Ginasunod Mo Bala sing Bug-os si Cristo?

“Sa katunayan nagalakat kamo sing subong, padayon ninyo nga himuon ini sing labi pa.”—1 TES. 4:1.

1, 2. (a) Anong dalayawon nga mga butang ang nasaksihan sang madamo nga tawo sang panahon ni Jesus? (b) Ngaa ang aton panahon sa karon importante man?

NAHANDURAW mo na bala kon daw ano katahom kon nabuhi ka sang panahon nga yari si Jesus sa duta? Mahimo nahunahuna mo nga isa ka sa gin-ayo ni Jesus kag naumpawan sa imo makapahuol nga balatian. Ukon mahimo nga tuman gid ang imo kalipay nga nakita mo kag nabatian si Jesus—nakatuon sa iya kag nasaksihan ang paghimo niya sang mga milagro. (Mar. 4:1, 2; Luc. 5:3-9; 9:11) Daw ano gid ina ka daku nga pribilehiyo! (Luc. 19:37) Wala na sang iban nga kaliwatan ang nakakita sadtong mga butang. Ang ginhimo ni Jesus sa duta “paagi sa paghalad sang iya kaugalingon” indi na masulit.—Heb. 9:26; Juan 14:19.

2 Apang, ang aton panahon sa karon importante man. Ngaa? Bangod suno sa gintagna sang Kasulatan, nagakabuhi na kita “sa katapusan nga mga adlaw.” (Dan. 12:1-4, 9; 2 Tim. 3:1) Sa sini nga hut-ong sang tion gintagbong si Satanas sa duta. Kag sa indi madugay, pagagapuson sia kag itagbong “sa kadadalman.” (Bug. 12:7-9, 12; 20:1-3) Sa karon, pribilehiyo man naton nga ibantala ang “maayong balita sang ginharian” sa bug-os nga kalibutan kag sugiran ang mga tawo tuhoy sa paglaum nga Paraiso. Ini nga hilikuton indi na masulit pa.—Mat. 24:14.

3. Antes sia magkayab sa langit, ano ang ginsiling ni Jesus nga himuon sang iya mga sumulunod, kag ano ang nadalahig sa sini?

 3 Antes magkayab si Jesus sa langit, nagsiling sia sa iya mga sumulunod: “Mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binu. 1:8) Ginapahangop sini nga ini nga hilikuton magalapnag sa bug-os nga kalibutan. Ano ang tulumuron sini? Amo ang paghimo sang mga disipulo, ukon mga sumulunod ni Cristo, antes mag-abot ang katapusan. (Mat. 28:19, 20) Ano ang dapat naton himuon agod matuman naton sing madinalag-on ang sugo ni Cristo?

4. (a) Ano ang ginapadaku ni Pedro sa iya pinamulong sa 2 Pedro 3:11, 12? (b) Sa ano kita dapat magbantay?

4 Talupangda ang ginsiling ni apostol Pedro: “Ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon, nga ginahulat kag pirme ginadumdom ang presensia sang adlaw ni Jehova!” (2 Ped. 3:11, 12) Ginapadaku sang pinamulong ni Pedro nga dapat kita magbantay sa sining katapusan nga mga adlaw agod mapat-od naton nga ang aton kabuhi nasentro sa mga buhat sang diosnon nga debosyon. Ina nga mga buhat nagalakip sang pagbantala sang maayong balita. Gani, daw ano ka makalilipay nga makita naton ang kakugi sang aton mga kauturan sa bug-os nga kalibutan sa pagtuman sang sugo ni Cristo nga magbantala! Subong man, nahangpan naton nga dapat kita maghalong nga ang mga kabudlayan nga ginaatubang naton sa kalibutan ni Satanas kag ang aton napanubli nga undanon nga mga huyog indi magpaluya sang aton pag-alagad sa Dios. Binagbinagon naton kon paano naton padayon nga masunod ang Cristo.

Batuna ang Responsibilidad nga Ginhatag sang Dios

5, 6. (a) Ngaa ginhatagan sang komendasyon ni Pablo ang mga masigkatumuluo niya sa Jerusalem, kag batok sa ano sila ginpaandaman? (b) Ngaa dapat kita mangin mapisan sa pagtuman sang responsibilidad nga ginhatag sang Dios sa aton?

