Pagsapo sing Kalig-unan sa Tunga sang Katawhan sang Dios

“Magapasalamat ako sa imo sa daku nga katilingban.”—SAL. 35:18.

1-3. (a) Paano mahimo mabutang sa katalagman ang espirituwalidad sang isa ka Cristiano? (b) Sa diin makasapo sing pangamlig ang katawhan sang Dios?

SAMTANG nagabakasyon, si Joe kag ang iya asawa naglangoylangoy sa baybay nga may mga korales nga puno sang isda nga sarisari ang kolor kag kadakuon. Nagkadto sila sa madalom-dalom nga bahin agod makita ang iban pa nga korales. Sang nakalab-ot sila sa madalom nga bahin kag nagaasul na nga tubig, nagsiling ang asawa ni Joe, “Daw kadalom na gid diri.” “Relaks ka lang,” sabat ni Joe. “Ako ang bahala.” Apang sang ulihi natingala si Joe, ‘Ngaa nadula ang mga isda?’ Hinadlukan gid sia sang nahibaluan niya ang rason. Gikan sa madalom nga bahin, nagua ang isa ka bagis kag nagpadulong ini sa iya. Wala na sia sing mahimo. Apang sang mga isa na lang ka metro ang distansia sang bagis, naglikaw ini kag nagpalayo.

2 Ang isa ka Cristiano mahimo mawili sa mga pangganyat nga ginagamit ni Satanas subong sang kalingawan, trabaho, kag materyal nga mga pagkabutang. Mahimo indi niya matalupangdan nga nagapadulong na sia sa katalagman. “Ang akon eksperiensia nakabulig sa akon nga hunahunaon pirme kon sin-o ang amon mga kaupdanan,” siling ni Joe nga isa ka gulang. “Maglangoy lamang sa duog nga hilway sa katalagman kag makalilipay—sa kongregasyon!” Indi maglangoy sa madalom nga tubig sang kalibutan nga mahimo magpahilayo sa imo sa mga kauturan kag magadul-ong sa imo sa katalagman. Kon sa banta mo napahilayo ka na, magbalik gilayon sa ‘duog nga hilway sa katalagman.’ Kay kon indi, mahalitan gid ang imo espirituwalidad.

3 Ang kalibutan sa karon, makatalagam gid nga duog para sa mga Cristiano. (2 Tim. 3:1-5) Nahibaluan ni Satanas nga malip-ot na lang ang iya tion, kag ginatinguhaan niya nga tukbon ang mga maluya. (1 Ped. 5:8; Bug. 12:12, 17) Maayo lang kay may yara kita pangamlig. Nag-aman si Jehova sing isa ka duog nga hilway sa espirituwal nga katalagman—ang Cristianong kongregasyon.

4, 5. Ano ang ginabatyag sang madamo nga tawo tuhoy sa ila palaabuton, kag ngaa?

4 Ang pisikal ukon emosyonal nga kalig-unan nga matanyag sang kalibutan limitado lamang. Madamo nga tawo ang nagabatyag nga wala sila sing pisikal nga kalig-unan bangod sa krimen, kasingki, mataas nga bili sang mga balaklon, kag mga problema sa palibot. Ang tanan apektado sang mga problema sang pagbalatian kag katigulangon. Bisan ang may mga trabaho, puluy-an, sarang sa pangabuhi, kag maayo nga panglawas nagakabalaka gihapon nga basi sa pila ka adlaw madula nila ini.

