Si Jehova Bala Amo ang Imo Bahin?

“Padayon nga pangitaa anay ang ginharian kag ang iya pagkamatarong, kag ini tanan iban pa nga butang idugang sa inyo.”—MAT. 6:33.

1, 2. (a) Sin-o ang ginapatuhuyan sang “Israel sang Dios” nga ginsambit sa Galacia 6:16? (b) Sa Mateo 19:28, sin-o ang ginarepresentar sang “napulog-duha ka tribo sang Israel”?

ANO ang nagasulod sa imo pensar kon mabasa mo sa Biblia ang ngalan nga Israel? Ang anak bala ni Isaac nga si Jacob, nga ginhingalanan liwat sing Israel? Ang iya bala kaliwatan, nga nangin pungsod sadto sang Israel? Ukon ang espirituwal bala nga Israel? Kon ginagamit sing malaragwayon, ang Israel pirme nagapatuhoy sa “Israel sang Dios,” ang 144,000, nga ginhaplas sang balaan nga espiritu nga mangin mga hari kag saserdote sa langit. (Gal. 6:16; Bug. 7:4; 21:12) Apang binagbinaga ang pinasahi nga pagpatuhoy sa 12 ka tribo sang Israel sa Mateo 19:28.

2 Si Jesus nagsiling: “Sa pagtuga-liwat, kon ang Anak sang tawo magalingkod sa iya mahimayaon nga trono, kamo nga nagsunod sa akon magalingkod man sa napulog-duha ka trono, kag magahukom sa napulog-duha ka tribo sang Israel.” Sa sini nga bersikulo, ang “napulog-duha ka tribo sang Israel” amo ang may paglaum nga mabuhi sing dayon sa Paraiso sa duta. Ang 144,000 amo ang ila mangin mga hukom kag mga saserdote.

3, 4. Ano nga halimbawa ang ginapakita sang matutom nga mga hinaplas?

3 Kaangay sang mga saserdote kag mga Levinhon sang una, ginatamod man sang mga hinaplas subong nga isa ka pribilehiyo ang ila pag-alagad. (Num. 18:20) Wala sila nagalaum nga hatagan sila sing palanublion diri sa duta. Kundi suno sa Bugna 4:10, 11, magapadayon sila sa pag-alagad kay Jehova sa langit subong mga hari kag mga saserdote nga kaupod ni Jesucristo.—Ezeq. 44:28.

4 Samtang yari sa duta, ginapakita sang mga hinaplas sa ila pagkabuhi nga si Jehova amo ang ila bahin. Ginauna gid nila ang ila pribilehiyo sa pag-alagad sa Dios. Nagatuo sila sa  halad-gawad ni Cristo kag padayon nga nagasunod sa iya, gani ‘ginapat-od nila ang pagtawag kag pagpili sa ila.’ (2 Ped. 1:10) Magkatuhay ang ila mga kahimtangan kag ikasarang. Apang wala nila ginagamit nga balibad ang ila mga limitasyon agod magpulupatawhay sa pag-alagad sa Dios. Sa baylo, ginauna gid nila ini kag ginahimo ang ila bug-os nga masarangan. Maayo gid sila nga halimbawa sa mga nagalaum nga magpuyo sa paraiso nga duta.

