Mangin Positibo Bisan Magluya ang Pag-asawahay

“Sa mga minyo nagahatag ako sang mga instruksion, apang indi ako kundi ang Ginuo.”—1 COR. 7:10.

MAPAATHAG MO BALA?

Sa ano nga kahulugan gintingob sang Dios ang mag-asawa?

Paano makabulig ang mga gulang sa mga Cristiano nga may problema sa pag-asawahay?

Paano naton dapat tamdon ang pag-asawahay?

1. Paano dapat tamdon sang mga Cristiano ang pag-asawahay, kag ngaa?

KON magpakasal ang mga Cristiano, nagasumpa sila sa atubangan sang Dios. Isa ini ka responsibilidad nga indi dapat pagpakadiutayon. (Man. 5:4-6) Bangod si Jehova ang nagtukod sang pag-asawahay, ‘ginatingob’ niya ang mga nagaminyo. (Mar. 10:9) Ini nga kaangtanan nagapabilin sa pagtamod sang Dios, bisan ano pa ang mga kasuguan sang isa ka pungsod parte sini. Gani dapat tamdon sang mga sumilimba ni Jehova ang pag-asawahay subong permanente nga kaangtanan, mga alagad man sila ni Jehova sang nagpakasal sila ukon indi.

2. Ano nga mga pamangkot ang binagbinagon sa sini nga artikulo?

2 Ang madinalag-on nga pag-asawahay makalilipay. Pero ano ang puede himuon kon magluya ang pag-asawahay? Mapabakod pa bala ini? Ano ang makabulig sa mag-asawa?

KALIPAY BALA UKON KASAKIT?

3, 4. Ano ang mahimo matabo kon ang isa magsala sa pagpili sing tiayon?

3 Kon magmadinalag-on ang Cristiano nga pag-asawahay, makalilipay ini kag nagapadungog kay Jehova. Apang kon mapaslawan, nagahatag ini sing kasakit. Ang Cristiano nga nagaplano magminyo mangin madinalag-on sa pag-asawahay kon sa umpisa pa lang, ginasunod na niya ang panuytoy sang Dios. Sa pihak nga bahin, ang isa nga nagsala sa pagpili sing tiayon mahimo mag-antos kag masubuan. Halimbawa, ang pila ka pamatan-on naganobyahanay na bisan indi pa sila handa sa mga responsibilidad sa pag-asawahay. May pila naman nga nakakita sing palangasaw-on ukon palamanhon sa Internet. Nagapakasal sila dayon apang sa ulihi indi sila malipayon. Ang iban naman nagapakasal dayon  kay nakahimo na sila sing sala. Pero nadulaan na sila sing respeto sa isa kag isa.

4 Ginsupak sang pila ka Cristiano ang sugo nga magminyo “lamang sa Ginuo” kag nag-antos sila bangod lain ang relihion sang ila tiayon. (1 Cor. 7:39) Kon amo sini ang natabo sa imo, mangamuyo para buligan ka kag patawaron sang Dios. Indi niya pagkuhaon ang epekto sang sala, pero buligan niya ang mga mahinulsulon nga maatubang ang mga kabudlayan. (Sal. 130:1-4) Tinguhai nga pahamut-an sia subong kag sa walay katubtuban, kag ‘ang kalipay sang GINOO amo ang imo kusug.’—Neh. 8:10.

KON MAY PROBLEMA SA PAG-ASAWAHAY

5. Kon indi malipayon ang pag-asawahay, ano ang indi dapat pagpamensaron?

5 Ang mga nagaproblema sa ila pag-asawahay mahimo mamensar: ‘Dapat ko gid bala salbaron ang amon pag-asawahay? Kon mabalik ko lang tani ang tion kag nagminyo na lang sang iban!’ Mahimo handumon nila nga magbulag sa ila tiayon. ‘Bisan pa wala sing Makasulatanhon nga rason nga makigbulag, ngaa indi ko ini paghimuon para mangin malipayon liwat?’ Sa baylo nga mamensar sing subong sini, dapat gid tinguhaan sang mga Cristiano nga sundon ang panuytoy sang Dios.

