Ang Paglandas sa mga Pagtilaw Nagpabakod sa Amon Pagsalig kay Jehova

Panugiron ni Ada Dello Stritto

Bag-o ko lang matapos kopya ang teksto sa sini nga adlaw sa akon kuwaderno. Treintay seis anyos na ako, apang duha ka oras ko nga ginsulat ining teksto. Ngaa amo sina ka dugay? Ipaathag ini sang akon iloy.—Joel

AKO kag ang akon bana ginbawtismuhan subong mga Saksi ni Jehova sang 1968. Pagkatapos mabun-ag ang amon duha ka mapagros nga bata nga si David kag si Marc, nagbun-ag ako sang amon ikatlo nga bata, si Joel. Natawo sia nga kulang sa binulan sang 1973 sa isa ka ospital sa banwa sang Binche sa Belgium, mga 60 kilometros sa bagatnan sang Brussels. Nagabug-at lamang sia sing 1.7 ka kilo. Sang paggua ko sa ospital, nabilin pa si Joel didto para madugangan ang iya bug-at.

Pagligad sang mga pila ka semana, wala gihapon mag-ayo ang kahimtangan sang amon anak amo nga gindala namon sia sang akon bana nga si Luigi sa isa ka pediatrician. Pagkatapos niya mausisa ang kahimtangan ni Joel, nagsiling ang doktor: “Ginakasubo ko gid. Daw ara kay Joel ang tanan nga problema nga wala sa iya mga utod.” Wala kami makahambal. Narealisar ko nga malubha ang balatian sang amon bata. Dayon gindapit sang doktor ang akon bana kag ginsilingan: “Ang imo bata may trisomy 21,” nga kilala man subong Down syndrome. *

Wala kami nakontento sa pagsayasat sang pediatrician amo nga nagkadto kami sa isa pa ka espesyalista. Sa sulod sang halos isa ka oras gin-usisa niya sing maayo ang kahimtangan ni Joel nga wala nagahuluhambal. Para sa amon ni Luigi, tuman ini ka dugay. Sang ulihi, ang doktor nagtulok sa amon kag nagsiling, “Ang inyo bata magakinahanglan gid sang inyo daku nga pag-atipan.” Dayon, malulo sia nga nagsiling, “Apang mangin malipayon si Joel bangod palangga sia sang iya mga ginikanan!” Indi ko mahangpan ang akon ginabatyag. Ginkugos ko si Joel kag gindala namon pauli. Walo pa lang sia ka semana sadto.

Napalig-on sang Cristianong mga Miting kag sang Ministeryo

Pagkatapos sang dugang pa nga pagsayasat kay Joel, natukiban nga may malubha sia nga balatian sa tagipusuon kag may malubha man nga rickets (sakit sa tul-an). Bangod tuman ka daku ang iya tagipusuon, ginaipit sini ang iya mga baga amo nga madali sia maimpeksion.  Sang mga apat sia ka bulan, nagmasakit sing pulmonya si Joel kag gindala liwat sa ospital para ikuarentinas. Masakit para sa amon nga makita sia nga nagaantos. Luyag namon sia kuguson kag hapulason, apang sa sulod sang napulo ka semana, wala kami gintugutan bisan magtandog lang sa iya. Wala kami sing mahimo ni Luigi kundi magtan-aw na lang sa iya, maghaksanay, kag mangamuyo.

Walay sapayan sinang mga kabudlayan, wala kami nag-untat sa pagtambong sa Cristianong mga miting. Ginaupod namon sanday David kag Marc, nga 6 kag 3 ka tuig sadto. Kon yara kami sa Kingdom Hall, pamatyag namon ginaalay-ay kami ni Jehova sa iya mga kamot. Sa mga oras nga didto kami, nga ginapalibutan sang amon Cristianong mga kauturan, nagabatyag kami nga mahimo namon itugyan ang amon lulan kay Jehova, kag may yara kami nasulod nga kalinong. (Sal. 55:22) Bisan ang mga nars nga nagaatipan kay Joel nakatalupangod nga ang amon pagtambong sa Cristianong mga miting nakabulig sa amon nga mahuptan ang pagkabalanse.

