. Bangod si Jehova mapinatawaron nga Dios, luyag niya makita kon bala may basihan sia sa pagpakita sing kaluoy. Indi bala nga makapalig-on gid ining ginhimo ni Jehova? Wala niya ginpuersa si David nga magtu-ad, kundi ginpadala niya si Natan para isaysay ang istorya nga nagailustrar kon daw ano kadaku ang sala nga nahimo sang hari. (Basaha ang 2 Samuel 12:1-4.) Epektibo ini nga paagi sa pag-uyat sining serioso nga sitwasyon!

7. Ano ang reaksion ni David sa ilustrasyon ni Natan?

7 Sa ilustrasyon ni Natan, napukaw ang handum ni David nga ipadapat ang hustisya. Naakig sia sa manggaranon nga lalaki kag ginsilingan si Natan: “Sa nagakabuhi ang GINOO, ang tawo nga nakahimo sini takus sa kamatayon.” Isa pa, nagsiling si David nga ang biktima dapat ulian sang mga nadula sa iya. Pero daw tinakluban sia sang langit sang nagsiling si Natan, “Ikaw amo ang tawo.” Dayon ginsilingan niya si David nga bangod ginhimo niya ini nga butang, “ang espada” indi magbulag sa iya panimalay kag may kagamo sa iya pamilya. Mahuy-an man sia sa publiko bangod sang iya mga sala. Narealisar ni David kon daw ano kabug-at sang iya sala, gani mahinulsulon sia nga nagsiling: “Nakasala ako batok sa GINOO.”—2 Sam. 12:5-14.

ANG PANGAMUYO NI DAVID KAG ANG PAGPATAWAD SANG DIOS

8, 9. Paano ang Salmo 51 nagapakita sang balatyagon ni David, kag ano ang ginatudlo sini parte kay Jehova?

8 Ang ambahanon nga ginkomposo ni Hari David pagkatapos sini nga hitabo nagapakita sang iya tinagipusuon nga paghinulsol. Ang Salmo 51 nagaunod sang makatalandog nga mga pangabay ni David kay Jehova kag nagapakita nga wala lamang niya gin-aku ang iya sala, kundi naghinulsol gid sia. Ang iya kaangtanan sa Dios amo gid ang pinakaimportante sa iya. “Batok sa imo, sa imo lamang, nakasala ako,” tu-ad niya. Nakitluoy sia kay Jehova: “Tugaha sa akon, O Dios, ang kasingkasing nga matinlo, kag bag-oha ang matarung nga espiritu sa sulud nakon. . . . Iuli sa akon ang kalipay sang imo kaluwasan, kag patinduga ako nga may kinabubut-on nga espiritu.” (Sal. 51:1-4, 7-12) Amo ka man bala sini kahanuot kag katampad kon nagatu-ad sang imo mga sala kay Jehova?

9 Wala gindula ni Jehova ang masakit nga mga resulta sang kasal-anan ni David. Ang mga epekto sini nagpadayon tubtob buhi sia. Pero, bangod ang tagipusuon ni David “boong kag mahinulsulon,” ginpatawad sia ni Jehova. (Basaha ang Salmo 32:5; Sal. 51:17) Nahangpan sang Labing Gamhanan  nga Dios ang matuod nga balatyagon kag motibo kon ngaa nakahimo ang isa sing sala. Sa baylo nga itugyan sanday David kag Batseba sa mga tawo nga hukom para mapamatbatan sing kamatayon suno sa Mosaikong Kasuguan, nagpasilabot si Jehova. (Lev. 20:10) Ginhimo pa gani sang Dios ang ila anak nga si Solomon subong masunod nga hari sang Israel.—1 Cron. 22:9, 10.

10. (a) Ano ang mahimo nga ginbasihan ni Jehova sa pagpatawad kay David? (b) Ano ang nagapahulag kay Jehova nga magpatawad?

10 Mahimo nga ang isa pa ka rason kon ngaa nagpatawad si Jehova bangod ginkaluy-an ni David si Saul. (1 Sam. 24:4-7) Pareho sang ginpaathag ni Jesus, pakig-angutan kita ni Jehova kon paano naton ginapakig-angutan ang iban. “Untati ninyo ang paghukom agod indi kamo paghukman,” siling ni Jesus, “kay hukman kamo suno sa inyo paghukom; kag takson nila kamo suno sa inyo pagtakus.” (Mat. 7:1, 2) Makapaumpaw gid mahibaluan nga patawaron ni Jehova ang aton mga sala—bisan pa mabug-at ini pareho sang pagpanghilahi ukon pagpatay! Himuon niya ini kon mapinatawaron kita, ginatu-ad ang aton mga sala sa iya, kag ginabag-o ang aton malain nga ginahimo. Ang “mga tion sang kaumpawan” ihatag ni Jehova kon ang mga makasasala sinsero nga maghinulsol.Basaha ang Binuhatan 3:19.

