Cristianong mga Pamilya—“Maghanda”

“Maghanda . . . , bangod sa oras nga wala ninyo ginahunahuna magaabot ang Anak sang tawo.”—LUC. 12:40.

1, 2. Ngaa dapat naton sundon ang sugo ni Jesus nga “maghanda”?

“KON ang Anak sang tawo mag-abot sa iya himaya” kag “painpainon niya ang katawhan,” ano ang matabo sa imo kag sa imo pamilya? (Mat. 25:31, 32) Matabo ini sa oras nga wala naton ginahunahuna, gani importante gid nga sundon naton ang laygay ni Jesus nga “maghanda”!—Luc. 12:40.

2 Ginbinagbinag sa nagligad nga artikulo kon paano makabulig ang kada isa agod ang bug-os nga pamilya makapabilin nga nagamata sa espirituwal. Mahimo nila ini paagi sa serioso nga pag-abaga sang tagsa nila ka responsibilidad. Hambalan naman naton ang iban pa nga paagi nga makaamot sa espirituwalidad sang aton pamilya.

Hupti nga “Simple” ang Inyo Mata

3, 4. (a) Sa ano dapat magbantay ang Cristianong mga pamilya? (b) Ano ang buot silingon sang paghupot sang mata nga “simple”?

3 Agod mangin handa ang mga pamilya sa  pag-abot ni Cristo, dapat sila magbantay kag maghalong nga indi mawili sa makagalanyat nga mga butang nga wala sing labot sa matuod nga pagsimba. Bangod madamo nga pamilya ang nasiod sang materyalismo, binagbinaga ang ginsiling ni Jesus parte sa paghupot sang “simple” nga mata. (Basaha ang Mateo 6:22, 23.) Subong nga ang isa ka suga makaiwag sang aton alagyan para indi kita makasandad, ang ginapasulod naton sa malaragwayon nga ‘mata sang aton tagipusuon’ makabulig man agod indi kita makasandad sa espirituwal.—Efe. 1:18.

4 Maathag lang ang panulok kon wala sing diperensia ang mata kag nakapokus sa isa lang ka butang. Sing kaanggid, agod mangin simple ang mata sang aton tagipusuon, dapat nga isa lang ang aton katuyuan. Sa baylo nga magpokus sa pag-aman sang materyal nga mga kinahanglanon sang aton pamilya, ginasentro naton ang aton panulok sa espirituwal nga mga butang. (Mat. 6:33) Ginapahangop sini nga dapat kita mangin kontento sa materyal nga mga aman nga aton matigayon kag unahon sa aton kabuhi ang pag-alagad sa Dios.—Heb. 13:5.

5. Paano ginpakita sang isa ka dalagita nga ang iya “mata” nakapokus sa pag-alagad sa Dios?

5 Maayo gid ang resulta kon hanason ang mga kabataan nga mangin simple ang ila mata! Binagbinaga ang halimbawa sang dalagita nga taga-Etiopia. Maalam sia, gani sang nakatapos sia sa pag-eskwela, gintanyagan sia nga mangin iskolar para sa mas mataas nga edukasyon. Apang wala niya ini ginbaton kay nakapokus ang iya mata sa pag-alagad kay Jehova. Wala magdugay, gintanyagan sia sing obra nga 4,200 ka dolyar (U.S.) ang sueldo kada bulan. Tuman ini kadaku kon ikumparar sa minimum nga sueldo sa ila pungsod. Apang ang iya “mata” nakapokus sa pagpayunir. Ginpangindian niya ang obra bisan wala pa sia makalisensia sa iya ginikanan. Ano ang reaksion sang iya mga ginikanan? Nalipay gid sila kag gindayaw nila ang iya ginhimo!

6, 7. Sa ano nga katalagman kita dapat “magbantay”?

6 Maathag ang paandam ni Jesus sa Mateo 6:22, 23 parte sa kakagod. Wala gingamit ni Jesus ang termino nga “komplikado” nga amo ang kabaliskaran sang “simple” kundi ang termino nga “malaut.” Ang ‘malaut nga mata’ “malain; mahisaon,” nga buot silingon, mahamkunon ukon makagod. (Mat. 6:23) Ano ang pagtamod ni Jehova sa pagkamahamkunon ukon kakagod? “Ang pagpakighilawas kag ang tanan nga sahi sang kahigkuan ukon kakagod [ukon pagkamahamkunon] indi gid paghinambitan sa tunga ninyo, subong nga nagakaigo sa mga tawo nga balaan.”—Efe. 5:3.

