Magdiretso sa kaundan

Magdiretso sa listahan sang kaundan

Ang Miting nga Indi Malipatan

Ang Miting nga Indi Malipatan

 Ang Miting nga Indi Malipatan

“PAGKATAPOS sini nga miting, makasiling ka gid, ‘Indi ko ini malipatan!’” Labi nga nalangkag ang mga tumalambong sang ginhambal ini ni Stephen Lett sang Nagadumala nga Hubon sang mga Saksi ni Jehova. Nagtipon sila para sa ika-126 nga annual meeting sang Watch Tower Bible and Tract Society of Pennsylvania, nga ginhiwat sang Oktubre 2, 2010, sa Assembly Hall sang mga Saksi ni Jehova sa Jersey City, New Jersey, U.S.A. Ano ang pila ka talalupangdon nga hitabo sa sining indi malipatan nga okasyon?

Ang nagabukas nga pamulongpulong ni Utod Lett amo ang mapagsik nga paghinun-anon sang langitnon nga kangga ni Jehova nga ginlaragway sa tulun-an sang Ezequiel. Ining tuman kadaku kag matahom nga kangga nagalaragway sa organisasyon sang Dios, nga ginakontrol niya sing bug-os. Ang langitnon nga bahin sini, nga ginahuman sang espiritu nga mga tinuga, nagapanghikot pareho kadasig sang kilat—ang kadasigon sang panghunahuna ni Jehova, siling ni Utod Lett. Ang dutan-on nga bahin sang organisasyon ni Jehova nga Dios nagapanghikot man. Ginsambit ni Utod Lett ang pila ka talalupangdon nga hitabo sa sining makita nga bahin sang organisasyon sang Dios sang nagligad nga mga tinuig.

Halimbawa, may pila ka sanga talatapan nga gintingob, para madamo nga mga Bethelite sadto sa sini nga mga pungsod ang makakonsentrar na sa pagbantala. Ginpangabay ni Utod Lett ang tumalambong nga padayon nga ipangamuyo ang Nagadumala nga Hubon, ang tiglawas sang ulipon, nga indi lamang mangin matutom kundi mangin maalamon man, ukon mainandamon.—Mat. 24:45-47.

Makapalig-on nga mga Report kag mga Interbyu

Si Tab Honsberger, nga miembro sang Komite sang Sanga sa Haiti, ang naghatag sang makatalandog nga report parte sa linog sang Enero 12, 2010, nga nagpatay sing ginabanabana nga 300,000. Suno sa iya, ginsilingan sang mga klero ang mga tawo nga ginasilutan sang Dios ang mga biktima kay wala sila sing pagtuo apang ginaamligan niya ang mga maayo. Pero linibo ka kriminal ang nahilway kay naguba ang pader sang prisuhan sang paglinog. Madamo sang sinsero nga taga-Haiti ang nalipay sang nahibaluan nila ang kamatuoran kon ngaa mabudlay ang aton tion. Ginkutlo ni Utod Honsberger ang isa ka matutom nga utod nga taga-Haiti nga napatyan sang asawa bangod sang linog: “Asta subong nagahibi gihapon ako. Wala ako makahibalo kon asta san-o ako magalalaw, apang nalipay ako sa gugma sang organisasyon ni Jehova. May paglaum ako, kag luyag ko gid nga ipaambit ini.”

 Si Mark Sanderson, nga miembro na sang pamilya Bethel sa Brooklyn, nagreport parte sa Pilipinas. Miembro sia anay sang Komite sang Sanga sa Pilipinas. Nalipay gid sia sa pagreport sang 32 ka sunodsunod nga peak sang mga manugbantala sang Ginharian kag sang mas madamo nga pagtuon sa Biblia sangsa manugbantala. Ginsugid niya ang eksperiensia sang utod nga si Miguel nga may apo nga lalaki nga ginpatay. Nanikasog gid si Miguel nga mapabilanggo ang kriminal. Sang ulihi, samtang nagabantala sia sa prisuhan, nagkitaay sila sang kriminal. Bisan ginakulbaan si Miguel, malulo kag mainayuhon sia nga nakighambal sa iya. Nahiwatan niya ini sing pagtuon sa Biblia, kag sang ulihi ginbaton sini ang kamatuoran kag ginhigugma si Jehova. Bawtismado na sia karon. Nangin suod sila nga mag-abyan ni Miguel kag subong, ginatinguhaan ni Miguel nga mapanubo ang sentensia sang iya bag-o nga utod. *

Ang masunod nga programa amo ang interbyu nga gindumalahan ni Mark Noumair, instruktor sang Theocratic Schools Department. Gin-interbyu niya ang tatlo ka mag-asawa nga sanday Alex kag Sarah Reinmueller, David kag Krista Schafer, kag Robert kag Ketra Ciranko. Gin-istorya ni Alex Reinmueller, isa ka kabulig sa Publishing Committee, kon paano niya ginserioso ang kamatuoran samtang nagapayunir sa Canada sang 15 anyos pa lang sia, kag masami nagabantala sing isahanon. Sang ginpamangkot sia kon sin-o sa Bethel ang nakapalig-on sa iya, ginsambit niya ang tatlo ka matutom nga utod kag kon paano nila sia ginbuligan nga mag-uswag sa espirituwal. Ginsugid man sang iya asawa nga si Sarah, nga mag-abyan sila sang isa ka utod nga babayi nga tinuig nga nag-antos sa prisuhan sa China bangod sang iya pagtuo. Suno kay Sarah natun-an niya kon paano magsandig kay Jehova paagi sa pangamuyo.

