“Mangin Madinalag-on ang Imo Dalanon”—Paano?

“KADALAG-AN”—makagalanyat gid nga tinaga! Gintinguhaan sang pila ang mataas nga posisyon, nagmadinalag-on, nagmanggaranon kag nangin bantog. Apang ang iban nga naghandum man sini napaslawan lang.

Sa masami, ang kadalag-an nagadepende sa kon diin mo ginapukos ang imo kabuhi. Apang nagadepende man ini sa imo pagpanikasog kag kon paano mo ginagamit ang imo tion kag kusog.

Napamatud-an sang mga Cristiano nga ang pagpakigbahin sing bug-os sa ministeryo makalilipay gid. Madamo nga kabataan kag mga may edad na ang nagmadinalag-on sang ginhimo nila ini nga karera. Apang para sa iban makatalaka ini amo nga ginbaylo nila ini sa iban nga tulumuron. Ngaa nagakatabo ini? Ano ang himuon mo agod indi mo mapahigad ang mas importante nga mga butang? Kag paano “mangin madinalag-on ang imo dalanon”?—Jos. 1:8, NW.

Mga Hilikuton sa Eskwelahan kag Kalingawan

Dapat mangin balanse ang Cristianong mga pamatan-on sa ila pag-alagad sa Dios kag sa iban pa nila nga hilikuton. Ang nagahimo sini mangin madinalag-on sa kabuhi kag takus dayawon.

Apang, ang pila ka pamatan-on tuman kasako sa ila hilikuton sa eskwelahan kag sa ila nanamian nga kalingawan. Ini nga mga hilikuton indi man malain. Apang, dapat nila pamangkuton ang ila kaugalingon: ‘Daw ano kadamo nga tion ang ginagamit ko sa sini? Sin-o ang akon mga kaupod? Ano nga mga panimuot ang puede maglaton sa akon? Kag sa diin sini ginapukos ang akon atension?’ Mahimo marealisar mo nga puede mawili ang isa sa sini kag wala na sia sing tion ukon kusog para sa pag-alagad sa Dios. Gani, maathag nga importante gid ang pagpahamtang sang mga prioridad.—Efe. 5:15-17.

Binagbinaga ang kahimtangan ni Wiktor. * Sia nagsiling: “Sang 12 anyos ako, nag-entra ako sa isa ka volleyball club. Wala madugay, madamo ako sang nadag-an kag mga award. Nangin sikat ako.” Sang ulihi, ginakonsiensia na sia sa epekto sini sa iya espirituwalidad. Isa ka bes, natulugan sia samtang nagabasa sang Biblia. Nabatyagan man niya nga nagakadula ang iya gana sa pagbantala. “Pirme ako kapoy sa volleyball, kag nabatyagan ko nga kapoy man ako sa espirituwal. Nahibaluan ko nga wala ko ginahimo ang akon bug-os nga masarangan.”

Mataas nga Edukasyon

Suno sa Biblia, obligasyon sang isa ka Cristiano nga atipanon kag amanan sing materyal nga kinahanglanon ang iya pamilya. (1 Tim. 5:8) Pero, kinahanglan gid bala nga nakatapos sia sa kolehiyo ukon unibersidad agod mahimo ini?

Importante gid nga binagbinagon sang isa kon ano ang mangin epekto sang pagkuha sing mataas nga edukasyon sa iya kaangtanan kay Jehova. Iilustrar naton ini paagi sa pagbinagbinag sang halimbawa sa Biblia.

Si Baruc sekretaryo ni manalagna Jeremias. May tion nga nadula ang iya apresasyon sa iya mga pribilehiyo sa pag-alagad kay Jehova kag  nangin ambisyuso sia. Nakita ini ni Jehova kag paagi kay Jeremias nagpaandam sia: “Nagapangita ka bala sing mga butang nga dalagku tungud sa imo kaugalingon? Dili sila pagpangitaa.”—Jer. 45:5.

Anong mga “butang nga dalagku” ang ginapangita ni Baruc? Mahimo nagganyat sia nga mangin bantog sa katilingban sang mga Judiyo. Ukon mahimo nga gusto niya magmanggaranon. Bisan diin man sa sini, nabalewala niya ang espirituwal nga mga butang nga amo ang mas importante. (Fil. 1:10) Maathag nga ginpamatian ni Baruc ang paandam ni Jehova kag nangin inagaw niya ang iya kabuhi.—Jer. 43:6.

Ano ang aton matun-an sa sini? Ang laygay nga nabaton ni Baruc nagapakita nga may pila ka butang nga indi husto. Ginapangita niya ang dalagku nga mga butang para sa iya kaugalingon. Kon masakdag mo man lang ang imo kaugalingon, dapat pa bala nga maghinguyang ka sang tion, kuarta, kag kusog para sa dugang nga edukasyon agod lamang matuman ang imo handum ukon ang handum sang imo mga ginikanan kag mga paryente?