7 Ang kakagod mahapos makita sa iban pero mabudlay ini makita sa aton kaugalingon. Gani, maalamon gid nga pamatian naton ang laygay ni Jesus: “Magbantay kamo kag mag-andam batok sa tanan nga sahi sang pagkamahamkunon.” (Luc. 12:15) Agod mahimo ini dapat naton usisaon kon sa ano nakapokus ang aton tagipusuon. Dapat pamensaron sing maayo sang Cristianong pamilya kon daw ano kadamo nga tion kag kuarta ang ila ginahinguyang sa mga kalingawan kag sa pagtipon sing mga pagkabutang.

8. Kon parte sa pagbakal, paano kita ‘makabantay’?

8 Antes ka magbakal sang isa ka butang, indi lang ang inugbakal ang dapat mo pensaron. Pamangkuta man ang imo kaugalingon: ‘Magamit ko bala ini pirme kag masarangan ko bala ini imentinar? Daw ano ka dugay antes ako makahibalo sa paggamit sini?’ Mga pamatan-on, indi pagpatihi ang mga pasayod kag mamilit nga baklan kamo sang malahalon nga mga butang nga indi man kinahanglanon. Mangin makatarunganon. Subong man, hunahunaa ninyo kon bala ang pagbakal sini makabulig sa inyo pamilya nga mangin handa sa pag-abot sang Anak sang  tawo. Magtuo sa saad ni Jehova: “Indi ko gid kamo pagbayaan ukon pagpatumbayaan.”—Heb. 13:5.

Lab-uta ang Espirituwal nga mga Tulumuron

9. Paano makabulig sa pamilya ang paglab-ot sang espirituwal nga mga tulumuron?

9 Ang isa pa ka paagi nga mapalig-on sang kada isa ang iya pagtuo kag makaamot sa espirituwalidad sang pamilya amo ang pagpahamtang sing mga espirituwal nga tulumuron kag paglab-ot sa sini. Ang paghimo sini makabulig sa mga pamilya nga mahibaluan ang ila pag-uswag kag kon ano ang dapat nila unahon agod mapahamut-an si Jehova.—Basaha ang Filipos 1:10.

10, 11. Subong pamilya, ano ang inyo mga tulumuron subong, kag ano pa gid ang luyag ninyo lab-uton?

10 Ang pagpahamtang sing bisan simple lang nga mga tulumuron nga mahapos lab-uton sang mga katapo sang pamilya mabungahon gid. Halimbawa, himua nga tulumuron sang pamilya ang pagbinagbinag sang teksto kada adlaw. Paagi sa ila mga komento mahibaluan sang ulo sang pamilya ang espirituwalidad sang kada isa. Kon tulumuron nila nga basahon ang Biblia sing tingob kada adlaw, may kahigayunan man ang kabataan nga pauswagon ang ila pagbasa kag paghangop sa mensahe sang Biblia. (Sal. 1:1, 2) Kag indi bala nga dapat mangin tulumuron naton nga pauswagon ang kalidad sang aton pangamuyo? Maayo man nga tulumuron nga palambuon pa gid ang bunga sang espiritu. (Gal. 5:22, 23) Ukon ngaa indi ninyo pagtun-an kon paano makapakita sing pasunaid sa inyo maistorya sa latagon? Ang paghimo sini subong pamilya makabulig sa kabataan nga magmainawaon, kag sa ulihi mahimo  handumon man nila nga magregular payunir ukon magmisyonero.

11 Ngaa indi magpahamtang sing tulumuron nga masarangan mo kag sang imo pamilya? Madugangan bala ninyo ang inyo tion sa ministeryo? Makatuon bala kamo sang mga paagi sa pagpanaksi sa telepono, sa kalye, ukon sa mga duog sang negosyo? Makabulig bala kamo sa lugar nga diutay lang ang Saksi? May isa bala sa inyo nga puede magtuon sing bag-o nga lenguahe?

