Hupti ang Positibo nga Espiritu sang Kongregasyon

“Ang wala tupong nga kaayo ni Ginuong Jesucristo mangin sa espiritu nga inyo ginapakita.”—FIL. 4:23.

PAANO NATON MAPASANYOG ANG MAAYO NGA ESPIRITU SA KONGREGASYON . . .

samtang nagapakig-upod sa aton mga kauturan?

paagi sa aton kakugi sa pagbantala?

paagi sa pagsugid sang serioso nga mga sala?

1. Ngaa ginkomendahan ang kongregasyon sang Filipos kag Tiatira?

IMOL ang mga Cristiano sa Filipos sang unang siglo. Apang maalwan sila kag palangga gid nila ang ila mga kauturan. (Fil. 1:3-5, 9; 4:15, 16) Gani, sa paghinakop sang iya inspirado nga sulat sa ila, si apostol Pablo nagsiling: “Ang wala tupong nga kaayo ni Ginuong Jesucristo mangin sa espiritu nga inyo ginapakita.” (Fil. 4:23) Bangod amo man sini nga espiritu ang ginpakita sang mga Cristiano sa Tiatira, ginsilingan sila ni Jesucristo: “Nahibaluan ko ang imo mga buhat, kag ang imo gugma kag pagtuo kag ministeryo kag pagbatas, kag ang imo mga buhat sining ulihi labaw pa sa mga nauna.”—Bug. 2:19.

2. Ano ang aton papel sa pagpalambo sang ginapakita nga espiritu sang aton kongregasyon?

2 Sa karon, ang kada kongregasyon sang mga Saksi ni Jehova may nagapangibabaw man nga kinaiya. Ang pila ka kongregasyon kilala sa ila mainit kag mahigugmaon nga espiritu. Ang iban naman, sa ila makugi nga pagsakdag sang pagbantala sang Ginharian kag sa bug-os tion nga pagministeryo. Kon ang kada isa sa aton magpalambo sang positibo nga espiritu, makabulig kita sa paghiusa sang kongregasyon kag pag-uswag sa espirituwal. (1 Cor. 1:10) Sa pihak nga bahin, kon may negatibo kita nga espiritu maimpluwensiahan sini ang iban nga tuyhon sa espirituwal, mangin alabaab, kag pasapayanan pa gani ang serioso nga sala sa kongregasyon. (1 Cor. 5:1; Bug. 3:15, 16) Ano ang espiritu sang inyo kongregasyon? Paano ka makabulig sa pagpasanyog sang positibo nga espiritu sa kongregasyon?

PAGPASANYOG SANG POSITIBO NGA ESPIRITU

3, 4. Paano naton dayawon si Jehova sa kongregasyon?

3 Ang salmista nag-amba: “Magapasalamat ako sa  imo [Jehova] sa daku nga katilingban; magadayaw ako sa imo sa tunga sang madamu nga katawohan.” (Sal. 35:18) Wala nagapangalag-ag ang salmista sa pagdayaw kay Jehova kon upod niya ang iban nga alagad sang Dios. Ang aton mga miting sa kongregasyon, lakip ang Pagtinuon sa Ang Lalantawan, isa ka maayo nga kahigayunan nga ipakita ang aton kakugi kon nagakomento kita kag nagapabutyag sang aton pagtuo. Mahimo naton pamangkuton ang aton kaugalingon: ‘Ginatinguhaan ko bala nga makakomento sa mga miting? Nagahanda bala ako sing abanse agod makakomento sing makapalig-on? Subong ulo sang pamilya, ginabuligan ko bala ang akon kabataan nga handaan sing abanse ang ila mga komento kag ginatudluan sila nga magsabat sa ila kaugalingon nga tinaga?’

4 Ginpakita sang salmista nga si David ang labot sang aton malig-on nga tagipusuon sa aton pag-amba. “Malig-on ang akon tagiposoon, O Dios,” siling niya, “malig-on ang akon tagiposoon! Magaamba ako kag magaamba sing mga pagdayaw!” (Sal. 57:7) Ang mga ambahanon sa Cristianong mga miting nagahatag sa aton sing kahigayunan nga ‘makaamba sing mga pagdayaw’ kay Jehova upod ang malig-on nga tagipusuon. Kon indi kita pamilyar sa pila ka ambahanon, puede naton ini praktison sa aton Pangpamilya nga Pagsimba. Kabay nga mangin determinado kita nga ‘mag-amba sa GINOO tubtub nga nagakabuhi kita kag dayawon ang aton Dios samtang may kabuhi kita.’—Sal. 104:33.

