Magdiretso sa kaundan

Magdiretso sa listahan sang kaundan

“Paglipay sang Tanan nga Nagakasakit”

“Paglipay sang Tanan nga Nagakasakit”

 “Paglipay sang Tanan nga Nagakasakit”

“Ang GINOO naghaplas sa akon . . . sa paglipay sang tanan nga nagakasakit.”—ISA. 61:1, 2.

1. Ano ang ginhimo ni Jesus sa mga nagakasakit, kag ngaa?

SI Jesucristo nagsiling: “Ang akon kalan-on amo ang paghimo sa kabubut-on sang nagpadala sa akon kag ang pagtapos sa iya buluhaton.” (Juan 4:34) Sa pagtuman sang iya asaynment sa Dios, ginpakita ni Jesus ang tumalagsahon nga mga kinaiya sang iya Amay. Lakip sa sini amo ang daku nga gugma ni Jehova sa mga tawo. (1 Juan 4:7-10) Ginsambit ni apostol Pablo ang isa ka paagi sang pagpakita ni Jehova sang gugma sang ginlaragway niya Sia subong “ang Dios nga may bug-os nga paglugpay.” (2 Cor. 1:3) Ginpasundayag ni Jesus ini nga gugma sang gintuman niya ang gintagna ni Isaias. (Basaha ang Isaias 61:1, 2.) Sa sinagoga sang Nazaret, ginbasa ni Jesus ang tagna kag gin-aplikar ining mga pinamulong sa iya. (Luc. 4:16-21) Sa bug-os nga pagministeryo ni Jesus, mahigugmaon nga ginlipay ukon ginlugpayan niya ang mga nagakasakit, nga nagadala sa ila sing pagpalig-on kag kalinong sa hunahuna.

2, 3. Ngaa dapat ilugon si Cristo sang iya mga sumulunod sa paghatag sing lugpay?

2 Dapat ilugon si Jesus sang iya mga sumulunod paagi sa paglugpay sa mga nagakasakit.  (1 Cor. 11:1) Si Pablo nagsiling: “Padayon nga lugpayi ang isa kag isa kag palig-una ang isa kag isa.” (1 Tes. 5:11) Kinahanglan pa gid naton nga lugpayan ang iban, kay ang katawhan karon yara sa “makahalanguyos nga mga tion nga mabudlay atubangon.” (2 Tim. 3:1) Kag sa masami, madamo nga bunayag sing tagipusuon sa bug-os nga kalibutan ang nagapakig-angot sa mga tawo nga ang ginahambal kag ginahimo makapalisod, makasakit sang balatyagon, kag makapasubo.

3 Subong sang gintagna sa Biblia, sa sining katapusan nga mga adlaw sining malaut nga sistema sang mga butang, madamo ang “mahigugmaon sa kaugalingon, mahigugmaon sa kuarta, nagapabugal sang kaugalingon, matinaastaason, manugpasipala, di-matinumanon sa mga ginikanan, di-mapinasalamaton, di-mainunungon, wala sing kinaugali nga pagpalangga, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, matig-a sing ulo, nagapahambog, mahigugmaon sa kinasadya sa baylo nga mahigugmaon sa Dios.” Nagalala pa gid ang sitwasyon kay ang “malaut nga mga tawo kag mga impostor magalain kag magalain pa.”—2 Tim. 3:2-4, 13.

4. Ano ang kahimtangan sang kalibutan subong?

4 Indi kita dapat matingala sa sini, kay maathag nga suno sa Biblia “ang bug-os nga kalibutan yara sa gahom sang isa nga malauton.” (1 Juan 5:19) “Ang bug-os nga kalibutan” nagalakip sa pulitika, relihion, komersio, kag mga propaganda. Husto gid nga si Satanas nga Yawa gintawag nga “manuggahom sang kalibutan” kag “dios sining sistema sang mga butang.” (Juan 14:30; 2 Cor. 4:4) Nagalain pa gid ang kahimtangan sa bug-os nga kalibutan bangod akig gid si Satanas, kay nakahibalo sia nga malip-ot na lang ang iya tion. (Bug. 12:12) Makapalig-on mahibaluan nga ang pagpahanugot sang Dios kay Satanas kag sa iya malaut nga sistema malapit na lang matapos, kag masolbar na ang isyu nga ginpautwas ni Satanas parte sa pagkasoberano ni Jehova!—Gen., kap. 3; Job, kap. 2.