5. Paano si Jehova mangin amo ang bahin sang tanan nga Cristiano, kag ngaa indi ini mahapos?

5 Sa langit man ukon sa duta ang aton paglaum, dapat naton ‘ipanghiwala ang aton kaugalingon kag pas-anon ang aton usok sang pag-antos kag padayon nga magsunod sa Cristo.’ (Mat. 16:24) Amo sina ang ginhimo sang minilyon nga nagasimba sa Dios kag nagasunod kay Cristo, kag nagalaum nga mabuhi sa Paraiso sa duta. Indi sila kontento sa diutay lang nga pag-alagad kon may mahimo pa sila. Madamo ang nagpasimple sang ila kabuhi kag nagpayunir. May mga nagapayunir sing pila ka bulan kada tuig. Ang iban naman nagahimo sang ila labi nga masarangan sa ministeryo bisan pa indi sila makapayunir. Kaangay sila sang matutom nga si Maria, nga naghaplas sang pahumot kay Jesus. Sia nagsiling: “Naghimo sia sang maayo nga buhat sa akon. . . . Ginhimo niya ang iya masarangan.” (Mar. 14:6-8) Ayhan mabudlay ang paghimo sang aton bug-os nga masarangan kay nagakabuhi kita sa kalibutan nga ginagamhan ni Satanas. Apang nagapanikasog gid kita kag nagasalig kay Jehova. Binagbinagon naton ang apat ka paagi para mahimo naton ini.

Pag-una sang Ginharian

6. (a) Paano ginapakita sang mga tawo nga ang ila bahin amo ang ila lamang kabuhi? (b) Ngaa nga mas maayo nga ilugon ang pagtamod ni David?

6 Gintudluan ni Jesus ang iya mga sumulunod nga unahon anay ang Ginharian kag ang pagkamatarong sang Dios. Ginauna sang mga tawo sa kalibutan ang ila personal nga mga interes subong “mga tawo nga kalibutanon nga ang ila bahin diri sining kabuhi.” (Basaha ang Salmo 17:1, 13-15.) Ginabalewala nila ang Manunuga kag nagakonsentrar sa pagpasulhay sang ila kabuhi, pagsagod sang ila pamilya, kag pagtipon sang ila inugpapanubli. Ang ila bahin amo lamang ang ila kabuhi subong. Pero, naghimo si David sing “maayo nga ngalan” kay Jehova, subong sang ginrekomendar sang iya anak nga dapat himuon sang tanan. (Man. 7:1) Kaangay ni Asaf, nahantop ni David nga ang pagpakig-abyan kay Jehova mas importante sangsa iya kaugalingon nga mga interes. Nalipay sia nga maglakat upod sa Dios. Madamo man nga Cristiano subong ang nag-una sang espirituwal nga mga hilikuton sangsa ila trabaho.

7. Paano ginpakamaayo ang isa ka utod kay gin-una niya ang Ginharian?

7 Binagbinaga si Jean-Claude, sa Central African Republic. Gulang sia kag may tatlo ka kabataan. Mabudlay didto ang mangita sing trabaho, kag himuon sang kalabanan ang tanan agod indi lang madulaan sing trabaho. Isa ka adlaw, ginsilingan si Jean-Claude sang manedyer nga panggab-i na ang iya trabaho, sugod sa alas 6:30, Lunes asta Domingo. Ginpaathag ni Jean-Claude nga magluwas nga sakdagon ang iya pamilya sa materyal, dapat man niya sila atipanon sa espirituwal. Nagsiling pa sia nga may responsibilidad man sia sa kongregasyon. Ang manedyer nagsabat: “Kon may obra ka, dapat mo kalimtan ang tanan nga butang, lakip ang imo asawa, kabataan, kag mga problema. Dapat obra ka lang nga obra. Pili ka: relihion ukon trabaho.” Kon ikaw, ano ang himuon mo? Nagasalig si Jean-Claude nga kon madulaan sia sang obra, indi sia pagpabay-an sang Dios. Madamo gihapon sia sing hilikuton sa pag-alagad, kag buligan sia ni Jehova nga maatipan ang mga kinahanglanon sang iya pamilya. Gani nagtambong  sia sa masunod nga miting. Pagkatapos sini, naghimos sia para mag-obra bisan indi sia sigurado kon batunon pa sia. Apang antes sia makalakat, may nagtawag nga ginpahalin ang manedyer kag may obra gihapon sia.

8, 9. Paano naton mailog ang mga saserdote kag mga Levinhon sa paghimo kay Jehova nga amo ang aton bahin?