5 Sa iya sulat sa mga Cristiano sa Jerusalem, si apostol Pablo naghatag sing komendasyon sa iya mga masigkatumuluo bangod nagpabilin sila nga matutom bisan pa ginhingabot sila. Nagsiling sia: “Padayon ninyo nga dumdumon ang nagligad nga mga adlaw nga sa tapos kamo masanagan, nagbatas kamo sang daku nga pagpakig-away sa idalom sang mga pag-antos.” Huo, ginadumdom gid ni Jehova ang ila katutom. (Heb. 6:10; 10:32-34) Mahimo nga napalig-on gid ang Hebreo nga mga Cristiano sa komendasyon nga ginhatag ni Pablo. Apang, nagpaandam man si Pablo sa sina nga sulat, nga kon ang tawhanon nga huyog indi makontrol, mahimo dulaon sini ang kakugi sang isa sa pag-alagad sa Dios. Nagsiling sia nga dapat maghalong ang mga Cristiano nga indi “magbalibad” ukon maglikaw sa pagtuman sa mga sugo sang Dios.—Heb. 12:25.

6 Ina nga paandam batok sa huyog nga “magbalibad” sa mga responsibilidad nga ginhatag sang Dios naaplikar man sa mga Cristiano karon. Nahangpan naton nga dapat kita mangin mapisan sa pagtuman sang aton Cristianong mga responsibilidad kag indi naton dapat pagtugutan nga mag-ugdaw ang aton kakugi sa pag-alagad sa Dios. (Heb. 10:39) Labaw sa tanan, ang aton kaluwasan ukon kalaglagan nasandig sa aton sagrado nga pag-alagad.—1 Tim. 4:16.

7, 8. (a) Ano ang makabulig sa aton nga mahuptan ang kakugi sa pag-alagad sa Dios? (b) Kon nag-ugdaw na ang aton kakugi, ano ang dapat naton dumdumon tuhoy kay Jehova kag kay Jesus?

7 Ano ang makabulig sa aton nga indi magbalibad sa pagtuman sang aton mga obligasyon sa Dios? Ang isa ka importante nga paagi amo ang regular nga pagpamalandong sa aton panaad sa dedikasyon. Nanaad kita kay Jehova nga unahon naton sa aton kabuhi ang paghimo sang iya kabubut-on kag luyag naton tumanon ina nga panaad. (Basaha ang Mateo 16:24.) Gani, maayo nga pamangkuton naton ang aton kaugalingon: ‘Malig-on bala gihapon ang akon determinasyon nga mag-alagad sa Dios kaangay sang tion nga nagpabawtismo ako? Ukon nag-ugdaw na bala ang akon kakugi?’

 8 Kon natalupangdan naton nga nagluya na kita sa pag-alagad, maayo nga dumdumon naton ang makapalig-on nga pinamulong ni manalagna Sofonias. Nagsiling sia: “Dili magluya ang imo mga kamut. Ang GINOO, ang imo Dios, yara sa tunga nimo, ang gamhanan nga magaluwas; magakasadya sia sa imo nga may kalipay.” (Sof. 3:16, 17) Ining makapalig-on nga mga pinamulong naaplikar sa dumaan nga mga Israelinhon nga nagbalik sa Jerusalem gikan sa pagkabihag sa Babilonia. Apang, ini nga pasalig naaplikar man sa katawhan sang Dios sa karon. Bangod ang aton hilikuton iya ni Jehova, dumdumon naton nga si Jehova kag ang iya Anak nagabulig kag nagapalig-on sa aton nga matuman ini. (Mat. 28:20; Fil. 4:13) Kon tinguhaan naton nga magpabilin nga makugi sa pagtuman sang hilikuton sang Dios pakamaayuhon niya kita kag buligan nga mag-uswag sa espirituwal.

Makugi nga “Pangitaa Anay ang Ginharian”

9, 10. Ano nga punto ang ginatudlo sang parabola ni Jesus tuhoy sa engrande nga panihapon, kag ano nga leksion ang matun-an naton sa sini?

