Mga Pagbag-o nga Naghatag sing Kalipay

Panugiron ni James A. Thompson

Sang natawo ako sa nabagatnan nga Estados Unidos sang 1928, may kasuguan nga indi puede mag-impon ang mga puti sa itom. Ang magsupak sini mahimo prisuhon ukon silutan sing mas mabug-at pa.

SA SINA nga tion may mga lugar sa Estados Unidos nga kinahanglan iseparar ang mga kongregasyon, sirkito, kag distrito sang puti nga mga Saksi ni Jehova sa mga itom. Sang 1937 nangin company servant (ginatawag na karon nga koordenitor sang hubon sang mga gulang) si Tatay sa kongregasyon sang mga itom sa Chattanooga, Tennessee. Si Henry Nichols naman ang company servant sa mga puti.

Nadumduman ko nga sang pamatan-on pa ako, nagapungko ako sa balkonahe kon gab-i kag nagapamati kanday Tatay kag Utod Nichols. Bisan indi ko pa maintiendihan sing maayo, nanamian ako magtupad kay Tatay samtang ginaistoryahan nila kon paano mapadayon ang pagbantala sa mabudlay nga sitwasyon sadto.

Pero antes pa sini, sang 1930, may trahedya nga natabo sa amon pamilya. Napatay si Nanay sa edad nga 20. Duha ka tuig pa lang ako sadto, kag si Tatay ang nag-atipan sa amon sang akon apat ka tuig nga magulang nga si Doris. Bisan bag-o pa lang nabawtismuhan si Tatay, madasig ang iya pag-uswag sa espirituwal.

Mga Halimbawa nga Nag-impluwensia sa Akon

Sang 1933, nakilala ni Tatay ang isa ka matahom nga utod, si Lillie Mae Gwendolyn Thomas, kag wala madugay nagpakasal sila. Ang ila katutom sa pag-alagad kay Jehova nangin maayo nga halimbawa sa amon ni Doris.

 Sang 1938, ang mga kongregasyon sang mga Saksi ni Jehova ginpangabay nga sakdagon ang resolusyon nga ang ulong talatapan sa Brooklyn, New York, ang matangdo sang mga gulang imbes nga botohan ini sa lokal nga kongregasyon. Bisan pa may iban sa Chattanooga nga nangalag-ag, ginsakdag dayon ni Tatay ini nga pagbag-o sa organisasyon. Ang pagkamainunungon ni Tatay kag ang tinagipusuon nga pagkooperar ni Nanay, may impluwensia sa akon tubtob subong.

Bawtismo kag Bug-os Tion nga Pag-alagad

Sang 1940, ang mga kauturan sa amon kongregasyon nag-arkila sang bus agod magtambong sa kombension sa Detroit, Michigan. May pila sa amon upod nga nagpabawtismo. Natingala ang iban nga wala ako nagpabawtismo, kay sugod sang lima ako ka tuig nagaupod na ako sa pagbantala.

Sang namangkot sila nagsabat ako, “Wala pa ako kaintiende kon ano ang nadalahig sa bawtismo.” Nakibot gid si Tatay sang nabatian niya ini. Halin sadto, ginpaathag niya sa akon kon ano ang kahulugan kag importansia sang bawtismo. Pagligad sang apat ka bulan, sang Oktubre 1, 1940, isa ka matugnaw nga adlaw, nabawtismuhan ako sa isa ka linaw sa Chattanooga.

Sugod sang 14 anyos ako, nagapayunir ako kada sira-klase. Nagabantala ako sa magagmay nga mga banwa sang Tennessee kag sa kaingod sini nga estado sang Georgia. Aga pa ako nagabugtaw kag nagaputos sang balon agod makaabot sa alas 6:00 nga biyahe sang tren ukon bus pakadto sa akon teritoryo. Alas 6:00 sang gab-i naman ako nagapauli. Sa masami, ubos ko na ang akon balon antes magtigpalanyaga. Bisan pa may kuarta ako, indi ako makasulod sa tiendahan para magbakal sing pagkaon kay itom ako. Isa ka bes, nagsulod ako sa tiendahan para magbakal sang ice cream, pero ginpagua ako. Maayo lang kay ginbaklan ako sang mabuot nga Kana.

