Ginatipigan Kita ni Jehova Para sa Aton Kaluwasan

“[Kamo] . . . ginatipigan sang gahom sang Dios paagi sa pagtuo para sa kaluwasan nga handa ipahayag sa katapusan nga hut-ong sang tion.”—1 PED. 1:4, 5.

ANO ANG IMO SABAT?

Paano kita ginabuyok ni Jehova sa matuod nga pagsimba?

Paano kita makapatuytoy kay Jehova paagi sa iya mga laygay?

Paano kita ginapalig-on ni Jehova?

1, 2. (a) Ano ang pamatuod nga buligan kita sang Dios nga mahuptan naton ang aton katutom? (b) Daw ano kita ka kilala ni Jehova?

“SIA nga nakabatas tubtob sa katapusan amo ang maluwas.” (Mat. 24:13) Sa sining mga pinamulong gin-athag ni Jesus nga agod maluwas kita sa kalaglagan sang kalibutan ni Satanas, dapat mangin matutom kita tubtob sa katapusan. Apang indi buot silingon nga ginapaabot ni Jehova nga makabatas kita paagi sa pagsalig sa aton lamang kaalam ukon kusog. Ang Biblia nagapasalig sa aton: “Ang Dios matutom, kag indi sia magtugot nga sulayon kamo labaw sa inyo masarangan, kundi kon mag-abot ang pagsulay magaimo man sia sang lulutsan agod mabatas ninyo ini.” (1 Cor. 10:13) Ano ang ginapakita sini?

2 Agod mapat-od ni Jehova nga indi kita masulay sang indi naton masarangan, dapat niya hibaluon ang tanan sa aton, lakip ang aton mga problema, ang aton pagkahuman, kag kon tubtob diin ang aton masarangan. Amo gid bala sini ang pagkilala niya sa aton? Huo. Ginapakita sang Kasulatan nga kilala gid kita ni Jehova. Nahibaluan niya ang aton matag-adlaw nga rutina kag mga paggawi. Mahantop pa gani niya ang aton mga panghunahuna kag mga intension.—Basaha ang Salmo 139:1-6.

3, 4. (a) Paano ginapakita sang eksperiensia ni David nga interesado si Jehova sa tagsa ka indibiduwal? (b) Anong dalayawon nga hilikuton ang ginahimo ni Jehova subong?

3 Interesado gid bala ang Labing Gamhanan nga Dios sa ahaw nga mga tawo? Ginbinagbinag ini sang salmista, nga nagasiling kay Jehova: “Kon pamalandungon ko ang imo kalangitan, ang binuhatan sang imo mga tudlo, ang bulan kag ang kabitoonan nga imo ginpatuk; ano bala ang tawo nga ginasapak mo sia, kag ang anak sang tawo nga ginaduaw mo sia?” (Sal. 8:3, 4) Mahimo nga ginpamangkot ini ni David bangod sa iya mismo  eksperiensia. Sia ang kamanghuran nga anak ni Jesse. Pero para kay Jehova sia ang “kalahamut-an sa iya tagipusuon” kag ginpili niya sia nga mangin lider sang Israel. (1 Sam. 13:14; 2 Sam. 7:8, NW) Nahibaluan sang Manunuga sang uniberso ang nasulod nga mga panghunahuna kag balatyagon ni David bisan pa isa lamang sia ka manugbantay sang karnero. Handurawa kon ano ang ginbatyag ni David sang marealisar niya ini!

4 Ang interes nga ginapakita ni Jehova sa aton subong dalayawon gid. Ginatipon niya sa matuod nga pagsimba ang “bilidhon nga mga butang sang tanan nga pungsud,” kag ginabuligan niya ang iya mga alagad nga huptan ang ila katutom. (Hag. 2:7) Agod mahangpan pa gid kon paano kita ginabuligan ni Jehova nga mahuptan ang aton katutom, binagbinagon anay naton kon paano niya ginabuyok ang katawhan sa matuod nga pagsimba.

GINBUYOK SANG DIOS

5. Iilustrar kon paano ginabuyok ni Jehova ang mga tawo sa iya Anak.

5 Si Jesus nagsiling: “Wala sing tawo nga makakari sa akon kon indi sia pagbuyukon sang Amay nga nagpadala sa akon.” (Juan 6:44) Ginapakita sini nga agod mangin disipulo ni Cristo, kinahanglan naton ang bulig sang Dios. Paano ginabuyok ni Jehova ang mga tulad-karnero pakadto sa iya Anak? Paagi sa pagbantala sang maayong balita kag sa balaan nga espiritu. Halimbawa, sang didto sa Filipos si Pablo kag ang kaupod niya nga mga misyonero, nakilala nila si Lidia kag ginpaambitan sia sang maayong balita. Ang Biblia nagasiling: “Ginbuksan ni Jehova ang iya tagipusuon agod talupangdon ang mga ginahambal ni Pablo.” Huo, gingamit ni Jehova ang iya espiritu sa pagbulig kay Lidia nga mahangpan ang mensahe, amo nga nabawtismuhan sia kag ang iya panimalay.—Binu. 16:13-15.