6. Ipaathag ang ginsiling ni Jesus sa Mateo 19:9.

6 Suno sa Biblia, kon magbulag ang isa ka Cristiano, mahimo sia magminyo liwat ukon indi. Si Jesus nagsiling: “Ang bisan sin-o nga magdiborsio sa iya asawa, luwas lamang kon nakighilawas ang iya asawa, kag magpangasawa sang iban nagapanghilahi.” (Mat. 19:9) Ang ‘pagpakighilawas’ nagalakip sang pagpanghilahi kag iban pa nga sala nga buhat parte sa sekso. Kon ang isa nagaplano nga makigbulag bangod ang iya tiayon nakahimo sing seksuwal nga imoralidad, dapat niya ini ipangamuyo kag binagbinagon sing maayo.

7. Kon napaslawan ang pag-asawahay sang isa ka Cristiano, ano ang mahimo hunahunaon sang iban?

7 Kon napaslawan ang pag-asawahay, nagapakita lang nga maluya sa espirituwal ang mag-asawa. Si apostol Pablo namangkot: “Kon ang bisan sin-o nga lalaki indi makahibalo magdumala sang iya kaugalingon nga panimalay, paano niya maatipan ang kongregasyon sang Dios?” (1 Tim. 3:5) Ang matuod, kon ang mag-asawa nagapangangkon nga mga Cristiano sila pero napaslawan ang ila pag-asawahay, mahimo hunahunaon sang iban nga wala nila ginahimo ang ila ginatudlo.—Roma 2:21-24.

8. Ano gid ang problema kon ang Cristiano nga mag-asawa nagaplano nga magbulagay?

8 Kon ang bawtismado nga mag-asawa  nagaplano nga magbulagay nga wala sing Makasulatanhon nga rason, may problema gid ang ila espirituwalidad. Mahimo nga isa sa ila ukon duha gid sila, ang wala nagasunod sa mga prinsipio sang Biblia. Kon ‘nagasalig sila kay Jehova sing bug-os tagiposoon,’ indi gid sila mamensar nga magbulagay.—Basaha ang Hulubaton 3:5, 6.

9. Paano ginpakamaayo ang pila ka Cristiano bangod gintinguhaan nila nga salbaron ang ila pag-asawahay?

9 Madamo nga pag-asawahay nga daw maguba na ang nangin madinalag-on sang ulihi. Masami nga ginapakamaayo ang mga Cristiano nga wala dayon nagapangampo sa mga problema sa pag-asawahay. Binagbinaga ang mahimo matabo sa isa ka panimalay nga may di-tumuluo nga tiayon. Si apostol Pedro nagsiling: “Kamo nga mga asawa, magpasakop kamo sa inyo bana, agod ang bisan sin-o nga wala nagatuman sa pulong, madaug sila nga wala sing pulong paagi sa paggawi sang ila asawa, bangod nasaksihan mismo nila ang inyo putli nga paggawi upod ang tudok nga pagtahod.” (1 Ped. 3:1, 2) Huo, bangod sa maayo nga paggawi sang isa ka Cristiano, mahimo magbaton sing kamatuoran ang iya di-tumuluo nga tiayon. Inang nasalbar nga pag-asawahay nagapadungog sa Dios kag nangin pagpakamaayo sa bana, asawa, kag kabataan.

10, 11. Ano nga mga problema ang mahimo mag-utwas sa pag-asawahay, apang ano ang masaligan sang isa ka Cristiano?

10 Handum gid sang kalabanan nga di-minyo nga Cristiano nga pahamut-an si Jehova, gani ang ila ginapili nga pangasaw-on ukon pamanahon amo ang masigkatumuluo. Apang, mahimo magbag-o ang ila kahimtangan. Halimbawa, mahimo magmasakit sa emosyon ang isa ka tiayon. Ukon ayhan sa tapos sang kasal, mahimo mangin di-aktibo ang bana ukon asawa. Halimbawa, si Linda * nga isa ka makugi nga Cristiano kag maatipanon nga iloy, naglalain gid sang ang iya bana nagpakasala, wala naghinulsol, kag na-disfellowship. Ano ang himuon sang isa ka Cristiano kon magluya ang ila pag-asawahay bangod sini?

11 ‘Salbaron ko gid bala ang amon pag-asawahay ano man ang matabo?’ mahimo ipamangkot mo. Wala sing iban nga magadesisyon sini para sa imo. Pero may maayo nga mga rason kon ngaa dapat salbaron ang nagaluya nga pag-asawahay. Ang diosnon nga lalaki ukon babayi nga nagabatas sang kabudlayan sang pag-asawahay bangod sang konsiensia, kalahamut-an sa Dios. (Basaha ang 1 Pedro 2:19, 20.) Paagi sa iya Pulong kag espiritu, buligan ni Jehova ang isa ka Cristiano nga nagatinguha nga pabakuron ang nagaluya nga pag-asawahay.

