SANG 1886, isa gatos ka kopya sang Millennial Dawn, Volume I, ang gindala sa Chicago, Illinois halin sa Bible House sa Allegheny, Pennsylvania, U.S.A. Luyag ni Charles Taze Russell nga ipanagtag sa mga balaligyaan sing libro ining bag-o nga libro. Nagsugot ang isa sa pinakadaku nga balaligyaan sing libro parte sa relihion sa Estados Unidos nga magkuha sing Millennial Dawn. Pero pagligad sang duha ka semana, ginbalik ang tanan nga libro sa Bible House.

Suno sa report, ang kilala nga evangelist naakig sang nakita niya ang Millennial Dawn nga nadispley sa tupad sang iya mga libro. Kon makita pa ini didto, kuhaon niya kag sang iya mga abyan nga evangelist ang ila mga libro sa tanan nga balaligyaan sini nga kompanya. Gani, gin-uli nila ang mga libro nga Dawn. Isa pa, napahibalo na ang Dawn sa mga pamantalaan. Pero ginsiguro sang mga kaaway nga makanselar ang kontrata sa pagpasayod. Gani, paano nakalab-ot sa mga nagapangita sing kamatuoran ining bag-o nga publikasyon?

Ginpalab-ot ini sang mga colporteur. * Sang 1881, ang Zion’s Watch Tower nagpanawagan sing 1,000 ka manugbantala para bug-os tion nga managtag sang mga publikasyon. Bisan pila lang ka gatos ang mga colporteur, napalab-ot nila sing lapnag ang binhi sang kamatuoran paagi sa mga publikasyon. Sang 1897, halos isa ka milyon nga Dawn ang napanagtag, kag kalabanan sini ginpanagtag sang mga colporteur. Kalabanan sa ila nakabaton sing gamay nga reimbursement sa suskripsion sang Watch Tower ukon libro nga ila napahamtang.

Sin-o ining maisog nga mga colporteur? Ang pila sa ila nag-aplay sang tin-edyer pa, ang iban naman medyo may edad na. Madamo sa ila ang wala sing bana, asawa, ukon kabataan. Madamo man nga pamilya ang nakigbahin. Ang regular nga mga colporteur nagapanghikot sa bilog nga adlaw, kag ang auxiliary nga mga colporteur nagahinguyang sing isa ukon duha ka oras kada adlaw. Indi tanan makasarang mag-aplay bilang colporteur bangod sang ila panglawas ukon kahimtangan. Pero sa kombension sang 1906, ginsilingan ang mga makasarang sini nga indi man kinahanglan nga “maalam sila, abilidaran, ukon may dila sang isa ka anghel.”

Sa halos kada kontinente, daku ang nahimo sining ordinaryo nga mga tawo. Nagsiling ang isa ka utod nga sa sulod sang pito ka tuig, nakapahamtang sia sing 15,000 ka libro. Pero nagsiling sia, “Wala ako  nagsulod subong colporteur para magbaligya sing mga libro, kundi mangin saksi para kay Jehova kag sa iya kamatuoran.” Bisan diin magkadto ang mga colporteur, ang binhi sang kamatuoran nagpanggamot, kag nagdamo ang grupo sang mga Estudyante sang Biblia.

Naakig ang mga klerigo sa mga colporteur, kag gintawag sila nga mga manugbaligya sing libro. Ang 1892 nga Watch Tower nagsiling: “Pila lamang ang nakakilala sa [ila] bilang matuod nga mga representante sang Ginuo, ukon nagpadungog sa ila pareho sa pagtan-aw sang Ginuo sa ila pagpaubos kag pagsakripisyo.” Ang kabuhi sang mga colporteur indi gid “matawhay,” siling sang isa sa ila. Kinahanglan nila ang mapag-on nga mga sapatos kag bisikleta sa ila paglakbay. Kon pigado gid, ginapabayluhan nila sing pagkaon ang mga libro. Pagligad sang isa ka adlaw sa latagon, kapoy pero malipayon sila nga nagabalik sa ila mga tolda kag ginaarkilahan nga mga kuarto. Sang ulihi, naghimo sila sing Colporteur Wagon, isa ka balay nga may ruweda nga ginaguyod sang kabayo, gani makakinot na sila. *

Sugod sang 1893 nga Kombension sa Chicago, nalakip sa programa ang pinasahi nga mga sesyon para sa mga colporteur. Mabatian diri ang pagbayluhanay sing mga eksperiensia, pamaagi sa pagbantala, kag praktikal nga mga panugda. Ginpalig-on ni Brother Russell ang mapisan nga mga manugbantala nga mamahaw sing madamo, mag-inom sing isa ka baso nga gatas pagkauluudto, kag sing ice-cream soda sa kaudtuhon.

Ang mga colporteur nga nagapangita sing kaupod sa pagbantala nagabutang sang yellow nga laso. Ang bag-uhan nga mga colporteur ginapares sa mga eksperiensiado. Kinahanglan gid ini nga paghanas, kay ang isa ka bag-uhan nga colporteur nagsiling sang ginatanyag niya ang libro, “Indi ka interesado sini no?” Maayo na lang kay nagbaton ang tagbalay kag nangin Saksi sang ulihi.

Ang isa ka utod nga lalaki nagpalibog, ‘Mapabilin bala ako sa akon matawhay nga pangabuhi kag magdonar sing $1,000 (U.S.) kada tuig para sa buluhaton sang Ginuo, ukon maaplay bilang colporteur?’ Ginsilingan sia nga pareho ina nga ginaapresyar sang Ginuo, pero ang direkta nga paghatag sing tion sa Ginuo magaresulta sa madamo nga pagpakamaayo. Nakita ni Mary Hinds nga ang pag-alagad subong colporteur amo ang “pinakamaayo nga paagi para mabuligan ang pinakamadamo nga tawo.” Kag ang mahuluy-on nga si Alberta Crosby nagsiling, “Nanamian ako mag-alagad kada adlaw bilang Colporteur.”

Sa karon, madamo sa pamilya kag mga gintun-an sining mapisan nga mga colporteur ang nagsulod man sa sini nga pribilehiyo. Kon wala pa sing colporteur ukon payunir sa inyo pamilya, mas maayo nga sugdan ninyo ini kag ipapanubli sa masunod nga henerasyon. Paagi sini, matun-an mo man nga palanggaon ang bug-os tion nga pagbantala kada adlaw.

[Mga Nota]

^ par. 5 Pagligad sang 1931, ang termino nga “colporteur” gin-islan sing “payunir.”

^ par. 8 Ang mga detalye parte sa sini nga balay magua sa masunod nga isyu.

[Blurb sa pahina 32]

Indi man kinahanglan nga mangin “maalam sila, abilidaran, ukon may dila sang isa ka anghel”

[Retrato sa pahina 31]

Ang colporteur nga si A. W. Osei sa Ghana, sang mga 1930

[Mga Retrato sa pahina 32]

Ibabaw: Ang colporteur nga sanday Edith Keen kag Gertrude Morris sa England, sang mga 1918; ubos: Sanday Stanley Cossaboom kag Henry Nonkes sa Estados Unidos, nga may mga karton sang mga libro nga ila napahamtang