“Mga Abyan Ko Kamo”

“Mga abyan ko kamo kon ginahimo ninyo ang ginasugo ko sa inyo.”—JUAN 15:14.

1, 2. (a) Ano ang nanuhaytuhay nga ginhalinan sang mga abyan ni Jesus? (b) Ngaa importante nga mangin abyan kita ni Jesus?

ANG mga lalaki nga kaupod ni Jesus nga nagapungko sa naibabaw nga hulot, nanuhaytuhay ang ginhalinan. Ang mag-utod nga sanday Pedro kag Andres mga mangingisda. Si Mateo manugsukot anay sang buhis—isa ka propesyon nga gintamay sang mga Judiyo. Ang pila subong nanday Santiago kag Juan nakakilala kay Jesus kutob sang bata pa sila. Ang iban naman subong ni Natanael, mahimo nga pila pa lang ka tuig nga nakakilala sa iya. (Juan 1:43-50) Apang, ang tanan nga nagtambong sa pinasahi nga gab-i sang Paskua sa Jerusalem kumbinsido gid nga si Jesus amo ang ginsaad nga Mesias, ang Anak sang buhi nga Dios. (Juan 6:68, 69) Pat-od gid nga natandog ang ila tagipusuon sang ginsilingan niya sila: “Ginatawag ko kamo nga mga abyan, bangod ang tanan nga butang nga nabatian ko sa akon Amay ginapahibalo ko sa inyo.”—Juan 15:15.

2 Ang ginpamulong ni Jesus sa iya matutom nga mga apostoles naaplikar sa tanan nga hinaplas nga mga Cristiano subong, kag naaplikar man ini sa ila kaupod nga “iban nga mga karnero.” (Juan 10:16) Ano man ang aton ginhalinan, may pribilehiyo kita nga mangin abyan ni Jesus. Ang aton pagpakig-abyan sa iya importante gid bangod nagahimo ini sa aton nga mga abyan man ni Jehova. Ang matuod, imposible nga mangin suod kita kay Jehova kon indi kita anay mangin suod kay Cristo. (Basaha ang Juan 14:6, 21.) Gani, ano ang dapat naton himuon agod mangin abyan kita ni Jesus kag mahuptan ini nga pagpakig-abyan? Antes naton binagbinagon inang importante nga topiko, usisaon anay naton ang halimbawa ni Jesus subong isa ka maayo nga abyan kag hibaluon naton kon ano ang aton matun-an sa reaksion sang iya mga disipulo sa iya pagpakig-abyan sa ila.

Ang Halimbawa ni Jesus Subong Isa ka Maayo nga Abyan

3. Sa ano nakilal-an si Jesus?

3 “Ang manggaranon may madamung abyan,” sulat sang maalam nga si Hari Solomon. (Hulu. 14:20) Ginapakita sining mga pulong ang huyog sang di-himpit nga mga tawo nga magpakig-abyan lamang sa isa kon may makuha sila sa iya. Apang, indi amo sina si Jesus. Wala sia nagatan-aw sa pinansial nga ikasarang ukon kabantugan sang isa ka tawo. Matuod, nakabatyag si Jesus sang gugma sa isa ka manggaranon nga pamatan-on nga manugdumala kag gin-agda niya sia nga mangin iya sumulunod. Pero inang pamatan-on ginsugo ni Jesus nga ibaligya ang iya mga pagkabutang kag ihatag sa mga imol. (Mar. 10:17-22; Luc. 18:18, 23) Si Jesus wala nakilal-an sa iya pagpakig-upod sa manggaranon ukon prominente nga mga tawo kundi sa iya pagpakig-abyan sa mga kubos kag mga gintamay.—Mat. 11:19.