Sadto nga tion, nagapakiluoy man ako kay Jehova nga hatagan niya ako sing kusog nga makagua sa latagon. Sa baylo nga magtener sa balay kag maghilibion, gusto ko nga magpakig-istorya sa iban kag sugiran sila kon paano ang akon pagsalig sa saad sang Dios nga isa ka kalibutan nga wala sing balatian naghatag sa akon sing kusog. Sa kada tion nga magpakigbahin ako sa ministeryo, nabatyagan ko nga ginasabat ni Jehova ang akon mga pangamuyo.

“Makatilingala Gid Ini!”

Daw ano nga kalipay ang amon nabatyagan sang puede na namon mapagua si Joel sa ospital kag madala pauli! Apang pagkadason nga adlaw, ang amon kalipay ginbuslan sang kasubo. Gulpi lang naglala ang kahimtangan ni Joel, kag ginhingagaw namon sia balik sa ospital. Pagkatapos sia mausisa sang mga doktor, ginsilingan nila kami: “Mga anom na lang ka bulan ang kabuhi ni Joel.” Pagligad sang duha ka bulan, sang mga walo na ka bulan ang iya edad, daw matuod gid ang ginsiling sang mga doktor kay naglala ang kahimtangan ni Joel. Ang isa ka doktor nagpakigsugilanon sa amon kag nagsiling: “Ginakasubo ko gid. Wala na kita sing mahimo.” Nagsiling pa sia: “Si Jehova na lamang ang makabulig sa iya.”

Nagbalik ako sa kuarto ni Joel sa ospital. Bisan pa nagabatyag ako sing kahuol kag kalapyo, indi ko luyag maghalin sa iya tupad. Madamo nga utod nga babayi ang nagabulosbulos bantay upod sa akon, samtang si Luigi naman ang nagaatipan sa duha pa namon ka anak. Pagligad sang isa lang ka semana, gulpi naman gin-atake sa tagipusuon si Joel. Nagdalidali kadto ang mga nars apang wala sila sing mabulig sa iya. Pagligad sang pila ka minuto, ang isa sa ila nagsiling sing malulo, “Wala na sia . . . ” Naggurahab ako kag naggua sa iya kuarto. Nangamuyo ako kay Jehova, apang indi ako makahibalo kon paano ipabutyag ang kasakit nga akon nabatyagan. Pagligad sang mga 15 minutos, gintawag ako sang isa ka nars kag nagsiling, “Naulian na si Joel!” Gindapit niya ako kag nagsiling sia, “Dali ka, puede mo na sia matan-aw.” Sang nagbalik ako kay Joel, nagapitik na liwat ang iya tagipusuon! Madasig nga naglapnag ang balita nga naumpawan na sia. Ginkadtuan sia sang mga nars kag mga doktor, kag madamo ang nagsiling, “Makatilingala gid ini!”

Isa ka Makapakibot nga Pag-uswag sang Apat Sia ka Tuig

Sa una nga tuig ni Joel, sulitsulit kami nga ginasilingan sang pediatrician, “Kinahanglan gid ni Joel ang daku nga pagpalangga.” Bangod naeksperiensiahan namon ni Luigi ang mahigugmaon nga pag-atipan ni Jehova sa tapos nga mabun-ag si Joel, luyag namon nga mabatyagan man sang amon anak ang mahigugmaon nga pag-atipan. Madamo kami sing kahigayunan nga mahimo ini bangod kinahanglan gid niya ang amon bulig sa tanan niya nga himuon.

 Sa kada tuig, sa sulod sang una nga pito ka tuig sang kabuhi ni Joel, sulitsulit namon nga gin-atubang ang pareho nga hitabo. Pirme sia ginaatake sang mga balatian sa mga bulan sang Oktubre tubtob Marso, kag gua-sulod kami sa ospital. Sa sini nga mga tion, ginatinguhaan ko man nga hatagan sing tion ang amon anak nga sanday David kag Marc. Bangod sini, daku ang ila nabulig sa pag-uswag ni Joel—kag makapakibot gid ang mga resulta. Halimbawa, madamo nga doktor ang nagsiling sa amon nga indi makalakat si Joel. Apang isa ka adlaw sang mga apat ka tuig ang edad ni Joel, ang amon anak nga si Marc nagsiling, “Sige na Joel, ipakita kay Nanay nga makalakat ka na!” Nakibot gid ako sang nakatikang na si Joel! Nalipay gid kami, kag nangamuyo kami kay Jehova subong pamilya para pasalamatan sia sing tinagipusuon. Bisan diutay lang nga pag-uswag ang mahimo ni Joel, ginahatagan gid namon sia sing komendasyon.

