Gamita ang Imo Pagkadiminyo sa Labing Mapuslanon nga Paagi

“Sia nga makahatag sang lugar sa sini sa iya kabuhi, maghimo sini.” —MAT. 19:12.

1, 2. (a) Paano gintamod nanday Jesus, Pablo, kag sang iban pa ang pagkadiminyo? (b) Ngaa para sa iban ang pagkadiminyo indi isa ka dulot?

ANG pag-asawahay isa sa hamili nga mga dulot sang Dios sa katawhan. (Hulu. 19:14) Apang, madamo man nga di-minyo nga Cristiano ang nangin kontento kag malipayon sa ila kabuhi. Ang 95 anyos nga di-minyo nga utod nga lalaki nga si Harold, nagsiling: “Bisan pa nanamian ako makig-upod kag mag-abiabi sa iban, wala ako ginasubuan kon nagaisahanon ako. Makasiling ako nga may dulot gid ako sang pagkadiminyo.”

2 Sa pagkamatuod, ang pagkadiminyo ginpatuhuyan ni Jesucristo kag ni apostol Pablo nga isa ka dulot gikan sa Dios, kaangay sang pag-asawahay. (Basaha ang Mateo 19:11, 12; 1 Corinto 7:7.) Apang, indi tanan nga nangin di-minyo ang gusto nga mangin di-minyo sila. Kon kaisa bangod sa pila ka kahimtangan, ang iban nabudlayan makakita sang nagakaigo nga tiayon. Ukon ang iban nga nagminyo, hinali lang nga nag-isahanon liwat bangod ginbulagan sila ukon namatyan sing tiayon. Gani, ngaa makasiling kita nga ang pagkadiminyo isa ka dulot? Kag paano  mapanginpuslan sang di-minyo nga mga Cristiano ang ila kahimtangan?

Isa ka Pinasahi nga Dulot

3. Ano nga mga bentaha ang masami nga ginaagom sang di-minyo nga mga Cristiano?

3 Sa masami, ang di-minyo nga tawo may mas madamo nga tion kag kahilwayan sangsa isa nga minyo. (1 Cor. 7:32-35) May kahigayunan sia nga mapasangkad ang iya ministeryo kag gugma sa iban kag mangin suod kay Jehova. Gani, nakita sang pila ka Cristiano ang mga bentaha sang pagkadiminyo amo nga nagdesisyon sila nga ‘hatagan anay ini sing lugar.’ Mahimo nga wala man sa plano sang iban nga mangin di-minyo, apang sang nagbag-o ang ila kahimtangan, ginpangamuyo nila kay Jehova nga buligan sila nga batunon ini kag magpabilin na lang nga di-minyo.—1 Cor. 7:37, 38.

4. Ngaa ang di-minyo nga mga Cristiano madamo sing rason nga magkalipay sa pag-alagad sa Dios?

4 Nahibaluan sang di-minyo nga mga Cristiano nga indi nila kinahanglan magminyo para mabatyagan nga ginapabaloran sila ni Jehova kag sang iya organisasyon. Palangga kita ni Jehova subong indibiduwal. (Mat. 10:29-31) Wala gid sang bisan sin-o ukon bisan ano nga makapahamulag sa aton sa gugma sang Dios. (Roma 8:38, 39) Minyo man kita ukon di-minyo, madamo kita sing rason nga magkalipay sa pag-alagad sa Dios.

5. Ano ang dapat himuon sang isa agod magamit niya sa labing mapuslanon nga paagi ang iya pagkadiminyo?

5 Kaangay sang dulot nga talento sa musika ukon sa sports, ang dulot sang pagkadiminyo kinahanglan man palambuon agod magamit ini sa labing mapuslanon nga paagi. Kon amo, paano ang di-minyo nga mga Cristiano sa karon—lalaki man ukon babayi, bata man ukon tigulang, nangin di-minyo sing hungod ukon bangod sa kahimtangan—naggamit sang ila kabuhi sa labing mapuslanon nga paagi? Binagbinagon naton ang pila ka makapalig-on nga halimbawa sa Cristianong kongregasyon sang una kag tan-awon naton kon ano ang aton matun-an sa sini.

Pagkadiminyo Samtang Pamatan-on Pa

6, 7. (a) Ano nga pribilehiyo sa pag-alagad sa Dios ang nabaton sang ulay nga mga anak nga babayi ni Felipe? (b) Sa ano nga mga paagi ginpanginpuslan ni Timoteo ang iya pagkadiminyo, kag paano sia ginpakamaayo sa iya kinabubut-on nga pag-alagad sa iya pagkapamatan-on?