5, 6. Paano kita mangin maabiabihon kag maalwan sa iban, kag ano ang ginapasanyog sini sa kongregasyon?

5 Ang pagkamaabiabihon sa mga kauturan isa pa ka paagi agod mapasanyog ang gugma sa kongregasyon. Sa katapusan nga kapitulo sang iya sulat sa mga Hebreo, ginlakip ni Pablo ini nga pagpalig-on: “Padayon ninyo nga ipakita ang inyo utudnon nga gugma. Indi ninyo pagkalimti ang pagkamaabiabihon.” (Heb. 13:1, 2) Ang pagpakaon sa nagalakbay nga mga manugtatap ukon sa bug-os tion nga mga manugbantala sa kongregasyon isa gid ka maayo nga paagi nga mapakita ang pagkamaabiabihon. Puede man naton agdahon ang mga balo, singgol nga mga ginikanan, ukon iban pa nga magkaon upod sa aton ukon sa aton pangpamilya nga pagsimba.

 6 Ginsugo ni Pablo si Timoteo nga laygayan ang iban nga “maghimo sang maayo, nga mangin manggaranon sa maayong mga buhat, nga mangin maalwan, handa sa pagpaambit, mahalungon nga nagatipon para sa ila kaugalingon sang maayo nga sadsaran para sa palaabuton subong ila bahandi, agod makapanguyapot sila sing malig-on sa matuod nga kabuhi.” (1 Tim. 6:17-19) Ginarekomendar ni Pablo nga dapat palambuon sang iya mga masigkatumuluo ang kaalwan. Bisan sa tion sang kapigaduhon, puede gihapon kita mangin maalwan. Ang isa ka paagi nga mahimo ini amo ang pagpasakay sa mga kauturan kon magbantala kag magtambong sa mga miting. Kamusta naman ang mga nagasakay? Mangin makapalig-on sila sa kongregasyon kon magpakita sila sing apresasyon, ayhan nagaamot para sa gasolina ukon sa pagmentinar sang salakyan. Dugang pa, indi bala makapalig-on man kon maghatag kita sing dugang nga tion sa aton kauturan kag ipabatyag sa ila ang aton kabalaka kag gugma? Kon nagabugana kita sa maayong mga buhat sa “mga may labot sa aton sa pagtuo” kag handa kita maghatag sing tion kag pagkabutang sa ila, wala lamang naton ginapadalom ang aton gugma sa ila kundi nagabulig man kita nga mangin mainit kag positibo ang espiritu sang kongregasyon.—Gal. 6:10.

7. Paano ang pagtago sang kompidensial nga mga butang makabulig nga mahuptan ang maayong espiritu sang kongregasyon?

7 Binagbinaga pa gid ang isa ka butang nga makapabakod sang aton gugma sa mga kauturan: pag-abyanay kag pagtago sang kompidensial nga mga butang. (Basaha ang Hulubaton 18:24.) Ang matuod nga abyan masaligan. Kon sugiran kita sang aton kauturan sang ila panghunahuna kag balatyagon kay nagasalig sila nga indi naton ini pag-ipanugidsugid, magalig-on pa gid ang gugma sa tunga naton. Kabay nga mangin isa kita ka masaligan nga abyan nga nagatago sang kompidensial nga mga butang kag nagabulig nga mangin kaangay sa isa ka mahigugmaon nga pamilya ang kongregasyon.—Hulu. 20:19.

MANGIN MAKUGI SA MINISTERYO

8. Ano ang ginlaygay ni Jesus sa mga taga-Laodicea, kag ngaa?

8 Si Jesus nagsiling sa mga taga-Laodicea: “Nahibaluan ko ang imo mga buhat, nga indi ka mabugnaw ukon mainit. Luyag ko kuntani nga mabugnaw ka ukon mainit. Gani, bangod maalabaab ka kag indi mainit ukon mabugnaw, ibuga ko ikaw gikan sa akon baba.” (Bug. 3:15, 16) Ang mga taga-Laodicea indi makugi sa pagbantala. Ini nga panimuot may epekto sa ila pagtamdanay sa sulod sang kongregasyon. Amo nga mahigugmaon nga ginlaygayan sila ni Jesus: “Ginasabdong ko kag ginadisiplina ang tanan nga ginahigugma ko. Gani mangin makugi ka kag maghinulsol.”—Bug. 3:19.