8 Ang pila nga daw madulaan sing trabaho mahimo mamangkot, ‘Paano ko matungdan ang akon responsibilidad nga saguron ang akon pamilya?’ (1 Tim. 5:8) Bisan ano man ang imo kahimtangan, ikaw mismo makapamatuod nga kon si Jehova amo ang imo bahin kag unahon mo ang pag-alagad sa iya, indi ka gid niya pagpabay-an. Sang ginsilingan ni Jesus ang iya mga disipulo nga pangitaa anay ang ginharian, ginpasalig niya sila: “Ini tanan iban pa nga butang”—subong sang kalan-on, ilimnon, ukon inugsuksok—“idugang sa inyo.”—Mat. 6:33.

9 Binagbinaga ang mga Levinhon nga wala sing palanublion nga duta. Bangod ang putli nga pagsimba amo ang ila panguna nga ginakabalak-an, dapat sila magsandig kay Jehova para sa ila mga kinahanglanon, kay sia nagsiling: “Ako amo ang imo bahin.” (Num. 18:20) Bisan pa nga wala kita nagaalagad sa templo pareho sa mga saserdote kag mga Levinhon, mailog naton sila paagi sa pagsalig nga amanan kita ni Jehova. Ang aton pagsalig sa gahom sang Dios sa pag-aman sang aton mga kinahanglanon labi pa gid nga importante samtang nagahilapit ang katapusan.—Bug. 13:17.

Pag-una sang Pagkamatarong sang Dios

10, 11. Kon parte sa trabaho, paano ginpakita sang iban nga nagasalig sila kay Jehova? Maghatag sing halimbawa.

10 Ginpalig-on man ni Jesus ang iya mga disipulo nga ‘padayon nga pangitaon ang pagkamatarong sang Dios.’ (Mat. 6:33) Nagakahulugan ini nga dapat naton unahon ang talaksan ni Jehova sa kon ano ang husto kag sayop sangsa iya sang tawo. (Basaha ang Isaias 55:8, 9.) Mahimo madumduman mo nga sang una, may mga tawo nga nagatanom sing tabako, nagabaligya sing sigarilyo, nagahanas sa iban sa inaway, kag nagahimo kag nagabaligya sing mga armas. Pero sang natun-an nila ang kamatuoran, nangita sila sing iban nga trabaho, kag nabawtismuhan.—Isa. 2:4; 2 Cor. 7:1; Gal. 5:14.

11 Ang isa ka halimbawa amo si Andrew. Sang nakilala nila sang iya asawa si Jehova, namat-od sila nga alagaron sia. Gusto gid ni Andrew ang iya trabaho apang nag-untat sia. Ngaa? Bangod nagasakdag sa inaway ang organisasyon nga iya ginaubrahan kag determinado sia nga unahon ang pagkamatarong sang Dios. Sang naghalin sia sa iya obra, duha ang iya bata kag ang ila sinuptan para lang sa pila ka bulan. Sa pagtamod sang tawo, daw wala gid sia sing ‘palanublion.’ Nagsalig sia sa Dios kag nangita sing trabaho. Kon balikan niya ang nagligad, napamatud-an gid nila sang iya pamilya nga indi malip-ot ang kamot ni Jehova. (Isa. 59:1) Bangod ginpasimple nila ang ila kabuhi, nakapayunir pa gani sila nga mag-asawa. “May mga tion man nga ginakabalak-an namon ang parte sa amon galastuhon, puluy-an, panglawas, kag pagtigulang,” siling niya. “Pero wala kami ginpabay-an ni Jehova. . . . Masiling gid namon nga ang pag-alagad kay Jehova amo ang pinakadungganon kag pinakamakalilipay nga butang nga mahimo sang tawo.” *Man. 12:13.

