Mangin Maalamon Mangita sing “Maayo nga mga Laygay”

Ang kabuhi mapaanggid sa pagpanakayon. Apang limitado lamang ang mabulig sang kaalam sang tawo agod mangin madinalag-on sa pagkabuhi. Madamo ang nalunod bangod sang mga unos sang kabuhi. (Sal. 107:23, 27) Ngaa nagakaigo gid ini nga pagpaanggid?

Sang una, mabudlay gid ang pagpanakayon kag nagakinahanglan ini sang eksperiensia. Matun-an ini sa eksperto nga mga marinero, nga mahimo isa ka timonel. (Binu. 27:9-11) Ginapakita sang dumaan nga mga painting nga importante gid ang papel sang timonel kay mas daku sia sangsa iban nga marinero. Para makalayag sa kadagatan, ginatun-an sang mga marinero ang mga bituon, hangin, kag iban pa nga makabulig sa ila sa paglayag. Ang pila ka marinero ginalaragway sang Biblia subong “hanas,” nga mahimo nagakahulugan sing maalam.—Ezeq. 27:8, APD.

Sa karon, ang pagpanakayon sa mga problema sa kabuhi daw kaangay man sa paglayag sa maunos nga kadagatan sang dumaan nga panahon. Ano ang makabulig sa aton?

PAANO NATON MATIGAYON ANG “MAAYO NGA MGA LAYGAY”?

Bilang pamatuod nga ang kabuhi mapaanggid sa pagpanakayon, ang Biblia nagsiling: “Ang maalam nga tawo makabati kag magdugang sa tinon-an, kag . . . ang tawo nga may paghangup sa maayo nga mga laygay.” (Hulu. 1:5, 6) Ang Hebreo nga tinaga nga ginbadbad “maayo nga mga laygay” mahimo magpatuhoy sa ginahimo sang kapitan sang barko sang una. Ginapahangop sini ang ikasarang sa paggiya sa husto nga paagi.

Bisan pa nagakinahanglan ini sing panikasog, matigayon naton ang “maayo nga mga laygay” kag matun-an nga “maglayag” sing madinalag-on sa dagat sang pagkabuhi. Ginapakita sang Hulubaton nga kinahanglan naton ang “kaalam” kag “paghangup.” (Hulu. 1:2-6; 2:1-9) Kag indi naton dapat pagkalimtan nga magpagiya sa Dios, kay bisan ang mga malauton may mga laygay nga indi maalamon.—Hulu. 12:5.

Gani importante gid nga tun-an naton pirme ang Pulong sang Dios. Paagi sini, matigayon naton ang hamili nga impormasyon parte kay Jehova kag sa isa nga nagapabanaag gid sa Iya, si Jesucristo. (Juan 14:9) Matigayon man naton ang maayo nga mga laygay sa aton mga miting. Luwas sini, makatuon kita sa eksperiensia sang iban, lakip na sa aton mga ginikanan.—Hulu. 23:22.

PAABUTA ANG MGA PROBLEMA KAG MAGPLANO

Mas kinahanglan naton ang “maayo nga mga laygay” kon nagaatubang kita sa daw balod nga mga  problema. Kon nagaduhaduha kita sang aton himuon sa mabudlay nga mga sitwasyon, mahimo indi kita makapanghikot sing maayo kag may makahalalit ini nga resulta.—Sant. 1:5, 6.

Ang tinaga nga ginbadbad “maayo nga mga laygay” gingamit man sa pagpakig-away. Mabasa naton: “Kinahanglan ang ila [maayo nga] mga laygay sa pagpakig-away. Kag mas dako ang tsansa nga magdaog kon madamo ang mga manuglaygay.”—Hulu. 20:18; 24:6, APD.

Kaangay sang isa nga nagahimo sing estratehiya sa pagpakig-away, mas maayo kon paabuton naton ang mga katalagman sa aton espirituwalidad. (Hulu. 22:3) Halimbawa, mahimo magadesisyon ka kon bala batunon mo ang isa ka trabaho ukon promosyon. Mahimo hunahunaon mo ang sueldo, kalayuon sang trabaho, kag iban pa. Pero may iban pa nga dapat mo dumdumon: Ini bala nga trabaho supak sa mga prinsipio sang Biblia? Ang iskedyul bala sang trabaho makaapektar sa akon mga hilikuton subong Cristiano?—Luc. 14:28-30.

Si Loretta, isa sa mga Saksi ni Jehova, may maayo nga trabaho sa isa ka kompanya. Sang ginsaylo ini sa lain nga lugar, gintanyagan sia sing mataas nga posisyon: “Talagsa lang ini nga oportunidad,” siling sang mga direktor. “Nakita namon nga may Kingdom Hall man didto.” Pero luyag ni Loretta nga pasimplehon ang iya kabuhi kag alagaron sing bug-os ang Manunuga. Narealisar niya nga ining bag-o nga posisyon magabuhin sang iya tion sa Cristiano nga mga hilikuton. Gani nagresayn sia, bisan pa nagsiling ang direktor nga sia lamang ang empleyado nga indi nila luyag pahalinon. Subong, mga 20 ka tuig na nga regular payunir si Loretta. Kumbinsido sia nga ining maayo nga mga resulta natigayon niya bangod nagplano sia kag nagsunod sa “maayo nga mga laygay” sang Pulong sang Dios. Napabakod niya ang iya kaangtanan kay Jehova kag nabuligan ang iban nga batunon ang kamatuoran sa Biblia.

Ang “maayo nga mga laygay” kinahanglan gid sa pamilya. Ang pagpadaku sang kabataan malawig nga proyekto, kag ang mga desisyon parte sa espirituwal ukon materyal nga mga butang makaapektar sa palaabuton sang tanan nga miembro sang pamilya. (Hulu. 22:6) Halimbawa, mahimo pamangkuton sang Cristiano nga mga ginikanan ang ila kaugalingon: ‘Ang amon bala ginahambal kag ginahimo makatudlo sa amon kabataan sing espirituwal nga mga kinaiya nga makabulig sa ila kon magdaku na sila? Ang amon bala pagkabuhi nagatudlo sa ila kon paano mangin kontento sa simple nga pagkabuhi kag unahon ang pagministeryo?’—1 Tim. 6:6-10, 18, 19.

Ang matuod nga kadalag-an wala nasandig sa mga tulumuron nga masami ginapasanyog sang kalibutan. Nahangpan ini ni Hari Solomon. Nagsulat sia: “Manginmaayo sa mga nagakahadluk sa Dios, bangud nga nagakahadluk sila sa atubangan niya.” (Man. 8:12) Ginapakita sini nga maalamon gid ang pagpangita sing “maayo nga mga laygay” nga naghalin sa Pulong sang Dios.—2 Tim. 3:16, 17.

[Retrato sa pahina 30]

Para ipadaku ang papel sang mga timonel, ginlaragway sila nga mas daku sangsa iban nga marinero

[Credit Line]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.