5 Madamo man ang nagabatyag nga wala sila sing emosyonal nga kalig-unan. Madamo sang nagalaum nga makasapo sing paghidait kag kalipay sa pag-asawahay kag sa pamilya ang napaslawan sa ila ginapaabot. Sing kaanggid, madamo sang mga nagakadto sa simbahan ang nagapauli nga naligban gihapon kag nagaduhaduha kon bala husto nga panuytoy ang ila nabaton. Ang isa ka rason, amo ang kwestionable nga paggawi kag indi makasulatanhon nga mga panudlo sang ila relihioso nga mga lider. Gani, madamo nga tawo ang nagabatyag nga wala na sila sing mahimo kundi magdangop na lang sa siensia kag magsalig sa mga panikasog sang ila isigkatawo. Amo  nga indi katingalahan nga ang mga tawo sa palibot naton nagabatyag nga wala sila sing kasiguruhan kag ang iban wala na nagapalibog sang ila palaabuton.

6, 7. (a) Ano ang rason kon ngaa tuhay ang pagtamod sang mga nagaalagad sa Dios kag sang mga wala nagaalagad sa iya? (b) Ano ang aton pagabinagbinagon?

6 Tuhay gid ang pagtamod sang mga Cristiano sa palaabuton! Bisan pa nagaatubang kita sang mga problema pareho sa iban, tuhay ang aton reaksion. (Basaha ang Isaias 65:13, 14; Malaquias 3:18.) Ngaa? Bangod natun-an naton sa Biblia ang kabangdanan sini, kag nahibaluan naton kon paano atubangon ang mga hangkat kag mga problema sa kabuhi. Gani, wala kita nagakabalaka sing tuman tuhoy sa palaabuton. Subong mga sumilimba ni Jehova naamligan kita gikan sa sayop kag indi makasulatanhon nga pangatarungan, imoral nga mga paggawi, kag sa malain nga mga resulta sini. Nakabatyag kita sing kalinong sa hunahuna nga wala nabatyagan sang iban.—Isa. 48:17, 18; Fil. 4:6, 7.

7 May pila ka halimbawa nga makabulig sa aton nga makita ang kinatuhayan sang kalig-unan nga ginaagom sang mga alagad ni Jehova kag sang mga wala nagaalagad sa iya. Ining mga halimbawa mahimo magpahulag sa aton nga usisaon ang aton mga pangatarungan kag mga paggawi kag binagbinagon naton kon bala mahimo pa naton maaplikar sing bug-os ang mga laygay sang Dios nga gintuyo para amligan kita.—Isa. 30:21.

“Ang Akon mga Tiil Diotayan Lang Makadanlog”

8. Ano sa masami ang ginalikawan sang mga alagad ni Jehova?

8 Halin pa sang una, ginalikawan sang mga nagaalagad kag nagatuman kay Jehova ang pagpakigsuod sa mga wala nagatuman sa iya. Ang matuod, si Jehova nagsiling nga may yara kaawayon sa tunga sang iya mga sumilimba kag sa mga sumulunod ni Satanas. (Gen. 3:15) Bangod sang ila malig-on nga panindugan sa mga prinsipio sang Dios, tuhay ang paggawi sang mga alagad sang Dios sa mga tawo sa palibot nila. (Juan 17:15, 16; 1 Juan 2:15-17) Ang paghimo sina indi pirme mahapos. Kon kaisa, may mga alagad pa gani si Jehova nga nagapangduhaduha kon bala husto ang ila ginahimo nga mga pagsakripisyo.

9. Ilaragway ang kabudlayan nga gin-atubang sang manunulat sang Salmo 73.

 9 Ang isa sa mga alagad ni Jehova nga nagpangduhaduha kon bala husto ang iya ginhimo nga desisyon amo ang manunulat sang Salmo 73, nga mahimo isa sa mga kaliwat ni Asap. Ang salmista namangkot kon ngaa ang malauton daw amo pa ang nagamadinalag-on, nagamalipayon, kag nagauswag, apang ang mga nagatinguha nga alagaron ang Dios nagaantos sang mga pagtilaw kag mga kabudlayan.—Basaha ang Salmo 73:1-13.

