Amo Na Ini ang Tulun-an nga Edisyon!

Ginbag-o namon ang tulun-an nga edisyon para mas makagalanyat ini kag makabulig pa gid sa imo pagtuon sa hamili nga Pulong sang kamatuoran ni Jehova.—Sal. 1:2; 119:97.

Apat ka tuig na ang nagligad sugod sang ginbalhag namon ang duha ka edisyon sang Ang Lalantawan, isa para sa publiko kag isa para sa aton tanan—sa mga Saksi ni Jehova kag sa nagauswag nga mga estudyante sa Biblia.

Parte sa tulun-an nga edisyon, ang isa ka madugay na nga Saksi nagsiling: “Matahom gid ini kag nagadulot sa tagipusuon. Amo ini ang akon nabatyagan sa una nga gua sang tulun-an nga edisyon. Ang madalom kag maid-id nga panudlo sini nagatudok gid sa akon tagipusuon. Madamo gid nga salamat sa sining bag-o nga aman.” Ang isa pa ka utod nagsulat: “Nanamian gid ako maghinguyang sing tion sa pagtuon sa tulun-an nga edisyon sa bulig sang Reference Bible.” Nagasalig kami nga amo man sini ang imo ginabatyag.

Sugod sang 1879, ginabalhag na ang Lalantawan. Ang padayon nga pagbalhag sini nangin posible lamang bangod sa pagpakamaayo kag espiritu ni Jehova. (Zac. 4:6) Sa sulod sang 133 ka tuig, pila ka beses na nga gin-islan ang cover sini nga magasin. Para sa 2012, ang gamiton sa cover amo ang gindrowing nga piktyur sang mga nagabantala, kag lain ang drowing kada bulan. Magapahanumdom ini sa aton sang sugo sang Dios nga magpanaksi sing maid-id tuhoy sa Ginharian ni Jehova. (Binu. 28:23) Sa pahina 2, makita mo ang orihinal nga piktyur nga gin-ilugan sang drowing sa cover, kag ang malip-ot nga paathag kon sa diin ini nga lugar kag kon ano ang ginahimo sang mga ara sa piktyur. Sa bug-os nga tuig, magapahanumdom ini sa aton nga ang katawhan ni Jehova nagabantala sang maayong balita “sa bug-os napuy-an nga duta.”—Mat. 24:14.

Ano pa ang iban nga ginbag-o sa sini nga magasin? Ang kahon para sa repaso ginsaylo sa umpisa sang tulun-an nga artikulo. Sa sini nga paagi, makita mo nga daan ang mga punto nga dapat mo tandaan samtang ginabasa kag ginatun-an mo ang artikulo. Siempre, gamiton gihapon sang mga nagadumala sa Pagtinuon sa Ang Lalantawan ini nga mga pamangkot para sa pagrepaso. Matalupangdan mo man nga naglapad ang mga mardyin kag nagdalagku ang mga numero sang pahina kag parapo.

Subong sang ginpaathag sa sini nga gua, may bag-o nga bahin nga ginatawag, “Halin sa Amon Archive.” Katuyuan sini nga ipakita ang mga pag-uswag sa maragtas sang mga Saksi ni Jehova sa moderno nga tion. Kon kaisa, may ara man mga sugilanon sang kabuhi sa tig-ulo nga “Naghalad sang Ila Kaugalingon sing Kinabubut-on.” Isugid sini ang kasadya, pagkakontento, kag kalipay nga naeksperiensiahan sang mga kauturan nga nag-alagad sa mga lugar nga nagakinahanglan sing dugang nga mga manugbantala.

Kabay nga sa bulig sini nga magasin mangin makalilipay ang imo pagtuon sang Biblia.

Mga Manugbalhag

[Retrato sa pahina 3]

1879

[Retrato sa pahina 3]

1895

[Retrato sa pahina 3]

1931

[Retrato sa pahina 3]

1950

[Retrato sa pahina 3]

1974

[Retrato sa pahina 3]

2008