“Bisan ano ang inyo ginahimo, himua ninyo ini sing bug-os kalag subong nga kay Jehova.”—COL. 3:23.

1-3. (a) Ang kamatayon bala ni Jesus sa usok sang pag-antos nagakahulugan nga wala na sing halad nga ginapatuman si Jehova? Ipaathag. (b) Ano ang mahimo naton ipamangkot parte sa mga halad?

SANG unang siglo C.E., ginpahayag ni Jehova sa iya katawhan nga ang Mosaikong Kasuguan gintapos na sang halad-gawad ni Jesus. (Col. 2:13, 14) Ang mga halad nga ginatos ka tuig na nga ginahimo sang mga Judiyo indi na kinahanglan kag wala na sing balor. Natuman na sang Kasuguan ang papel sini subong ‘manunudlo nga nagadul-ong kay Cristo.’—Gal. 3:24.

2 Pero indi buot silingon sini nga ang paghalad indi na importante sa mga Cristiano. Ginsambit pa gani ni apostol Pedro nga kinahanglan “magdulot sang espirituwal nga mga halad nga kalahamut-an sa Dios paagi kay Jesucristo.” (1 Ped. 2:5) Ginpaathag man ni apostol Pablo nga ang tanan nga aspekto sang pagkabuhi sang isa ka Cristiano kaangay sang “halad” nga gindedikar sa Dios.—Roma 12:1.

3 Gani, ang isa ka Cristiano makahalad kay Jehova paagi sa paghatag sang pila ka butang ukon pagbiya sang pila ka butang para sa pag-alagad. Base sa aton mga natun-an parte sa mga halad nga ginapatuman sa mga Israelinhon, paano naton mapat-od nga ang aton halad kalahamut-an kay Jehova?

SA MATAG-ADLAW NGA PAGKABUHI

4. Ano ang dapat naton dumdumon sa aton matag-adlaw nga mga hilikuton?

4 Mahimo nga indi naton mahangpan sing maayo kon ano ang labot sang aton ginahimo kada adlaw sa aton paghalad kay Jehova. Ang mga ulubrahon sa balay, pag-eskwela, pagtrabaho, pagpamalaklon, kag iban pa, mahimo nga daw wala sing labot sa aton kaangtanan sa Dios. Pero, kon nadedikar mo na ang imo kabuhi kay Jehova ukon nagaplano pa lang nga magdedikar, dapat mo dumdumon nga ang tanan mo nga ginahimo makaapektar sa imo pagsimba. Mga Cristiano kita 24 oras kada adlaw, kag ginasunod naton ang mga prinsipio  sang Biblia sa tanan nga bahin sang aton kabuhi. Amo nga ginpalig-on kita ni Pablo: “Bisan ano ang inyo ginahimo, himua ninyo ini sing bug-os kalag subong nga kay Jehova, kag indi sa mga tawo.”—Basaha ang Colosas 3:18-24.

5, 6. Ano ang dapat naton binagbinagon kon parte sa aton pagpanapot kag paggawi?

5 Ang matag-adlaw nga hilikuton sang isa ka Cristiano indi bahin sang iya sagrado nga pag-alagad. Apang ang laygay ni apostol Pablo nga maghimo sing “bug-os kalag subong nga kay Jehova” nagapahunahuna sa aton kon paano kita dapat maggawi sa tanan nga tion. Ano ang aton matun-an sa sini? Nagagawi bala kita kag nagapanapot sing nagakaigo sa tanan nga tion? Ukon kon nagahimo sang aton matag-adlaw nga hilikuton, nahuya bala kita magpakilala nga mga Saksi kita bangod indi nagakaigo ang aton paggawi kag pagpanapot? Kabay nga indi gid ina matabo sa aton! Ang katawhan ni Jehova wala nagahimo sing bisan ano nga makadala sing kahuy-anan sa Iya ngalan.—Isa. 43:10; 2 Cor. 6:3, 4, 9.

6 Binagbinagon naton kon paano ang paghimo sing “bug-os kalag subong nga kay Jehova,” makaapektar sa nanuhaytuhay nga bahin sang aton kabuhi. Samtang ginahambalan naton ini, dumduma nga ang tanan nga dapat ihalad sang mga Israelinhon kay Jehova amo ang ila labing maayo.—Ex. 23:19.

