Ginaapresyar Mo Bala ang mga Pagpakamaayo nga Imo Nabaton?

SANG milagruso nga ginluwas ang mga Israelinhon gikan sa pagkaulipon sa Egipto, nalipay gid sila kay hilway na nila nga masimba si Jehova. (Ex. 14:29–15:1, 20, 21) Apang wala madugay, nagbag-o ang ila panimuot. Nagsugod na sila sa pagreklamo. Ngaa? Bangod nagkonsentrar sila sa mga kabudlayan nga ila naeksperiensiahan sa kahanayakan kag wala na nila ginpabaloran ang ginhimo ni Jehova para sa ila. Nagsiling sila kay Moises: “Ngaa bala ginpataklad ninyo kami gikan sa Egipto agud nga mapatay sa kamingawan? Kay wala sing kalan-on kag wala sing tubig, kag ang amon kalag nasum-uran sini nga kalan-on [manna] nga talamayon.”—Num. 21:5.

Mga siniglo sang ulihi, si Hari David sang dumaan nga Israel nag-amba: “Nagsalig ako sa imo malig-on nga paghigugma; magakalipay ang akon tagiposoon sa imo kaluwasan. Magaambahan ako sa GINOO, bangud nga naghisayo sia sing mabuganaon sa akon.” (Sal. 13:5, 6) Wala gid ginkalimtan ni David ang malig-on nga paghigugma ni Jehova sa iya. Sa baylo, ginapamalandungan niya ini pirme. (Sal. 103:2) Madamo man sang butang nga ginhimo si Jehova para sa aton nga indi naton dapat pagpasapayanan. Binagbinagon naton ang pila sang mga pagpakamaayo nga ginaagom naton sa karon.

“Malapit kay Jehova”

Ang salmista nag-amba: “Malapit kay Jehova ang mga nagakahadlok sa iya.” (Sal. 25:14, NW) Daw ano nga pribilehiyo para sa di-himpit nga mga tawo nga matigayon ang suod nga kaangtanan kay Jehova! Apang, kamusta kon masako kita sa matag-adlaw nga mga hilikuton amo nga diutay na lang ang aton tion sa pagpangamuyo? Hunahunaa kon ano ang mangin epekto sini sa aton kaangtanan kay Jehova. Subong aton Abyan, luyag ni Jehova nga magsalig kita sa iya kag ipabutyag sa iya sing tinagipusuon ang aton mga ginakahadlukan, mga handum, kag mga  kabalaka. (Hulu. 3:5, 6; Fil. 4:6, 7) Gani indi bala nga dapat gid naton binagbinagon ang kalidad sang aton mga pangamuyo?

Sang gin-usisa sang pamatan-on nga Saksi nga si Paul ang iya mga pangamuyo, narealisar niya nga kinahanglan niya ini pauswagon. * Nagsiling sia, “Natalupangdan ko nga daw sulitsulit na lang nga mga tinaga ang akon ginagamit kon mangamuyo ako kay Jehova.” Sang nag-research si Paul sa Watch Tower Publications Index, natun-an niya nga may yara gali mga 180 ka pangamuyo nga narekord sa Biblia. Mga pangamuyo ini sang mga alagad ni Jehova sang una nga nagpabutyag sang ila nasulod nga mga balatyagon. Si Paul nagsiling: “Paagi sa pagpamalandong sa sinang mga halimbawa sa Kasulatan, natun-an ko nga mangin espesipiko sa akon mga pangamuyo. Nakabulig ini sa akon nga isugid kay Jehova ang akon nabatyagan. Sa karon, nalipay ako nga mangin suod sa iya sa pangamuyo.”

“Pagkaon sa Nagakaigo nga Tion”

Ang isa pa ka pagpakamaayo nga ginhatag ni Jehova sa aton amo ang kamatuoran nga aton natun-an sa Biblia. Bangod sa bugana nga espirituwal nga pagkaon nga ginaagom naton, may rason gid kita nga “magaamba sa kalipay sang tagiposoon.” (Isa. 65:13, 14) Apang, dapat kita gihapon maghalong sa indi maayo nga mga impluwensia nga mahimo makadula sang aton kakugi sa kamatuoran. Halimbawa, ang pag-usisa sa propaganda sang mga apostata mahimo magdagta sang aton panghunahuna kag magpalas-ay sang aton gana sa espirituwal nga “pagkaon sa nagakaigo nga tion” nga ginaaman ni Jehova paagi sa “matutom kag mainandamon nga ulipon.”—Mat. 24:45-47.

Si André nga madugay na nga nagaalagad kay Jehova, may mapait nga inagihan sang nagpadala sia sa impluwensia sang mga apostata. Naghunahuna sia nga indi man malain ang pagtan-aw sing makadali sa Web site sang mga apostata. Naghinumdom sia: “Sang primero, naganyat ako sa ginahambal sang mga apostata nga kamatuoran. Samtang dugang ko nga ginausisa ang ila mga ginsiling, labi man ako nga nahaylo nga magbiya sa organisasyon ni Jehova. Apang sang ulihi, sang gin-research ko ang mga argumento sang mga apostata batok sa mga Saksi ni Jehova, nakita ko kon daw ano ka malalangon ang ila pahito. Ang mga impormasyon nga wala sa konteksto amo ang ila ‘mabakod nga ebidensia’ batok sa aton. Gani, nagdesisyon ako nga magbasa liwat sang aton mga publikasyon kag magtambong sa mga miting. Wala madugay narealisar ko kon daw ano kadamo sang akon nawasi.” Maayo na lang kay nakabalik si André sa kongregasyon.