10. Ngaa importante gid sa imo ang mga isyu nga ginpautwas sang salmista?

10 Napamangkot mo man bala sa imo kaugalingon ang mga pamangkot sang salmista? Kon huo, indi ka magbatyag nga nakasala ka ukon maghunahuna nga nagluya na ang imo pagtuo. Ang matuod, ini nga mga pamangkot nahunahuna man anay sang pila ka alagad ni Jehova, lakip na yadtong mga gingamit niya sa pagsulat sang Biblia. (Job 21:7-13; Sal. 37:1; Jer. 12:1; Hab. 1:1-4, 13) Sa pagkamatuod, ang tanan nga luyag mag-alagad kay Jehova dapat gid maghunahuna kag magbaton sang sabat sini nga pamangkot: Ang pag-alagad kag pagtuman bala sa Dios amo ang pinakamaayo nga butang nga dapat himuon? Ini nga pamangkot nagadalahig sa isyu nga ginpautwas ni Satanas sa hardin sang Eden. Importante ini sa hulusayon sang bug-os uniberso nga pagkasoberano sang Dios. (Gen. 3:4, 5) Gani maayo nga binagbinagon naton tanan ang pamangkot nga ginpautwas sang salmista. Mahisa bala kita sa mga malauton nga nagapabugal nga daw wala sila sing problema? Magauntat bala kita sa pag-alagad kay Jehova kag sundon ang ila dalanon? Sa pagkamatuod, amo gid sina ang gusto ni Satanas nga himuon naton.

11, 12. (a) Paano nalandas sang salmista ang iya mga pangduhaduha, kag ano ang ginatudlo sini sa aton? (b) Ano ang nakabulig sa imo nga maghinakop kaangay sang salmista?

11 Paano nalandas sang salmista ang iya mga pangduhaduha? Bisan pa gin-ako niya nga diutayan lang sia makadanlog, nagbag-o ang iya pagtamod sang nagsulod sia sa “santuario sang Dios”—sang nakig-upod sia sa mga alagad sang Dios sa tabernakulo ukon templo kag sang ginpamalandungan niya ang katuyuan sang Dios. Nian, nangin maathag sa salmista nga indi niya luyag matabo sa iya ang madangatan sang mga malauton. Narealisar niya nga ang mga malauton yara sa “madanlug nga mga duug” bangod sang ila dalanon sang pagkabuhi. Nahangpan man sang salmista nga ang tanan nga nagabiya kay Jehova kag nangin imoral, pat-od nga mapatay sa “kakugmat,” apang ang mga nagaalagad kay Jehova sakdagon niya. (Basaha ang Salmo 73:16-19, 27, 28.) Wala sing duhaduha nga nakita mo ang kamatuoran sini. Ang pagkabuhi para lamang sa kaugalingon nga wala nagasunod sa kasuguan sang Dios mahimo makagalanyat para sa madamo, apang indi gid malikawan ang malain nga mga resulta sina nga dalanon.—Gal. 6:7-9.

12 Ano pa ang matun-an naton sa eksperiensia sang salmista? Nakasapo sia sing kalig-unan kag kaalam sa tunga sang katawhan sang Dios. Nakapamensar sia sing maayo sang nagkadto sia sa templo ni Jehova. Sing kaanggid, makakita kita sing maalamon nga mga manuglaygay kag makatigayon sing makapapagros sa espirituwal nga pagkaon sa aton mga miting sang kongregasyon. Gani, nagakaigo lamang nga ginsilingan ni Jehova ang iya mga alagad nga magtambong sa Cristianong mga miting sa diin makabaton sila sang pagpalig-on kag matudluan kon paano maggawi sing maalamon.—Isa. 32:1, 2; Heb. 10:24, 25.

Pilia sing Maayo ang Imo mga Kaupdanan

13-15. (a) Ano ang eksperiensia ni Dina, kag ano ang ginatudlo sini sa aton? (b) Ngaa ang pagpakig-upod sa mga masigka-Cristiano isa ka pangamlig?