Ang Maayong Balita Ginabantala sa Bug-os nga Duta

5. Paano nagakatuman ang tagna parte sa pagbantala sa sining katapusan nga mga adlaw?

5 Sa sining mabudlay nga tion sa maragtas sang tawo, nagakatuman ang mga tagna ni Jesus. Sia nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mat. 24:14) Ining hilikuton nga pagbantala sa bug-os nga duta parte sa Ginharian sang Dios labi pa gid nga nagasangkad. Subong, sobra na sa 7,500,000 ka mga Saksi ni Jehova sa 107,000 ka kongregasyon sa bug-os nga duta ang nagabantala sang Ginharian sang Dios. Amo ini ang tema sang pagbantala kag pagpanudlo ni Jesus. (Mat. 4:17) Bilang resulta sang aton pagbantala, madamo nga nagakasakit ang nalugpayan. Sa nagligad lang nga  duha ka tuig, 570,601 ang nabawtismuhan subong mga Saksi ni Jehova!

6. Ano ang masiling mo sa kasangkaron sang pagbantala nga hilikuton?

6 Mahangpan pa gid naton ang kasangkaron sining pagbantala kon dumdumon naton nga ang mga Saksi ni Jehova subong nagabadbad kag nagapanagtag sang literatura sang Biblia sa sobra 500 ka lenguahe. Wala pa gid ini matabo sa maragtas sang tawo! Tumalagsahon gid ang pagluntad, hilikuton, kag pag-uswag sang dutan-on nga bahin sang organisasyon ni Jehova. Kon wala ang panuytoy kag bulig sang gamhanan nga balaan nga espiritu sang Dios, imposible nga matabo ini sa kalibutan nga ginakontrol ni Satanas. Bangod ginabantala ang maayong balita sa bug-os napuy-an nga duta, ang lugpay halin sa Kasulatan mabaton indi lamang sang aton mga masigkatumuluo kundi pati sang mga nagakasakit nga nagbaton sang mensahe sang Ginharian.

Paglugpay sa mga Masigkatumuluo

7. (a) Ngaa indi naton mapaabot nga dulaon ni Jehova subong ang tanan nga makapasubo nga kahimtangan? (b) Paano naton mahibaluan nga mabatas naton ang paghingabot kag kapipit-an?

7 Sa sining kalibutan nga puno sang kalautan kag pag-antos, indi kita hilway sa mga kalisdanan. Indi naton mapaabot nga dulaon sang Dios ang tanan nga kabangdanan sang kasubo tubtob wala pa niya malaglag ining sistema sang mga butang. Samtang ginaatubang naton ining gintagna nga paghingabot, nabutang man sa pagtilaw ang aton integridad bilang mga sumalakdag sang pagkasoberano ni Jehova sa bug-os nga uniberso. (2 Tim. 3:12) Apang bangod sa bulig kag paglugpay sang aton langitnon nga Amay, mangin kaangay kita sa hinaplas nga mga Cristiano sa Tesalonica nga nag-atubang sing mga paghingabot kag kapipit-an nga may pagbatas kag pagtuo.—Basaha ang 2 Tesalonica 1:3-5.

8. Ano ang pila ka pamatuod sa Biblia nga ginalugpayan ni Jehova ang iya mga alagad?

8 Wala sing duhaduha nga ginalugpayan ni Jehova ang iya mga alagad. Halimbawa, sang ginhingabot si manalagna Elias sang malaut nga si Rayna Jezebel, hinadlukan sia kag nalagyo. Nagsiling pa gani sia nga luyag niya mapatay. Apang sa baylo nga akigan si Elias, ginlugpayan sia ni Jehova kag ginpabakod sa iya hilikuton subong manalagna. (1 Hari19:1-21) Makita man sa eksperiensia sang unang siglo nga Cristianong kongregasyon nga ginalugpayan ni Jehova ang iya katawhan. Halimbawa, mabasa naton nga ang “kongregasyon sa bug-os nga Judea kag Galilea kag Samaria nakaagom sang isa ka panag-on sang kalinong, nga napalig-on.” Dugang pa, “samtang nagalakat ini sa kahadlok kay Jehova kag paagi sa lugpay sang balaan nga espiritu padayon ini nga nag-uswag.” (Binu. 9:31) Nalipay gid kita kay may yara man kita “lugpay sang balaan nga espiritu”!

