Nagapabilin Ako nga Masako sa Organisasyon ni Jehova

Panugiron ni Vernon Zubko

NATAWO ako sa isa ka uma malapit sa Stenen, isa ka banwa sa probinsia sang Saskatchewan, Canada. Ang akon mga ginikanan nga sanday Fred kag Adella nagapangabudlay sing lakas para maaman ang espirituwal kag materyal nga mga kinahanglanon namon nga mag-ulutod—si Aurellia, ako kag ang akon mga manghod nga sanday Alvin, Allegra, kag Daryl. Asta subong, nagapasalamat gid kami sa amon mga ginikanan sa pagtudlo nila sa amon sang kamatuoran.

Si Tatay, nga isa ka hinaplas nga Cristiano, maisog gid nga ebanghelisador. Nagapangabudlay gid sia para sakdagon kami, apang ginapanikasugan man niya nga ipahibalo sa tanan nga isa sia ka Saksi. Pirme sia nagapakigsugilanon tuhoy sa kamatuoran. Ang iya kakugi kag kaisog may daku gid nga epekto sa akon. Pirme niya ako ginasilingan, “Kon magpabilin ka nga masako sa organisasyon ni Jehova, malikawan mo ang madamo nga problema.”

Pirme kami nagapanaksi sa mga kalye sa Stenen kag sa kaiping nga mga lugar. Indi ini mahapos para sa akon. Sa kada banwa may mga tawo gid nga nagapangyaguta ilabi na sa mga kabataan nga kaangay ko. Isa ka bes sang otso anyos ako, samtang nagatindog ako sa isa ka bangga nga may ginauyatan nga Ang Lalantawan kag Magmata! ginpalibutan ako sang isa ka grupo sang mga pamatan-on. Ginsabnit nila ang akon bag-o nga kalo kag ginsang-at ini sa poste sa tupad ko. Maayo lang kay nakita ini sang isa ka utod nga lalaki nga nagabantay sa akon. Nagpalapit sia kag namangkot, “Vern, may problema?” Gulpi lang nagdinalagan ang kabataan. Bisan pa daw makapaluya yadto nga eksperiensia, nagtudlo ini sa akon nga kon magpanaksi sa dalan, indi lang ako dapat magtindog nga daw poste kundi maglakatlakat man ako. Ining paghanas nga nabaton ko sang bata pa ako naghatag sa akon sing kaisog nga magbantala sa mga pamalay.

Si Alvin kag ako nabawtismuhan sang Mayo 1951. Trese anyos ako sadto. Indi ko gid malipatan si Utod Jack Nathan, nga amo ang naghatag sing pamulongpulong sa bawtismo. Ginpalig-on niya kami nga indi pagpaligaron ang isa ka bulan nga indi kami makapakighambal tuhoy kay Jehova. * Para sa amon pamilya, ang pagpayunir amo gid ang pinakamaayo nga karera. Gani sang 1958, paggradwar ko, nagsaylo ako sa Winnipeg, Manitoba, agod magpayunir. Bisan pa nalipay kuntani si Tatay nga makaupod ako sa amon negosyo nga lumber shop, ginpalig-on nila ako ni Nanay nga magsulod sa bug-os tion nga ministeryo kag ginsuportahan nila ang akon pagsaylo.

Bag-o nga Puluy-an kag Bag-o nga Kaupod

Sang 1959 gin-agda sang sanga talatapan ang bisan sin-o nga luyag magsaylo sa Quebec, kay may daku nga pagkinahanglan didto sang mga manugbantala. Ginbaton ko ang pangagda kag nagpayunir ako sa Montreal. Daku gid ini nga pagbag-o sa akon kabuhi! Nagtuon ako sing Pranses kag nagpasibu sa bag-o nga kultura. Ang amon  manugtatap sang sirkito nagsiling nga indi ko dapat pag-ipamilit ang amon pamaagi sa lugar nga ginhalinan ko. Maayo gid yadto nga laygay.—1 Cor. 9:22, 23.

Sang nagsaylo ako sa Quebec, wala ako sing kaupod nga payunir. Apang, nakatigayon ako sing permanente nga kaupod sang Pebrero 1961, sang nagpakasal kami ni Shirley Turcotte, isa ka pamatan-on nga nakilala ko sa Winnipeg. Nagdaku man sia sa isa ka pamilya nga nagahigugma kay Jehova. Wala ko pa sadto narealisar nga mangin isa gali sia ka daku nga tuburan sang kusog kag pagpalig-on sa akon sa pagligad sang mga tinuig.