12. Ano ang dapat himuon sang ulo sang pamilya agod mag-uswag sa espirituwal ang iya pamilya?

12 Subong ulo sang pamilya, hibalua kon ano ang dapat pauswagon sang imo pamilya sa espirituwal. Agod mahimo ini, dapat ka magpahamtang sing espesipiko nga mga tulumuron. Dapat realistiko ini kag bagay sa inyo sirkunstansia kag ikasarang. (Hulu. 13:12) Siempre pa, nagakinahanglan ini sing tion. Gani, buhini ang inyo tion sa pagtan-aw sang TV kag gamita ini sa espirituwal nga mga hilikuton. (Efe. 5:15, 16) Panikasugi nga malab-ot ang tulumuron sang inyo pamilya. (Gal. 6:9) Ang pag-uswag sang pamilya nga may espirituwal nga tulumuron “madayag sa tanan nga tawo.”—1 Tim. 4:15.

Mangin Regular sa Pangpamilya nga Pagsimba

13. Ano nga pagbag-o ang ginhimo sa iskedyul sang mga miting sa kongregasyon, kag ano nga mga pamangkot ang dapat naton pamalandungan?

13 Ang pinakamaayo nga bulig para ‘makahanda’ ang mga pamilya sa pag-abot sang Anak sang tawo amo ang daku nga pagbag-o sa mga miting sugod sang Enero 1, 2009. Gindula ang adlaw para sa Pagtinuon sang Kongregasyon sa Libro kay gintingob ini sa Teokratikong Eskwelahan Para sa Ministeryo kag Miting sa Serbisyo. Ginhimo ini agod may kahigayunan ang Cristianong mga pamilya nga mapabakod ang ila espirituwalidad paagi sa pag-iskedyul sang isa ka gab-i kada semana para sa ila pangpamilya nga pagsimba. Pagligad sang pila ka tuig, pamangkuton naton ang aton kaugalingon: ‘Ginagamit ko bala ini nga tion para sa Pangpamilya nga Pagsimba ukon pagtuon sing personal? Nasunod ko bala ang katuyuan sini nga kahimusan?’

14. (a) Ano ang panguna nga katuyuan sang regular nga Pangpamilya nga Pagsimba ukon personal nga pagtuon? (b) Ngaa importante ang pagpain sing tion para sa regular nga pagtuon?

14 Ang panguna nga katuyuan sang regular nga Pangpamilya nga Pagsimba ukon sang personal nga pagtuon amo ang mangin suod pa gid sa Dios. (Sant. 4:8) Kon regular kita nga nagatuon sing Biblia kag nagadugang ang aton ihibalo parte sa Manunuga, magalig-on ang aton kaangtanan sa iya. Samtang nagasuod kita kay Jehova, labi nga higugmaon naton sia sing ‘bug-os tagipusuon, kalag, hunahuna, kag kusog.’ (Mar. 12:30) Magadugang man ang aton handum nga tumanon kag ilugon sia. (Efe. 5:1) Gani ang sekreto agod mangin ‘handa’ sa espirituwal ang tanan nga katapo sang pamilya samtang nagahulat sa gintagna nga “dakung kapipit-an” amo ang regular nga Pangpamilya nga Pagsimba. (Mat. 24:21) Importante gid ini para sa aton kaluwasan.

15. Ano ang epekto sang Pangpamilya nga Pagsimba sa pagtamdanay sang mga katapo sang pamilya?

15 Ang kahimusan sang Pangpamilya nga Pagsimba may isa pa ka katuyuan. Makabulig ini para magsuod pa gid ang pamilya. Ang pagbinagbinag sang espirituwal nga mga butang sing tingob kada semana may daku nga epekto sa pagtamdanay sang kada isa. Labi man nga magasuod ang mag-asawa kon magbayluhanay sila sang espirituwal nga mga bahandi nga ila natun-an! (Basaha ang Manugwali 4:12.) Ang mga ginikanan kag kabataan nga nagasimba sing tingob nahiusa  sa gugma, ang “himpit nga higot sang paghiusa.”—Col. 3:14.