HANDA SILA MAGBULIG

12. Ano ang pagtamod sa aton sang mga gulang kon nagapangabay kita sa ila sing bulig?

12 Kon may problema ang inyo pag-asawahay, mangabay sing espirituwal nga bulig sa hamtong nga mga Cristiano. Ang mga gulang amo ang manugbantay sang panong kag nalipay sila nga ipakita sa imo ang laygay sang Dios nga masapwan sa Biblia. (Binu. 20:28; Sant. 5:14, 15) Indi paghunahunaa  nga madula ang respeto sang mga gulang sa inyo kon mangabay kamo sing espirituwal nga bulig kag kon isugid ninyo sa ila ang inyo problema. Mas higugmaon kamo nila kag tahuron kon makita nila nga ginatinguhaan ninyo nga pahamut-an ang Dios.

13. Ano ang laygay sa 1 Corinto 7:10-16?

13 Kon ang mga gulang ginapangabay nga magbulig sa mga Cristiano nga may di-tumuluo nga tiayon, ginagamit nila ang mga laygay subong sang ginsulat ni Pablo: “Sa mga minyo nagahatag ako sang mga instruksion, apang indi ako kundi ang Ginuo, nga ang asawa indi dapat magbulag sa iya bana; apang kon magbulag gid man sia, magpabilin sia nga di-minyo ukon indi gani magpasag-uli sa iya bana; kag ang bana indi dapat magbiya sa iya asawa. . . . Bangod, asawa, paano mo mahibaluan nga maluwas mo ang imo bana? Ukon, bana, paano mo mahibaluan nga maluwas mo ang imo asawa?” (1 Cor. 7:10-16) Daku gid nga pagpakamaayo kon batunon sang di-tumuluo nga tiayon ang matuod nga pagsimba!

14, 15. Sa ano nga mga kahimtangan puede makabulag ang isa ka Cristiano nga tiayon, pero ngaa dapat niya ini ipangamuyo kag binagbinagon sing maayo?

14 Sa ano nga mga kahimtangan puede “magbulag” ang isa ka Cristianong asawa? Ang iban nagabulag bangod hungod nga wala nagasuporta sa ila ang ila tiayon, ginasakit sila, ukon ginabutang sa katalagman ang ila espirituwalidad.

15 Kon mabulag ang isa ka Cristiano ukon indi, personal ini nga desisyon. Apang dapat niya ini ipangamuyo kag binagbinagon sing maayo. Halimbawa, ang di-tumuluo gid bala nga tiayon ang rason kon ngaa nabutang sa katalagman ang espirituwalidad sang isa ka Cristiano, ukon sia mismo ang nagapabaya sa iya personal nga pagtuon sa Biblia, pagtambong sa mga miting, kag pagministeryo?

16. Ngaa indi dapat magpadalidali nga makigbulag ang isa ka Cristiano?

16 Kon ginapabaloran gid naton ang aton kaangtanan sa Dios kag ang iya regalo nga pag-asawahay, wala kita nagapadalidali nga makigbulag. Subong mga alagad ni Jehova, luyag gid naton pakabalaanon ang iya ngalan. Gani, wala kita nagapangita sing paagi para makabulag kay gusto lang naton nga magminyo sang iban.—Jer. 17:9; Mal. 2:13-16.

17. Sa ano nga mga kahimtangan masiling nga gintawag sang Dios sa paghidait ang minyo nga mga Cristiano?

17 Dapat tinguhaan sang isa ka Cristiano nga may di-tumuluo nga tiayon nga mangin mabakod ang ila pag-asawahay. Apang indi sia dapat pagkonsiensiahon kon makigbulag gid ang iya di-tumuluo nga tiayon bisan pa gintinguhaan niya nga salbaron ang ila  pag-asawahay. “Kon ang di-tumuluo magbulag, pabulaga sia,” siling ni Pablo. “Ang utod nga lalaki ukon babayi indi obligado sa idalom sang amo sina nga mga kahimtangan, apang gintawag kamo sang Dios sa paghidait.”—1 Cor. 7:15. *