KON PAANO NAAPEKTUHAN ANG IMO KABUHI

7. Ano ang nalakip sa Cristianong dedikasyon?

7 Sang gindedikar mo ang imo kaugalingon kay Jehova, indi bala nga wala ka nagpangalag-ag? Nangako ka nga unahon mo sia sa tanan nga bahin sang imo kabuhi. (Basaha ang Hebreo 10:7.) Maayo gid ang imo desisyon. Pat-od nga nakita mo nga ang pag-una sang kabubut-on ni Jehova kag ang pagkabuhi nahisuno sa sini, may maayo gid nga resulta. (Isa. 48:17, 18) Ang katawhan sang Dios balaan kag malipayon bangod ginailog nila ang mga kinaiya sang Isa nga nagatudlo sa ila.—Lev. 11:44; 1 Tim. 1:11.

8. Ngaa importante nga dumdumon naton nga ang halad sang mga Israelinhon ginkabig ni Jehova nga balaan?

8 Ang mga halad sang mga Israelinhon ginkabig ni Jehova nga balaan. (Lev. 6:25; 7:1) Ang Hebreo nga tinaga nga ginbadbad “pagkabalaan” may kahulugan man nga napain, eksklusibo, ukon para lang sa Dios. Agod mangin kalahamut-an kay Jehova ang aton mga halad, dapat nga napain ini kag wala madagtaan sang kalibutan. Indi naton paghigugmaon ang bisan ano nga ginadumtan ni Jehova. (Basaha ang 1 Juan 2:15-17.) Maathag nga dapat naton likawan ang bisan sin-o ukon ang bisan ano nga makadagta sa aton sa  atubangan sang Dios. (Isa. 2:4; Bug. 18:4) Nagakahulugan man ini nga indi naton pagtugutan ang aton mga mata nga padayon nga magtan-aw ukon magpantasya sa mahigko ukon imoral nga mga butang.—Col. 3:5, 6.

9. Ngaa importante kon paano naton ginatratar ang iban?

9 Ginpalig-on ni Pablo ang iya mga masigkatumuluo: “Indi pagkalimti ang paghimo sing maayo kag ang pagpaambit sing mga butang sa iban, kay nahamuot gid ang Dios sa sini nga mga halad.” (Heb. 13:16) Gani, kon pirme kita nagahimo sang maayo kag nagabulig sa iban, tamdon ini ni Jehova nga kalahamut-an nga halad sa iya. Ang aton gugma kag kabalaka sa iban magapakilala sa aton bilang matuod nga mga Cristiano.—Juan 13:34, 35; Col. 1:10.

MGA HALAD SA PAGSIMBA

10, 11. Paano ginatamod ni Jehova ang aton Cristianong ministeryo kag pagsimba, kag ano ang epekto sini sa aton?

10 Ang isa ka paagi nga makahimo kita sing maayong butang sa iban amo “ang dayag nga pagpahayag sang aton paglaum.” Ginakalitan mo bala ang tanan nga higayon sa pagbantala? Gintawag ni Pablo ining importante nga hilikuton sang mga Cristiano nga “halad sang pagdayaw, nga amo ang bunga sang mga bibig nga dayag nga nagapahayag sang ngalan [sang Dios].” (Heb. 10:23; 13:15; Os. 14:2) Makabulig kon hunahunaon naton kon daw ano kadamo nga tion ang aton gamiton sa pagbantala sang maayong balita kag paano naton mapauswag ang aton pagbantala. Madamo nga bahin sang Miting sa Serbisyo ang makabulig sa aton. Apang dapat naton dumdumon nga ang aton pagbantala sing pormal kag di-pormal “halad sang pagdayaw,” isa ka bahin sang aton pagsimba, gani ang aton halad dapat amo ang labing maayo. Bisan pa nga nanuhaytuhay ang aton kahimtangan, makita sa aton ginahinguyang nga tion sa pagbantala ang aton apresasyon sa espirituwal nga mga butang.

