Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) OKTUBRE 2012

Sa Brazil

Sa Brazil

SANG nagligad nga tinuig, si Rúbia (1), isa ka sister nga 30 anyos na karon, nagduaw kay Sandra (2), nga nagapayunir sa isa ka gamay nga kongregasyon sa nabagatnan nga Brazil. Pagduaw ni Rúbia, may natabo nga nagtandog gid sa iya kag nagpabag-o sang iya kabuhi. Ano ini? Pasugiron naton sia.

“DAW INDI AKO MAKAPATI SANG AKON NABATIAN”

“Gin-upod ako ni Sandra sa iya Bible study nga babayi. Sang nagatuon na kami, ang babayi daw sa wala lang nga nagsiling: ‘Sandra, may tatlo ka babayi sa akon ginaubrahan nga gusto magtuon sa Biblia, pero ginsilingan ko sila nga mahulat lang anay. Kabalo ko nga puno na ang imo iskedyul sa sini nga tuig.’ Daw indi ako makapati sang akon nabatian. Ang mga tawo nga gusto magtuon parte kay Jehova  ginalista pa anay! Sa amon kongregasyon, nabudlayan ako magpangita sing bisan isa lang ka Bible study. Sina nga tion sa balay sang iya Bible study, nabatyagan ko ang handum nga buligan ang mga tawo sa sining gamay nga banwa. Sang ulihi, naghalin ako sa siudad kag nagsaylo sa banwa nga ginapayuniran ni Sandra.”

Ano ang resulta? Nagsiling si Rúbia: “Sa sulod lang sang duha ka bulan, may 15 na ako ka Bible study—kag mapati ka man ukon indi—pareho kay Sandra, may iban pa nga nagahulat sa akon listahan!”

NAPALIG-ON NGA USISAON LIWAT ANG IYA MINISTERYO

Si Diego (3), isa ka brother nga beintehon, nagduaw sa pila ka payunir sa Prudentópolis, isa ka gamay nga banwa sa nabagatnan nga Brazil. Pagduaw niya, napalig-on gid sia amo nga gin-usisa niya liwat ang iya ministeryo. Nagsiling sia: “Nagaupod-upod ako sa amon kongregasyon kag nagabantala sing pila lang ka oras kada bulan. Pero sang ginduaw ko ini nga mga payunir kag nabatian ang ila mga eksperiensia, narealisar ko nga malipayon sila kon ikumparar sa akon nga nagapawala lang sa ministeryo. Sang nakita ko kon daw ano sila ka malipayon, nakasiling ako nga kuntani amo man sini ang akon kabuhi.” Pagkatapos sini, nagpayunir si Diego.

Pareho ni Diego, isa ka bala ka pamatan-on nga Saksi nga nagabantala kag nagatambong sa mga miting pero nagabatyag nga ang pagministeryo isa lamang ka rutina kag indi makalilipay? Kon amo, mabag-o mo bala ini para matilawan mo ang kalipay sa pag-alagad sa lugar nga may daku nga kinahanglanon sang mga manugbantala? Mahimo magduhaduha ka nga biyaan ang imo matawhay nga pangabuhi. Pero madamo nga pamatan-on ang naghimo sini. Ginbag-o nila ang ila mga tulumuron kag mga handum para maalagad sing bug-os si Jehova. Halimbawa, binagbinaga si Bruno.

MAESTRO UKON MINISTRO?

Sang nagligad nga pila ka tuig, si Bruno (4), nga 28 anyos karon, nagtuon sa isa ka bantog nga eskwelahan sa musika, kag gusto niya nga mangin konduktor sa orkestra. Nag-uswag sia sa iya pagtuon kag pila  ka beses sia nga gin-agda nga mangin konduktor sa isa ka orkestra. Daw mangin maayo gid ang iya palaabuton sa sini nga karera. “Pero,” siling ni Bruno, “daw may kulang sa akon kabuhi. Gindedikar ko ang akon kaugalingon kay Jehova, pero nahibaluan ko nga wala ko ginahatag sa iya ang akon bug-os nga masarangan, gani ginakonsiensia ako. Ginpabutyag ko kay Jehova ang akon nabatyagan, kag nakig-istorya man ako sa eksperiensiado nga mga kauturan sa kongregasyon. Pagkatapos makabinagbinag sing maayo, nagdesisyon ako nga unahon ang ministeryo, nag-untat sa pag-eskwela sa musika, kag nag-alagad sa lugar nga may daku nga kinahanglanon sang mga manugbantala.” Ano ang resulta sang iya desisyon?

