Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) SEPTIEMBRE 2012

Ginatipon ni Jehova ang Iya Malipayon nga Katawhan

Ginatipon ni Jehova ang Iya Malipayon nga Katawhan

“Tipona ang katawohan, ang mga lalaki, ang mga babayi, kag ang mga magamay, kag ang imo manlulugayaw.”—DEUT. 31:12.

1, 2. Ano ang usisaon naton parte sa teokratiko nga mga pagtilipon?

ANG internasyonal kag distrito nga kombension madugay na nga bahin sang modernong-adlaw nga kasaysayan sang mga Saksi ni Jehova. Sa sulod sang mga dekada, madamo sa aton ang nakatambong sa sining makalilipay nga mga pagtilipon.

2 Linibo ka tuig na ang nagligad, ang katawhan sang Dios nagahiwat man sang balaan nga mga pagtilipon. Usisaon naton ang pila ka pagtilipon sa Kasulatan nga nangin sulundan sang mga kombension nga ginahiwat subong. Talupangda ang pagkaanggid sang mga pagtilipon sang una kag sa subong, kag binagbinaga ang mga benepisyo sa pagtambong sa sini.—Sal. 44:1; Roma 15:4.

INDI MALIPATAN NGA MGA PAGTILIPON, SADTO KAG SUBONG

3. (a) Ano ang natabo sa una nga pagtilipon sang katawhan ni Jehova? (b) Paano gintawag ang mga Israelinhon para magtipon?

3 Sa Biblia, ang pagtilipon sa tiilan sang Bukid Sinai amo ang una nga daku nga pagtilipon sang katawhan sang Dios para magpatudlo kay Jehova. Ini nga hitabo indi gid malipatan sa kasaysayan sang putli nga pagsimba. Sa sinang makahalawathawat nga okasyon, nga indi gid malipatan sang mga nagatambong, ginpakita ni Jehova ang iya gahom sang ginhatag niya sa ila ang iya Kasuguan. (Ex. 19:2-9, 16-19; basaha ang Exodo 20:18; Deuteronomio 4:9, 10.) Ini nga hitabo amo ang umpisa sang pagpakig-angot sang Dios sa Israel. Wala madugay pagkatapos sadto, naghimo si Jehova sing pamaagi sa pagpatawag sa iya katawhan. Ginsugo niya si Moises nga maghimo sing duha ka budyong nga pilak, nga gamiton sa pagtawag sa “bug-os nga katilingban” para magtipon “sa ganhaan sang layanglayang nga tiliponan.” (Num. 10:1-4) Handurawa ang ila kalipay sa sina nga okasyon!

4, 5. Ngaa importante gid ang mga pagtilipon nga ginhiwat nanday Moises kag Josue?

 4 Sa katapusan sang 40 ka tuig nga paglakbay sang mga Israelinhon sa kamingawan, gintipon sila ni Moises. Natabo ini sa importante nga bahin sang kasaysayan sang bag-o nga pungsod sang Israel. Manugsulod na sila sa Ginsaad nga Duta. Nagakaigo ini nga tion para kay Moises nga pahanumdumon ang iya mga kauturan sang tanan nga nahimo ni Jehova sa ila kag sang pagahimuon pa Niya.—Deut. 29:1-15; 30:15-20; 31:30.

5 Mahimo nga sa sina man nga tion, ginsilingan ni Moises ang katawhan nga maghiwat sing regular nga pagtilipon para magpatudlo sa Dios. Sa mga tuig sang Inugpahuway, sa Piesta sang mga Kayangkayang, ang mga lalaki, babayi, kabataan, kag dumuluong nga mga pumuluyo sang Israel magatipon sa lugar nga ginpili ni Jehova “agud nga magpamati sila kag nga magtoon sila kag magkahadluk sa GINOO nga [ila] Dios, kag magbantay sa paghimo sang tanan nga polong sining kasogoan.” (Basaha ang Deuteronomio 31:1, 10-12.) Gani sa sining temprano nga bahin sang kasaysayan sang katawhan sang Dios, maathag nga kinahanglan sila pirme magtipon para binagbinagon ang pulong kag mga katuyuan ni Jehova. Sang naagaw na sang mga Israelinhon ang Ginsaad nga Duta, napalibutan gihapon sila sang pagano nga mga pungsod. Gani gintipon ni Josue ang tanan nga Israelinhon para pabakuron ang ila pamat-od nga magpabilin nga matutom kay Jehova. Bilang resulta, nanumpa ang katawhan nga mag-alagad sa Dios.—Jos. 23:1, 2; 24:1, 15, 21-24.

6, 7. Ngaa importante gid ang moderno nga mga kombension sang katawhan ni Jehova?