9. Ngaa makalugpay sa aton ang pagtuon parte kay Jesus?

9 Subong mga Cristiano, nalipay kita nga nakatuon kita parte kay Jesucristo kag nagasunod sa iya mga tikang. Sia nagsiling: “Kari sa akon, kamo tanan nga ginabudlayan kag ginabug-atan, kag paumpawan ko kamo. Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sang kaumpawan sa inyo kaugalingon. Kay ang akon gota mahapos pas-anon kag ang akon lulan mamag-an.” (Mat. 11:28-30) Ang pagtuon sa makapalig-on nga pagpakig-angot ni Jesus sa mga tawo kag pagsunod sa iya halimbawa daku na nga bulig agod mabuhinan ang mga kalisdanan nga mahimo naton maeksperiensiahan.

10, 11. Sin-o sa kongregasyon ang puede makahatag sing lugpay?

10 Malugpayan man kita sang aton mga masigka-Cristiano. Halimbawa, binagbinaga kon paano ginabuligan sang mga gulang sa kongregasyon ang mga nagakasakit. Si Santiago nagsulat: “May nagamasakit bala sa inyo [sa espirituwal]? Magtawag sia sang mga gulang nga lalaki sang kongregasyon, kag magpangamuyo sila para sa iya.” Ano ang resulta?  “Ang pangamuyo nga may pagtuo magaayo sa isa nga nagamasakit, kag si Jehova magabangon sa iya. Subong man, kon nakahimo sia sang mga sala, patawaron sia.” (Sant. 5:14, 15) Ang iban nga mga miembro sang kongregasyon makalugpay man.

11 Ang mga babayi mahapos magsugiray sang ila mga problema. Ang mga hamtong kag mas eksperiensiado nga mga babayi makahatag sing maayo nga laygay sa mga mas bataon sa ila. Ayhan naagihan na nila ang kaanggid nga problema. Ang ila pagpamati kag pag-ulikid daku gid nga bulig sa bataon nga mga utod nga babayi. (Basaha ang Tito 2:3-5.) Sa pagkamatuod, puede “lipayon ang mga kalag nga ginapung-awan,” sang mga gulang kag sang iban. (1 Tes. 5:14, 15) Dumdumon man naton nga ang Dios “nagalugpay sa aton sa tanan naton nga kapipit-an, agod malugpayan naton ang yara sa bisan ano nga sahi sang kapipit-an.”—2 Cor. 1:4.

12. Ngaa importante gid nga magtambong kita sa Cristianong mga miting?

12 Ang isa ka importante nga paagi nga malugpayan kita amo ang pagtambong sa mga miting, diin mapalig-on kita sa paghinun-anon sang Biblia. Mabasa naton nga sanday Judas kag Silas ‘nagpalig-on sa mga kauturan paagi sa madamo nga pamulongpulong kag ginpabakod sila.’ (Binu. 15:32) Antes kag pagkatapos sang aton mga miting, may makapalig-on nga paghambalanay sang mga kauturan. Gani bisan ginalisdan kita bangod sa problema, indi naton pag-ipain ang aton kaugalingon, kay indi ini makabulig sa aton. (Hulu. 18:1) Sa baylo, dapat naton sundon ang inspirado nga laygay ni Pablo: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.”—Heb. 10:24, 25.

Lugpay Gikan sa Pulong sang Dios

13, 14. Isaysay kon paano makalugpay sa aton ang Kasulatan.

13 Bawtismado man kita ukon nagatuon pa lang parte sa Dios kag sa iya mga katuyuan, malugpayan gid kita sa nasulat nga Pulong sang Dios. Si Pablo nagsiling: “Ang tanan nga butang nga ginsulat sadto ginsulat sa pagtudlo sa aton, agod paagi sa aton pagbatas kag paagi sa lugpay gikan sa Kasulatan makatigayon kita sang paglaum.” (Roma 15:4) Mapalig-on kita sang Biblia kag ‘masangkapan sing bug-os para sa tagsa ka maayong buhat.’ (2 Tim. 3:16, 17) Makalulugpay gid mahibaluan ang kamatuoran parte sa mga katuyuan sang Dios kag sa matuod nga paglaum. Gani gamita sing maayo ang Pulong sang Dios kag ang mga publikasyon pasad sa sini nga makalugpay kag makabulig sa aton sa madamo nga paagi.