Si David Schafer, nga kabulig man sang Teaching Committee, nagdayaw sa kabakod sang pagtuo sang iya iloy kag nagsugid parte sa manugtroso nga mga kauturan nga nagbulig sa iya nga mag-auxiliary payunir sang pamatan-on sia. Si Krista naman nga iya asawa nagsiling nga daku ang impluwensia sa iya sang tigulang na nga mga Bethelite nga nangin “matutom sa gamay nga butang,” suno sa ginsiling ni Jesus.—Luc. 16:10.

Si Robert Ciranko, isa ka kabulig sa Writing Committee, naghinumdom sa iya mga lolo kag lola, nga lunsay taga-Hungary nga mga imigrante kag hinaplas nga mga Cristiano. Sang bata pa sia, nagdayaw gid sia sa dalagku nga mga kombension nga natambungan niya sang katuigan 1950 kag sang nahibaluan niya  kon daw ano kadaku ang organisasyon ni Jehova. Si Ketra nga iya asawa nagsugid kon paano niya natun-an ang pagkamainunungon sang nagpayunir sia sa kongregasyon nga may mga apostata kag iban pa nga problema. Nagbatas sia kag sang ulihi gin-asayn subong espesyal payunir sa isa ka kongregasyon diin nabatyagan niya ang matuod nga paghiusa.

Si Manfred Tonak naman ang nagreport parte sa Etiopia. Ini nga pungsod kilala na sang tion pa sang Biblia, kag subong sobra na sa 9,000 ang manugbantala diri. Kalabanan sa ila nagapuyo sa kapital, ang Addis Ababa, ukon malapit lang sa sini. Amo nga ang mga nagaistar sa nabaw-ing nga mga lugar indi pirme mabantalaan. Agod mabuligan sila, gin-agda ang Etiopianhon nga mga Saksi nga nagapuyo sa iban nga pungsod nga magbantala sa sini nga mga duog. Madamo ang nagbaton sang pangagda. Ginbuligan nila kag ginpalig-on ang mga kauturan didto kag madamo sila sing nasapwan nga interesado.

Ang isa sa talalupangdon nga bahin sang programa amo ang simposium parte sa mga Saksi ni Jehova sa Rusya kag sa ila pagpakigbato sang ila kinamatarong sa korte. Si Aulis Bergdahl sang Komite sang Sanga sa Rusya ang nagpresentar sang kasaysayan sang paghingabot sa mga Saksi sa Rusya, ilabi na sa Moscow. Ginsugid ni Philip Brumley sang Legal Department sa sanga sang Estados Unidos ang parte sa makahalawathawat nga hitabo sang nagligad nga mga binulan. Suno sa iya, ginpamatian na sang European Court of Human Rights (ECHR) ang siam ka panumbungon nga ginpasaka batok sa mga Saksi. Nasapwan sang Korte nga wala gid sing basihan ang bisan isa lang sa sini, kag sa pila ka kaso ginpaathag pa sang korte ang mga detalye kon ngaa sayop ini nga mga panumbungon. Samtang ginahulat ang resulta sini, nagalaum si Utod Brumley nga ang pamatbat sang Korte may daku nga epekto sa mangin desisyon sang iban nga pungsod.

Pagkatapos sining makalilipay nga balita, ginpahibalo ni Utod Lett nga ginbaton na sang ECHR ang madugay na nga kaso sang mga Saksi ni Jehova sa Pransia parte sa buhis. Pila lang ka kaso ang ginabaton sining ginatahod gid nga Korte. Sa karon, 39 na ka kaso sang mga Saksi ni Jehova ang gin-uyatan sang ECHR, kag 37 sa sini ang nagdaug. Ginpalig-on ni Utod Lett ang tanan nga katawhan ni Jehova nga ilakip ini pirme sa ila pangamuyo.

Ang katapusan nga report naghalin kay Richard Morlan, instruktor sang School for Congregation Elders. Nalipay sia sa pagsugid parte sa eskwelahan kag sa apresasyon sang mga gulang nga nakatambong na sa sini.