6. Paano kita ginbuyok sang Dios sa matuod nga pagsimba?

6 Kay Lidia lang bala ini natabo? Indi. Kon isa ikaw ka dedikado nga Cristiano, ginbuyok ka man sang Dios sa matuod nga pagsimba. Subong nga may nakita nga maayo si Jehova sa tagipusuon ni Lidia, may nakita man sia nga maayo sa imo. Sang nagsugod ka nga magpamati sa maayong balita, ginbuligan ka niya nga mahangpan ini paagi sa balaan nga espiritu. (1 Cor. 2:11, 12) Sang ginpanikasugan mo nga iaplikar ang imo natun-an, ginpakamaayo niya ang imo mga panikasog nga himuon ang iya kabubut-on. Nalipay sia sang nagdedikar ka sa iya. Sa pagkamatuod, sugod nga naglakat ka sa dalanon pakadto sa kabuhi, gintuytuyan ka na ni Jehova.

7. Ngaa makasiling kita nga ginabuligan kita sang Dios nga makapabilin nga matutom?

7 Ginbuligan kita ni Jehova sang nagsugod kita sa pag-alagad sa iya, gani makasalig kita nga padayon niya kita nga buligan agod makapabilin nga matutom. Nahibaluan niya nga wala kita makahibalo sang kamatuoran sa aton lang kaugalingon kag indi man kita makapabilin sa sini kon kita lang. Si apostol Pedro nagsulat sa hinaplas nga mga Cristiano nga sila “ginatipigan sang gahom sang Dios paagi sa pagtuo para sa kaluwasan nga handa ipahayag sa katapusan  nga hut-ong sang tion.” (1 Ped. 1:4, 5) Naaplikar ini sa tanan nga Cristiano. Paano kita ginatipigan ni Jehova subong? Dapat naton mahibaluan ang sabat bangod kinahanglan naton ang bulig sang Dios agod makapabilin nga matutom sa iya.

MABULIGAN KITA SANG DIOS NGA MALIKAWAN ANG SAYOP

8. Ngaa dapat kita maghalong agod indi makahimo sing sayop nga tikang?

8 Indi kita himpit kag madamo ang aton problema, gani mahimo tuhay ang aton pagtamod sa pagtamod ni Jehova. Bangod sini, basi makahimo kita sang sayop nga tikang antes naton ini matalupangdan. (Basaha ang Galacia 6:1.) Ginailustrar ini sa natabo kay David.

9, 10. Paano ginpunggan ni Jehova si David sa paghimo sing sayop nga tikang, kag ano ang ginahimo niya para sa aton subong?

9 Samtang ginalagas sia ni Hari Saul, tumalagsahon gid ang pagpugong ni David agod indi makabalos sa maimon nga hari. (1 Sam. 24:2-7) Pero wala magdugay, nadaug sia sang indi himpit nga balatyagon. Kinahanglan nila sang iya mga tinawo ang suplay kag matinahuron nga nangayo sia sing bulig sa masigka-Israelinhon nga si Nabal. Sang gin-insulto sia ni Nabal, naakig gid si David kag naghanda nga magtimalos paagi sa pagpatay sang bug-os nga panimalay ni Nabal. Nalipat sia nga manabat sia sa Dios kon patyon niya ang inosente nga mga tawo. Maayo lang kay ginpunggan sang asawa ni Nabal nga si Abigail si David amo nga nalikawan niya ang sayop nga tikang. Sang narealisar ni David ang pagmaniobra ni Jehova, nagsiling sia kay Abigail: “Dalayawon ang GINOO, ang Dios sang Israel, nga nagpadala sa imo sining adlaw sa pagsugata sa akon! Bulahan ang imo pagkamahinantupon, kag bulahan ikaw, nga nagpugung sa akon sining adlaw gikan sa pagpakasala sa dugo kag gikan sa pagtimalus ko sa akon kaugalingon nga kamut!”—1 Sam. 25:9-13, 21, 22, 32, 33.