9 Samtang nagakaon sia sa puluy-an sang isa ka manuggahom nga Fariseo, naghatag si Jesus sang ilustrasyon tuhoy sa engrande nga panihapon. Sa sina nga ilustrasyon, ginlaragway niya ang kahigayunan nga ginhatag sa nanuhaytuhay nga tawo nga mangin bahin sang Ginharian sa langit. Gin-ilustrar man niya kon ano ang buot silingon sang ‘pagpamalibad.’ (Basaha ang Lucas 14:16-21.) Sa ilustrasyon ni Jesus, ang mga bisita nga gin-agda nagpamalibad sa pagtambong. Ang isa nagsiling nga nakataba sia sang uma kag kinahanglan niya ini kadtuan kag tan-awon. Ang isa naman nagsiling nga nakabakal sia sang mga baka kag malakat sia agod tan-awon ini. Kag ang isa pa nagsiling: ‘Indi ako makakadto kay bag-o lang ako nakapangasawa.’ Daw ano kanabaw nga mga rason! Kinaandan na nga antes baklon sang isa ang uma ukon mga sapat, ginausisa niya anay ini, gani indi na kinahanglan pa nga usisaon liwat sa tapos ini mabakal. Kag ngaa abi indi makatambong ang isa sa isa ka importante nga okasyon kon bag-o lang sia makasal? Gani, indi katingalahan nga ang tagbalay sa ilustrasyon naakig gid!

10 Ang tanan nga alagad sang Dios makatuon sang leksion sa parabola ni Jesus. Ano nga leksion? Subong sang ginsambit ni Jesus sa iya ilustrasyon, indi naton dapat pagtugutan ang personal nga mga butang nga mag-upang sa aton pag-alagad sa Dios. Kon ang isa ka Cristiano indi mangin balanse sa iya personal nga mga hilikuton mahimo amat-amat nga magaugdaw ang iya kakugi sa ministeryo. (Basaha ang Lucas 8:14.) Agod malikawan ina, dapat naton sundon ang laygay ni Jesus: “Padayon nga pangitaa anay ang ginharian kag ang iya pagkamatarong, kag ini tanan iban pa nga butang idugang sa inyo.” (Mat. 6:33) Daw ano ka makapalig-on nga makita ang mga alagad sang Dios, bata man ukon tigulang, nga nagatuman sinang importante nga laygay! Sa pagkamatuod, ginpasimple sang madamo ang ila pagkabuhi agod madugangan ang ila tion sa ministeryo. Bangod makugi nila nga ginpangita anay ang Ginharian, naeksperiensiahan nila ang matuod nga kalipay kag kaayawan.

11. Ano nga kasaysayan sa Biblia ang nagapakita nga importante gid ang makugi kag bug-os tagipusuon nga pag-alagad sa Dios?

11 Para mahangpan naton sing maayo kon daw ano ka importante ang kakugi sa pag-alagad sa Dios, talupangda ang natabo sa kabuhi ni Hari Jehoas sang Israel. Bangod nabalaka sia nga basi malutos sang Siria ang Israel, nagkadto sia kag naghibi kay Eliseo. Ginsugo sia sang manalagna nga magpana sang baslay sa bintana nga nagaatubang sa Siria, nga tanda sang ila pagdaug batok sa sina nga pungsod paagi sa bulig ni Jehova. Mahimo nga nagpapagsik gid ini sa hari. Dayon, ginsugo ni Eliseo si Jehoas nga ibuno sa duta ang iya mga baslay. Ginbuno ni Jehoas ang duta sing tatlo ka beses. Nagpaakig gid ini kay Eliseo bangod ang pagbuno sa duta sing lima ukon anom ka beses nagakahulugan kuntani sang ‘pagdaug sa Siria tubtub nga mapapas ini.’ Gani tatlo ka beses lamang nga magadaug si Jehoas. Bangod kulang ang kakugi nga ginpakita ni Jehoas, limitado lamang ang  iya kadalag-an. (2 Hari 13:14-19) Ano ang matun-an naton sa sini? Mabaton lamang naton ang bugana nga pagpakamaayo ni Jehova kon ginatuman naton ang iya hilikuton sing bug-os tagipusuon kag may kakugi.

12. (a) Ano ang makabulig sa aton nga mahuptan ang aton kakugi sa pag-alagad sa Dios kon nagaatubang kita sang mga kabudlayan sa kabuhi? (b) Isugid kon paano ka nakabenepisyo sa pagpabilin nga masako sa ministeryo.