4. Ngaa masiling naton nga ang mga abyan ni Jesus may kasawayan?

4 Ang matuod, ang mga abyan ni Jesus mga indibiduwal nga may kasawayan. Isa ka bes, napaslawan si Pedro nga tamdon ang mga butang suno sa pagtamod sang Dios. (Mat. 16:21-23) Sanday Santiago kag Juan nagpakita sing ambisyuso nga panimuot sang ginpangabay nila si Jesus nga hatagan sila sing prominente nga mga posisyon sa Ginharian. Ang ila ginhimo nagpaakig sa iban pa nga apostoles, kag ini nga isyu ginatunaan pirme sang ila pagbinaisay. Apang, mapailubon nga gintinguhaan ni Jesus nga tadlungon ang panghunahuna sang iya mga abyan kag indi sia madali maakig sa ila.—Mat. 20:20-28.

5, 6. (a) Ngaa nagpabilin si Jesus nga abyan sang kalabanan sang iya mga apostoles? (b) Ngaa ginbugto ni Jesus ang iya pagpakig-abyan kay Judas?

5 Nagpadayon ang pagpakig-abyan ni Jesus sa sining di-himpit nga mga tawo indi bangod tuman  sia ka matinuguton ukon ginapabulagbulagan lang niya ang ila pagkadihimpit. Kundi, nagkonsentrar sia sa ila maayo nga mga motibo kag positibo nga mga kinaiya. Halimbawa, sanday Pedro, Santiago, kag Juan nagtulog sa baylo nga unungan si Jesus sang nagaatubang sia sa pinakamabudlay nga kahimtangan sa iya kabuhi. Mahangpan naton kon ngaa nalugaw-an si Jesus sa ila. Bisan pa sa sini, nakita niya nga maayo ang ila motibo kag nagsiling sia: “Sa pagkamatuod, ang espiritu handa, apang ang unod maluya.”—Mat. 26:41.

6 Sa pihak nga bahin, ginbugto ni Jesus ang iya pagpakig-abyan kay Judas Iscariote. Bisan pa suod sila nga mag-abyan sang una, gintugutan ni Judas nga maglain ang iya tagipusuon, kag nahibaluan ini ni Jesus. Bangod nagpakig-abyan si Judas sa kalibutan, ginhimo niya ang iya kaugalingon nga kaaway sang Dios. (Sant. 4:4) Amo kon ngaa ginpahalin ni Jesus si Judas antes niya ginpahayag ang iya pagpakig-abyan sa nabilin nga 11 ka matutom nga apostoles.—Juan 13:21-35.

7, 8. Paano ginpakita ni Jesus ang iya gugma para sa iya mga abyan?

7 Ginpalampas ni Jesus ang mga sayop sang iya mainunungon nga mga abyan kag ginhimo niya kon ano ang pinakamaayo para sa ila. Halimbawa, nangamuyo sia sa iya Amay nga amligan sila kon nagaatubang sila sang mga pagtilaw. (Basaha ang Juan 17:11.) Nagpakita si Jesus sing konsiderasyon sa ila pisikal nga mga limitasyon. (Mar. 6:30-32) Wala lamang sila ginsugiran ni Jesus sang iya ginahunahuna kundi interesado man sia nga mabatian kag mahangpan kon ano ang ila ginahunahuna kag ginabatyag.—Mat. 16:13-16; 17:24-26.

8 Nabuhi kag napatay si Jesus para sa iya mga abyan. Huo, nahibaluan niya nga dapat niya ihalad ang iya kabuhi agod matuman ang talaksan sang katarungan sang iya Amay. (Mat. 26:27, 28; Heb. 9:22, 28) Apang ginhatag ni Jesus ang iya kabuhi agod ipakita ang iya gugma. “Wala sing isa nga may gugma nga daku pa sa sini,” siling ni Jesus, “nga ihatag sang isa ang iya kalag para sa iya mga abyan.”—Juan 15:13.

Ano ang Reaksion sang mga Disipulo sa Pagpakig-abyan ni Jesus sa Ila?

9, 10. Ano ang reaksion sang mga tawo sa kaalwan ni Jesus?

