Magdiretso sa kaundan

Magdiretso sa listahan sang kaundan

Ang Espesyal nga Kampanya sa Bulgaria Nagmadinalag-on

Ang Espesyal nga Kampanya sa Bulgaria Nagmadinalag-on

 Ang Espesyal nga Kampanya sa Bulgaria Nagmadinalag-on

“Ang alanyon bugana, apang pila lamang ang mamumugon. Busa, pakiluoy kamo sa Agalon sang alanyon nga magpadala sia sang mga mamumugon sa iya alanyon.”—MAT. 9:37, 38.

INI nga pinamulong ni Jesus nangin matuod gid sa kahimtangan sang Bulgaria, isa ka matahom nga Balkan nga pungsod sa bagatnan-nasidlangan sang Europa! Nagakinahanglan didto sing dugang nga mga manugbantala para mabantalaan ang kapin sa pito ka milyon nga mga pumuluyo. Mga 1,700 ang mga manugbantala sa Bulgaria, apang indi sila makasarang sa pagtuptop sang ila teritoryo. Gani sang 2009, ang Nagadumala nga Hubon nagpahanugot nga mag-agda sang mga Saksi nga nagahambal sing Bulgariano gikan sa nanuhaytuhay nga pungsod sang Europa para sa isa ka espesyal nga kampanya. Ang kampanya magalawig sing pito ka semana sa tion sang tingadlaw kag matapos ini sa “Magpadayon sa Pagbantay!” nga Distrito nga Kombension sa Sofia, sa Agosto 14-16, 2009.

Madamo ang Nagbaton sa Pangagda

Ang mga utod sa sanga talatapan sa Sofia nagkabalaka kon pila ayhan ang makadto gikan sa Alemanya, Espanya, Gresya, Italya, Poland, kag Pransia kay ang mga utod mismo ang magagasto pakadto sa Bulgaria kag kinahanglan nila magbakasyon para magbantala. Daw ano ka makakulunyag nga kada semana nagadugang ang mga aplikante tubtob nakalab-ot ini sa 292! Bangod sa kadamuon sang mga nagbaton sang pangagda, nangin posible nga maasayn ang mga boluntaryo sa tatlo ka siudad sang Bulgaria: Kazanlak, Sandanski, kag Silistra. Gin-agda sang mga manugtatap sang sirkito sa Bulgaria ang lokal nga mga payunir kag mga manugbantala nga suportahan man ang kampanya. Sang ulihi, nakalab-ot sa 382 ka boluntaryo ang makugi nga nagbantala sa mga teritoryo nga talagsa lang matuptupan.

May mga utod sa kaingod nga mga kongregasyon nga ginpauna agod maghanda sing mga dalayunan. Nag-arkila sila sang mga apartment kag nagpareserba sa barato nga mga hotel. Ining lokal nga mga kauturan daw wala ginakapoy sa pagbulig sa nag-alabot nga mga boluntaryo nga makaplastar sa ila mga dalayunan kag sa pag-atipan sang ila mga kinahanglanon. Nag-arkila man sila sing mga duog para hiwatan sang ila mga miting sa sining tatlo ka siudad. May kahimusan man nga ginhimo nga ang nagabisita nga mga utod amo ang magdumala sang mga miting sang kongregasyon. Makalilipay gid makita nga sa mga lugar nga wala sing Saksi, 50 ka manugbantala ang nagatipon agod magdayaw kay Jehova.

Dalayawon gid ang kakugi nga ginpakita sang mga boluntaryo gikan sa iban nga pungsod. Sa tion sang tingadlaw, ang temperatura sa Bulgaria nagalab-ot sa 40°C. Apang wala ini makaupang sa kakugi sang mga kauturan. Sa sulod lamang sang tatlo ka semana napanaksihan sing maid-id ang siudad sang Silistra sa Danube River nga mga 50,000 ang pumuluyo. Sang ulihi nagbantala man sila sa kaingod nga mga banwa, kag nakalab-ot tubtob sa Tutrakan nga mga 55 kilometros sa katundan sang Silistra. Sa masami nagasugod sila sa pagbantala mga 9:30 sang aga. Kag pagkatapos sang panyaga ginapadayon nila ini tubtob sa 7:00 sang gab-i kag kon kaisa, mas gab-i pa. Amo man sini ang natabo sa duha pa ka siudad. Bangod sa kakugi sang mga boluntaryo nga nagkampanya sa Kazanlak kag Sandanski, nabantalaan  nila pati ang kaingod nga mga banwa kag siudad.