16. Isugid kon paano nakabenepisyo ang tatlo ka utod nga babayi sa ila pagpain sing tion para sa pagtuon sing Biblia.

16 Binagbinaga kon paano nakabenepisyo ang tatlo ka utod nga babayi sa kahimusan sang pagpain sing tion para sa pagtuon sing Biblia kada semana. Bisan indi sila paryentihanay, ining tatlo ka balo nagaistar sa isa lang ka siudad kag madugay na nga amigahay. Bangod luyag nila nga mag-updanay pirme, nagpain sila sing isa ka gab-i kada semana indi lamang para magtipontipon kundi magpalig-unanay sa espirituwal. Gintun-an nila ang libro nga “Pagpanaksi sing Maid-id Tuhoy sa Ginharian sang Dios.” “Nasadyahan gid kami, amo nga pirme sobra isa ka oras ang amon pagtuon,” siling sang isa sa ila. “Ginahanduraw namon ang nagakatabo sa aton kauturan sang unang siglo kag ginahambalan kon ano ang amon himuon pananglitan matabo man ini sa amon. Dayon ginagamit namon sa ministeryo ang amon mga natun-an. Gani nangin mas makalilipay kag epektibo ang amon pagbantala kag paghimo sing disipulo.” Magluwas nga nagbakod ang ila espirituwalidad, nangin suod pa gid sila nga tatlo. “Ginapabaloran gid namon ini nga kahimusan,” siling nila.

17. Ano ang makaamot sa kadalag-an sang Pangpamilya nga Pagsimba?

17 Kamusta ikaw? Paano ka nakabenepisyo sa pangpamilya nga pagsimba ukon personal nga pagtuon? Indi ka gid makabenepisyo sa sini nga kahimusan kon talagsa mo lang ini ginahimo. Dapat handaan sang tagsa ka katapo sang pamilya ang ila gintalana nga oras sang pagtuon. Indi pagtuguti nga maupangan kamo sang labaylabay nga mga butang. Importante man nga ibagay ang inyo tun-an sa kinahanglanon sang inyo pamilya. Ano ang mahimo mo para mangin makalilipay ang inyo pagtuon? Sunda ang epektibo nga pamaagi sa pagtudlo, kag himua nga makagalana ang pagtuon.—Sant. 3:18. *

‘Magpabilin nga Nagamata’ kag “Maghanda”

18, 19. Ano ang epekto sa imo kag sa imo pamilya kay nahibaluan mo nga madali na lang ang pag-abot sang Anak sang tawo?

18 Ang paglala sang kahimtangan sang kalibutan subong nagapakita nga sugod sang 1914, ang malaut nga kalibutan ni Satanas yara na sa katapusan nga mga adlaw sini. Madali na lang ang Armagedon. Sa indi madugay magaabot na ang Anak sang tawo kag magapadapat sang paghukom ni Jehova sa mga di-diosnon. (Sal. 37:10; Hulu. 2:21, 22) Ano ang epekto sini nga ihibalo sa imo kag sa imo pamilya?

19 Ginapamatian mo bala ang laygay ni Jesus nga huptan nga “simple” ang imo mata? Samtang ginatinguhaan sining kalibutan ang manggad, dungog, ukon gahom, ginatinguhaan bala sang imo pamilya ang espirituwal nga mga butang? Ginasunod mo bala ang kahimusan sang Pangpamilya nga Pagsimba ukon personal nga pagtuon? Nakabenepisyo ka bala sa sini? Subong sang ginbinagbinag sa nagligad nga artikulo, ginatungdan mo bala ang imo responsibilidad subong bana, asawa, ukon anak, agod ‘makapabilin nga nagamata’ ang imo pamilya? (1 Tes. 5:6) Kon ginahimo mo ini, ‘makahanda’ ka sa pag-abot sang Anak sang tawo.

[Nota]

^ par. 17 Para sa mga panugda kon paano magtuon kag kon paano mangin praktikal kag makalilipay ang Pangpamilya nga Pagsimba, tan-awa ang Oktubre 15, 2009, nga Ang Lalantawan, pahina 29-31.

Ano ang Imo Natun-an?

• Ipaathag kon paano ‘makahanda’ ang Cristianong mga pamilya paagi sa . . .

paghupot sang “simple” nga mata.

pagpahamtang kag paglab-ot sang espirituwal nga mga tulumuron.

regular nga Pangpamilya nga Pagsimba.

[Mga Pamangkot sa Pagtinuon]

[Retrato sa pahina 13]

Ang “simple” nga mata magapahulag sa aton nga isikway ang mga pangganyat sang kalibutan