9 Si Jesus maalwan gid sa paghatag sang iya tion, pagpalangga, kag materyal nga mga butang. Bangod sini, nangin suod sa iya ang mga tawo kag nangin maalwan man sila sa iya. (Luc. 8:1-3) Base sa iya naeksperiensiahan, nakasiling si Jesus: “Ugalia ang paghatag, kag ang mga tawo magahatag sa inyo. Ibubo nila sa inyo sabak ang sukob nga maayo, nga dinasok, naligoligo kag nagaawas. Kay takson man nila kamo suno sa inyo pagtakus.”—Luc. 6:38.

10 Ang matuod, ang iban nakig-upod lamang kay Jesus bangod sa bentaha nga ila makuha sa iya. Ining mga tawo nga nagapangangkon nga mga abyan ni Jesus nagbiya sa iya sang may ginsiling sia nga wala nila nahangpan. Sa baylo nga magsalig kuntani kay Jesus, nagpadasudaso sila sa paghinakop kag nag-untat sila sa pagsunod sa iya. Sa pihak nga bahin, ang mga apostoles mainunungon. Masami natilawan ang ila pagpakig-abyan kay Cristo, apang ginhimo nila ang ila labi nga  masarangan sa pagsakdag sa iya indi lamang sa maayo nga mga tion kundi sa tion man sang kabudlayan. (Basaha ang Juan 6:26, 56, 60, 66-68.) Sa iya katapusan nga gab-i sa duta subong tawo, ginpabutyag ni Jesus ang iya apresasyon sa iya mga abyan sang nagsiling sia: “Kamo ang nagpabilin nga kaupod ko sa mga pagtilaw sa akon.”—Luc. 22:28.

11, 12. Paano ginpasalig liwat ni Jesus ang iya mga disipulo sang iya pagpakig-abyan, kag ano ang ila ginhimo?

11 Wala madugay sa tapos ginhatagan ni Jesus sing komendasyon ang iya mga disipulo bangod sa ila pagkamainunungon, ini mismo nga mga tawo ang nagbiya sa iya. Gintugutan nila sa makadali ang kahadlok sa tawo nga mangibabaw sa ila gugma kay Cristo. Sa liwat, ginpatawad sila ni Jesus. Pagkatapos sang iya pagkabanhaw, nagpakita sia sa ila kag ginpasalig sila liwat sang iya pagpakig-abyan sa ila. Dugang pa, ginhatagan niya sila sing sagrado nga buluhaton—ang paghimo sing mga disipulo “sa mga tawo sang tanan nga pungsod” kag mangin iya mga saksi “tubtob sa ukbong sang duta.” (Mat. 28:19; Binu. 1:8) Ano ang ginhimo sang mga disipulo?

12 Ginhimo gid sang mga disipulo ang ila bug-os nga masarangan sa pagpalapnag sang mensahe sang Ginharian. Sa bulig sang balaan nga espiritu ni Jehova, ginpuno nila sa gilayon ang Jerusalem sang ila panudlo. (Binu. 5:27-29) Bisan pa ang ila kabuhi nabutang sa katalagman wala ini nakapugong sa ila sa pagtuman sa sugo ni Jesus nga maghimo sang mga disipulo. Sa sulod sang pila pa lang ka dekada nga nabaton nila ang sugo ni Jesus, si apostol Pablo nagsulat nga ang maayong balita nabantala na “sa tanan nga tinuga sa idalom sang langit.” (Col. 1:23) Ginpakita sini nga ginpabaloran gid sang mga disipulo ang ila pagpakig-abyan kay Jesus!

13. Sa ano nga mga paagi gintugutan sang mga disipulo nga mag-impluwensia sa ila kabuhi ang mga panudlo ni Jesus?

13 Gintugutan man sang mga disipulo nga mag-impluwensia sa ila kabuhi ang mga panudlo ni Jesus. Madamo sa ila ang kinahanglan maghimo sing daku nga mga pagbag-o sa ila paggawi kag personalidad. Ang pila sa bag-o nga mga disipulo mga homoseksuwal anay, mga makihilahion, mga palahubog, kag mga kawatan. (1 Cor. 6:9-11) Kinahanglan bag-uhon sang iban ang ila pagtamod sa mga tawo nga tuhay sing rasa. (Binu. 10:25-28) Apang sa gihapon, gintuman nila si Jesus. Gin-uba nila ang ila daan nga personalidad kag nagsuklob sang bag-o nga personalidad. (Efe. 4:20-24) Nahangpan nila ang “hunahuna ni Cristo” kag ginailog nila ang iya panimuot kag paggawi.—1 Cor. 2:16.