SI MANASES NAKAHIMO SING MABUG-AT NGA SALA PERO NAGHINULSOL

11. Ano nga mga kalautan ang ginhimo ni Hari Manases?

11 Binagbinaga ang isa pa ka kasaysayan sa Kasulatan nga nagailustrar sang pagpatawad ni Jehova. Mga 360 ka tuig sa tapos naghari si David, si Manases nangin hari sa Juda. Sa 55 ka tuig niya nga paggahom, naghimo sia sing makangilil-ad nga mga buhat, gani ginpakamalaut sia ni Jehova. Halimbawa, nagpatindog sia sing mga altar para kay Baal, nagsimba sa “bug-os nga kadam-an sang langit,” nagpaagi sa kalayo sang iya mga anak nga lalaki, kag nagpasanyog sang espiritismo. Huo, “naghimo sia sing labi kadamu nga malaut sa itololok sang GINOO.”—2 Cron. 33:1-6.

12. Paano si Manases nagbalik kay Jehova?

12 Sang ulihi, ginbihag si Manases kag ginbilanggo sa Babilonia. Sini nga tion, mahimo nadumduman niya ining mga pinamulong ni Moises sa Israel: “Kon yara ka sa kapipit-an, kag mag-abut sa imo ini tanan nga butang sa olihi nga mga adlaw magabalik ka sa GINOO nga imo Dios kag magapamati sang iya tingug.” (Deut. 4:30) Gani, nagbalik si Manases kay Jehova. Paano? “Nagpaubus [sia] sang iya kaugalingon sing daku” kag padayon nga “nagpangamuyo” sa Dios (subong makita sa pahina 21).  (2 Cron. 33:12, 13) Wala ginsugid sang Biblia kon ano gid ang ginsiling ni Manases sa iya mga pangamuyo, pero mahimo nga may kaanggid ini sa mga pangabay ni Hari David sa Salmo 51. Ano man ang iya ginsiling, nahibaluan naton nga nagbag-o gid si Manases.

13. Ngaa ginpatawad ni Jehova si Manases?

13 Ano ang reaksion ni Jehova sa mga pangamuyo ni Manases? “Nalooy ang Dios [kay Manases] kag ginpamatian ang iya pag-ampo.” Kaangay ni David, ginbaton ni Manases kon daw ano kabug-at ang iya mga sala kag matuod nga naghinulsol. Gani, ginpatawad sia sang Dios kag ginbalik subong hari sa Jerusalem. Subong resulta, “si Manases nakakilala nga ang GINOO amo ang Dios.” (2 Cron. 33:13) Makatalandog gid ining isa pa ka pamatuod nga ang aton maluluy-on nga Dios nagapatawad sa mga mahinulsulon.

ANG PAGPATAWAD BALA NI JEHOVA WALA SING LIMITASYON?

14. Ano ang basihan ni Jehova sa pagpatawad sa mga nakasala?

14 Ang kalabanan nga alagad sang Dios karon wala man sing nahimo nga sala pareho sang sala nanday David kag Manases. Pero ang pagpatawad ni Jehova sa sining duha ka hari makabulig sa aton nga makita nga ang Dios handa magpatawad sa mga mahinulsulon nga nakahimo sing mabug-at nga mga sala.

15. Paano naton nahibaluan nga indi awtomatiko ang pagpatawad ni Jehova?

15 Siempre, indi kita makasiling nga awtomatiko nga ginapatawad ni Jehova ang tanan nga tawo sa ila mga sala. Halimbawa, ipaanggid naton ang panimuot nanday David kag Manases sa batinggilan nga katawhan sang Israel kag Juda. Ginpakadto sang Dios si Natan kay David para hatagan sia sing kahigayunan nga maghinulsol. Ginbaton ni David nga nakasala sia kag naghinulsol. Sang ara sa kalisdanan si Manases, naghinulsol gid sia. Pero sa masami, ang  mga pumuluyo sang Israel kag Juda wala naghinulsol. Amo nga wala sila ginpatawad ni Jehova. Gani, sulitsulit niya nga ginpadala ang iya mga manalagna para ipahayag sa ila kon ano ang iya pagtamod sa ila paglapas. (Basaha ang Nehemias 9:30.) Sang nagbalik sa ila dutang natawhan ang mga ginbihag sa Babilonia, padayon nga nagpadala si Jehova sing matutom nga mga mensahero, pareho sang saserdote nga si Esdras kag manalagna nga si Malaquias. Sang gintuman sang katawhan ang kabubut-on ni Jehova, nangin malipayon gid sila.—Neh. 12:43-47.