9. Paano naapektuhan sang aton panimuot sa pagbantala ang espiritu sang kongregasyon?

 9 Agod mapasanyog ang maayo kag positibo nga espiritu sa kongregasyon, dapat kita mangin makugi sa ministeryo. Gin-organisar ang kongregasyon para pangitaon kag palig-unon sa espirituwal ang mga tulad-karnero. Gani pareho kay Jesus, dapat mangin makugi kita sa paghimo sing disipulo. (Mat. 28:19, 20; Luc. 4:43) Kon mas makugi kita sa ministeryo, labi nga nagabakod ang aton paghiusa subong “mga masigkamanugpangabudlay sang Dios.” (1 Cor. 3:9) Kon makita naton nga ginapangapinan sang isa ka utod ang iya pagtuo kag nagapakita sang apresasyon sa espirituwal nga mga butang, mapahulag kita nga higugmaon sia kag tahuron. Subong man, ang pag-alagad sa ministeryo sing may “paghilisugut” makapatubas sing nahiusa nga espiritu sa kongregasyon.—Basaha ang Sofonias 3:9.

10. Ano ang epekto sa espiritu sang kongregasyon kon pauswagon naton ang aton kalidad sa pagbantala?

10 Ang aton mga panikasog nga pauswagon ang kalidad sang aton ministeryo may maayo nga epekto sa iban. Samtang labi naton nga ginakabalak-an ang mga tawo kag ginatinguhaan nga mangin mas epektibo sa paglab-ot sa ila tagipusuon, magadugang man ang aton kapagsik sa ministeryo. (Mat. 9:36, 37) Ang kapagsik makalalaton, gani posible nga maimpluwensiahan naton ang aton mga kaupod. Sang ginpabantala ni Jesus ang iya mga disipulo ginpadala niya sila sing tagduhaduha. (Luc. 10:1) Ginhimo niya ini indi lamang agod mapalig-on kag mahanas sila kundi agod magmakugi pa gid sila. Pat-od gid nga nanamian kita makig-upod sa makugi nga mga manugbantala. Ang ila mapagsik nga espiritu makapalig-on sa aton nga mangin mapagsik man sa aton pagbantala.—Roma 1:12.

INDI MAGKUMOD KAG MAGTAGO SANG SERIOSO NGA SALA

11. Ano nga sahi sang espiritu ang ginpakita sang pila ka Israelinhon sang adlaw ni Moises, kag ano ang epekto sini sa ila?

11 Pila pa lang ka semana nga nangin pungsod ang Israel, nangin di-kontento na sila kag nagkumod. Nagdul-ong ini sa pagrebelde kay Jehova kag sa iya mga tiglawas. (Ex. 16:1, 2) Pila lang ka Israelinhon nga nagbiya sa Egipto ang nakalab-ot sa Ginsaad nga Duta. Bisan si Moises gani wala makasulod bangod sang iya reaksion sa malaut nga espiritu sang kongregasyon sang Israel! (Deut. 32:48-52) Ano ang aton himuon agod malikawan ang malaut nga panimuot?

12. Ano ang makabulig sa aton nga indi mangin palakumod?

12 Likawan naton nga mangin palakumod. Ang pagkamapainubuson kag pagtahod sa awtoridad makabulig sa aton nga malikawan ini. Amo man ang pagpili sang maayo nga mga kaupdanan. Apang magatubo ini nga panimuot kon ang ginapili naton nga mga kalingawan indi maayo, kag kon pirme kita nagapakig-upod sa aton mga katrabaho ukon mga kaeskwela nga wala nagatuman kay Jehova. Gani maalamon nga limitahan naton ang pagpakig-upod sa mga tawo nga may negatibo kag independiente nga panimuot.—Hulu. 13:20.

13. Ano pa nga mga problema sa espirituwal ang mahimo mangin resulta sang pagkumod?

13 Ang pagkumod mahimo magresulta sa iban pa nga problema sa espirituwal. Halimbawa, makaguba ini sang paghidait kag paghiusa sang kongregasyon. Dugang pa, ang pagreklamo pirme batok sa aton kauturan indi lamang makasakit sa ila kundi magaresulta man sa pagpasipala kag pagtamay nga isa ka mabug-at nga sala. (Lev. 19:16; 1 Cor. 5:11) Ang iban nga palakumod sa kongregasyon sang unang siglo “nagatamay  sang pagkaginuo kag nagapakalain sa mga mahimayaon.” (Jud. 8, 16) Maathag nga ang pagkumod batok sa mga may katungdanan sa kongregasyon wala gid ginakahamut-an sang Dios.

