Nalipay Ka Bala sa Pulong sang Dios?

“SANG regular ko nga ginabasa ang Biblia, wala ako nalipay kay nabudlayan ako,” siling ni Lorraine. “Indi ko ini mahangpan, kag pirme lang nagalagaw ang akon pensar.”

Ginbaton man sang iban nga wala sila nalipay magbasa sang Biblia. Apang ginpadayon nila ini kay nahibaluan nila nga dapat gid basahon ang Biblia. Si Marc nagsiling: “Madamo sang upang sa pagbasa sang Biblia kag sa personal nga pagtuon. Kinahanglan gid ang pangamuyo kag panikasog agod mabasa ko ang Biblia kada adlaw.”

Ano ang imo himuon agod maglambo ang imo apresasyon sa Pulong sang Dios? Paano ka malipay sa pagbasa sini? Binagbinaga ang masunod nga mga panugda.

Mga Tulumuron kag Pamaagi

Magpangamuyo kag magkonsentrar antes magbasa sang Biblia. Mangayo sing bulig kay Jehova nga mapalambo mo ang gana sa pagtuon sang iya Pulong. Pangabaya sia nga buksan ang imo hunahuna kag tagipusuon agod mahangpan mo sing maayo ang iya kaalam. (Sal. 119:34) Kon indi mo ini paghimuon, ang imo pagtuon mangin hapaw lang kag madali ka matak-an. Si Lynn nagsiling: “Madasig kon kaisa ang akon pagbasa apang wala ako sing matandaan. Gani nagapangamuyo ako nga mapunggan ko ang akon kaugalingon kag makakonsentrar.”

Pabalori ang imo natun-an. Tandai nga ang paghangop kag pag-aplikar sang mga kamatuoran sa Biblia nagakahulugan sang imo kabuhi. Gani, panikasugi gid nga makakita sing praktikal nga mga punto nga puede mo iaplikar. “Ginapangita ko ang mga punto nga makabulig sa akon nga marealisar ang akon sayop nga mga panimuot kag motibo,” siling ni Chris. “Nalipay gid ako nga ang Biblia kag ang aton mga publikasyon may mga impormasyon nga para gid sa akon, bisan pa wala ako makilala sang mga manunulat sini.”

Magpahamtang sing mga tulumuron nga masarangan mo. Tinguhai nga may bag-o ka nga matun-an sa mga karakter sa Biblia. Matun-an mo ang makawiwili nga mga butang parte sa ila kon gamiton mo ang Insight on the Scriptures ukon ang Watch Tower Publications Index. Samtang ginatun-an mo ang ila mga kinaiya kag mga personalidad, mangin matuod gid sila sa imo.

Tun-i ang dugang pa gid nga mga paathag sa Kasulatan. (Binu. 17:2, 3) Ginhimo ini ni Sophia. “Handum ko nga matun-an kag mapalambo ang bag-o nga mga paathag nga magamit ko sa ministeryo kag sa iban pa nga kahigayunan, agod mapaathag ko sing maayo ang mga kamatuoran sa Biblia. Maayo gid nga bulig ang Lalantawan,” siling niya.—2 Tim. 2:15.

Handurawa ang mga hitabo sa Biblia. “Ang pulong sang Dios buhi,” suno sa Hebreo 4:12. Samtang ginabasa mo ang Kasulatan, buhia ang mga karakter sa Biblia paagi sa pag-imadyin sang mga nagakatabo sa ila. Tilawi nga pamatian ang ila nabatian kag batyagon ang ila ginabatyag. Hunahunaa ang mga hitabo nga kaanggid sa imo naeksperiensiahan. Tun-i kon paano nila ini gin-atubang.  Makabulig ini nga mahangpan mo kag indi malipatan ang imo nabasa sa Biblia.

Tun-i sing maayo ang mga teksto nga mabudlay hangpon kag kon paano ini ginpaathag. Maghatag sing bastante nga tion sa kada pagtuon. Mahimo ka makasumalang sing mga pamangkot nga dapat mo i-research. Tun-i ang mga tinaga nga bag-o sa imo, mga footnote, kag mga cross-reference sang Biblia. Samtang nahangpan mo kag ginaaplikar ang imo natun-an, labi nga mangin makalilipay ang Pulong sang Dios. Makasiling ka dayon pareho sa ginsiling sang salmista: “Ang imo [Jehova] mga pagpamatuud ginkuha ko subong nga panublion sa gihapon; kay sila kasadya sang akon tagiposoon.”—Sal. 119:111.