10 Ano ang matun-an naton sa sini? Gingamit ni Jehova si Abigail agod punggan si David sa sayop nga tikang. Ginahimo man niya ini sa aton subong. Siempre, indi man buot silingon nga mapadala ang Dios sang magapugong sa aton kon daw maghimo kita sang sala. Wala man kita makahibalo kon ano gid ang himuon sang Dios sa isa ka sitwasyon ukon kon ano ang iya tugutan nga matabo para matuman ang iya katuyuan. (Man. 11:5) Apang makasalig kita nga nahibaluan ni Jehova ang aton sitwasyon kag buligan gid niya kita nga makapabilin nga matutom sa iya. Nagpasalig sia: “Ton-an ko ikaw kag tudloan ikaw sang dalanon nga dapat mo laktan; laygayan ko ikaw nga ang akon mata yara sa ibabaw nimo.” (Sal. 32:8) Paano kita ginalaygayan ni Jehova? Paano kita makabenepisyo sa sini? Ngaa makasalig kita nga ginatuytuyan ni Jehova ang iya katawhan subong? Ginasabat ini sang tulun-an sang Bugna.

GINATIPIGAN PAAGI SA LAYGAY

11. Asta diin ang nahibaluan ni Jehova sa mga nagakatabo sa mga kongregasyon?

11 Sa palanan-awon nga narekord sa Bugna kapitulo 2 kag 3, ginausisa sang ginhimaya nga si Jesucristo ang pito ka kongregasyon sa Asia Minor. Nakita sang Cristo indi lamang ang kabilugan nga kahimtangan kundi ang espesipiko gid nga mga sitwasyon. May ginsambit pa gani sia nga mga indibiduwal kag naghatag sia sing komendasyon ukon laygay sa kada isa sa ila. Ano ang buot silingon sini? Ang pito ka kongregasyon nagalaragway sa hinaplas nga mga Cristiano pagkatapos sang 1914, kag bisan pa ang laygay sa pito ka kongregasyon para sa mga hinaplas ang prinsipio sini naaplikar man sa tanan nga kongregasyon subong. Gani makasiling kita nga si Jehova aktibo nga nagatuytoy sa iya katawhan  paagi sa iya Anak. Paano kita makabenepisyo sa sini?

12. Paano kita makapatuytoy kay Jehova?

12 Ang isa ka paagi nga makabenepisyo kita sa mahigugmaon nga panuytoy ni Jehova amo ang personal nga pagtuon. Paagi sa mga publikasyon sang matutom kag mainandamon nga ulipon, nag-aman si Jehova sang bugana nga espirituwal nga pagkaon. (Mat. 24:45) Apang agod makabenepisyo sa sini, dapat may tion kita sa pagtuon kag iaplikar ang aton natun-an. Ang personal nga pagtuon isa ka paagi nga si Jehova “makabantay sa [aton] gikan sa pagkasandad.” (Jud. 24) May natun-an ka bala sa aton literatura nga pamatyag mo ginsulat gid para sa imo? Batuna nga ini nga pagtadlong halin kay Jehova. Subong nga ang isa ka abyan magapikpik sang aton abaga agod ipatalupangod ang isa ka butang, magamit ni Jehova ang iya espiritu agod ipatalupangod ang paggawi ukon personalidad nga dapat naton pauswagon. Kon batunon naton ang pagtuytoy sang espiritu, nagapatuytoy kita kay Jehova. (Basaha ang Salmo 139:23, 24.) Parte sa sini, binagbinagon naton ang aton batasan sa pagtuon.

13. Ngaa dapat gid naton usisaon ang aton batasan sa pagtuon?

13 Mahimo ubuson sang sobra nga paglingawlingaw ang aton tion nga para kuntani sa personal nga pagtuon. Ang isa ka brother nagsiling: “Mahapos lang malipatan ang pagtuon. Kadamo gid sang kalingawan subong, kag barato pa. Yara ini sa TV, kompyuter, kag telepono. Yara ini bisan diin.” Kon indi kita magbantay, ang aton tion para sa personal nga pagtuon amat-amat nga mabuhinan asta nga maubos na gid ini. (Efe. 5:15-17) Pamangkuta ang imo kaugalingon: ‘Kada san-o ko ginatun-an sing maayo ang Biblia? Kon may bahin lang bala ako sa mga miting?’ Kon amo, basi puede nga gamiton naton ang isa ka gab-i para sa pangpamilya nga pagsimba ukon personal nga pagtuon agod pangitaon ang kaalam ni Jehova sa Biblia, subong sang pagpangita sang bahandi. Ini nga kaalam makaamlig kag makabulig sa aton nga magpabilin nga matutom asta sa katapusan.—Hulu. 2:1-5.

GINSAKDAG SANG PAGPALIG-ON

14. Paano ginapakita sang Biblia nga ginatalupangod ni Jehova ang aton mga balatyagon?

14 Madamo sing mabudlay nga mga inagihan si David. (1 Sam. 30:3-6) Ginpakita sang Biblia nga nahibaluan ni Jehova ang iya balatyagon. (Basaha ang Salmo 34:18; 56:8.) Nahibaluan man sang Dios ang aton mga balatyagon. Kon ‘boong ang aton tagiposoon kag espiritu,’ magapalapit sia sa aton. Ini mismo makapaumpaw na sa aton, pareho kay David, nga nag-amba: “Magakasadya ako kag magakalipay sa imo malig-on nga paghigugma, kay nakita mo ang akon kapipit-an, nakilala mo ang akon kalag sa kalalat-an.” (Sal. 31:7) Apang wala lamang matalupangdan ni Jehova ang aton mga kahuol. Ginasakdag man niya kita paagi sa pagpaumpaw kag pagpalig-on sa aton. Ang isa ka paagi amo ang Cristianong mga miting.