11 Regular naton nga ginasimba si Jehova sa balay man kita ukon sa kongregasyon. Ginapatuman ini sang Dios sa aton. Wala na kita nagasaulog sang Adlaw nga Inugpahuway ukon nagakadto sa mga kapiestahan sa Jerusalem. Pero, may matun-an kita sa mga kapiestahan sadto. Ginapaabot sang Dios nga likawan naton ang patay nga mga buhat kag hatagan sing tion ang pagtuon sang Biblia,  pagpangamuyo, kag pagtambong sa mga miting. Responsibilidad sang ulo sang pamilya nga magdumala sing pangpamilya nga pagsimba sa iya pamilya. (1 Tes. 5:17; Heb. 10:24, 25) Parte sa aton espirituwal nga mga hilikuton, pamangkuton naton ang aton kaugalingon, ‘Mapauswag ko bala ang kalidad sang akon pagsimba?’

12. (a) Sa ano mapaanggid ang paghalad sang incienso sa Israel sang una? (b) Paano mangin kaangay sang incienso ang aton mga pangamuyo?

12 Si Hari David nag-amba kay Jehova: “Ang akon pangamuyo magtub-ok subong sang incienso sa atubangan mo.” (Sal. 141:2) Maayo nga hunahunaon mo kon daw ano kasunson ka nagapangamuyo kag kon ano ang unod sang imo pangamuyo. Sa tulun-an sang Bugna ang “mga pangamuyo sang mga balaan” ginpaanggid sa incienso bangod ang pangamuyo nga kalahamut-an kay Jehova nagatub-ok kaangay sang mahumot nga kaamyon. (Bug. 5:8) Sa Israel sang una, estrikto gid nga ginasunod ang mga sangkap kag pamaagi sa paghimo sang incienso nga regular nga ginahalad sa altar. Mangin kalahamut-an lamang ini kay Jehova kon ginsunod sing maayo ang iya instruksion. (Ex. 30:34-37; Lev. 10:1, 2) Kon ang aton mga pangamuyo ginpamensaran sing maayo, makasalig man kita nga batunon ini ni Jehova.

PAGHATAG KAG PAGBATON

13, 14. (a) Ano ang ginhimo ni Epafrodito kag sang mga taga-Filipos para kay Pablo? (b) Paano naton mailog ang halimbawa ni Epafrodito kag sang mga taga-Filipos?

13 Ang aton ginaamot nga kuarta, diutay man ukon daku, para sakdagon ang bug-os kalibutan nga hilikuton mapaanggid sa halad. (Mar. 12:41-44) Sang unang siglo C.E., ginpadala sang kongregasyon sa Filipos si Epafrodito sa Roma para atipanon si Pablo. May dala sia nga kuarta nga regalo sang kongregasyon para kay Pablo. Indi ini ang una nga tion nga nabatyagan ni Pablo ang kaalwan sang mga taga-Filipos. Ginpadal-an nila sia sing kuarta agod wala na sia sing libog kag makapokus sa iya ministeryo. Ano ang reaksion ni Pablo sa ila regalo? Gintawag niya ini nga “isa ka mahumot nga kaamyon, isa ka nahamut-an nga halad, kag kalahamut-an sa Dios.” (Basaha ang Filipos 4:15-19.) Ang kaalwan sang mga taga-Filipos gin-apresyar gid ni Pablo kag labi na gid ni Jehova.

14 Ginaapresyar man ni Jehova ang aton mga amot para sa bug-os kalibutan nga hilikuton. Dugang pa, nagsaad sia nga kon unahon naton ang intereses sang Ginharian, amanan niya kita sang aton mga kinahanglanon sa espirituwal kag sa pisikal.—Mat. 6:33; Luc. 6:38.

IPAKITA ANG IMO APRESASYON

15. Ano ang pila ka butang nga ginapasalamatan mo kay Jehova?

15 Indi naton maisip ang tanan nga butang nga dapat naton pasalamatan kay Jehova. Indi bala nga kada adlaw, dapat naton sia pasalamatan sa kabuhi nga ginhatag niya sa aton? Ginaaman niya ang tanan nga kinahanglan naton para mabuhi—pagkaon, panapton, puluy-an kag ang hangin nga ginaginhawa naton. Dugang pa, ang pagtuo nga napasad sa sibu nga ihibalo nagahatag sa aton sing paglaum. Gani, nagakaigo lang nga simbahon naton si Jehova kag maghalad sing mga pagdayaw sa iya bangod sang iya mga ginhimo para sa aton kag bangod sia ang Manunuga.—Basaha ang Bugna 4:11.