Paglakbay Agod Magbantala sa Gaspé

Duha ka tuig pagkatapos sang amon kasal, gintangdo kami subong mga espesyal payunir sa Rimouski, Quebec. Pagkasunod nga tigpamulak, ginpangabay kami sang sanga talatapan nga magbantala sa bug-os nga Gaspé Peninsula, sa sidlangan nga baybayon sang Canada. Ang amon asaynment amo ang pagsab-ug sing pinakamadamo nga binhi sang kamatuoran tubtob posible. (Man. 11:6) Ginpuno namon ang amon salakyan sing kapin sa 1,000 ka magasin, halos 400 ka libro, mga pagkaon kag panapton, kag naglakbay para sa isa ka bulan nga pagbantala sa bug-os nga Gaspé. Gintuptupan namon sing maid-id ang tanan nga magagmay nga minuro sa Gaspé. Ang lokal nga estasyon sang radyo nagpaandam nga magaabot ang mga Saksi kag nagsiling sa mga tawo nga indi pagbatunon ang amon mga publikasyon. Apang, wala nahangpan sang kalabanan nga residente ang pahibalo kag abi nila pasayod ini sang amon publikasyon, amo nga ginbaton nila ang amon mga literatura.

Sadto nga tion, wala ginakilala ang kahilwayan sa pagbantala sa pila ka bahin sang Quebec, kag ordinaryo na lang nga ginapauntat sang mga pulis ang mga nagabantala. Amo ini ang natabo sa isa ka siudad sa diin halos tanan nga tagbalay nagbaton sang amon literatura. Ginsilingan kami sang isa ka opisyal sang pulis nga mag-upod sa iya sa presinto, kag nagtuman kami. Natukiban ko nga ang abogado sang siudad nagpagua gali sing mando nga pauntaton kami sa pagbantala. Bangod wala ang hepe sang mga pulis sadto nga adlaw, ginpakita ko sa abogado ang isa ka sulat halin sa sanga talatapan sang Toronto nga detalyado nga nagapaathag sang amon kinamatarong sa pagbantala. Pagkatapos niya mabasa ang sulat, ang abogado nagsiling: “Ang matuod, indi ako gusto sing gamo. Ang pari sang mga Katoliko amo ang nagsugo sa akon nga pauntaton kamo.” Bangod luyag namon ipakita sa mga tawo sa amon teritoryo nga indi ilegal ang amon hilikuton, nagbalik kami gilayon sa lugar diin ginpauntat kami sang mga pulis kag nagpadayon kami sa pagbantala.

Sang masunod nga adlaw sang nagbalik kami agod makigkita sa hepe, naakig sia sang nahibaluan niya nga ginpauntat kami sa amon pagbantala. Ambot lang kon ano ang mabatyagan mo kon nabatian mo ang iya ginhambal sa abogado sa telepono! Ginsilingan kami sang hepe nga kon may problema kami, tawgan lang namon sia sing direkta kag sia na ang bahala. Bisan pa pangayaw kami kag indi pa maayo maghambal sing Pranses, ang mga tawo mabuot kag maabiabihon sa amon. Apang naghunahuna kami, ‘Mahangpan ayhan nila ang kamatuoran?’ Nasabat ang amon pamangkot pagligad sang mga tinuig sang nagbalik kami agod magtukod sing mga Kingdom Hall sa bug-os nga Gaspé. Natukiban namon nga madamo sa amon napanaksihan anay ang mga utod na karon. Huo, si Jehova amo gid ang isa nga nagapatubo.—1 Cor. 3:6, 7.

Nakabaton Kami sing Palanublion

Sang 1970, natawo ang amon bata nga si Lisa. Ining palanublion gikan kay Jehova naghatag gid sa amon sing dugang nga kalipay. Si Shirley kag si Lisa nagaupod sa akon sa madamo nga proyekto sa pagtukod sing mga Kingdom Hall. Sang nakagradweyt na si Lisa, nagsiling sia: “Nay, Tay, bangod ako ang rason kon ngaa nag-untat kamo sa bug-os tion nga pag-alagad, mapayunir ako agod makabawi sa inyo.” Kapin na sa beinte ka tuig ang nagligad, payunir gihapon si Lisa apang karon kaupod na niya ang iya bana nga si Sylvain. Nagaalagad sila karon sa madamo nga proyekto sang pagtukod sa lainlain nga pungsod. Ang amon tulumuron subong pamilya amo ang pagpabilin nga simple kag gamiton ang amon kabuhi sa pag-alagad kay Jehova. Wala ko gid malipatan ang ginsiling ni Lisa sang nagsugod sia sa pagpayunir. Sa  katunayan, amo ini ang nagpahulag sa akon nga magbalik sa bug-os tion nga ministeryo sang 2001, kag wala na ako nag-untat sa pagpayunir sugod sadto. Ang pagpayunir padayon nga nagatudlo sa akon nga magsalig kay Jehova sa tanan ko nga ginahimo kag magkabuhi sing simple apang makaalayaw kag malipayon.