6 Sa moderno nga kasaysayan sang katawhan ni Jehova, may mga indi man malipatan nga pagtilipon diin ginpahibalo ang mga pag-uswag sa mga hilikuton ukon paghangop sa Kasulatan. (Hulu. 4:18) Ang una nga daku nga kombension sang mga Estudyante sang Biblia ginhiwat pagkatapos sang Bug-os Kalibutan nga Inaway I sang 1919 sa Cedar Point, Ohio, U.S.A. Sa sina nga pagtilipon, nga gintambungan sang mga 7,000, ginpahibalo ang bug-os kalibutan nga pagbantala. Sang 1922, sa tion sang siam ka adlaw nga kombension sa sina man nga lugar, ginpalig-on ni Joseph F. Rutherford ini nga hilikuton paagi sa pagsiling: “Magmatutom kag mangin matuod nga mga saksi sang Ginuo. Magpadayon sa pagpakig-away tubtob marumpag ang tanan nga kabutigan sang Babilonia. Ipahayag ang mensahe bisan diin. Dapat mahibaluan sang kalibutan nga si Jehova ang Dios kag si Jesucristo amo ang Hari sang mga hari kag Ginuo sang mga ginuo. Ini na ang adlaw sang tanan nga mga adlaw. Tan-awa, ang Hari nagagahom! Kamo ang iya mga tiglawas. Gani ibantala, ibantala, ibantala, ang Hari kag ang iya ginharian.” Ang mga nagtambong kag ang katawhan sang Dios sa bilog nga kalibutan malipayon nga nagtuman sini.

7 Sang 1931, sa Columbus, Ohio, ginbaton sing malipayon sang mga Estudyante sang Biblia ang ngalan nga mga Saksi ni Jehova. Dayon sang 1935, sa Washington, D.C., ginpakilala ni Brother Rutherford ang “dakung kadam-an,” nga ginlaragway sa Bugna nga “nagatindog sa atubangan sang trono kag sa atubangan sang Kordero.” (Bug. 7:9-17) Sang 1942, sa tungatunga sang Bug-os Kalibutan nga Inaway II, ginhatag ni Nathan H. Knorr ang makakulunyag nga pamulongpulong nga “Peace—Can It Last?” Ginpakilala niya ang “duag-eskarlata nga mabangis nga sapat” sa Bugna 17 kag nagsiling nga madamo pa ang dapat bantalaan pagkatapos sang inaway.

8, 9. Ngaa makatalandog gid ang pila ka kombension?

8 Talalupangdon gid sa “Glad Nations” Theocratic Assembly sa Cleveland, Ohio sang 1946 ang pamulongpulong ni Brother Knorr nga “The Problems of Reconstruction and Expansion.” Ang isa nga nagtambong nga napalig-on sa pamulongpulong nagsulat: “Ara gid  ako sa iya likod sa plataporma sina nga gab-i, kag sang ginhambal niya ang hilikuton kag ginsugid ang mga plano nga pagpasangkad sang puluy-an kag factory sa Brooklyn Bethel, nagpamalakpak sa kalipay ang tuman kadamo nga tumalambong. Bisan indi maklaruhan ang ila hitsura gikan sa plataporma, mabatyagan mo gid ang ila kalipay.” Sa internasyonal nga kombension sa New York City sang 1950, malipayon nga ginbaton sang mga tumalambong ang Bag-ong Kalibutan nga Badbad Sang Cristianong Griegong Kasulatan, ang una nga bahin sang moderno sing lenguahe nga Biblia nga nagpasag-uli sang ngalan sang Dios sa iya Pulong.—Jer. 16:21.

9 Makatalandog man ang mga kombension diin gintipon ni Jehova ang iya matutom nga mga Saksi pagkatapos sang paghingabot ukon pagdumili. Nanumpa si Adolf Hitler nga papason ang mga Saksi ni Jehova sa Germany, pero sang 1955 nga kombension, 107,000 ka Saksi ang nagtipon sa Nuremberg, sa gintipunan anay ni Hitler kag sang iya mga sumalakdag. Madamo sa mga nagtambong ang naghibi sa kalipay! Sa tatlo ka adlaw nga “Diosnon nga Debosyon” nga mga kombension sa Poland sang 1989, nalakip sa 166,518 ka delegado ang naghalin sa anay Unyon Sobyet kag Czechoslovakia, kag sa iban pa nga pungsod sa Sidlangan nga Europa. Amo ini ang una nga tion para sa iban nga makaupod sa pagtilipon sang katawhan sang Dios nga sobra 15 ukon 20 ang nagtambong. Handurawa man ang kalipay sa “Panudlo sang Dios” nga Internasyonal nga Kombension sang 1993 sa Kiev, Ukraine, diin 7,402 ang ginbawtismuhan, nga amo ang pinakamadamo nga nabawtismuhan sa kasaysayan sang mga Saksi ni Jehova.—Isa. 60:22; Hag. 2:7.