14 Nagpahamtang si Jesus sing halimbawa paagi  sa paggamit sang Kasulatan sa pagtudlo kag paglugpay sa iban. Halimbawa, sang isa ka bes nga nagpakita sia matapos mabanhaw, ‘ginpaathag niya ang Kasulatan’ sa duha niya ka disipulo. Samtang nagapakighambal sia sa ila, napahulag gid sila. (Luc. 24:32) Bilang pagsunod sa halimbawa ni Jesus, ‘nangatarungan si Pablo gikan sa Kasulatan.’ Sa Berea, ang iya mga tagpalamati ‘nalangkag gid sa pagbaton sa pulong, nga ginausisa sing maayo ang Kasulatan sa adlaw-adlaw.’ (Binu. 17:2, 10, 11) Nagakaigo gid nga basahon naton ang Biblia adlaw-adlaw agod makabenepisyo kita sa sini kag sa Cristianong mga publikasyon nga gindesinyo sa paglugpay kag sa paghatag sing paglaum sa aton sa sining magamo nga tion!

Iban Pa nga Paagi sa Paglugpay sa Iban

15, 16. Ano ang pila ka butang nga mahimo naton agod mabuligan kag malugpayan ang aton mga masigka-Cristiano?

15 Mabuligan naton kag malugpayan ang mga masigka-Cristiano sa pila ka praktikal nga paagi. Halimbawa, mahimo mamalaklon kita para sa mga tigulang ukon nagabalatian nga mga kauturan. Mahimo man naton mabuligan ang iban sa ila mga hilikuton sa balay, agod ipakita ang personal nga interes sa ila. (Fil. 2:4) Mahimo naton apresyahon ang ila mga ikasarang kag maayo nga mga kinaiya, subong sang gugma, kaisog, kag pagtuo.

16 Agod malugpayan ang mga tigulang, duawon naton sila kag pamatian ang ila mga eksperiensia kag mga pagpakamaayo sa ila pag-alagad kay Jehova. Basi kita pa gani ang mapalig-on kag malugpayan! Mahimo naton basahan sang Biblia ukon sang mga publikasyon nga pasad sa sini ang aton mga ginaduaw. Basi puede naton mabinagbinag ang bag-o nga artikulo sa Pagtinuon sa Ang Lalantawan kada semana ukon ang tulun-an sa Pagtinuon sang Kongregasyon sa Biblia sa sina nga semana. Ayhan maupdan naton sila sa paglantaw sang DVD parte sa Kasulatan. Mahimo man nga basahan naton sila ukon sugiran sang makapalig-on nga mga eksperiensia nga nabasa naton sa mga publikasyon.

17, 18. Subong matutom nga mga alagad ni Jehova, ngaa masaligan naton ang iya pagsakdag kag lugpay?

17 Kon matalupangdan naton nga ang aton masigkasumilimba kay Jehova nagakinahanglan sing lugpay, mahimo naton sila ilakip sa aton pribado nga mga pangamuyo. (Roma 15:30; Col. 4:12) Samtang ginalandas naton ang aton mga problema kag makugi nga nagalugpay sa iban, mangin pareho ang aton pagtuo kag kombiksion sa salmista nga nag-amba: “Itungtung sa GINOO ang imo lulan, kag sia magaalay-ay sa imo; indi sia magtugut nga malingkang ang matarung.” (Sal. 55:22) Sa pagkamatuod, yara pirme si Jehova nga nagalugpay kag nagasakdag sa aton bilang iya matutom nga mga alagad.

18 Ginsilingan sang Dios ang iya mga sumilimba sadto: “Ako, ako gid amo ang nagalipay sa inyo.” (Isa. 51:12) Amo man sini ang himuon sa aton ni Jehova kag pakamaayuhon niya ang aton maayong buhat kag pulong samtang ginalugpayan naton ang mga nagalalaw. Sa langit man ukon sa duta ang aton paglaum, tanan kita malugpayan sang ginsiling ni Pablo sa iya hinaplas sang espiritu nga mga masigka-Cristiano: “Kabay nga ang aton Ginuong Jesucristo mismo kag ang Dios nga aton Amay, nga naghigugma sa aton kag naghatag sang wala katapusan nga lugpay kag maayong paglaum paagi sa wala tupong nga kaayo, maglugpay sang inyo tagipusuon kag magpalig-on sa inyo sa tagsa ka maayong buhat kag pulong.”—2 Tes. 2:16, 17.

Madumduman Mo Bala?

• Daw ano kasangkad ang aton hilikuton nga paglugpay sa mga nagakasakit?

• Ano ang pila ka butang nga mahimo naton agod makalugpay sa iban?

• Ano ang pila ka pamatuod sa Biblia nga ginalugpayan ni Jehova ang iya katawhan?

[Mga Pamangkot sa Pagtinuon]

[Retrato sa pahina 28]

Ginalugpayan mo man bala ang mga nagakasakit?

[Retrato sa pahina 30]

Bata man ukon tigulang, puede mangin makapalig-on