12 Ang mga kabudlayan sa kabuhi nagatilaw sang aton kakugi kag debosyon sa pag-alagad sa Dios. Madamo sang aton mga kauturan ang nagaatubang sang kapigaduhon. Ang iban ginaluyahan bangod sang malala nga balatian nga nagaupang sa ila sa pag-alagad kay Jehova. Apang, kita tanan sarang makahimo sang paagi agod mahuptan ang aton kakugi kag padayon nga masunod sing bug-os si Cristo. Talupangda ang pila ka panugda kag mga kasulatan nga nalista sa kahon nga “Ano ang Makabulig sa Imo nga Padayon nga Sundon si Cristo?” Binagbinaga kon paano mo ini maaplikar sa imo bug-os nga masarangan. Makabenepisyo ka sing daku kon himuon mo ini. Ang pagpabilin nga masako sa ministeryo nagapabakod sa aton, nagapauswag sang aton kabuhi, kag nagahatag sa aton sing dugang nga paghidait kag kalipay. (1 Cor. 15:58) Dugang pa, ang aton bug-os kalag nga pag-alagad sa Dios nagabulig man sa aton nga ‘pirme dumdumon ang presensia sang adlaw ni Jehova.’—2 Ped. 3:12.

Usisaa sing Bunayag ang Imo Kahimtangan

13. Paano naton mahibaluan kon bala bug-os kalag ang aton pag-alagad sa Dios?

13 Dumduma nga ang bug-os kalag nga pag-alagad wala lamang nabase sa kadamuon sang tion nga ginahinguyang naton sa ministeryo. Nanuhaytuhay ang kahimtangan sang kada isa. Bisan isa ukon duha lamang ka oras ang ginahinguyang sang isa sa pag-alagad sa latagon kada bulan, nagapahamuot gid ini kay Jehova kon amo lamang sini ang ginatugot sang iya panglawas. (Ipaanggid ang Marcos 12:41-44.) Kon luyag naton mahibaluan kon bala bug-os kalag ang aton pag-alagad sa Dios, dapat naton usisaon sing bunayag ang aton ikasarang kag kahimtangan. Subong mga sumulunod ni Cristo, luyag naton ilugon ang iya pagtamod. (Basaha ang Roma 15:5; 1 Cor. 2:16) Ano bala ang gin-una ni Jesus sa iya kabuhi? Ginsilingan niya ang mga taga-Capernaum: “Dapat ko ibantala ang maayong balita sang ginharian sang Dios, kay tungod sini ginpadala ako.” (Luc. 4:43; Juan  18:37) Samtang ginapamalandungan mo ang kakugi ni Jesus sa ministeryo, usisaa ang imo kahimtangan kon bala mahimo mo pa mapauswag ang imo ministeryo.—1 Cor. 11:1.

14. Sa ano nga mga paagi mapasangkad naton ang aton ministeryo?

14 Kon usisaon naton sing maayo ang aton kahimtangan mahimo makita naton nga puede pa naton madugangan ang aton tion nga ginahinguyang sa ministeryo. (Mat. 9:37, 38) Halimbawa, madamo nga pamatan-on ang nagpayunir gilayon pagkatapos nila sa hayskul kag nakaeksperiensia sing kalipay sa ila makugi nga pag-alagad. Luyag mo man bala maeksperiensiahan ina nga kalipay? Ginbinagbinag sang pila ka kauturan ang ila kahimtangan kag nagdesisyon nga magsaylo sa isa ka lugar ukon pungsod nga nagakinahanglan sang dugang pa nga mga manugbantala sang Ginharian. May mga utod nga nagtuon sang iban nga lenguahe agod makabulig sa mga tawo nga nagahambal sina nga lenguahe. Bisan pa mabudlay ang pagpasangkad sang aton ministeryo, nagahatag ini sing bugana nga mga pagpakamaayo kag mahimo nga madamo pa kita sing mabuligan nga “makadangat sa sibu nga ihibalo tuhoy sa kamatuoran.”—1 Tim. 2:3, 4; 2 Cor. 9:6.

Mga Halimbawa sa Biblia nga Dapat Sundon

15, 16. Sin-o ang makugi nga mga sumulunod ni Cristo nga maayo nga ilugon naton?