15. Ano ang matun-an naton sa inagihan ni Asaf?

15 Matun-an naton sa inagihan ni Asaf kon ngaa maayo gid para sa aton ang pagtambong  sa mga miting. Padayon niya nga ginpamensar ang mga inhustisya amo nga nahunahuna niya nga wala sing pulos ang pag-alagad sa Dios. Nagluya gid ang iya buot. Ginlaragway niya ang iya balatyagon: “Ang akon kalag nagkalisud, sang ginsuntok ako sa akon tagiposoon.” Diutayan na lang sia mag-untat sa pag-alagad kay Jehova. Ano ang nagtadlong sang panghunahuna ni Asaf? “Nagsulud ako sa santuario sang Dios,” siling niya. Paagi sa pagpakig-upod sa mga sumilimba ni Jehova, natadlong niya ang iya panghunahuna. Narealisar niya nga ang kadalag-an sang mga malauton temporaryo lang, kag sigurado nga ihatag ni Jehova ang hustisya. (Sal. 73:2, 13-22) Mahimo nga mahul-an man kita kag maluyahan sing buot bangod sang mga inhustisya sa kalibutan ni Satanas subong. Pero, ang pagpakig-upod sa mga kauturan makapaumpaw kag makabulig sa aton nga magmalipayon sa pag-alagad kay Jehova.

16. Paano kita makabenepisyo sa halimbawa ni Ana?

16 Pero, ano abi kon natamaran ka magtambong sa mga miting bangod sang pila ka kahimtangan? Mahimo nga kinahanglan mo biyaan ang imo pribilehiyo kag nahuya ikaw, ukon ayhan wala naghangpanay sang isa ka utod. Kon amo sini, makabulig ang halimbawa ni Ana. (Basaha ang 1 Samuel 1:4-8.) Pirme lang ginapalain ang iya buot ni Penina, ang isa pa ka asawa sang iya bana. Nagalain pa gid ang kahimtangan kada tuig kon maghalad sila kay Jehova sa Shilo. Nahul-an gid si Ana amo nga ‘nagahibi sia kag indi magkaon.’ Apang wala niya gintugutan ang kalain sang buot nga mag-upang sa iya nga magsimba kay Jehova. Natalupangdan ni Jehova ang iya katutom kag ginpakamaayo sia.—1 Sam. 1:11, 20.

17, 18. (a) Sa anong mga paagi kita mapalig-on sang mga miting sa kongregasyon? (b) Ano ang imo nabatyagan sa pag-ulikid ni Jehova sa imo?

17 May rason gid ang mga Cristiano subong nga ilugon ang halimbawa ni Ana. Dapat kita mangin regular sa pagtambong sa mga miting. Suno mismo sa aton eksperiensia, makapalig-on ang mga miting. (Heb. 10:24, 25) Ang kainit sang paghiliupod makapalig-on sa aton. Mahimo may mabatian kita sa pamulongpulong ukon mga komento nga makatandog sang aton tagipusuon. Ayhan pamatian kita sang isa ka utod ukon mapaambitan sang makapalig-on nga mga pulong kon makighambal kita sa ila antes kag pagkatapos sang miting. (Hulu. 15:23; 17:17) Samtang nagaamba kita kay Jehova, nagakadula ang aton kasubo. Kon ‘nagakabalaka’ gid kita, labi naton nga kinahanglan ang pagpalig-on nga mabatian naton sa mga miting. Diri man naton mabatian ang mga ‘paglipay’ kag pagbulig ni Jehova agod makapabilin kita nga matutom.—Sal. 94:18, 19, NW.

18 Napabakod kita sang pag-ulikid sa aton sang Dios pareho sang ginbatyag ni Asaf sang nag-amba sia kay Jehova: “Ginkaptan mo ang akon kamut nga too. Magatuytuy ka sa akon sang imo laygay.” (Sal. 73:23, 24) Daku gid ang aton pasalamat kay Jehova bangod ginatipigan niya kita para sa kaluwasan!

[Mga Pamangkot sa Pagtinuon]

[Retrato sa pahina 28]

Ginbuyok ka man ni Jehova

[Retrato sa pahina 30]

Ang pag-aplikar sa mga laygay sang Dios makaamlig sa aton

[Retrato sa pahina 31]

Ang mga pagpalig-on makabulig sa aton nga makabatas