MAGSALIG KAY JEHOVA

18. Bisan pa indi masalbar ang pag-asawahay, ano ang maayo nga resulta kon tinguhaan nga himuon ini?

18 Kon nagaatubang sing problema sa pag-asawahay, mangabay kay Jehova sing kaisog kag magsalig pirme sa iya. (Basaha ang Salmo 27:14.) Binagbinaga si Linda nga ginsambit kaina. Bisan pa pila ka tuig niya nga gintinguhaan nga salbaron ang ila pag-asawahay, nagdiborsio gid sila sang ulihi. Nag-uyang lang bala sia sing tion? “Wala gid,” siling niya. “Ang akon pagtinguha naghatag sing maayo nga panaksi. May matinlo ako nga konsiensia. Labaw sa tanan, nakabulig ini sa akon bata nga babayi nga magpabilin sa kamatuoran. Nagdaku sia nga matutom nga alagad ni Jehova.”

19. Ano ang mahimo matabo kon tinguhaan nga salbaron ang pag-asawahay?

19 Nagapasalamat man ang Cristiano nga si Marilyn kay nagsalig sia sa Dios kag gintinguhaan gid niya nga salbaron ang ila pag-asawahay. “Bulagan ko na tani ang akon bana bangod wala niya kami ginasuportahan kag nabutang pa sa katalagman ang amon espirituwalidad,” siling niya. “Apang gulang sadto ang akon bana antes sia nag-entra sa indi maayo nga mga negosyo. Sang ulihi, wala na sia nagtambong sa mga miting, kag wala naman kami nagaistoryahanay. Sang ginsalakay sang mga terorista ang amon siudad, hinadlukan gid ako amo nga wala na ako nagapakigkomunikar sa iban. Dayon narealisar ko nga may kakulangan man ako. Gani nag-istoryahanay kami liwat, ginpadayon ang amon pangpamilya nga pagtuon, kag nangin regular sa mga miting. Ang mga gulang mainayuhon gid kag mabinuligon. Gani, nagbakod liwat ang amon pag-asawahay. Sang ulihi, nakatigayon liwat ang akon bana sing mga pribilehiyo sa kongregasyon. Masakit yadto nga hitabo, pero nakatuon kami sing leksion.”

20, 21. Ano ang aton determinado nga himuon may kaangtanan sa pag-asawahay?

20 Minyo man kita ukon indi, dapat kita pirme magpakabakod kag magsalig kay Jehova. Kon may mga problema sa aton pag-asawahay, dapat tinguhaan naton nga solbaron ini. Dumdumon naton nga ang ginhiusa sa pag-asawahay ‘indi na duha, kundi isa ka unod.’ (Mat. 19:6) Padayon man naton nga batason ang mga kabudlayan kon indi tumuluo ang aton tiayon. Paagi sini, magakalipay kita kon batunon niya ang matuod nga pagsimba!

21 Ano man ang aton kahimtangan, kabay nga maglakat kita sing mahalungon agod makahatag sing maayo nga panaksi sa mga tagagua. Kon may problema sa pag-asawahay, mangamuyo kita sing hanuot, usisaon naton ang aton mga motibo, binagbinagon naton sing maayo ang Kasulatan, kag mangabay sing bulig sa mga gulang. Labaw sa tanan, kabay nga mangin determinado kita nga pahamut-an si Jehova nga Dios sa tanan nga butang kag magpakita sing apresasyon sa iya dalayawon nga regalo nga pag-asawahay.

[Mga Nota]

^ par. 10 Gin-islan ang mga ngalan.

^ par. 17 Basaha ang “Magpabilin Kamo sa Gugma Sang Dios,” pahina 219-221. Ang Lalantawan, Nobiembre 1, 1988, pahina 26-27; The Watchtower, Septiembre 15, 1975, pahina 575.

[Mga Pamangkot sa Pagtinuon]

[Blurb sa pahina 10]

Masami nga ginapakamaayo ang mga Cristiano nga wala dayon nagapangampo sa mga problema sa pag-asawahay

[Blurb sa pahina 12]

Mangabay pirme kay Jehova sing kabakod kag magsalig sa iya

[Retrato sa pahina 9]

Ginapakamaayo ni Jehova ang Cristiano nga mga tiayon nga nagatinguha nga pabakuron ang nagluya nga pag-asawahay

[Retrato sa pahina 11]

Ang Cristianong kongregasyon makahatag sing paumpaw kag espirituwal nga bulig