14, 15. (a) Ano ang epekto sa kongregasyon kon pabulagbulagan naton ang serioso nga sala? (b) Ano ang aton himuon kon nahibaluan naton nga may nagahimo sing serioso nga sala?

14 Apang ano abi kon nahibaluan mo nga ang isa may ginatago nga sala, ayhan nagaabuso sa alkohol, nagatan-aw sang pornograpiya, ukon imoral? (Efe. 5:11, 12) Ang aton pagpabulagbulag sa serioso nga sala makaupang sa pagpanghikot sang balaan nga espiritu ni Jehova kag makaguba sang paghidait sa kongregasyon. (Gal. 5:19-23) Kon paano ginkuha sang mga Cristiano sa Corinto sadto ang kalautan, amo man sini ang dapat naton himuon sa malaut nga impluwensia sa kongregasyon agod mahuptan ang maayo kag positibo nga espiritu. Paano ka makabulig nga mahuptan ang paghidait sa kongregasyon?

15 Subong sang ginsambit na, importante ang pagtago sang kompidensial nga mga butang, ilabi na kon ginasugiran kita sang isa sang iya mga balatyagon kag pagtamod. Sayop gid nga ipanugidsugid ang kompidensial nga impormasyon! Apang kon parte sa serioso nga sala, dapat gid ini ipahibalo sa mga gulang sa kongregasyon kay suno sa Kasulatan, sila ang may responsibilidad sa sini. (Basaha ang Levitico 5:1.) Gani kon may utod nga nakasala, palig-unon naton sia nga isugid ini sa mga gulang kag mangayo sing bulig. (Sant. 5:13-15) Apang kon indi pa gid sia manugid sa rasonable nga tion nga ginhatag naton sa iya, kita na ang dapat magsugid sini.

16. Paano makabulig sa pagpreserbar sa espiritu sang kongregasyon ang pagsugid naton sa mga gulang sang serioso nga mga sala?

16 Ang Cristianong kongregasyon espirituwal nga dalangpan, kag dapat magbulig kita agod maamligan ini paagi sa pagsugid sang serioso nga mga sala. Kon nabuligan sang mga gulang nga maghinulsol ang nakasala kag batunon ang disiplina, madula ang katalagman sa kongregasyon. Apang ano abi kon indi mahinulsulon ang nakasala kag wala nagabaton sang mahigugmaon nga laygay sang mga gulang? Ang pagsikway sa iya sa kongregasyon magaresulta sa pagkuha ukon sa “kalaglagan” sang kalautan sa tunga naton, kag maamligan ang espiritu sang kongregasyon. (Basaha ang 1 Corinto 5:5.) Huo, para mapreserbar ang espiritu sang kongregasyon ang tagsatagsa dapat maggawi sing nagakaigo, magkooperar sa hubon sang mga gulang, kag mag-amlig sang masigkatumuluo.

SAKDAGA “ANG PAG-ISA SA ESPIRITU”

17, 18. Ano ang makabulig sa aton nga “tipigan ang pag-isa sa espiritu”?

17 Paagi sa “paghugod sa panudlo sang mga apostoles,” napasanyog sang una nga mga sumulunod ni Jesus ang espiritu sang paghiusa sa sulod sang kongregasyon. (Binu. 2:42) Ginpabaloran nila ang laygay kag panuytoy sang mga gulang base sa Kasulatan. Ang mga gulang subong nagakooperar sa matutom kag mainandamon nga ulipon, gani ang tanan sa kongregasyon ginapalig-on kag ginabuligan nga magpabilin nga nahiusa. (1 Cor. 1:10) Kon ginatuman naton ang pasad sa Biblia nga instruksion halin sa organisasyon ni Jehova kag ginasunod ang panuytoy sang mga gulang, ginapamatud-an naton nga kita “nagatinguha gid nga tipigan ang pag-isa sa espiritu sa nagapahiusa nga higot sang paghidait.”—Efe. 4:3.

18 Gani tinguhaan gid naton nga amligan ang maayo kag positibo nga espiritu sang kongregasyon. Kon himuon naton ini, makasalig kita nga ‘ang wala tupong nga kaayo ni Ginuong Jesucristo mangin sa espiritu nga aton ginapakita.’—Fil. 4:23.

[Mga Pamangkot sa Pagtinuon]

[Retrato sa pahina 19]

Ginapasanyog mo bala ang positibo nga espiritu sa kongregasyon paagi sa paghanda sing makapalig-on nga mga komento?

[Retrato sa pahina 20]

Mag-amot sa positibo nga espiritu sang kongregasyon paagi sa pagpraktis sang aton mga ambahanon