10. Ano nga kombension ang indi mo gid malipatan, kag ngaa?

10 Mahimo nga may distrito ukon internasyonal nga mga kombension nga indi mo malipatan. Nadumduman mo pa bala ang kombension nga una mo nga natambungan ukon ang kombension diin ginbawtismuhan ka? Amo ini ang importante nga hitabo sa imo pagsimba kay Jehova nga indi mo dapat pagkalimtan!—Sal. 42:4.

REGULAR NGA MGA OKASYON PARA MAGKASADYA

11. Ano nga mga kapiestahan ang ginpatuman sang Dios nga tambungan sang mga Israelinhon?

11 Ginpatuman ni Jehova sa mga Israelinhon nga magtipon sa Jerusalem para sa tatlo ka kapiestahan kada tuig—ang Piesta sang Tinapay nga Walay Tapay, Piesta sang mga Semana (nga gintawag sang ulihi nga Pentecostes), kag Piesta sang mga Kayangkayang. Tuhoy sa sini, ang Dios nagsugo: “Makatlo sa isa ka tuig ang tanan mong lalaki mag-atubang sa Ginoong DIOS.” (Ex. 23:14-17) Bangod importante katama ini nga mga kapiestahan sa ila pagsimba, madamo nga amay ang nagatambong upod sa ila bilog nga pamilya.—1 Sam. 1:1-7; Luc. 2:41, 42.

12, 13. Ano ang dapat himuon sang madamo nga Israelinhon para makatambong sa tuigan nga mga kapiestahan?

12 Hunahunaa kon ano ang dapat himuon sang mga Israelinhon nga pamilya para makalakbay. Halimbawa, sanday Jose kag Maria  kinahanglan maglakbay sing mga 100 kilometros halin sa Nazaret pakadto sa Jerusalem. Sa banta mo, daw ano kadugay ini nga paglakbay dala ang magagmay nga mga kabataan? Ang rekord parte sa pagkadto sang bata nga si Jesus sa Jerusalem nagapakita nga mahimo magkaupod nga nagalakbay ang mga magparyentehanay kag mga mag-abyan. Kinaandan na nga nagabuligay sila sa pagdigamo kag sa paghanda sang ila matulugan sa mga lugar nga indi pamilyar sa ila. Pero ini nga kahimtangan indi delikado para sa 12 anyos nga si Jesus kay ginhatagan sia sing pila ka kahilwayan. Pat-od gid nga indi nila malipatan ini nga mga kapiestahan, ilabi na sang mga kabataan!—Luc. 2:44-46.

13 Sang nag-alaplaag ang mga Israelinhon sa iban nga bahin sang kalibutan, ang mga nagtambong sa mga kapiestahan naghalin sa madamo nga pungsod. Sang Pentecostes sang 33 C.E., ang mainapresyahon nga mga Judiyo kag mga proselita halin sa Italya, Libya, Creta, Asia Minor, kag Mesopotamia naglakbay pa Jerusalem.—Binu. 2:5-11; 20:16.

14. Paano nakabenepisyo ang mga Israelinhon sa pagtambong sa tuigan nga mga kapiestahan?

14 Para sa matutom nga mga Israelinhon, ang pinakaimportante nga bahin sina nga mga paglakbay amo ang ila pagsimba kay Jehova kaupod sa linibo nga nagahigugma man sa iya. Ano ang epekto sini sa mga nagtambong? Ang sabat makita sa panuytoy ni Jehova sa iya katawhan tuhoy sa Piesta sang mga Kayangkayang: “Magkalipay ka sa imo piesta, ikaw kag ang imo anak nga lalaki kag ang imo anak nga babayi, ang imo alagad nga lalaki, kag ang imo alagad nga babayi, ang Levinhon, ang manlulugayaw, ang ilo, kag ang balo nga babayi nga yara sa sulud sang imo mga gawang. Sa pito ka adlaw hiwaton mo ang piesta sa GINOO nga imo Dios sa duug nga pilion sang GINOO; bangud nga pakamaayohon ka sang GINOO nga imo Dios sa tanan mong patubas kag sa tanan nga buluhaton sang imo mga kamut, agud nga magmasadyahon ka sing bug-os gid.”—Deut. 16:14, 15; basaha ang Mateo 5:3.

NGAA DAPAT PABALORAN ANG MODERNO NGA MGA PAGTILIPON?

15, 16. Ano ang imo mga ginsakripisyo para makatambong sa mga kombension? Ngaa daku gid ang benepisyo sini?