Binagbinaga si Grzegorz, nga isa ka computer programmer. Naengganyo sia sang iya mga kaupdanan nga mag-eskwela liwat agod mangin eksperto pa gid sa kompyuter. Sang ulihi wala na sia sing tion sa pag-alagad. Naghinumdom sia: “Pirme ako indi mahim-os. Ginakonsiensia ako kay wala ko malab-ot ang akon espirituwal nga mga tulumuron.”

Pagkawili sa Trabaho

Ginapalig-on sang Pulong sang Dios ang matuod nga mga Cristiano nga mangin mapisan kag masaligan nga empleyado kag mga amo. Si apostol Pablo nagsulat: “Bisan ano ang inyo ginahimo, himua ninyo ini sing bug-os kalag subong nga kay Jehova, kag indi sa mga tawo.” (Col. 3:22, 23) Apang mas importante ang maayo nga kaangtanan sa aton Manunuga sangsa kapisan. (Man. 12:13) Kon ang Cristiano mawili sa iya trabaho, mapahigad niya ang espirituwal nga mga butang.

Ang sobra nga pagtrabaho makapakapoy sa isa ka Cristiano kag makadula sang iya pagkabalanse sa espirituwal kag mapabay-an niya ang iya pamilya. Si Hari Solomon nagsiling nga ang “duha ka tapnay nga may kabudlayan” masami nagaresulta sa “pagpanikasug sa hangin.” Kon tuman kasako sa trabaho ang isa, makapahuol ini sa iya. Mahimo pa gani sia ulipunon sang iya trabaho tubtob sa punto nga lapyuon sia. Kon amo sini, ‘magakalipay pa bala sia sa kaayohan sang bug-os niya nga kinabudlayan’? (Man. 3:12, 13; 4:6) Labaw sa tanan, may kusog pa bala sia sa paghimo sang  iya obligasyon sa pamilya kag sa espirituwal nga hilikuton?

Si Janusz, nga taga-Eastern Europe, nawili gid sa iya negosyo. Naghinumdom sia: “Ginadayaw ako sang mga tawo bangod kabalo ako magmatumato kag ginatapos ko gid ang akon obra. Pero nagluya ang akon espirituwalidad, kag nag-untat ako sa pagbantala. Sang ulihi wala naman ako magtambong sa mga miting. Bangod sa bugal, wala ko ginpamatian ang laygay sang mga gulang kag nagpalayo ako sa kongregasyon.”

Puede Ka Magmadinalag-on

Nabinagbinag na naton ang tatlo ka sitwasyon nga mahimo makaapektar sa espirituwalidad sang isa ka Cristiano. Ara ka bala sa sini nga mga sitwasyon? Kon amo, mabuligan ka  sang masunod nga mga pamangkot, teksto, kag mga komento nga mahibaluan kon bala nagapadulong ka sa kadalag-an.

Mga hilikuton sa eskwelahan kag kalingawan: Daw ano ka kasako sa sini? Ginaagaw bala sini ang tion nga ginagamit mo sang una sa pag-alagad? Wala ka na bala sing gana mag-upod sa mga kauturan? Kon amo, iluga si Hari David, nga nagpangabay kay Jehova: “Pakilalaha ako sang dalan nga akon dapat laktan.”—Sal. 143:8.

Si Wiktor, nga ginsambit kaina, ginbuligan sang isa ka nagalakbay nga manugtatap. Ang manugtatap nakamuno sa iya: “Ngaa volleyball na lang pirme ang ginaistorya mo haw?” “Natapungawan ako,” siling ni Wiktor. “Narealisar ko nga nawili na gid ako. Wala madugay, nagbulag ako sa akon mga abyan sa klab kag nakig-abyan sa kongregasyon.” Sa karon, makugi na nga nagaalagad kay Jehova si Wiktor sa iya kongregasyon. Sia nagsiling: “Pamangkuta ang imo mga abyan, mga ginikanan, ukon mga gulang sang ila naobserbahan sa imo. Ang imo bala mga hilikuton sa eskwelahan nagpasuod ukon nagpalayo sa imo kay Jehova?”

Ngaa indi pag-ipakita sa mga gulang nga ginatinguhaan mo ang dugang nga pribilehiyo sa pag-alagad sa Dios? Maupdan mo bala ukon mabuligan ang mga tigulang sa pagpanindahan ukon sa ulubrahon sa ila balay? Bisan ano man ang imo edad, mahimo ka mangin bug-os tion sa ministeryo, nga nagasugid sa iban kon paano sila magmalipayon pareho sa imo.

Mataas nga edukasyon: Si Jesus nagpaandam batok sa ‘pagpangita sang imo kaugalingon nga himaya.’ (Juan 7:18) Bisan ano man ang luyag mo nga edukasyon, ‘ginapat-od mo bala ang mas importante nga mga butang’?—Fil. 1:9, 10.