12. Ano nga kinaiya ang kinahanglanon agod mauna ang mga talaksan sang Dios? Magsambit sing mga halimbawa sa inyo lugar.

 12 Si Jesus nagsiling sa iya mga disipulo: “Kon may pagtuo kamo kaangay sa kadakuon sang lamigas sang mustasa, makasiling kamo sa sini nga bukid, ‘Saylo didto,’ kag magasaylo ini, kag wala sing imposible sa inyo.” (Mat. 17:20) Unahon mo bala ang mga talaksan sang Dios bisan magaresulta ini sang mga kabudlayan? Kon nagaduhaduha ka nga himuon ini, makighambal sa mga kauturan sa kongregasyon. Pat-od nga mapalig-on ka sang ila mga eksperiensia.

Pag-apresyar sa mga Aman ni Jehova sa Espirituwal

13. Kon himuon naton ang aton labi nga masarangan sa pag-alagad kay Jehova, sa ano kita makasalig?

13 Kon ginapabaloran mo ang imo pribilehiyo sa pag-alagad kay Jehova, makasalig ka nga iaman niya ang imo materyal kag espirituwal nga mga kinahanglanon, kaangay sa ginhimo niya sa mga Levinhon. Hunahunaa si David. Bisan sa kueba sia, makasalig sia nga amanan sia sang Dios. Makasalig man kita kay Jehova bisan daw wala na kita sing mahimo. Dumduma nga sang magkadto si Asaf sa “santuario sang Dios,” nahantop niya kon ano ang iya problema. (Sal. 73:17) Sing kaanggid, dapat man kita magpalapit sa Tuburan sang espirituwal nga pagpalig-on. Bisan ano man ang aton kahimtangan, dapat naton apresyahon ang aton pribilehiyo sa pag-alagad sa Dios. Paagi sa sini, ginapakita naton nga si Jehova amo ang aton bahin.

14, 15. Ano dapat ang aton reaksion kon may pagbag-o sa aton paghangop sa pila ka kasulatan, kag ngaa?

14 Ano ang imo reaksion kon si Jehova, ang Tuburan sang espirituwal nga kasanagan, magpaathag sang “madalom nga mga butang sang Dios” nga masapwan sa Biblia? (1 Cor. 2:10-13) Maayo nga halimbawa ang reaksion ni apostol Pedro sa ginsiling ni Jesus sa Iya mga tagpalamati: “Kon indi kamo magkaon sang unod sang Anak sang tawo kag mag-inom sang iya dugo, indi kamo makatigayon sang kabuhi.” Bangod abi nila literal ini, madamo nga disipulo ang nagsiling: “Ini nga mga pulong makakilibang; sin-o ang makapamati sini?” Nagbalik sila “sa mga butang nga ila ginbiyaan.” Apang si Pedro nagsiling: “Ginuo, kay sin-o kami makadto? Ikaw ang may mga pinamulong sang kabuhi nga walay katapusan.”—Juan 6:53, 60, 66, 68.

15 Wala mahangpan ni Pedro ang ginhambal ni Jesus tuhoy sa pagkaon sang Iya unod kag pag-inom sang Iya dugo. Apang nagsalig ang apostol nga ipahayag sang Dios ang espirituwal nga kasanagan. Kon may pagbag-o sa aton paghangop sa pila ka kasulatan, ginatinguhaan mo bala nga mahangpan ang mga rason sini? (Hulu. 4:18) Sang unang siglo, “nalangkag gid [ang mga taga-Berea] sa pagbaton sa pulong, nga ginausisa sing maayo ang Kasulatan sa adlaw-adlaw.” (Binu. 17:11) Kon ilugon mo sila, labi mo nga maapresyar ang imo pribilehiyo sa pag-alagad kay Jehova kag pagpili sa iya subong amo ang imo bahin.