Ano ang Resulta?

Daku gid nga panaksi ang nahimo sa sulod sang pito ka semana. Kaangay sa ginsiling sang mga tawo sa mga apostoles sang una, ang pumuluyo sa sini nga mga siudad makasiling man, ‘ginpuno ninyo ang amon siudad sang inyo panudlo.’ (Binu. 5:28) Ang mga Saksi nga nagpakigbahin sa sini nga kampanya nakapahamtang sing mga 50,000 ka magasin kag nakasugod sang 482 ka pagtuon sa Biblia. Makalilipay gid nga sang Septiembre 1, 2009, naporma ang isa ka kongregasyon sa Silistra, kag may mga grupo man nga natukod sa Kazanlak kag Sandanski. Makalilipay man makita nga bisan ang mga tawo nga bag-o lang nakabati sang maayong balita paagi sa sini nga kampanya, madasig nga nag-uswag sa espirituwal.

Sa una nga semana sang kampanya, napanaksihan sang isa ka espesyal payunir nga taga-Espanya nga nagahambal sing Bulgariano si Karina, isa ka babayi sa Silistra nga nagabaligya sing periodiko sa kalye. Nagpakita sing interes si Karina kag nagtambong sa miting. Nagbaton man sia sing pagtuon sa Biblia. Bangod ateista ang iya bana, nangabay sia nga hiwaton ang ila pagtuon sa parke. Kaupod niya ang iya duha ka bata sa iya pagtuon sa Biblia. Ang iya magulang nga bata nga si Daniela nagpakita sing tumalagsahon nga interes sa kamatuoran. Naubos niya basa ang Ginatudlo Sang Biblia nga libro sa sulod lang sang isa ka semana kag gin-aplikar niya gilayon ang iya nabasahan nga indi maggamit sing imahen sa pagsimba. Ginsugdan man niya ang pagpaambit sang kamatuoran sa iya mga abyan. Tatlo pa lang ka semana nga nagatambong sia sa mga miting sa kongregasyon nagsiling na sia sa utod nga nagtudlo sa iya: “Pamatyag ko pareho na ako sa inyo. Ano ang himuon ko para makabantala man ako?” Padayon nga nag-uswag si Daniela, amo man ang iya nanay kag manghod nga babayi.

Sa Kazanlak, samtang nagalakat pauli sa iya dalayunan halin sa pag-alagad sa latagon si Orlin, isa ka Bulgariano nga utod nga naghalin sa Italya, nagpanaksi sia sa duha ka pamatan-on nga lalaki nga nagapungko sa parke. Nakapahamtang sia sang Ginatudlo Sang Biblia nga libro sa ila kag nangako nga balikan sila pagkasunod nga adlaw. Pagduaw niya liwat, nasugdan niya ang pagtuon sa Biblia kay Svetomir kag ginpadayon nila ini pagkasunod nga adlaw. Sa sulod sang siam ka adlaw, walo ka beses sila nga nagtuon. Si Svetomir nagsiling: “Duha ka adlaw antes ko ikaw nakilala, nangamuyo ako sa Dios nga buligan niya ako nga makilala sia. Kag nangako ako nga kon makilala ko sia idedikar ko ang akon kabuhi sa iya.” Sang nagbalik si Orlin sa Italya, ginpadayon sang lokal nga mga utod ang pagtuon kay Svetomir kag padayon niya karon nga ginaaplikar ang iya natun-an.

 Bugana nga Ginpakamaayo ang mga Nagsakripisyo

Ano ang ginbatyag sang mga kinabubut-on nga naggamit sang ila bakasyon kag nagbiyahe sa ila kaugalingon nga gasto agod makabantala sang maayong balita sa iban nga pungsod? Ang isa ka gulang nga nagaalagad sa Espanya nagsulat: “Ang kampanya nagpasuod sa mga utod nga nagahambal sang Bulgariano sa Espanya. Maayo gid ang nangin epekto sini sa mga utod nga nagpakigbahin.” Ang mag-asawa nga taga-Italya nagsulat: “Amo ini ang pinakamalipayon nga bulan sa amon kabuhi!” Nagsiling pa sila: “Ginbag-o sang kampanya ang amon kabuhi! Tuhay na ang amon prioridad subong.” Ini nga mag-asawa nagaplano nga magsaylo sa Bulgaria sing permanente agod mag-alagad sa lugar nga daku ang kinahanglanon. Si Carina, isa ka di-minyo nga payunir nga utod nga babayi nga naghalin sa Espanya, nagbuylog sa kampanya sa Silistra. Pagkatapos sini, naghalin sia sa iya obra sa Espanya kag nagsaylo sa Bulgaria agod sakdagon ang bag-o nga kongregasyon sa sina nga siudad. May nasupot sia nga kuarta nga sarang niya magamit sa sulod sang isa ka tuig sa Bulgaria. Si Carina nagsiling tuhoy sa iya desisyon: “Nalipay gid ako nga ginpahanugutan ako ni Jehova nga makaalagad sa Bulgaria, kag nagalaum ako nga makaalagad diri sa malawig nga tion. May lima na ako ka ginatun-an sa Biblia kag tatlo sa ila ang nagatambong na sa mga miting.”