Sang hayskul na ako, nangin aktibo sa Bagatnan ang mga hublag para sa alalangay nga kinamatarong. Ang mga organisasyon subong sang NAACP (National Association for the Advancement of Colored People) nagapalig-on sa mga estudyante nga mangin aktibista. Gusto sang madamo nga eskwelahan sang mga itom, lakip ang sa amon, nga mag-entra ang tanan nila nga estudyante. Ginpilit nila ako nga “sakdagon ang amon rasa.” Apang nangindi ako kag ginpaathag sa ila nga ang Dios wala sing ginapasulabi nga rasa kag nagasalig ako nga solbaron Niya ang mga inhustisya.—Juan 17:14; Binu. 10:34, 35.

Sang makatapos ako sa hayskul, nagdesisyon ako nga magsaylo sa New York City. Pero naghapit ako anay sa Philadelphia, Pennsylvania, agod bisitahan ang akon mga abyan nga nakilala ko sa kombension. Didto, sa una nga tion, nakatambong ako sa kongregasyon nga nagasimpon ang sarisari nga rasa. Sang magduaw ang C.O., gin-istorya niya ako kag ginsilingan nga may bahin ako sa masunod nga miting. Isa ini sa nagkumbinse sa akon nga magtener didto.

Isa sa nangin abyan ko sa Philadelphia amo si Geraldine White, nga ginatawag ko Gerri. Madamo sia sing nahibaluan sa Biblia kag maayo makighambal sa mga tagbalay kon magbantala. Labaw sa tanan, pareho kami sing tulumuron  nga magpayunir. Nagpakasal kami sang Abril 23, 1949.

Gin-agda sa Gilead

Tulumuron gid namon nga mag-eskwela sa Gilead School kag magmisyonero sa iban nga pungsod. Gani, naghimo kami sing mga pagbag-o sa amon kabuhi para mangin kalipikado sa Gilead. Wala madugay, ginpangabay kami nga magsaylo sa Lawnside, New Jersey; dayon sa Chester, Pennsylvania; kag sang ulihi sa Atlantic City, New Jersey. Didto, nangin kalipikado kami nga mag-eskwela sa Gilead, duha ka tuig sugod sang ginkasal kami. Pero, wala kami gilayon nakaeskwela. Ngaa?

Sang umpisa sang dekada 1950, madamo nga lalaki ang ginapasoldado para makig-away sa Korea. Ang mga manugrehistro sa Philadelphia daw indi maayo ang pagtamod sa mga Saksi ni Jehova bangod sa aton neutralidad. Pero sang ulihi, nagsiling ang hukom nga neutral gid man ako suno sa pagpangusisa sang FBI. Gani, sang Enero 11, 1952, ginkilala ako sang Presidential Appeal Board subong isa ka ministro.

Sang Agosto sina nga tuig, nakabaton kami ni Gerri sang imbitasyon para sa ika-20 nga klase sang Gilead, nga nagsugod pagka-Septiembre. Samtang nagaeskwela kami, ginapaabot namon nga maasayn kami sa iban nga pungsod. Ang akon magulang nga si Doris, nakagradwar sa ika-13 nga klase sang Gilead kag nagaalagad sa Brazil. Pero nakibot gid kami ni Gerri sang gin-asayn kami nga mag-C.O.! Duawon namon ang kongregasyon sang mga itom sa nabagatnan nga bahin sang estado sang Alabama. Sang primero, nasubuan kami kay gusto gid namon magmisyonero.

Ang una nga kongregasyon nga ginduaw namon amo ang Huntsville. Pag-abot namon, nagkadto kami sa balay sang sister nga amon dayunan. Samtang ginahimos namon ang amon mga dala, nabatian namon nga nagsiling sia sa telepono, “Ari na ang mga bata.” Mga 24 anyos pa lang kami kag mas bata pa kon tan-awon. Nakilala kami sa hayo nga “Mga Bata” sa sini nga sirkito.