 Pamulongpulong sang Iban Pa nga Miembro sang Nagadumala nga Hubon

Si Guy Pierce sang Nagadumala nga Hubon naghatag sing makatalandog nga pamulongpulong parte sa 2011 nga yeartext, “Magdangop sa ngalan ni Jehova.” (Sof. 3:12, NW) Siling niya, sa madamo nga paagi makalilipay ini nga tion sa katawhan ni Jehova pero tion man ini nga mangin serioso. Ang daku nga adlaw ni Jehova malapit na; pero ang mga tawo nagadangop gihapon sa butig nga relihion, pulitika, manggad, panimuot nga bahala na, kag iban pa. Para may matuod kita nga dalangpan, dapat tawgon naton ang ngalan ni Jehova. Nalakip sa sini ang paghibalo, pagtahod, pagsalig sa Persona nga ginarepresentar sina nga ngalan, kag paghigugma sa iya sing bug-os.

Si David Splane sang Nagadumala nga Hubon namulongpulong parte sa makapahunahuna nga tema nga “Nakasulod Ka Na Bala sa Kapahuwayan sang Dios?” Nagsiling sia nga ang kapahuwayan sang Dios wala nagapahangop sang pagpahimunong, kay si Jehova kag ang iya Anak “padayon nga nagapangabudlay” tubtob matapos inang malaragwayon nga adlaw sang kapahuwayan para sa katumanan sang Iya katuyuan sa duta. (Juan 5:17) Gani, paano kita makasulod sa kapahuwayan sang Dios? Indi lamang ang pag-untat sa sala kag pagpakamatarong sang aton kaugalingon ang dapat naton himuon. Dapat kita magtuo kag dumdumon pirme ang katuyuan sang Dios, kag magkooperar sa sini. Kon kaisa, mabudlay ini himuon, apang dapat naton batunon ang laygay kag magkooperar sa panuytoy sang organisasyon ni Jehova. Nangabay si Utod Splane sa mga kauturan nga tinguhaan gid nga makasulod sa kapahuwayan sang Dios.

Ang katapusan nga pamulongpulong ni Anthony Morris sang Nagadumala nga Hubon, may tig-ulo nga “Ano Pa ang Ginahulat Naton?” Subong sang mahigugmaon nga amay, ginpalig-on kag ginpahanumdom ni Utod Morris ang tumalambong sang mga tagna nga wala pa matuman, nga ginahulat sing malangkagon sang mga matutom. Nalakip sa sini ang pagsinggit sing “Paghidait kag kalig-unan!” kag ang kalaglagan sang butig nga relihion. (1 Tes. 5:2, 3; Bug. 17:15-17) Nagsiling man sia nga likawan naton ang maghambal nga “Armagedon na ini,” kon makabati kita sing mga balita nga indi bahin sining mga tagna. Ginpanugda niya nga ilugon ang malipayon, mapailubon, kag nagahulat nga panimuot nga ginlaragway sang Miqueas 7:7. Kag ginpalig-on man niya ang tanan nga “buligan” ang Nagadumala nga Hubon, subong nga ang mga soldado nagabuligay sa tion sang inaway. “Magpakabakud . . . ang inyo tagiposoon,” siling niya, “tanan kamo nga nagalaum sa GINOO.”—Sal. 31:24.

Bilang paghinakop, may pila ka makalilipay kag bag-o nga pahibalo. Ginpahibalo ni Geoffrey Jackson sang Nagadumala nga Hubon nga may ginpasimple nga edisyon sang Ang Lalantawan para sa indi tanto makahangop sang Ingles. Dayon ginpahibalo ni Stephen Lett nga ang Nagadumala nga Hubon may himuon nga kahimusan sa pag-shepherding sa mga manugtatap sa distrito kag sa ila asawa sa Estados Unidos. Ginpahibalo man niya nga ang Ministerial Training School pagatawgon na nga Bible School for Single Brothers. Sugdan man ang Bible School for Christian Couples. Paghanas ini sa mga mag-asawa para magamit pa gid sila sa organisasyon ni Jehova. Ginpahibalo man ni Utod Lett nga ang School for Traveling Overseers and Their Wives kag ang School for Branch Committee Members and Their Wives duha ka beses na nga hiwaton sa Patterson kada tuig, kag puede makatambong liwat ang mga nakaeskwela na.

Gintapos ang programa paagi sa mapainubuson kag sinsero nga pangamuyo sang 97 anyos nga si John E. Barr, nga madugay na nga miembro sang Nagadumala nga Hubon. * Para sa tanan nga nagtambong, ini nga miting indi gid malipatan.

[Mga Nota]

^ par. 7 Tan-awa ang 2011 Tuigan nga Libro sang mga Saksi ni Jehova, pahina 62-63.

^ par. 20 Natapos ni Utod Barr ang iya dutan-on nga kabuhi sang Disiembre 4, 2010.

[Blurb sa pahina 19]

Nalipay gid ang tumalambong sa mga interbyu

[Blurb sa pahina 20]

Ginpakamaayo ni Jehova ang pagbantala sa Etiopia