15 Maayo gid nga halimbawa ang mga pagtilipon sang una para sa katawhan sang Dios subong! Madamo nga butang sa sini nga mga pagtilipon ang nagbag-o pagligad sang mga siglo, pero wala nagbag-o ang importante nga bahin sini. Sang panahon sang Biblia, kinahanglan ang pagsakripisyo agod makatambong. Amo man sa karon. Pero daku gid ang benepisyo sini. Ini nga mga pagtilipon importante gihapon sa pagsimba sa Dios. Nagahatag ini sa aton sing impormasyon kag paghangop para makapabilin nga suod sa Dios. Ang mga kombension nagapahulag sa aton nga iaplikar ang aton natun-an, nagabulig nga malikawan ang mga problema, kag nagapalig-on nga magkonsentrar sa mga butang nga makapaumpaw sa baylo sang mga butang nga makapabug-at.—Sal. 122:1-4.

16 Makalilipay gid pirme ang pagtambong sa mga kombension. Ang isa ka report parte sa daku nga kombension sang 1946 nagsiling: “Makalilipay makita ang linibo ka saksi nga mahim-ong nga nagatipon, kag makalilipay pa gid mamati sa orkestra nga ginabuylugan sang madamo nga nagakanta sang mga ambahanon sang Ginharian para dayawon si Jehova.” Suno pa sa report: “Ang Volunteer Service Department naglista sang mga delegado nga magatrabaho sa tanan nga departamento, tungod sa ila kalipay nga mag-alagad sa pareho nila nga mga saksi.” Nabatyagan mo man bala ini nga kalipay sa distrito ukon internasyonal nga mga kombension?—Sal. 110:3; Isa. 42:10-12.

17. Paano ginbag-o ang pag-organisar sang mga kombension?

17 Ang pila ka butang nga ginbag-o sa mga  kombension amo ang pag-organisar sini. Halimbawa, nadumduman sang pila nga ang mga kombension sang una nagalawig sing walo ka adlaw! May mga sesyon sa aga, hapon, kag gab-i. Ang pag-alagad sa latagon nangin regular nga bahin sang programa. Ang pila ka bahin nagasugod sa alas nuebe sang aga, kag sa masami, may mga sesyon pa tubtob sa alas nuebe sang gab-i. Ang mga boluntaryo nagapangabudlay sing malawig sa paghanda sing pamahaw, panyaga, kag panyapon sa mga tumalambong. Pero subong, pila na lang ka adlaw ang mga kombension kag ang mga pamilya nagabalon na lang sing pagkaon para mas makakonsentrar sila sa espirituwal nga mga programa.

18, 19. Ano nga mga bahin sang kombension ang ginakalangkagan mo gid, kag ngaa?

18 May pila ka butang sa mga programa nga ginakalangkagan gid naton kag madugay na ini nga bahin sang aton mga kombension. Ang espirituwal nga “pagkaon sa nagakaigo nga tion,” nga nagabulig para mahangpan sing maayo ang mga tagna kag panudlo sang Biblia, ginaaman sa aton indi lamang paagi sa mga diskurso kundi paagi man sa bag-o nga mga publikasyon nga ginapagua sa mga kombension. (Mat. 24:45) Ini nga mga publikasyon masami nga ginagamit para buligan ang mga interesado nga mahangpan ang mga kamatuoran sa Kasulatan. Ang makatalandog nga mga drama base sa Biblia makapalig-on sa mga pamatan-on kag mga may edad na nga usisaon ang ila kaugalingon kag magbantay batok sa di-diosnon nga panghunahuna sang kalibutan. Ang pamulongpulong sa bawtismo nagahatag sing kahigayunan nga binagbinagon liwat ang aton mga prioridad sa kabuhi kag magkalipay sa pagtan-aw sa iban nga nagasimbulo sang ila dedikasyon kay Jehova.

19 Huo, ang mga kombension madugay na nga bahin sang putli nga pagsimba kag nagabulig ini sa malipayon nga katawhan ni Jehova para maalagad sia sing nagakaigo sa sining mabudlay nga mga tion. Ini nga mga pagtilipon nagapalig-on sa espirituwal, nagahatag sing kahigayunan nga makakilala sing bag-o nga mga abyan, nagabulig para maapresyar ang bug-os kalibutan nga paghiliutod, kag panguna nga pamaagi ni Jehova sa pagpakamaayo kag pag-atipan sa iya katawhan. Pat-od nga ang kada isa sa aton luyag nga mag-iskedyul sing maayo sang iya mga hilikuton para makatambong kag makabenepisyo sa tanan nga sesyon sang mga kombension.—Hulu. 10:22.