6 Ang ebanghelisador nga si Felipe may apat ka ulay nga anak nga babayi nga makugi sa pag-ebanghelyo kaangay niya. (Binu. 21:8, 9) Ang pagpanagna isa ka milagruso nga dulot sang balaan nga espiritu, kag ini nga dulot gingamit sining pamatan-on nga mga babayi subong katumanan sang Joel 2:28, 29.

7 Si Timoteo isa ka pamatan-on nga lalaki nga nagpanginpulos sang iya pagkadiminyo. Kutob sa pagkalapsag gintudluan sia tuhoy sa “balaan nga mga sinulatan” sang iya iloy nga si Eunice kag sang iya lola nga si Loida. (2 Tim. 1:5; 3:14, 15) Apang mahimo nga nangin Cristiano lang sila sang mga 47 C.E., sang una nga nagbisita  si Pablo sa Listra nga ila dutang natawhan. Pagligad sang duha ka tuig, sa ikaduha nga pagbisita ni Pablo, mahimo nga si Timoteo tin-edyer na ukon mga beintehon. Bisan bataon pa sia kag bag-o pa lang sa kamatuoran, “maayo ang ginasugid” tuhoy sa iya sang mga gulang sa Listra kag sa Iconio. (Binu. 16:1, 2) Gani, gin-agda ni Pablo si Timoteo nga mag-upod sa iya sa paglakbay nga hilikuton. (1 Tim. 1:18; 4:14) Indi kita sigurado kon bala wala gid nangasawa si Timoteo. Apang nahibaluan naton nga subong isa ka pamatan-on, kinabubut-on niya nga ginbaton ang pangagda ni Pablo, kag pagligad sang madamo nga tinuig, natigayon niya ang pribilehiyo nga mag-alagad subong di-minyo nga misyonero kag manugtatap.—Fil. 2:20-22.

8. Ano ang nagpahulag kay Juan Marcos nga maglab-ot sang espirituwal nga mga tulumuron, kag ano nga mga pagpakamaayo ang nabaton niya sa paghimo sini?

8 Sang pamatan-on pa si Juan Marcos, gingamit man niya ang iya pagkadiminyo sa mapuslanon nga paagi. Sia, ang iya iloy nga si Maria, kag ang iya pakaisa nga si Bernabe, mga katapo sang kongregasyon sa Jerusalem. Mahimo nga maayo ang pangabuhi sang pamilya ni Marcos kay may kaugalingon sila nga balay sa siudad kag may isa ka alagad nga babayi. (Binu. 12:12, 13) Apang walay sapayan sini, wala niya ginhinguyang ang iya pagkapamatan-on sa pagpatuyang sa undanon nga mga kailigbon; wala sia namat-od nga mangasawa dayon ukon magpabilin sa isa lang ka lugar agod magkabuhi sing komportable. Mahimo nga ang iya pagpakig-upod sa mga apostoles amo ang rason kon ngaa naghandum sia nga mangin misyonero. Bangod sini, nalangkag sia nga mag-upod kanday Pablo kag Bernabe subong ila alagad sa ila una nga paglakbay subong misyonero. (Binu. 13:5) Sang ulihi, naglakbay sia upod kay Bernabe, kag nag-alagad man sia upod kay Pedro sa Babilonia. (Binu. 15:39; 1 Ped. 5:13) Wala kita nakahibalo kon daw ano kadugay nga nagpabilin si Marcos nga di-minyo. Apang nakilal-an sia nga isa ka maayo nga halimbawa sang isa nga handa mag-alagad sa iban kag maghimo sang iya bug-os nga masarangan sa pag-alagad sa Dios.

9, 10. Ano nga mga kahigayunan sa pagpasangkad sang ministeryo ang bukas para sa di-minyo nga Cristianong mga pamatan-on sa karon? Maghatag sing halimbawa.