Nagsaylo si Bruno sa Guapiara (mga 7,000 ang pumuluyo), nga mga 260 kilometros halin sa siudad sang São Paulo. Daku gid ini nga pagbag-o. Nagsiling sia: “Nag-istar ako sa isa ka gamay nga balay nga wala sing repredyeritor, TV, ukon Internet. Pero sa palibot sang balay, may mga tanom nga utan kag kakahuyan—nga wala gid sa akon sang una!” Nagaalagad si Bruno sa gamay nga kongregasyon, kag isa ka bes kada semana ginapuno niya ang iya bag sing pagkaon, tubig, kag mga literatura kag nagamotor para magbantala sa kaumhan. Madamo nga tawo sa sina nga lugar ang wala pa makabati sang maayong balita. “Nakalab-ot sa 18 ang akon Bible study,” siling niya. “Nalipay gid ako sang nakita ko nga ginbag-o sini nga mga estudyante ang ila kabuhi!” Nagsiling pa sia: “Sini nga tion, nasapwan ko kon ano ang kulang sa akon kabuhi—ang kalipay sa pag-una sa intereses sang Ginharian. Indi ko ini mabatyagan kon gin-una ko ang materyalistiko nga mga tulumuron.” Paano ginasuportahan ni Bruno ang iya kaugalingon sa Guapiara? Nagyuhum sia nga nagsabat: “Nagatudlo ako sa paggitara.” Gani, daw maestro lang sia gihapon.

“KINAHANGLAN KO MAGPIBILIN”

Kaanggid man kay Bruno ang eksperiensia ni Mariana (5), nga manugtreinta na. Abogada sia, pero indi sia malipayon. Nagsiling sia: “Daw nagapanikasog lang ako sa hangin.” (Man. 1:17) Ginpalig-on sia sang pila ka kauturan nga binagbinagon ang pagpayunir. Sa tapos ini mabinagbinag ni Mariana, nagdesisyon sia upod sa iya mga amiga nga sanday Bianca (6),  Caroline (7), kag Juliana (8), nga magbulig sa isa ka kongregasyon sa Barra do Bugres, isa ka malayo nga banwa nga malapit sa Bolivia kag linibo ka kilometro halin sa ila balay. Ano dayon ang natabo?

Si Mariana nagsiling: “Plano ko nga tatlo lang ako ka bulan diri. Pero pagligad sang tatlo ka bulan, 15 na ang akon Bible study! Kinahanglan nga buligan pa ini nga mga estudyante para mag-uswag sa kamatuoran. Gani, daw wala ako sing kaisog nga maghambal sa ila nga mahalin na ako. Kinahanglan ko magpabilin.” Amo gid sini ang ginhimo sang apat ka sister. Nangin mas mapuslanon bala ang kabuhi ni Mariana bangod sining bag-o nga karera? Nagsiling sia: “Nalipay gid ako kay gingamit ako ni Jehova nga buligan ang mga tawo para mangin mas maayo ang ila kabuhi. Isa gid ka pagpakamaayo sa akon kay ginagamit ko karon ang akon tion kag kusog sa hilikuton nga matuod nga mapuslanon.” Ginpabutyag ni Caroline ang ila balatyagon nga apat: “Antes ako magtulog sa gab-i, nabatyagan ko ang daku nga kalipay tungod gingamit ko ang akon kaugalingon sa pag-una sang intereses sang Ginharian. Ang akon kabuhi nasentro sa pagbulig sa akon mga Bible study. Makalilipay gid makita nga nagauswag sila. Nangin matuod sa akon ini nga pinamulong: ‘Tilawi kag tan-awa nga maayo [si Jehova].’”—Sal. 34:8.

Pat-od gid nga nalipay si Jehova sa nagadamo nga mga pamatan-on sa bilog nga kalibutan nga “nagahalad sang ila kaugalingon sing kinabubut-on” sa pagbantala sang maayong balita sang iya Ginharian sa malayo nga mga lugar! (Sal. 110:3; Hulu. 27:11) Naeksperiensiahan sining mapisan nga mga manugpangabudlay ang bugana nga mga pagpakamaayo ni Jehova.—Hulu. 10:22.

Magtuon sing Dugang Pa

Paano Ginahanas ang mga Payunir?

Anong pinasahi nga paghanas ang ginahatag sa mga payunir nga nagabantala sang Ginharian sing bug-os tion?