16. (a) Ano ang natabo bangod indi mahinulsulon ang pungsod sang Israel? (b) Ano ang matabo sa indibiduwal nga mga miembro sang dumaan nga Israel?

16 Sang ginpadala ni Jehova si Jesus sa duta kag gin-aman ang isa ka himpit nga halad gawad, wala na niya ginabaton ang halad nga mga sapat sang Israel. (1 Juan 4:9, 10) Subong tawo, ginpakita ni Jesus ang pagtamod sang iya Amay sang magsiling sia: “Jerusalem, Jerusalem, ang nagapatay sa mga manalagna kag nagabato sa mga ginpadala sa iya,—makapila kuntani nga luyag ko tipunon ang imo mga anak, subong sang isa ka munga nga nagatipon sang iya mga piso sa idalom sang iya mga pakpak! Apang indi ninyo luyag ini.” Gani si Jesus nagsiling: “Yari karon! Ang inyo balay pabay-an sa inyo.” (Mat. 23:37, 38) Gani, ang makasasala kag indi mahinulsulon nga pungsod ginbuslan sang espirituwal nga Israel. (Mat. 21:43; Gal. 6:16) Pero ano ang matabo sa indibiduwal nga mga miembro sang kinaugali nga Israel? Mahimo sila patawaron kag kaluy-an ni Jehova paagi sa ila pagtuo sa Dios kag sa halad ni Jesucristo. Ina nga kahigayunan matigayon man sang mga napatay nga wala nakahinulsol sang ila mga sala nga banhawon sa isa ka natinluan nga duta.—Juan 5:28, 29; Binu. 24:15.

MGA BENEPISYO SA PAGPATAWAD NI JEHOVA

17, 18. Paano naton mabaton ang pagpatawad ni Jehova?

17 Ano ang aton himuon bangod si Jehova handa magpatawad? Pat-od nga luyag naton ilugon sanday David kag Manases. Dapat naton batunon nga makasasala kita, hinulsulan ang aton mga sala, hanuot nga pangayuon ang kapatawaran ni Jehova, kag pangabayon sia nga putlion ang aton tagipusuon. (Sal. 51:10) Kon nakahimo kita sing mabug-at nga sala, dapat kita magpabulig sa mga gulang. (Sant. 5:14, 15) Bisan ano man kabug-at ang aton mga sala, makalulugpay dumdumon ang ginsiling ni Moises nga si Jehova “Dios nga maloloy-on kag mainayohon, makuli sa pagpangakig, kag bugana sa malig-on nga paghigugma kag sa pagkatutum, nga nagatipig sing malig-on nga paghigugma sa mga linibo, nga nagapatawad sang kalautan kag sang paglapas kag sang sala.” Wala nagbag-o si Jehova.—Ex. 34:6, 7.

18 Paagi sa isa ka pagpaanggid, nagsaad si Jehova sa mahinulsulon nga mga Israelinhon nga patawaron sing bug-os ang ila mga sala. Bisan ang ila mga sala subong kapula sang “escarlata” mangin maputi ini subong sang “nieve.” (Basaha ang Isaias 1:18.) Gani, ano ang kahulugan sa aton sang pagpatawad ni Jehova? Patawaron lamang sing bug-os ang aton mga sala kag kalapasan kon apresyahon naton ang pagpatawad ni Jehova kag maghinulsol.

19. Ano ang binagbinagon naton sa masunod nga artikulo?

19 Nabaton naton ang pagpatawad ni Jehova, gani paano naton sia mailog sa pagpakig-angot sa isa kag isa? Paano naton malikawan nga mangin indi mapinatawaron sa mga mahinulsulon nga nakahimo sa aton sing mabug-at nga sala? Ang masunod nga artikulo makabulig sa aton nga usisaon ang aton tagipusuon agod mangin kaangay kita sang aton Amay nga si Jehova, nga “maayo kag handa sa pagpatawad.”—Sal. 86:5.