9 Sa karon, madamo man nga pamatan-on sa kongregasyon ang kinabubut-on nga nagagamit sang ila pagkadiminyo agod pasangkaron ang ila pag-alagad sa Dios. Kaangay ni Marcos kag ni Timoteo, nahangpan nila nga ang pagkadiminyo nagahatag sa ila sing kahigayunan “sa pag-alagad sing dalayon sa Ginuo nga wala sing tublag.” (1 Cor. 7:35) Daku gid ini nga bentaha. Madamo sila sing kahigayunan—pagpayunir, pag-alagad sa lugar sa diin daku ang kinahanglanon, pagtuon sang iban nga lenguahe, pagbulig sa pagtukod sang mga Kingdom Hall ukon sanga talatapan, pag-eskwela sa Ministerial Training School, kag pag-alagad sa Bethel. Kon pamatan-on ka pa kag di-minyo, ginapanginpuslan mo bala ini nga mga kahigayunan?

10 Ang isa ka utod nga lalaki nga si Mark nagsugod sa pagpayunir sang manugbeinte sia. Dayon nag-eskwela sia sa Ministerial Training School kag nakabaton sang nanuhaytuhay nga asaynment sa lainlain nga bahin sang kalibutan. Tuhoy sa iya 25 ka tuig nga bug-os tion nga pag-alagad, sia nagsiling: “Ginatinguhaan ko nga palig-unon ang tanan sa kongregasyon, ginaupdan ko sila sa ministeryo, gina-shepherding, ginaagda sila nga magkaon sa amon balay, kag nagaorganisar ako sang mga pagtipontipon sa tuyo nga palig-unon sila. Ini tanan nagahatag sa akon sing daku nga kalipay.” Subong sang ginsiling ni Mark, ang matuod nga kalipay nagagikan sa paghatag, kag madamo ka sing kahigayunan sa paghatag kon gamiton mo sing bug-os ang imo kabuhi sa pag-alagad sa Dios. (Binu. 20:35) Ano man ang imo mga interes, talento, ukon eksperiensia sa kabuhi, dumduma nga madamo sing hilikuton sa Ginuo para sa mga pamatan-on.—1 Cor. 15:58.

11. Ano ang mga benepisyo kon indi ka magdali sa pagminyo?

11 Bisan pa ang kalabanan nga pamatan-on may plano nga magminyo sa ulihi, wala sing rason nga magdali sila sa pagminyo. Ginapalig-on ni Pablo ang mga pamatan-on nga maghulat anay tubtob lampas na sila sa “hingurusgan sang  pagkapamatan-on,” ang tion nga tuman pa ka baskog sang seksuwal nga balatyagon. (1 Cor. 7:36) Kilalaha anay sing maayo ang imo kaugalingon kag magtigayon sang eksperiensia sa kabuhi kay amo ini ang makabulig sa imo sa pagpili sang nagakaigo nga tiayon. Ang pagpanumpa sa pag-asawahay isa ka serioso nga desisyon nga dapat mo tumanon tubtob buhi ka.—Man. 5:2-5.

Pagkadiminyo sa Ulihi nga Bahin sang Kabuhi

12. (a) Paano naatubang sang balo nga si Ana ang iya kahimtangan? (b) Ano nga pribilehiyo ang nabaton niya?

12 Si Ana, nga ginsambit sa Ebanghelyo ni Lucas, mahimo nga ginsubuan gid sang napatay ang iya bana pagligad sang ila pito ka tuig nga pag-asawahay. Wala kita nakahibalo kon may kabataan sila ukon kon nagplano sia nga magminyo liwat. Apang ang Biblia nagasugid nga sa edad nga 84, si Ana balo gihapon. Base sa ginasiling sang Biblia, makahinakop kita nga gingamit ni Ana ang iya nagbag-o nga kahimtangan agod mangin suod pa gid kay Jehova. “Wala gid [sia] nagapalya sa templo, nga nagahimo sang sagrado nga pag-alagad adlaw kag gab-i nga may mga pagpuasa kag pag-ampo.” (Luc. 2:36, 37) Ang iya pagsimba sa Dios amo ang pinakaimportante nga butang sa iya kabuhi. Nagakinahanglan gid ina sang hanuot nga determinasyon kag panikasog, apang ginpadyaan sia sing bugana. Nakapribilehiyo sia nga makita ang bata nga si Jesus, kag nakapanaksi sa iban tuhoy sa pagluwas nga himuon sining Mesias.—Luc. 2:38.

13. (a) Ano ang nagapakita nga aktibo si Dorcas sa kongregasyon? (b) Paano ginpadyaan si Dorcas bangod sang iya kaayo kag pagkamaluluy-on?

