Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Bangod ginadumilian ni Jehova ang idolatriya, ngaa wala niya ginsilutan si Aaron sang naghimo ini sang bulawan nga tinday nga baka?

Subong sang mabasa naton sa Exodo kapitulo 32, ginsupak ni Aaron ang kasuguan sang Dios tuhoy sa idolatriya sang naghimo sia sang bulawan nga tinday nga baka. (Ex. 20:3-5) Subong resulta, “ang GINOO naakig sing tama kay Aaron sa paglaglag sa iya; kag nagpangamuyo [si Moises] tungud kay Aaron man sa among tion.” (Deut. 9:19, 20) Ang pangamuyo bala sang matarong nga si Moises may “daku nga puersa” para kay Aaron? (Sant. 5:16) Huo. Bangod sa sina nga pangamuyo kag sa duha pa ka rason, makasiling kita nga ginsabat ni Jehova ang pangamuyo ni Moises kay wala Niya ginsilutan si Aaron.

Ang isa ka rason mahimo nga amo ang katutom ni Aaron. Sang ginsugo ni Jehova si Moises nga mag-atubang kay Paraon agod paguaon ang mga Israelinhon sa Egipto, gintangdo Niya si Aaron nga mangin humalambal ni Moises. (Ex. 4:10-16) Ining duha ka lalaki pila ka beses nga nag-atubang sa hari sang Egipto kag naeksperiensiahan nila ang pagkabatinggilan ni Paraon. Gani, samtang didto sila sa Egipto, ginpamatud-an ni Aaron ang iya katutom kay Jehova.—Ex. 4:21.

Binagbinaga man ang rason kon ngaa nakahimo si Aaron sang bulawan nga tinday nga baka. Si Moises nagkadto sa Bukid Sinai kag nagpabilin didto sa sulod sang 40 ka adlaw. “Sang nakita sang katawohan nga si Moises nagpalantang sa pagdulhog sa bukid,” ginpilit nila si Aaron nga maghimo sang idolo. Nagpasugot si Aaron kag naghimo sia sang bulawan nga tinday nga baka. (Ex. 32:1-6) Apang, ang mga ginhimo sang ulihi ni Aaron nagapakita nga ang iya tagipusuon indi ugyon sa paghimo sang idolo. Maathag nga napilitan lamang sia. Sang ginpapili ni Moises ang mga tawo kon kay sin-o sila dampig, ang tanan nga anak ni Levi, lakip si Aaron, malig-on nga nagdampig kay Jehova. Ang tatlo ka libo nga nanguna sa pagsimba sa idolo ginpamatay.—Ex. 32:25-29.

Pagkatapos sini, ginsilingan ni Moises ang katawhan: “Nakasala kamo sing daku nga sala.” (Ex. 32:30) Gani, indi lamang si Aaron ang balasulon. Apang sia kag ang katawhan ginpakitaan ni Jehova sing daku nga kaluoy.

Sa tapos sini nga hitabo, nagsugo si Jehova nga itangdo subong mataas nga saserdote si Aaron. “Isuklub mo kay Aaron ang mga panapton nga balaan, kag haplason mo sia kag pakabalaanon sia,” siling ni Jehova kay Moises, “agud nga mag-alagad sia sa akon sa pagkasacerdote.” (Ex. 40:12, 13) Nagapakita ini nga ginpatawad na ni Jehova si Aaron sa iya kaluyahon. Sa iya tagipusuon, si Aaron isa ka matutom nga sumilimba sang Dios, indi sang mga idolo.