Indi magdali kon nagatuon. Mangin makatarunganon sa imo iskedyul para sa personal nga pagtuon. Hatagi man sing tion ang paghanda para sa mga miting sa kongregasyon. “Pirme ako nagadali amo nga indi ako makakonsentrar,” siling ni Raquel. “Mas epektibo sa akon kon diutay lang ang akon tun-an sa kada sesyon. Makabenepisyo gid ako.” Si Chris nagbaton: “Kon ginadalidali ko ang pagtuon, ginakonsiensia ako kay wala ako sing matandaan. Wala ini nagatudok sa akon tagipusuon.” Gani, indi magdali kon nagatuon.

Palambua ang handum sa pulong sang Dios. Si apostol Pedro nagsiling: “Subong sang bag-o lang nabun-ag nga mga lapsag, palambua ang paghandum sa wala simbog nga gatas nga iya sang pulong, agod paagi sini magtubo kamo sa kaluwasan.” (1 Ped. 2:2) Natural na sa mga lapsag nga maghandum sang gatas. Pero suno sa Kasulatan, kinahanglan pa naton palambuon ang handum sa pulong sang Dios. Bisan isa lang ka pahina sang Biblia ang imo basahon kada adlaw, magapatubo ini sang imo gana. Mabudlay ini sa primero, pero mangin makalilipay ini sa ulihi.

Pamalandungi ang mga teksto. Makabenepisyo ka gid kon pamalandungan mo ang imo ginabasa. Makabulig ini sa imo nga maangot-angot ang mga topiko nga imo ginatun-an. Sa ulihi, ining espirituwal nga kaalam magasugponsugpon kaangay sang kulintas nga perlas nga isa ka malahalon nga pagkabutang.—Sal. 19:14; Hulu. 3:3.

 Maayo nga Paggamit sang Tion

Kinahanglan gid ang panikasog agod mangin batasan ang pagtuon sing maayo, pero daku gid ang kaayuhan sini. Magabulig ini nga mag-uswag ang imo paghangop sa Biblia. (Heb. 5:12-14) Ang paghantop kag kaalam nga matigayon mo sa Biblia magahatag sa imo sing kalipay kag kalinong. Ang kaalam gikan sa Pulong sang Dios “kahoy sang kabuhi” sa mga nagakapyot kag nagaaplikar sini.—Hulu. 3:13-18.

Ang madalom nga pagtuon sa Pulong sang Dios makahatag sa imo sing tagipusuon nga may paghangop. (Hulu. 15:14) Makabulig ini sa imo nga maglaygay pasad sa Biblia. Kon ang imo mga desisyon pasad sa Kasulatan kag sa mga publikasyon sang “matutom kag mainandamon nga ulipon,” maeksperiensiahan mo ang kalipay kag kalinong nga madulot sang inspirado nga Pulong ni Jehova. (Mat. 24:45) Mangin positibo ang imo pagtamod kag magakabuhi ka suno sa Pulong ni Jehova. Dugang pa, magabakod ang imo kaangtanan sa Dios.—Sal. 1:2, 3.

Ang daku nga gugma sa Dios magapahulag sa imo nga ipaambit ang imo pagtuo. Makalilipay man ini. Ginapanikasugan ni Sophia nga magsaulo kag maggamit sing sarisari nga teksto agod makuha ang interes sang mga tagbalay. Gani nangin epektibo kag makagalanyat ang iya ministeryo. “Makalilipay gid makita ang reaksion sang mga tawo sa ginasiling sang Biblia,” siling niya.

Apang, ang pinakadaku nga kaayuhan sa pagkalipay sa Pulong sang Dios amo ang suod nga kaangtanan kay Jehova. Ang pagtuon sa Biblia makabulig nga mahibaluan ang iya mga talaksan kag maapresyar ang iya gugma, kaalwan, kag katarungan. Wala na sing mas importante kag mas makalilipay sangsa sini. Tun-i pirme ang Pulong sang Dios. Amo ini ang pinakamaayo nga paggamit sang tion.—Sal. 19:7-11.

[Kahon/Mga Retrato sa pahina 5]

PAGBASA SANG PULONG SANG DIOS: MGA TULUMURON KAG PAMAAGI

▪ Magpangamuyo kag magkonsentrar antes magbasa sang Biblia.

▪ Pabalori ang imo natun-an.

▪ Magpahamtang sing mga tulumuron nga masarangan mo.

▪ Tun-i ang dugang pa gid nga mga paathag sa Kasulatan.

▪ Handurawa ang mga hitabo sa Biblia.

▪ Tun-i sing maayo ang mga teksto nga mabudlay hangpon kag kon paano ini ginpaathag.

▪ Indi magdali kon nagatuon.

▪ Palambua ang handum sa pulong sang Dios.

▪ Pamalandungi ang mga teksto.

[Retrato sa pahina 4]

Handurawa nga didto ka sa hitabo nga imo ginabasa sa Biblia