Ang isa ka utod nga babayi nga taga-Italya gusto magbuylog sa kampanya, pero bag-o lang sia makasulod sa obra kag wala pa sing bakasyon. Bangod determinado gid sia, naglisensia sia nga magbakasyon nga wala sing sueldo kag handa nga maghalin sa trabaho kon indi sia pagpasugtan. Apang, nakibot gid sia sang nagsiling ang iya amo: “OK, pero sa isa ka kondisyon: Kon sa Bulgaria ka na, padal-an mo ako sang postcard.” Nabatyagan gid sining utod nga babayi nga ginsabat ni Jehova ang iya mga pangamuyo.

Ang pamatan-on nga si Stanislava nga taga-Varna, Bulgaria, nagatrabaho sing bug-os tion nga may daku nga sueldo, apang nagbakasyon sia para makapakigbahin sa kampanya sa Silistra. Sang nakita niya ang kalipay sang madamo nga payunir nga nagkadto sa iya pungsod para magbantala sang maayong balita, nagtulo gid ang iya luha. Ginhunahuna niya kon paano niya ginagamit ang iya kabuhi—pag-una sang sekular nga karera. Sang nagpauli sia pagligad sang duha ka semana, naghalin sia sa iya obra kag nagregular payunir. Sa karon nabatyagan niya ang matuod nga kalipay bangod gindumdom niya ang iya Manunuga sa tion sang iya pagkapamatan-on.—Man. 12:1.

Daw ano gid nga pagpakamaayo nga mangin aktibo sa pag-alagad kay Jehova. Wala na sing mas maayo pa nga himuon sangsa gamiton ang aton tion kag kusog sa importante nga hilikuton sang pagpanudlo kag pagbantala sang maayong balita. May iban pa bala nga paagi nga mapasangkad mo ang imo pagpakigbahin sa nagaluwas kabuhi nga hilikuton? Ayhan may mga lugar sa inyo pungsod nga nagakinahanglan sang dugang pa nga mga manugbantala. Mahimo ka bala magsaylo sa sina nga lugar? Ukon ayhan mahimo ka magtuon sang tuhay nga lenguahe agod mabuligan ang mga tawo sa inyo pungsod nga ginauhaw sa kamatuoran sa Biblia. Ano man nga mga pagbag-o ang himuon mo agod mapasangkad ang imo ministeryo makasalig ka nga pakamaayuhon ka ni Jehova sing bugana.—Hulu. 10:22.

[Kahon/Retrato sa pahina 32]

Ang Adlaw nga Indi Malipatan

Madamo sa mga nagbuylog sa kampanya nga naghalin sa mga pungsod sa Europa ang nagplano nga magtambong sa “Magpadayon sa Pagbantay!” Distrito nga Kombension sa Sofia. Makapalig-on gid para sa lokal nga mga kauturan nga makilala ang madamo nga bisita nga naghalin sa nanuhaytuhay nga pungsod. Daw ano nga kakunyag ang nabatyagan sang 2,039 nga nagtambong sang ginpagua ni Utod Geoffrey Jackson, katapo sang Nagadumala nga Hubon, ang kompleto nga New World Translation of the Holy Scriptures sa Bulgariano nga lenguahe! Ang tanan nga nagtambong sang Biernes, nagpakita sang ila tinagipusuon nga apresasyon paagi sa ila mabaskog kag malawig nga pagpamalakpak. Madamo sa ila ang naghibi sa kalipay. Ining sibu kag madali hangpon nga badbad magabulig gid sa bunayag nga mga Bulgariano nga makilala si Jehova.

[Mapa sa pahina 30, 31]

(Para sa aktual nga pormat, tan-awa ang publikasyon)

BULGARIA

SOFIA

Silistra

Kazanlak

Sandanski

[Mga Retrato sa pahina 31]

Daku gid nga panaksi ang nahimo sa sulod sang pito ka semana