Ang Diosnon nga Paghanas Kutob sa Pagkalapsag May Maayo nga mga Resulta

Tubtob posible, ginadala namon si Joel sa mga miting sa Kingdom Hall. Bangod madali sia magmasakit, ginabutang namon sia sa isa ka espesyal nga stroller nga may plastik nga tabon agod maamligan sia batok sa mga mikrobyo. Bisan pa nagapungko lang sia sa stroller nga may tabon, nalipay sia makig-upod sa mga kauturan.

Napalig-on gid kami sang mga kauturan, nabatyagan gid namon ang ila pagpalangga kag ginhatagan nila kami sing praktikal nga bulig. Ang isa ka utod masami nagapahanumdom sa akon sang Isaias 59:1: “Yari karon, ang kamut sang GINOO indi malip-ot, nga indi ini makaluwas, kag ang iya idulungug indi bungul, nga indi ini makabati.” Yadtong makapalig-on nga mga pulong nagbulig gid sa amon nga magsalig kay Jehova.

Samtang nagadaku si Joel, ginpanikasugan gid namon nga ipatudok sa iya ang handum nga alagaron si Jehova. Sa tanan nga kahigayunan, nagapakigsugilanon kami sa iya tuhoy kay Jehova agod makapalambo sia sing suod nga kaangtanan sa iya langitnon nga Amay. Nagpakiluoy kami kay Jehova nga pakamaayuhon niya ang amon panikasog nga hanason si Joel sa espirituwal.

Sang nagtin-edyer na si Joel, nagapasalamat gid kami nga nanamian sia nga ipaambit ang mga kamatuoran sa Biblia sa mga tawo nga iya masugilanon. Samtang nagapaayoayo sia pagkatapos sang isa ka operasyon sa edad nga 14, nalipay gid ako sang namangkot si Joel sa akon, “Nay, puede ko hatagan ang doktor sang libro nga Mabuhi Sing Dayon?” Pagligad sang pila ka tuig, kinahanglan liwat operahan si Joel. Nahibaluan namon nga basi indi na sia makalampuwas. Antes sang iya operasyon, ginhatag ni Joel sa mga doktor ang sulat nga ginhimo namon upod sa iya. Ginapaathag sa sini nga sulat ang iya panindugan tuhoy sa dugo. Ginpamangkot sang doktor si Joel, “Ti, ugyon ka sa sini?” Malig-on nga nagsabat si Joel, “Huo, Dok.” Nalipay gid kami sa pagsalig sang amon anak sa iya Manunuga kag sa iya determinasyon nga pahamut-an Sia. Nagkooperar gid sa amon ang mga doktor kag mga nars, amo nga daku gid ang amon pagpasalamat.

Ang Pag-uswag ni Joel sa Espirituwal

Sa edad nga 17, ginsimbuluhan ni Joel ang iya dedikasyon sa Dios paagi sa pagpabawtismo sa tubig.  Indi gid namon malipatan yadto nga adlaw! Nalipay gid kami nga makita ang iya pag-uswag sa espirituwal. Sugod sadto, ang iya gugma kay Jehova kag kakugi sa kamatuoran wala gid nag-ugdaw. Sa pagkamatuod, ginasilingan ni Joel ang tanan nga makilala niya, “Ang kamatuoran amo ang akon kabuhi!”

Sang manugbeinte na ang edad ni Joel, nakatuon sia magbasa kag magsulat. Daku gid ini nga panikasog sa iya bahin. Kada tinaga nga masulat niya isa gid ka daku nga kadalag-an. Sugod sadto, ginabinagbinag niya kada aga ang teksto gikan sa Pag-usisa sa Kasulatan Adlaw-adlaw. Pagkatapos sina, ginapangabudlayan gid niya nga kopyahon ang teksto sa iya kuwaderno. Kag madamo na sia sing kuwaderno nga natipon!