13 Ang babayi nga si Dorcas, ukon Tabita, nagapuyo sa Joppe, isa ka dumaan nga pantalan sa aminhan-katundan sang Jerusalem. Bangod wala ginsambit sa Biblia nga may bana sia, mahimo nga sadto nga tion di-minyo sia. “Madamo [si Dorcas] sing ginhimo nga maayong mga buhat kag ginhatag nga mga dulot tungod sa kaluoy.” Naghimo sia sang madamo nga panapton para sa imol nga mga balo kag sa iban pa, kag bangod sini ginhigugma gid nila sia. Gani sang hinali lang sia nagmasakit sing malubha kag napatay, nagpakitluoy ang bug-os nga kongregasyon kay Pedro nga banhawon sia. Sang naglapnag ang balita sa bug-os nga Joppe tuhoy sa iya pagkabanhaw, madamo ang nangin tumuluo. (Binu. 9:36-42) Mahimo nga ang pila sa ila nabuligan anay ni Dorcas paagi sa iya tumalagsahon nga kaayo.

14. Ano ang nagapahulag sa di-minyo nga mga Cristiano nga mangin suod kay Jehova?

14 Kaangay ni Ana kag ni Dorcas madamo sa kongregasyon karon ang nagpabilin nga di-minyo tubtob nagtigulang sila. Ang pila mahimo wala sing nakita nga nagakaigo nga tiayon. Ang iban nagbulag sa ila tiayon ukon nabalo. Bangod wala sila sing tiayon nga masugiran sang ila mga problema, ang di-minyo nga mga Cristiano labi nga nagasandig kay Jehova. (Hulu. 16:3) Para kay Silvia, isa ka di-minyo nga utod nga babayi nga nagaalagad sing kapin na sa 38 ka tuig sa Bethel, ang pagkadiminyo isa ka pagpakamaayo. “Kon kaisa makapoy man kon ikaw lang pirme ang nagapalig-on sa iban,” siling niya. “Naghunahuna ako, ‘Sin-o naman ang magapalig-on sa akon?’” Apang nagdugang sia: “Bangod nagapati ako nga mas nahibaluan ni Jehova ang akon mga kinahanglanon sangsa akon, nakabulig ini nga mangin suod pa gid ako sa iya. Kag pirme ako nakabaton sang mga pagpalig-on sa wala ginapaabot nga paagi.” Kon mangin suod kita kay Jehova, indi gid niya kita pagpabay-an.

15. Paano ‘mapasangkad’ sang di-minyo nga mga Cristiano ang ila gugma?

15 Ang pagkadiminyo nagahatag sa aton sing pinasahi nga kahigayunan nga “magpasangkad” sang aton gugma. (Basaha ang 2 Corinto 6:11-13.) Si Jolene, isa ka di-minyo nga utod nga babayi nga naghinguyang sing 34 ka tuig sa bug-os tion nga pag-alagad, nagsiling: “Ginatinguhaan ko gid nga magpakig-abyan, indi lang sa mga kaedad ko, kundi sa tanan nga tawo. Bangod di-minyo ako, madamo ako sing tion para kay Jehova, sa pamilya, sa kauturan, kag sa iban. Samtang nagaedad ako, mas naapresyar ko ang pagpabilin nga di-minyo.” Ginapabaloran gid sang mga may edad na, mga maluya, nagasolo nga mga ginikanan, mga pamatan-on, kag sang iban pa sa kongregasyon ang bulig nga ginahatag sa ila sang mga di-minyo. Huo, samtang nagapakita kita sing gugma sa iban, nagabatyag kita nga  may pulos ang aton kabuhi. Gani, ‘mapasangkad’ mo man bala ang imo gugma sa iban?

Pagkadiminyo sa Bug-os nga Kabuhi

16. (a) Ngaa wala nangasawa si Jesus? (b) Paano gingamit sing maalamon ni Pablo ang iya pagkadiminyo?

16 Si Jesus wala nagminyo. Kinahanglan niya handaan kag tumanon ang ministeryo nga gintangdo sa iya. Naglakbay sia sa malayo nga mga lugar, aga pa sia nagabugtaw kag nagapanghikot tubtob sa kagab-ihon, kag sang ulihi ginhatag niya ang iya kabuhi subong halad. Ang pagkadiminyo nakabulig sa iya nga matuman ang iya hilikuton. Si apostol Pablo naglakbay sing linibo ka kilometro kag madamo nga kabudlayan ang iya naatubang sa ministeryo. (2 Cor. 11:23-27) Bisan pa mahimo nga minyo anay si Pablo, nagpabilin sia nga di-minyo sang gintangdo na sia nga apostol. (1 Cor. 7:7, 8; 9:5) Ginpalig-on ni Jesus kag ni Pablo ang iban nga ilugon ang ila halimbawa sa ministeryo tubtob posible. Apang, wala sila nagsiling nga ang mga ministro indi dapat mangasawa.—1 Tim. 4:1-3.

