Madumduman Mo Bala?

Nabasa mo bala sing maayo ang ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Sin-o si Olivétan, kag ngaa dapat naton talupangdon ang iya ginhimo?

Sia amo ang Pranses nga si Pierre Robert. Sang panahon sang Repormasyon sang ika-16 nga siglo ginbadbad niya ang Biblia sa Pranses nga lenguahe. Gingamit niya ang tinaga nga “manugtatap” sa baylo nga “obispo,” kag “kongregasyon” sa baylo nga “simbahan.” Sa iban nga bersikulo, gingamit niya ang ngalan sang Dios nga “Jehova.”—9/1, pahina 18-20.

• Ano ang buot silingon sang ginsilingan sang Dios ang mga Levinhon: “Ako amo ang imo bahin”?

Ang kada tribo sang Israel may ginpanubli nga duta. Pero ang mga Levinhon si Jehova amo ang ila “bahin.” (Num. 18:20) Wala sila sing napanubli nga duta, pero ginhatagan sila sing pinasahi nga pribilehiyo sa pag-alagad. Gin-atipan ni Jehova ang ila materyal nga mga kinahanglanon. Sa karon, ang mga may pribilehiyo sa pagpauswag sang intereses sang Ginharian makasalig man nga amanan sila sang Dios sang ila mga kinahanglanon.—9/15, pahina 7-8, 13.

• Paano naton nahibaluan kon san-o ginlaglag sang Babilonia ang dumaan nga Jerusalem?

Lainlain ang impormasyon nga ginahatag sang dumaan nga mga historian parte sa mga hari sang Babilonia kag sa ila paggahom. Pero, nagaugyon ang mga iskolar nga nalutos ni Ciro II ang Babilonia sang 539 B.C.E., isa ka importante nga petsa sa kasaysayan. Ginhilway ang mga Judiyo kag nakabalik sa ila dutang natawhan sang 537 B.C.E. Suno sa Biblia, gintapok sila sing 70 ka tuig. Gani, masiling nga ang Jerusalem nalaglag sang 607 B.C.E. (2 Cron. 36:21, 22; Jer. 29:10; Dan. 9:1, 2)—10/1, pahina 26-31.

• Ano ang makabulig sa isa ka Cristiano nga mahibaluan kon bala ang kalingawan nga iya napili mapuslanon ukon indi?

Para mahibaluan kon bala ang kalingawan mapuslanon kag kalahamut-an sa pagtamod sang Dios, maayo nga mamangkot: Parte ini sa ano? San-o ko ini ginahimo? Sin-o ang kaupdanan ko?—10/15, pahina 9-12.

• Ngaa sala nga ipahulog ang bata?

Ang kabuhi sagrado sa Dios, kag para sa iya, ang ginabusong nga lapsag isa na ka buhi nga tinuga. (Sal. 139:16) Ang pagpatay sini isa ka krimen, kay suno sa Kasuguan ang isa ka tawo manabat kon mahalitan niya ang wala pa matawo nga lapsag. (Ex. 21:22, 23)—11/1, pahina 6.

• Paano kita mabuligan sang Hulubaton 7:6-23 nga malikawan ang pornograpiya?

Ginasugid sini sa aton ang parte sa isa ka pamatan-on nga nagalakat pakadto sa ginapuy-an sang babayi nga makihilawason. Ginsulay sia sang babayi. Subong, dapat man naton likawan ang mga Internet site nga may bastos nga mga retrato, kag importante nga mangayo sing bulig sa Dios paagi sa pagpangamuyo antes magbukas sang Internet.—11/15, pahina 9-10.

• Malaglag bala ang duta sa 2012?

Bangod sa dumaan nga kalendaryo sang mga Maya, nagapati ang iban nga ang kalibutan maguba sa 2012. Pero indi ina matabo, kay gintuga ni Jehova ang duta para puy-an. Suno sa Biblia, ang duta magapabilin sa gihapon. (Man. 1:4; Isa. 45:18)—12/1, pahina 10.

• Sin-o nga mga manunulat sang Biblia ang presente sang Pentecostes 33 C.E.?

Masiling nga anom lamang ka manunulat sang Cristianong Griegong Kasulatan ang presente. Tatlo ka apostoles ang ato didto—sanday Mateo, Juan, kag Pedro. Ato man didto ang duha ka utod nga lalaki ni Jesus nga sanday Santiago kag Judas. Kag mahimo nga ato man didto ang pamatan-on nga si Marcos.—12/1, pahina 22.