Si Grzegorz, nga computer programmer, nagbag-o sang iya pagkabuhi. Sia nagsiling: “Namati ako sa laygay sang mga gulang kag ginpasimple ko ang akon kabuhi. Narealisar ko nga indi ko na kinahanglan mag-eskwela liwat kay ubuson lang sini ang akon tion kag kusog.” Nangin aktibo si Grzegorz sa mga hilikuton sa kongregasyon. Sang ulihi, nakagradwar sia sa ginatawag na subong nga Bible School for Single Brothers. Huo, ‘ginbakal niya ang tion’ para sa pagpasanyog sang iya espirituwal nga edukasyon.—Efe. 5:16.

Trabaho: Tuman ka bala kasako sa imo trabaho amo nga napahigad mo na ang imo pag-alagad? May tion ka pa bala sa pagpakigkomunikar sa imo pamilya? Ginapauswag mo bala ang kalidad sang imo mga bahin sa mga miting sa kongregasyon? Ginaistorya mo bala kag ginapalig-on ang iban? “Magkahadluk sa Dios, kag magbantay sa iya mga sogo,” kag bugana ka nga pakamaayuhon ni Jehova kag ‘magakalipay ka sa kaayohan sang imo kinabudlayan.’—Man. 2:24; 12:13.

Si Janusz, nga ginsambit kaina, wala magmadinalag-on sa iya negosyo. Bangod wala sing kita kag nalubong na sa utang, nagbalik sia kay Jehova. Gintadlong niya ang iya kabuhi kag subong, regular payunir na sia kag gulang sa kongregasyon. Nagsiling sia: “Sang nangin kontento ako sa panguna nga kinahanglanon kag nangin aktibo sa pag-alagad, nabatyagan ko ang kalinong sa hunahuna kag tagipusuon.”—Fil. 4:6, 7.

Binagbinaga sing maayo ang imo mga motibo kag mga prioridad. Ang pag-alagad kay Jehova amo lamang ang makahatag sing mapinadayunon nga kadalag-an. Unaha ini sa imo kabuhi.

Ayhan kinahanglan mo nga magpasibu ukon dulaon ang indi importante nga mga butang agod mapamatud-an mo ang “maayo kag kalahamut-an kag himpit nga kabubut-on sang Dios.” (Roma 12:2) Pat-od nga “mangin madinalag-on ang imo dalanon” kon mag-alagad ka sa iya sing bug-os kalag.

[Nota]

^ par. 8 Gin-islan ang iban nga ngalan.

[Kahon/Retrato sa pahina 31]

Paano Mangin Madinalag-on ang Imo Dalanon?

Tuman kadamo sang mga butang nga nagaagaw sang imo atension, gani ano ang himuon mo para mauna kon ano gid ang importante? Binagbinaga ang imo mga motibo kag prioridad sa bulig sang masunod nga mga pamangkot:

MGA HILIKUTON SA ESKWELAHAN KAG KALINGAWAN

▪ Ano nga mga panimuot ang makaimpluwensia sa imo kon nagapakigbahin ka sa sini nga mga hilikuton?

▪ Daw ano kadamo nga tion ang ginakinahanglan sini?

▪ Mahimo bala nga ini na ang mangin sentro sang imo kabuhi?

▪ Ginaagaw bala sini ang imo tion sa pag-alagad?

▪ Sin-o ang imo mga kaupod?

▪ Mas nanamian ka na bala mag-upod sa ila sangsa imo mga kauturan?

MATAAS NGA EDUKASYON

▪ Kon masakdag mo man lang ang imo kaugalingon, dapat pa bala nga maghinguyang ka sang tion, kuarta, kag kusog para sa dugang nga edukasyon?

▪ Kinahanglan gid bala nga makatapos sa kolehiyo kag unibersidad para masakdag ang imo kaugalingon?

▪ Makatambong ka pa bala sa mga miting?

▪ ‘Ginapat-od mo bala ang mas importante nga mga butang’?

▪ Dapat mo pa bala pabakuron ang imo pagsalig nga iaman ni Jehova ang imo mga kinahanglanon?

TRABAHO

▪ Ang imo bala trabaho nagatugot sa imo nga ‘magkalipay sa kaayohan sang bug-os mo nga kinabudlayan’?

▪ May kusog ka pa bala para sa imo obligasyon sa pamilya kag sa espirituwal nga hilikuton pagkatapos sang imo trabaho?

▪ May tion ka pa bala sa pagpakigkomunikar sa imo pamilya?

▪ Tuman ka bala kasako sa imo trabaho amo nga napahigad mo na ang imo pag-alagad?

▪ Naapektuhan bala sini ang kalidad sang imo mga bahin sa mga miting sa kongregasyon?

[Retrato sa pahina 30]

Ginpaandaman ni Jehova si Baruc batok sa ambisyon