13 Si Dina nga anak nga babayi ni Jacob, napahamak bangod sang iya pagpakig-upod sa mga tawo nga wala nagaalagad kay Jehova. Ang rekord sa Genesis nagasugid sa aton nga pirme sia nagapakig-upod sa mga pamatan-on nga babayi nga Canaanhon nga nagapuyo sa lugar nga malapit sa ila ginaistaran. Ang talaksan sa moral sang mga Canaanhon indi pareho kataas sa talaksan sang mga sumilimba ni Jehova. Ginapakita sang mga natukiban sang mga arkeologo nga ang pagkabuhi  sang mga Canaanhon puno sang idolatriya, imoralidad, malaut nga pagsimba sa sekso, kag kasingki. (Ex. 23:23; Lev. 18:2-25; Deut. 18:9-12) Dumduma kon ano ang natabo sang nagpakig-upod si Dina sa sining mga tawo.

14 Ang Canaanhon nga si Siquem ginlaragway nga amo “ang pinakadungganon sa bug-os nga panimalay sang iya amay.” Sang nakita niya si Dina, “ginkuha niya sia kag naghulid sa iya kag ginhimuslan niya sia.” (Gen. 34:1, 2, 19, NW) Daw ano ka makapasubo nga resulta! Sa banta mo, naghunahuna ayhan si Dina nga matabo ina sa iya? Mahimo nga luyag lamang niya nga makig-abyan sa mga pamatan-on sa Canaan kay abi niya mabuot sila. Apang, nagsala gid si Dina.

15 Ano ang matun-an naton sa sini nga kasaysayan? Ginapakita sini nga indi kita dapat maghunahuna nga ang aton pagpakig-upod sa mga indi tumuluo wala sing malain nga resulta. Ang Kasulatan nagasiling nga “ang malain nga pagpakig-upod nagapalain sang mapuslanon nga mga batasan.” (1 Cor. 15:33) Sa pihak nga bahin, kon magpakig-upod ka sa mga tawo nga pareho sa imo ang pagpati, ang imo mataas nga talaksan sa moral kag gugma kay Jehova maamligan. Inang maayo nga mga kaupdanan magapalig-on sa imo nga maggawi sing maalamon.—Hulu. 13:20.

“Ginhugasan Na Kamo”

16. Ano ang ginsiling ni apostol Pablo tuhoy sa pila ka Cristiano sa kongregasyon sang Corinto?

16 Madamo nga tawo ang nabuligan sang Cristianong kongregasyon nga mangin matinlo gikan sa ila mahigko nga mga buhat. Sa una nga sulat ni apostol Pablo sa kongregasyon sang Corinto, ginsambit niya ang mga pagbag-o nga ginhimo sang mga Cristiano agod mapahisuno ang ila pagkabuhi sa mga talaksan sang Dios. Ang pila sa ila mga makihilawason anay, nagasimba sa mga idolo, makihilahion, homoseksuwal, kawatan, palahubog, kag iban pa. “Apang ginhugasan na kamo,” siling ni Pablo sa ila.—Basaha ang 1 Corinto 6:9-11.

17. Paano ang pagkabuhi nahisuno sa mga talaksan sang Biblia nagpabag-o sa kabuhi sang madamo?

17 Ang mga tawo nga wala sing pagtuo wala sing ginasunod nga prinsipio. Ginahimo lang nila kon ano ang ila gusto, ukon nagapadala lang sila sa imoral nga paggawi sang mga tawo sa palibot nila. Amo sina anay ang mga taga-Corinto antes sila nangin mga tumuluo. (Efe. 4:14) Apang, ang sibu nga ihibalo sa Pulong sang Dios kag sa iya mga katuyuan may gahom sa pagpabag-o sa kabuhi sang mga nagaaplikar sang Kasulatan. (Col. 3:5-10; Heb. 4:12) Madamo karon nga katapo sang Cristianong kongregasyon ang makasugid sa imo nga antes sila nakatuon sang matarong nga talaksan ni Jehova, wala sila sing ginasunod nga moral nga prinsipio. Sa gihapon, nagabatyag sila nga may kulang sa ila kabuhi kag indi sila malipayon. Apang, sang nagsugod sila sa pagpakig-upod sa katawhan sang Dios kag nagkabuhi nahisuno sa mga prinsipio sa Biblia, nakasapo sila sing kalinong.