Sa mga adlaw nga may miting, ginapat-od gid ni Joel nga makaabot kami sa Kingdom Hall sing temprano bangod luyag niya nga abiabihon ang mga nagasulod sa Kingdom Hall. Sa tion sang mga miting malipayon sia nga nagakomento kag nagapakigbahin sa mga pasundayag. Nagaduhol man sia sing mikropono kag nagabulig sa iban pa nga hilikuton. Kada semana, kon maayo ang iya pamatyag, nagaupod sia sa amon sa pagbantala. Sang 2007, ginpahibalo sa kongregasyon nga gintangdo na si Joel subong ministeryal nga alagad. Naghibi kami sa kalipay. Daw ano ka mapinalanggaon nga pagpakamaayo gikan kay Jehova!

Nabatyagan Namon ang Bulig ni Jehova

Sang 1999 nakaatubang kami sang isa pa ka pagtilaw. Ang amon salakyan ginbungguan sang isa ka huroshuros nga drayber kag nasamaran sing malubha si Luigi. Kinahanglan utdon ang isa niya ka tiil, kag pila ka beses sia gin-operahan sa taludtod. Sa liwat, paagi sa pagsalig kay Jehova, nabatyagan namon ang kusog nga ginahatag niya sa iya mga alagad nga nagakinahanglan sini. (Fil. 4:13) Bisan pa kumpol na si Luigi, ginatinguhaan namon nga magkonsentrar sa positibo nga mga butang. Bangod indi na sia makatrabaho, mas daku ang iya tion sa pag-atipan kay Joel. Gani, naghatag ini sa akon sing dugang nga tion sa espirituwal nga mga hilikuton. Mas madamo na ang tion ni Luigi sa pag-aman sang espirituwal nga mga kinahanglanon sang amon pamilya kag sang kongregasyon, sa diin padayon sia nga nagaalagad subong koordinetor sang hubon sang mga gulang.

Bangod sang amon pinasahi nga kahimtangan, madamo kami sing tion nga magkaupod subong pamilya. Sa pagligad sang mga tion, natun-an namon nga mangin makatarunganon kag indi magpaabot sing imposible nga mga butang. Sa mga tion nga ginaluyahan kami, ginapabutyag namon ang amon balatyagon kay Jehova paagi sa pangamuyo. Sing makapasubo, sang nagdalagku na ang amon anak nga sanday David kag Marc kag nagbiya na sa amon puluy-an, amat-amat sila nga nag-untat sa pag-alagad kay Jehova. Sa gihapon, nagalaum kami nga sa ulihi magabalik sila kay Jehova.—Luc. 15:17-24.

Sa pagligad sang mga tinuig, nabatyagan namon ang pagsakdag ni Jehova kag natun-an namon nga magsandig sa iya sa tanan nga hangkat nga amon maatubang. May pinasahi gid nga kahulugan para sa amon ang ginasiling sang Isaias 41:13: “Ako ang GINOO nga imo Dios, magauyat sang imo kamut nga too; nagasiling sa imo, ‘Dili magkahadluk, magatabang ako sa imo.’” Napalig-on gid kami bangod nahibaluan namon nga ginauyatan ni Jehova sing hugot ang amon kamot. Sa pagkamatuod, makasiling gid kami nga ang paglandas sa mga pagtilaw nagpabakod sa amon pagsalig sa aton langitnon nga Amay, si Jehova.

[Nota]

^ par. 5 Ang trisomy 21, isa ka napanubli nga balatian nga nagaresulta sa diperensia sa hunahuna. Ang aton mga chromosomes masami nga parisparis, apang ang mga lapsag nga may trisomy may sobra nga isa ka chromosome nga nagaupod sa isa ka paris. Ang trisomy 21 nagaapektar sa ika-21 nga chromosome.

[Retrato sa pahina 16, 17]

Si Joel kag ang iya iloy nga si Ada

[Retrato sa pahina 18]

Sanday Ada, Joel, kag Luigi

[Retrato sa pahina 19]

Nalipay si Joel sa pag-abiabi sa mga kauturan sa Kingdom Hall