Ang Proyekto nga Pagtukod Nagakinahanglan sing Gugma, Pagkamainunungon, kag Katutom

Gintudluan ako ni Jehova nga kon gamiton naton ang aton kabuhi sa pag-alagad sa iya kag batunon ang bisan ano nga asaynment nga ihatag niya, makabaton kita sing bugana nga pagpakamaayo. Ang pag-alagad sa Regional Building Committee kag sa mga proyekto sang pagtukod upod sa akon mga kauturan sa bug-os nga Quebec kag sa iban pa nga lugar isa gid ka hamili nga pribilehiyo.

Bisan pa ang pila ka boluntaryo indi makahatag sing talalupangdon nga mga pamulongpulong sa plataporma, talalupangdon gid ang ila kalantip sa mga proyekto nga pagtukod sing Kingdom Hall. Ginahigugma gid nila ang ila trabaho, kag bangod sini nagagua ang ila mga abilidad. Sa masami, nagaresulta ini sa isa ka matahom nga bilding nga magamit sa pagsimba kay Jehova.

May nagpamangkot anay sa akon, “Ano ang pinakaimportante nga mga kinaiya sang isa ka boluntaryo sa pagtukod sang Kingdom Hall?” Sa akon eksperiensia, una sa tanan dapat ginahigugma gid sang isa si Jehova kag ang iya Anak kag subong man ang mga kauturan. (1 Cor. 16:14) Ikaduha, kinahanglan ang pagkamainunungon kag katutom. Kon ang mga butang wala nagakatabo suno sa aton ginapaabot—kag amo gid sini ang masami nga nagakatabo—ang mainunungon nga tawo padayon nga magasakdag sa teokratikong kahimusan. Ang katutom naman amo ang magapahulag sa iya nga magboluntaryo sa palaabuton nga mga proyekto.

Mapinasalamaton kay Jehova

Bisan pa ang akon amay napatay sang 1985, indi ko gihapon malimtan ang iya laygay nga dapat magpadayon ako nga masako sa organisasyon ni Jehova. Kaangay sang iban nga nakabaton na sang ila asaynment sa langitnon nga bahin sang organisasyon ni Jehova, sigurado ako nga masako man sia gihapon. (Bug. 14:13) Si Nanay 97 na karon. Apang bangod na-stroke sia, indi na sia makahambal sing maayo; walay sapayan sini, kabisado gihapon niya ang Biblia. Nagakutlo sia sing mga teksto kon maghimo sia sing sulat kag ginapalig-on niya kami nga magpadayon sa pag-alagad sing matutom kay Jehova. Daw ano ang amon kalipay nga makatigayon sinang mahigugmaon nga mga ginikanan!

Nagapasalamat gid ako kay Jehova bangod kay Shirley, ang akon matutom nga asawa kag kaupod. Ginapakabahandi gid niya ang laygay nga ginhatag sang iya iloy sa iya, “Mangin masako gid si Vern sa kamatuoran, kag dapat matun-an mo nga indi sia pag-idingot sa iban.” Sang nagpakasal kami 49 ka tuig na ang nagligad, namat-od kami nga magkaupod nga magatigulang nga nagaalagad kay Jehova, kag kon pareho kami nga maluwas sa katapusan sining sistema, magkaupod man kami nga magabalik sa pagkapamatan-on kag magaalagad kay Jehova sa walay katubtuban. Huo, ‘madamo kami sing ginahimo sa hilikuton sang Ginuo.’ (1 Cor. 15:58) Sa bahin ni Jehova, ginaatipan gid niya kami kag ginapat-od nga wala sing butang nga maayo nga makulang sa amon.

[Nota]

^ par. 6 Tan-awa ang Septiembre 1, 1990 nga Ang Lalantawan, pahina 10-14, tuhoy sa sugilanon sang kabuhi ni Jack Halliday Nathan.

[Retrato sa pahina 31]

“Ang amon tulumuron subong pamilya amo ang pagpabilin nga simple kag gamiton ang amon kabuhi sa pag-alagad kay Jehova”