“Ang Bug-os nga Paghiliutod”

Ang aton mahigugmaon kag nahiusa nga paghiliutod isa ka pagpakamaayo gikan kay Jehova. (Sal. 133:1) Amo ini ang rason kon ngaa nagsulat si apostol Pedro: “Higugmaa ang bug-os nga paghiliutod.” (1 Ped. 2:17) Subong bahin sang Cristianong paghiliutod, nalipay kita sa pagsakdag sang aton espirituwal nga mga amay, iloy, utod nga lalaki, kag mga utod nga babayi.—Mar. 10:29, 30.

 Apang kon kaisa, may mga kahimtangan nga mahimo bangdan sang mga indi paghangpanay. Halimbawa, mahimo kita maakig sa kasaypanan sang iban kag daw sala na lang nila ang aton ginabantayan. Kon matabo ini, maayo nga dumdumon naton nga ginahigugma ni Jehova ang iya mga alagad bisan pa di-himpit sila. Dugang pa, “kon magsiling kita: ‘Wala kita sing sala,’ ginapatalang naton ang aton kaugalingon kag ang kamatuoran wala sa aton.” (1 Juan 1:8) Indi bala nga dapat lang nga tinguhaan naton nga ‘padayon nga batason ang isa kag isa kag patawaron sing kinabubut-on ang isa kag isa’?—Col. 3:13.

Ang pamatan-on nga si Ann nakatuon sa mabudlay nga paagi kon daw ano ka importante ang pagpakig-upod sa mga kauturan. Kaangay sang buhaha nga anak sa ilustrasyon ni Jesus, nagpalayo sia sa Cristianong kongregasyon. Sang ulihi, nakamarasmas sia kag nagbalik sa kamatuoran. (Luc. 15:11-24) Ano ang natun-an ni Ann sa iya eksperiensia? Nagsugid sia: “Sa karon nga nakabalik na ako sa organisasyon ni Jehova, ginapabaloran ko na ang tanan nga kauturan bisan pa di-himpit sila. Sang una, madali ko lang makita ang ila mga kaluyahon. Apang sa karon wala ko na ginatugutan nga maupangan sini ang akon maayo nga kaangtanan sa mga kauturan. Wala gid sing butang sa kalibutan nga takus ibaylo sa aton espirituwal nga paraiso.”

Apresyaha Pirme ang mga Pagpakamaayo nga Imo Nabaton

Ang aton paglaum sa Ginharian sang Dios isa ka bahandi nga indi matupungan. Daw ano nga kalipay ang aton nabatyagan sang una naton nga nahibaluan ini nga paglaum! Daw kaangay kita sang manugpatikang sa parabola ni Jesus nga “ginbaligya gilayon ang tanan niya nga pagkabutang” agod baklon ang “isa ka perlas nga may daku nga balor.” (Mat. 13:45, 46) Wala nagsiling si Jesus nga nadula sang manugpatikang ang iya apresasyon sa perlas. Sing kaanggid, indi man naton pagtugutan nga madula ang aton apresasyon sa aton matahom nga paglaum.—1 Tes. 5:8; Heb. 6:19.

Binagbinaga ang halimbawa ni Jean nga nagaalagad kay Jehova sing kapin na sa 60 ka tuig. Nagsiling sia: “Indi madula sa akon hunahuna ang Ginharian sang Dios bangod pirme ko ini ginapakig-istorya sa iban. Napalig-on gid ako nga makita ang kalipay sa ila mga mata sang nahangpan na nila ang Ginharian. Kon makita ko ang epekto sang kamatuoran sang Ginharian sa kabuhi sang isa ka estudyante sang Biblia nagahunahuna ako, ‘Matahom gid ini nga mga kamatuoran nga dapat ko ipaambit sa iban!’”

May rason gid kita nga apresyahon ang madamo nga espirituwal nga pagpakamaayo nga aton nabaton. Bisan pa mahimo nga ginabudlayan kita bangod sa mga pagtilaw subong sang pagpamatok, balatian, katigulangon, depresyon, kamatayon sang pinalangga, kag kapigaduhon, nahibaluan naton nga temporaryo lamang ina. Sa idalom sang Ginharian sang Dios, indi lang espirituwal nga mga pagpakamaayo ang mabaton naton kundi pati ang pisikal nga mga pagpakamaayo. Ang bisan ano nga pag-antos naton sa karon madula na sa bag-o nga sistema sang mga butang.—Bug. 21:4.

Bisan sa karon pa lang, pasalamatan na naton ang aton espirituwal nga mga pagpakamaayo kag ipakita ang aton apresasyon pareho sang salmista nga nag-amba: “O Jehova nga akon Dios, madamo ang imo ginhimo, madamo ang imo makatilingala nga mga binuhatan kag madamo ang imo mga katuyuan para sa amon; wala ka sing kaangay. Kon isugid ko kag isaysay ini, madamo pa ini sa sarang ko masugid.”—Sal. 40:5, NW.

[Nota]

^ par. 6 Gin-islan ang mga ngalan.

[Retrato sa pahina 18]

Makabaton kita sing espirituwal nga bulig sa tion sang mga pagtilaw