15 Ano ang reaksion sang pila nga nangin mga apostoles ni Cristo sang gin-agda niya sila nga mangin mga sumulunod niya? Tuhoy kay Mateo, ang rekord nagasiling: “Nagabiya sang tanan nga butang, nagtindog sia kag nagsunod sa iya.” (Luc. 5:27, 28) Tuhoy naman kanday Pedro kag Andres nga nagapangisda, mabasa naton: “Ginbayaan nila gilayon ang mga pukot kag nagsunod sa iya.” Nakita man ni Jesus sanday Santiago kag Juan nga nagapamuna sang ila pukot upod sa ila amay. Ano ang ila reaksion sang gin-agda sila ni Jesus? “Ginbayaan nila gilayon ang sakayan kag ang ila amay, kag nagsunod sila sa iya.”—Mat. 4:18-22.

16 Ang isa pa ka maayo nga halimbawa amo si Saulo, nga nangin si apostol Pablo. Bisan pa masupog sia nga manughingabot sa mga sumulunod ni Cristo sang una, nagbag-o sia kag nangin ang “pinili nga suludlan” nga nagadala sang ngalan ni Cristo. “Sa gilayon ginbantala [ni Pablo] sa mga sinagoga ang tuhoy kay Jesus, nga ining Isa amo ang Anak sang Dios.” (Binu. 9:3-22) Kag bisan pa nagbatas si Pablo sang madamo nga kabudlayan kag paghingabot, wala gid nag-ugdaw ang iya kakugi.—2 Cor. 11:23-29; 12:15.

17. (a) Ano ang tulumuron mo tuhoy sa pagsunod kay Cristo? (b) Ano nga mga pagpakamaayo ang ginaagom naton bangod sa bug-os tagipusuon kag bug-os kusog nga paghimo naton sang kabubut-on ni Jehova?

17 Luyag gid naton ilugon ang maayo nga halimbawa sang mga disipulo nga wala nagpangalag-ag sa pagbaton sang imbitasyon ni Cristo. (Heb. 6:11, 12) Ano nga mga pagpakamaayo ang maagom naton kon sundon naton sing bug-os kag may kakugi si Cristo? Mabatyagan naton ang matuod nga kalipay sa paghimo sang kabubut-on sang Dios kag sa pagbaton sang dugang pa nga mga pribilehiyo kag katungdanan sa kongregasyon. (Sal. 40:8; basaha ang 1 Tesalonica 4:1.) Huo, samtang ginapanikasugan naton nga sundon si Cristo, maagom naton ang bugana kag padayon nga mga pagpakamaayo subong sang kalinong sa hunahuna, kaayawan, pagkakontento, kahamuot sang Dios, kag paglaum nga kabuhi nga wala sing katapusan.—1 Tim. 4:10.

Madumduman Mo Bala?

• Anong importante nga hilikuton ang ginapatuman sa aton, kag paano naton ini dapat tamdon?

• Ano nga huyog ang dapat naton bantayan, kag ngaa?

• Anong bunayag nga pag-usisa sa kaugalingon ang dapat naton himuon?

• Ano ang makabulig sa aton nga magpadayon sa pagsunod kay Cristo?

[Mga Pamangkot sa Pagtinuon]

[Kahon/Retrato sa pahina 27]

Ano ang Makabulig sa Imo nga Padayon nga Sundon si Cristo?

▪ Basaha ang Biblia adlaw-adlaw kag pamalandungi ang imo nabasahan.—Sal. 1:1-3; 1 Tim. 4:15.

▪ Ipangamuyo pirme nga suportahan ka kag tuytuyan sang espiritu sang Dios.—Zac. 4:6; Luc. 11:9, 13.

▪ Makig-upod sa mga nagapakita sing bug-os tagipusuon nga kakugi sa ministeryo.—Hulu. 13:20; Heb. 10:24, 25.

▪ Magbatyag sing pagkahilingagawon.—Efe. 5:15, 16.

▪ Dumduma pirme ang indi maayo nga mga resulta sang ‘pagpamalibad.’—Luc. 9:59-62.

▪ Hunahunaa pirme ang imo panaad sa dedikasyon kag ang bugana nga pagpakamaayo nga imo naagom sa pag-alagad kay Jehova kag sa pagsunod kay Cristo sing bug-os tagipusuon.—Sal. 116:12-14; 133:3; Hulu. 10:22.