17. Paano ginailog sang pila sa karon ang halimbawa ni Jesus kag ni Pablo, kag ngaa makasalig kita nga ginapabaloran ni Jehova ang ila mga pagsakripisyo?

17 Sa karon, ang pila namat-od man nga magpabilin nga di-minyo agod makakonsentrar sila sa ministeryo. Si Harold nga ginsambit kaina, malipayon nga nagaalagad sa Bethel sing kapin na sa 56 ka tuig. “Sang napulo na ako ka tuig sa Bethel,” siling niya, “natalupangdan ko nga madamo nga mag-asawa ang nagbiya sa Bethel bangod sa balatian ukon bangod kinahanglan nila atipanon ang ila nagatigulang na nga mga ginikanan. Patay na ang akon mga ginikanan. Apang luyag ko gid mag-alagad sa Bethel kag indi ko gusto nga madula ang akon pribilehiyo bangod sa pagpangasawa.” Sining nagligad lang nga mga tinuig, ang isa ka madugay na nga payunir nga si Margaret nagsiling: “Madamo ako sing kahigayunan nga magminyo, apang wala ko na ini mahatagan sing tion. Sa baylo, gingamit ko ang akon kahilwayan para mangin masako sa ministeryo, kag naghatag ini sa akon sang daku nga kalipay.” Makasalig kita nga indi gid pagkalipatan ni Jehova ang bisan sin-o nga nagasakripisyo para sa matuod nga pagsimba.—Basaha ang Isaias 56:4, 5.

Gamita sa Labing Mapuslanon nga Paagi ang Imo Kahimtangan

18. Paano mapalig-on kag mabuligan sang iban ang di-minyo nga mga Cristiano?

18 Ang tanan nga di-minyo nga Cristiano nga nagahimo sang ila labing masarangan sa pag-alagad kay Jehova takus gid nga hatagan sang komendasyon kag pagpalig-on. Palangga naton sila subong aton utod kag bangod sang ila daku nga bulig sa kongregasyon. Kon ipabatyag naton sa ila nga aton sila espirituwal nga “mga utod nga lalaki kag mga utod nga babayi kag mga iloy kag mga anak,” indi gid sila masubuan.—Basaha ang Marcos 10:28-30.

19. Ano ang himuon mo agod magamit mo sa labing mapuslanon nga paagi ang imo pagkadiminyo?

19 Ginpili mo man nga mangin di-minyo ukon bangod lang sa kahimtangan, kabay nga ining mga halimbawa sa Biblia kag sa aton panahon makapasalig sa imo nga sarang ka mangin malipayon kag mabungahon sa kabuhi. May mga dulot nga ginakalangkagan mo gid nga mabaton, apang may mga dulot man nga wala mo ginapaabot. Ang iban naapresyar mo sa gilayon, apang ang iban sa ulihi mo na lang napabaloran. Ang matuod, depende lang ina sa imo panimuot. Gani, ano ang himuon mo agod magamit mo sa labing mapuslanon nga paagi ang imo pagkadiminyo? Mangin suod kay Jehova, mangin masako sa pag-alagad, kag pasangkara ang imo gugma sa iban. Kaangay sa pag-asawahay, ang pagkadiminyo mangin makalilipay kon tamdon naton ini nga dulot suno sa pagtamod sang Dios kag gamiton ini sing maalamon.

Madumduman Mo Bala?

• Sa ano nga mga paagi ang pagkadiminyo isa ka dulot?

• Paano ang pagkadiminyo isa ka pagpakamaayo sa mga pamatan-on?

• Ano nga mga kahigayunan ang bukas sa di-minyo nga mga Cristiano agod mangin suod kay Jehova kag mapasangkad ang ila gugma?

[Mga Pamangkot sa Pagtinuon]

[Mga piktyur sa pahina 18]

Ginagamit mo bala sa labing mapuslanon nga paagi ang imo kahimtangan sa pag-alagad sa Dios?