Sa masami, ang Bagatnan ginatawag nga Bible Belt bangod ginatahod gid sang kalabanan diri ang Biblia. Gani, pirme kami nagapakig-istorya paagi sa sining tatlo ka punto:

(1) Malip-ot nga komento parte sa kahimtangan sang kalibutan.

(2) Ang solusyon sang Biblia.

(3) Ang dapat himuon suno sa Biblia.

Dayon nagatanyag kami sang publikasyon para sa pagtuon sa Biblia. Bangod maayo ang resulta sini nga presentasyon, ginhatagan ako sing bahin nga ipasundayag ini sa New World Society Assembly sa New York sang 1953.

Sang tig-ilinit sang 1953, gin-asayn ako nga mag-D.O. sa mga sirkito sang mga itom sa  Bagatnan. Sakop sang amon teritoryo ang bug-os nga Virginia pa Florida kag pa katundan sa Alabama kag Tennessee. Subong mga nagalakbay nga manugtatap, kinahanglan gid nga mangin mapasibusibuon. Halimbawa, pirme kami nagadayon sa mga balay nga wala sing gripo kag nagapaligo lang kami sa tub sa kilid sang dapog. Maayo lang kay amo ini ang pinakamainit nga parte sang balay!

Kabudlayan Bangod sa Pagseparar sang mga Rasa

Ang pag-alagad sa Bagatnan nagakinahanglan sang maayo nga pagplano kag pagkamataktikanhon. Ang mga itom indi makagamit sang mga Laundromat (washing machine para sa publiko). Gani kon maglaba si Gerri nagasiling sia nga para ini kay “Mrs. Thompson.” Amo nga abi sang iban suluguon sia kag ama niya si “Mrs. Thompson.” Sang panahon nga nagapasalida ang mga D.O. sang film nga The New World Society in Action, ginatawgan ko ang shop kag nagapareserba sang telon para kay “Mr. Thompson.” Dayon, ginakuha ko na lang ini sa shop. Matinahuron gid kami kag daw wala man kami sing nangin problema sa pagbantala.

Pero, may nag-utwas naman nga problema sa Bagatnan batok sa Aminhan. Ang lokal nga pamantalaan nagreport nga si James A. Thompson, Jr., sang Watchtower Bible and Tract Society of New York magapamulongpulong sa isa ka asembleya. Abi sang iban halin ako sa New York, amo nga ginkanselar nila ang amon kontrata sa awditoryum sang eskwelahan. Gani nagkadto ako sa mga opisyal sang eskwelahan kag ginpaathag nga sa Chattanooga man ako nag-eskwela. Ginpasugtan kami nga gamiton ang awditoryum para sa amon sirkito nga asembleya.

Sang tungatunga sang dekada 1950, nagdugang pa gid ang tension kag kon kaisa nagaresulta sa kasingki. Sa pila ka distrito nga asembleya sang 1954, naglain ang buot sang pila ka kauturan kay wala sing itom nga may bahin. Ginpalig-on namon sila nga maghulat lang. Pagkadason nga tig-ilinit, ginbahinan na ako. Pagkatapos sini, madamo na sang itom nga kauturan halin sa Bagatnan ang ginbahinan.

Sang ulihi, nadula man lang ang gamo sang mga rasa sa Bagatnan, kag amat-amat nga nag-ululupod ang itom kag puti nga mga kauturan. Bangod sini, ang iban nga kauturan ginsaylo sa lain nga kongregasyon, nagbag-o ang mga teritoryo, kag ang mga asaynment sang mga nagapanguna. Pero may mga itom kag puti nga indi magsugot sa sini nga kahimusan. Apang gin-ilog sang kalabanan ang aton langitnon nga Amay nga wala sing ginapasulabi. Madamo pa gani ang nangin suod nga mag-abyan bisan indi pareho ang ila kolor. Naeksperiensiahan gid ini sang amon pamilya sang dekada 1930 kag 1940 samtang nagadaku ako.