18. Ano ang eksperiensia sang isa ka pamatan-on, kag ano ang ginapamatud-an sini?

18 Sa pihak nga bahin, ang pila nga nagbiya sa ‘duog nga hilway sa katalagman,’ ukon Cristianong kongregasyon, naghinulsol gid sa ginhimo nila nga desisyon. Ang utod nga si Tanya, * nagsugid nga “ginpadaku sia sa kamatuoran,” apang sang 16 anyos sia, nagbiya sia sa kongregasyon agod “magpaayaw sa kalibutan.” Ang pila sang mga resulta sini amo ang iya wala ginapaabot nga pagbusong kag pagpahulog. Nagsiling sia: “Ang tatlo ka tuig nga pagpahilayo ko sa kongregasyon nagbilin sa akon sing mga pilas sa emosyon nga daw indi na magpali. Ang indi ko gid malipatan amo ang pagpahulog ko sang akon lapsag. . . . Luyag ko isiling sa mga pamatan-on nga kon  nagahandum sila nga ‘magtilaw’ sa kalibutan bisan sing makadali lang: ‘Indi gid!’ Sa primero daw matam-is ini, apang sa ulihi tuman gali kapait. Ang kalibutan wala gid sing matanyag kundi kasubo lamang. Nahibaluan ko kay natilawan ko na ini. Magpabilin sa organisasyon ni Jehova! Amo lamang ini ang dalanon sang kabuhi nga makahatag sing matuod nga kalipay.”

19, 20. Ano nga pangamlig ang ginahatag sang Cristianong kongregasyon, kag paano?

19 Hunahunaa kon ano ang matabo sa imo kon maggua ka sa Cristianong kongregasyon. Ginapangilkigan gani bisan sa paghunahuna lang sini yadtong mga nagkabuhi anay sing imoral antes nangin Saksi. (Juan 6:68, 69) Paagi sa pagpabilin nga suod sa imo Cristianong mga kauturan makasapo ka sing kalig-unan kag maamligan ka batok sa mga kahuol kag kasubo nga lapnag sa kalibutan ni Satanas. Ang pagpakig-upod sa mga kauturan kag regular nga pagtambong sa mga miting sa kongregasyon magapahanumdom sa imo sang matarong nga mga talaksan ni Jehova kag magapalig-on sa imo nga ikabuhi ini. Madamo ka gid sing rason nga ‘magpasalamat kay Jehova sa daku nga katilingban,’ kaangay sang ginhimo sang salmista.—Sal. 35:18.

20 Huo, ang tanan nga Cristiano mahimo makaatubang sang mga sitwasyon nga magatilaw sang ila integridad. Ayhan nagakinahanglan sila sing bulig agod makahimo sing husto nga desisyon. Ano ang mahimo mo ukon sang iban pa nga katapo sang kongregasyon agod buligan ang aton mga masigkatumuluo sa sina nga tion? Binagbinagon sa masunod nga artikulo kon paano mo ‘padayon nga lugpayan kag palig-unon’ ang imo mga kauturan.—1 Tes. 5:11.

[Nota]

^ par. 18 Gin-islan ang ngalan.

Paano Mo Sabton?

• Ano ang matun-an naton sa eksperiensia sang manunulat sang Salmo 73?

• Ano ang ginatudlo sa aton sang eksperiensia ni Dina?

• Ngaa makasapo ka sing kalig-unan sa Cristianong kongregasyon?

[Mga Pamangkot sa Pagtinuon]

[Mga Retrato sa pahina 7]

Maglangoy lamang sa duog nga hilway sa katalagman; magpabilin sa kongregasyon!