Magdiretso sa kaundan

Magdiretso sa listahan sang kaundan

May Kaisog nga Ginbantala Nila ang Pulong sang Dios!

May Kaisog nga Ginbantala Nila ang Pulong sang Dios!

 May Kaisog nga Ginbantala Nila ang Pulong sang Dios!

Kaisog kon may nagapamatok. Ini nga kinaiya ginpakita sang matuod nga mga Cristiano, subong sang mabasa sa mga publikasyon pareho sang “Pagpanaksi sing Maid-id Tuhoy sa Ginharian sang Dios” kag Jehovah’s Witnesses—Proclaimers of God’s Kingdom. Kaangay sa aton mga masigkatumuluo sang unang siglo, nagapangayo kita kay Jehova sang iya espiritu kag sang iya bulig agod makabantala kita nga may kaisog.—Binu. 4:23-31.

Parte sa pagbantala sa tion sang una nga inaway sa bug-os nga kalibutan, ang isa ka utod nagsulat: “Ang mga alagad sang Dios mapagsik nga nagpanagtag sang ikapito nga tomo sang Studies in the Scriptures, nga ginatig-uluhan The Finished Mystery. Ini nga libro ang pinakamadamo nga napanagtag sadto. Sang 1918, ginbalhag ang Kingdom News Num. 1. Dayon, ang Kingdom News Num. 2 nga nagapaathag kon ngaa gindilian sang mga awtoridad ang The Finished Mystery. Ginsundan ini sang Kingdom News Num. 3. Ini nga mga publikasyon ginpanagtag sing maayo sang matutom nga mga hinaplas. Kinahanglan ang pagtuo kag kaisog sa pagpanagtag sang Kingdom News.”

Ang mga manugbantala subong masami nga ginahanas sa ministeryo, pero may mga tion sadto nga wala sing paghanas. Parte sa iya una nga pagbantala sang 1922, ang isa ka Polaco nga brother sa Estados Unidos nagsulat: “Wala pa gid ako makaagi tanyag sang mga literatura kag indi pa ako maayo mag-Ingles. Isahanon ako nga nagpanuktok sa klinika sang doktor. Ginbuksan ako sang nars. Indi ko gid malipatan ang natabo, kay grabe gid ang akon kulba. Samtang ginabuksan ko ang akon bag, nagkalahulog ang mga libro sa tiilan sang nars. Wala ko kabalo kon ano ang akon ginpanghambal, pero nagkuha sia sang libro. Paghalin ko, nadula na ang akon kulba kag nabatyagan ko gid ang pagpakamaayo ni Jehova. Sadto nga adlaw, madamo ako sing napanagtag nga bukleta sa sina nga lugar sang mga negosyante.”

“Sang mga 1933, madamo nga kauturan ang naggamit sang de-trompa nga mga salakyan sa pagbantala sang mensahe sang Ginharian,” siling sang isa ka sister. Isa ka bes, nag-upod sia sa mag-asawa nga Saksi sa pagbantala sa kabukiran sang California, U.S.A. “Gindala sang brother ang salakyan sa bukid, kag kami naman nagpabilin sa banwa,” siling niya. “Sang ginpatokar niya ang nakarekord nga mensahe, daw sa langit ini naghalin. Ginpinangita sang mga tawo ang brother, pero wala gid nila sia matultulan. Sang matapos ang ginapatokar, nagpamalaybalay kami kag nagpanaksi. Nakaupod ako sa duha pa ka de-trompa nga mga salakyan, kag masiling ko gid nga ang kalabanan indi luyag magpamati. Pero wala sila sing  mahimo kay mabatian gihapon nila sa ila mga balay ang ginapatokar nga mensahe. Nakita gid namon nga ginatuytuyan kami ni Jehova kon ano ang husto nga pamaagi nga amon gamiton sadto. Kinahanglan gid ang kaisog sa sini nga pamaagi, pero nagmadinalag-on ini kag nahimaya ang ngalan ni Jehova.”

Sang mga 1930 kag sang umpisa sang mga 1940, mga radyo pono kag ginrekord nga mga pamulongpulong sa Biblia ang gingamit sa pagbantala. Ang isa ka sister naghinumdom: “Isa ka lamharon nga sister ang nagpamalaybalay nga nagagamit sang radyo pono. Sang ginpatokar niya ini sa isa ka balay, naakig ang tagbalay nga lalaki kag ginsipa niya ang radyo pono gani nahulog ini sa balkon. Pero, wala sing plaka nga nabuka. Nakita ini sang tatlo ka tawo nga nagapanyaga sa nagaparking nga salakyan, gani gin-agda nila ang sister nga patokaron ini, kag nagkuha sila sang mga literatura. Nagpaumpaw gid ini sa sister.” Kinahanglan gid ang kaisog agod mabatas ini nga mga pagtilaw.

Nagsiling pa ang sister: “Nadumduman ko ang umpisa sang pagpanagtag sang magasin sa kalye sang 1940. Antes sini, nagaparada kami kon manaksi. Nagapanagtag kami sang mga tract kag may mga plakard kami nga nagasiling ‘Ang Relihion Isa ka Siod kag Isa ka Pagpangdaya’ kag ‘Alagda ang Dios kag si Cristo nga Hari.’ Kinahanglan ang kaisog para mahimo ini nga hilikuton, apang napakilala sini ang ngalan ni Jehova kag ang iya katawhan.”

“Mabudlay gid ang pagtanyag sang magasin sa magagmay nga mga banwa,” siling sang isa pa ka sister. “Grabe gid sadto ang pagpamatok sa mga Saksi . . . Dapat may kaisog gid kami nga magtindog sa kanto samtang nagakapot sang mga magasin kag nagapahibalo sang mga islogan nga dapat gamiton. Apang, talagsa lang nga Sabado nga wala kami. Kon kaisa mabuot man ang mga tawo. Pero kon kaisa, nagatipon ang akig nga grupo, amo nga nagasaliputpot kami agod indi kami masakit.”

Walay sapayan sang mga paghingabot sang Bug-os Kalibutan nga Inaway II, maisog nga nagabantala ang mga Saksi ni Jehova. Sa 43 ka adlaw nga kampanya sugod sang Disiembre 1, 1940, asta Enero 12, 1941, mga 50,000 ka manugbantala sa Estados Unidos ang nagpanagtag sing halos walo ka milyon ka bukleta.

Madamo nga tigulang sa organisasyon sang Dios ang makadumdom pa sang mga hangkat sadto nga nagakinahanglan gid sang ila kaisog. Madumduman sang pila nga sa sulod sang mga tinuig, makita ang ila kaisog sa ila hurubaton nga, Mabantala kita asta sa katapusan! Wala naton mahibaluan kon ano pa nga pamaagi sang pagsugid sang mensahe halin sa Dios ang himuon antes matapos ining malaut nga sistema. Apang sa bulig ni Jehova, magapadayon kita sa pagbantala sang Iya pulong nga may pagtuo kag kaisog.

[Blurb sa pahina 9]

Kinahanglan ang kaisog sa pagbantala sang Ginharian