Bag-o nga Asaynment

Sang Enero 1969, gin-agda kami ni Gerri nga magkadto sa Guyana, South America, kag nalipay gid kami sa pagbaton sini. Nagkadto kami anay sa Brooklyn, New York, diin ginhanas ako kon paano dumalahan ang pagbantala nga hilikuton sa Guyana. Sang Hulyo 1969, nag-abot kami sa Guyana. Daku gid ini nga pagbag-o para sa amon kay 16 ka tuig kami nga yara sa nagalakbay nga hilikuton. Ginhinguyang  ni Gerri ang iya kalabanan nga tion subong misyonera, kag ako naman naasayn sa sanga talatapan.

Madamo ako sing hilikuton, halin sa pagtrim sang hilamon kag pagpadala sang mga literatura sa 28 ka kongregasyon asta sa pagpakigkomunikar sa ulong-talatapan sa Brooklyn. Kada adlaw, nagaobra ako sing 14 tubtob 15 ka oras. Nabudlayan man kami ni Gerri, pero malipayon kami sa amon asaynment. Pag-abot namon sa Guyana, 950 ang manugbantala pero subong sobra na 2,500.

Nanamian kami sang klima kag sang sarisari nga prutas didto, pero ang nagapahalipay gid sa amon amo ang mapainubuson nga mga tawo nga ginatun-an namon sang kamatuoran sa Biblia. Sa masami 20 ka pagtuon sa Biblia ang ginahiwat ni Gerri kada semana, kag madamo sa ila ang nabawtismuhan. Ang pila sa ila nangin payunir, gulang, kag ang iban nag-eskwela sa Gilead kag nangin mga misyonero.

Mga Kabudlayan sang Pagtigulang

Sang 1983, ang akon mga ginikanan sa Estados Unidos nagkinahanglan sing bulig. Gin-istoryahan namon ini nanday Gerri kag Doris. Si Doris, nga nag-alagad sa Brazil sang 35 ka tuig subong misyonera ang nagpauli para atipanon sila. Ngaa duha gid ang mauntat, siling niya, kon masarangan man lang sang isa? Sang napatay ang amon mga ginikanan, sa Chattanooga na sia nag-espesyal payunir.

Sang 1995, natukiban nga may prostate cancer ako kag kinahanglan namon magbalik sa Estados Unidos. Nag-istar kami sa Goldsboro, North Carolina, bangod malapit ini sa akon pamilya sa Tennessee kag sa pamilya ni Gerri sa Pennsylvania. Sang indi na delikado ang akon kanser, nag-alagad kami sa kongregasyon sang Goldsboro subong infirm nga mga espesyal payunir.

Kon dumdumon ko ang sobra 65 ka tuig nga pag-alagad sing bug-os tion, nagapasalamat gid ako nga ginpakamaayo ni Jehova ang pagbag-o nga ginhimo namon ni Gerri para sa pag-alagad sa iya. Matuod gid ang mga pinamulong ni David: “Matutom ka [Jehova] sa mga tawo nga matutom sa imo”!—2 Sam. 22:26, NW.

[Mga Retrato sa pahina 3]

Si Tatay kag si Utod Nichols nangin maayo nga halimbawa sa akon

[Mga Retrato sa pahina 4]

Kami ni Gerri antes sang amon pag-eskwela sa Gilead, 1952

[Mga Retrato sa pahina 5]

Gin-asayn kami subong nagalakbay nga manugtatap sa Bagatnan paggradwar namon sa Gilead

[Retrato sa pahina 6]

Ang mga nagalakbay nga manugtatap kag ang ila mga asawa antes sang distrito nga kombension nga tingob na ang mga itom kag puti, 1966

[Retrato sa pahina 7]

Makalilipay gid ang pag-alagad subong misyonero sa Guyana