Pagminyo Lamang sa Ginuo

16. Suno sa 1 Corinto 7:39, paano ang Dios mangin amo ang bahin sang di-minyo nga mga Cristiano?

16 Dapat man dumdumon sang mga Cristiano ang mga katuyuan sang Dios kon parte sa pagtuman sang sugo sa Biblia nga magminyo “lamang sa Ginuo.” (1 Cor. 7:39) Madamo ang wala na lang magminyo sangsa supakon ini nga sugo kag wala sila ginpabay-an sang Dios. Ano ang ginhimo ni David sang ginsubuan sia kag sang daw wala sing nagbulig sa iya? Sia nagsiling: “Ginaula ko ang akon yamo sa atubangan [sang Dios], ginapakita ko sa atubangan niya ang akon kalisdanan. Sang ginpunaw ang akon espiritu sa sulud nakon.” (Sal. 142:1-3) Mahimo nga nabatyagan man ini  sang di-minyo nga si Jeremias nga matutom nga nag-alagad sa Dios sa sulod sang mga tinuig. Matun-an mo ang iya halimbawa sa kapitulo 8 sang libro nga God’s Word for Us Through Jeremiah.

17. Ano ang ginahimo sang utod nga babayi kon ginasubuan sia?

17 “Wala gid ako sing plano nga maglaon,” siling sang isa ka utod nga babayi sa Estados Unidos. “Gusto ko mamana kon may makita ako nga nagakaigo nga palamanhon. Ginapilit ako sang akon iloy nga indi Saksi nga mamana sang bisan sin-o na lang. Gani, ginpamangkot ko sia kon bala luyag niya nga sia ang basulon kon indi magmadinalag-on ang akon pangabuhi. Sang ulihi, sang nakita niya nga maayo ang akon obra, maatipan ko ang akon kaugalingon, kag malipayon ako, nag-untat man lang sia sa pagpilit sa akon.” Ini nga utod ginasubuan man kon kaisa. “Pero,” siling niya, “nagasalig ako kay Jehova. Wala gid niya ako ginapabay-an.” Ano ang nakabulig sa iya nga magsalig kay Jehova? “Ginbuligan ako sang pangamuyo nga mabatyagan nga matuod ang Dios kag nga wala ako nagaisahanon. Ang Labing Mataas sa uniberso nagapamati sa akon, gani paano nga indi ako magbakod kag magmalipayon?” Nagasalig nga “daku ang kalipay sa paghatag sangsa pagbaton,” sia nagsiling: “Ginatinguhaan ko nga buligan ang iban, nga wala nagapaabot nga balusan. Bisan ginapamensar ko pa lang kon ano ang mabulig ko sa iban, nalipay na ako.” (Binu. 20:35) Huo, si Jehova amo ang iya bahin, kag malipayon sia sa iya pribilehiyo sa pag-alagad.

18. Sa ano nga paagi nga si Jehova mangin amo ang aton bahin?

18 Ano man ang imo kahimtangan, mahimo mo nga ang Dios amo ang imo bahin. Kon himuon mo ini, malakip ka sa malipayon niya nga katawhan. (2 Cor. 6:16, 17) Subong resulta, ikaw mangin amo ang bahin ni Jehova, pareho sa iya mga alagad sang una. (Basaha ang Deuteronomio 32:9, 10.) Subong nga ang Israel amo ang bahin sang Dios sa tunga sang mga pungsod, mahimo ka niya pilion nga amo ang iya bahin kag atipanon ka sing mahigugmaon.—Sal. 17:8.

[Nota]

Ano ang Imo Sabat?

Paano si Jehova mangin amo ang imo bahin

• paagi sa pag-una sang Ginharian sang Dios kag sang iya pagkamatarong?

• paagi sa pag-apresyar sang espirituwal nga pagkaon?

• paagi sa pagtuman sa sugo sang Dios nga magminyo lamang sa Ginuo?

[Mga Pamangkot sa Pagtinuon]

[Blurb sa pahina 13]

Si Jehova mangin amo ang aton bahin kon unahon naton ang pag-alagad sa iya

[Retrato sa pahina 15]

Makapalig-on ang halimbawa ni Jeremias