16. Paano kita makapasalamat sa halad-gawad ni Cristo?

16 Subong sang nabinagbinag naton sa nagligad nga artikulo, ang halad-gawad ni Cristo isa gid ka hamili nga dulot sang  Dios sa katawhan. Pamatuod ini sang gugma sang Dios sa aton. (1 Juan 4:10) Paano naton ini mapasalamatan? Si Pablo nagsiling: “Ang gugma ni Cristo nagapahulag sa amon, bangod amo ini ang amon ginhinakop, nga ang isa ka tawo napatay para sa tanan; . . . kag napatay sia para sa tanan agod ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.” (2 Cor. 5:14, 15) Daw pareho lang nga nagsiling si Pablo nga kon ginapasalamatan naton ang wala tupong nga kaayo sang Dios, gamiton naton ang aton kabuhi sa pagpadungog sa Iya kag sa Iya Anak. Mapakita naton ang aton gugma kag apresasyon sa Dios kag kay Cristo paagi sa aton pagkamatinumanon kag pagbantala kag paghimo sing disipulo.—1 Tim. 2:3, 4; 1 Juan 5:3.

17, 18. Paano ginpauswag sang iban ang ila halad sang pagdayaw kay Jehova? Maghatag sing halimbawa.

17 Mapauswag mo pa bala ang imo mga halad sang pagdayaw sa Dios? Sa tapos mabinagbinag ang kaayo ni Jehova sa ila, madamo ang nag-organisar sang ila iskedyul kag mga hilikuton agod madugangan ang ila tion sa pagbantala ukon sa iban pa nga teokratikong hilikuton. Ang iban nagaauxiliary payunir sing makaisa ukon pila ka beses kada tuig, samtang ang iban nangin regular payunir. Ang pila nagaboluntaryo sa mga proyekto sa pagpatindog sing mga pasilidad. Maayo gid ini nga mga paagi para mapakita sang isa ang iya apresasyon. Kon husto ang iya motibo sa paghimo sini, mahamuot ang Dios sa iya pag-alagad.

18 Madamo nga Cristiano ang napahulag nga magpasalamat kay Jehova. Isa sa ila amo si Morena. Ginpangita niya ang sabat sa iya mga pamangkot parte sa Dios sa iya ginmat-an nga relihion nga Katoliko, kag sa mga pagtuluuhan sa Asia. Pero, wala niya makita ang sabat. Naathagan lang sia sang nagtuon sia sing Biblia upod sa mga Saksi ni Jehova. Nagpasalamat gid si Morena bangod ang iya mga natun-an sa Biblia naghatag sa iya sing matuod nga kalipay. Gani, luyag niya gamiton ang iya kusog sa pag-alagad kay Jehova. Pagkatapos sang iya bawtismo, nag-auxiliary payunir sia kag sang ulihi nagregular payunir sang gintugot na sang iya kahimtangan. Treinta ka tuig na sia subong nga payunir.

19. Paano mo mapauswag ang imo mga halad kay Jehova?

19 Siempre, madamo sang matutom nga alagad ni Jehova ang indi makapayunir bangod sang ila kahimtangan. Bisan ano man ang aton ginahimo sa pag-alagad kay Jehova, tanan kita makahatag sang espirituwal nga mga halad nga kalahamut-an sa iya. Sa aton paggawi, dapat sundon naton sing maayo ang matarong nga mga prinsipio, kag dumdumon nga ginarepresentar naton si Jehova sa tanan nga tion. Sa pagtuo, nagasalig gid kita sa katumanan sang mga katuyuan sang Dios. Sa maayong mga buhat, nagabulig kita sa pagpalapnag sang maayong balita. Halin sa kabuganaan sang aton tagipusuon kag sa aton apresasyon sa tanan nga ginhimo ni Jehova sa aton, magpadayon kita sa paghalad sing bug-os kalag para kay Jehova.

[Mga Pamangkot sa Pagtinuon]

[Blurb sa pahina 25]

Paano ka ginapahulag sang kaayo ni Jehova nga pauswagon ang imo halad sang pagdayaw?

[Retrato sa pahina 23]

Ginakalitan mo bala ang tagsa ka kahigayunan para makapanaksi?