Ang Aton Pagpakig-abyan kay Cristo Karon

14. Ano ang ginsaad ni Jesus nga himuon niya sa tion “sang katapusan sang sistema sang mga butang”?

14 Madamo nga mga Cristiano sang unang siglo ang personal nga nakakilala kay Jesus ukon nakakita sa iya sa tapos sia mabanhaw. Apang wala kita sing amo sina nga pribilehiyo. Gani, paano kita mangin abyan ni Cristo? Ang isa ka paagi amo ang pagtuman sa panuytoy nga gin-aman sang matutom kag mainandamon nga ulipon, nga ginahuman sang hinaplas sang espiritu nga mga utod ni Jesus nga nagakabuhi pa sa duta. Nagsaad si Jesus nga sa tion “sang katapusan sang sistema sang mga butang,” tangduan niya ini nga ulipon sang “tanan niya nga pagkabutang.” Mat. 24:3, 45-47) Sa karon, ang kalabanan sang mga nagapakig-abyan kay Cristo indi bahin sining ulipon nga grupo. Paano ang ila reaksion sa panuytoy nga ila nabaton gikan sa matutom kag mainandamon nga ulipon nakaimpluwensia sa ila pagpakig-abyan kay Cristo?

15. Paano ang isa makilala nga karnero ukon kanding?

15 Basaha ang Mateo 25:31-40. Gintawag ni Jesus ang mga bahin sang matutom nga ulipon nga iya mga utod. Sa iya ilustrasyon tuhoy sa pagpainpain sang mga karnero sa mga kanding, maathag nga nagsiling si Jesus nga ang aton paagi sa  pagpakig-angot sa iya mga utod tamdon niya subong aton personal nga pagpakig-angot sa iya. Ang matuod, nagsiling sia nga ang isa makilala nga karnero ukon kanding depende sa iya pagpakig-angot sa “labing kubos sining [Iya] mga utod.” Gani, ang panguna nga paagi nga mapakita sang mga may dutan-on nga paglaum ang ila pagpakig-abyan kay Cristo amo ang pagsuporta sa matutom kag mainandamon nga ulipon.

16, 17. Paano naton mapakita ang aton pagpakig-abyan sa mga utod ni Cristo?

16 Kon nagalaum ka nga mabuhi sa idalom sang Ginharian sang Dios, paano mo mapakita ang pagpakig-abyan sa mga utod ni Cristo? Binagbinagon naton ang tatlo ka paagi. Una, paagi sa bug-os tagipusuon nga pagpakigbahin sa pagbantala nga hilikuton. Ginsugo ni Cristo ang iya mga utod nga ibantala ang maayong balita sa bug-os nga kalibutan. (Mat. 24:14) Apang, ang nagkalabilin nga mga utod ni Cristo sa duta karon mabudlayan gid sa pagtuman sa sini nga responsibilidad kon wala ang bulig sang ila kaupod nga iban nga mga karnero. Sa kada tion nga nagapakigbahin ang iban nga mga karnero sa pagbantala, ginabuligan nila ang mga utod ni Cristo sa pagtuman sang ila hatag-Dios nga hilikuton. Ginapabaloran gid ni Cristo kag sang matutom kag mainandamon nga ulipon ini nga bulig.

17 Ang ikaduha nga paagi nga mabuligan sang iban nga mga karnero ang mga utod ni Cristo amo ang paghatag sing pinansial nga suporta sa pagbantala nga hilikuton. Ginpalig-on ni Jesus ang iya mga sumulunod nga magpakig-abyan paagi sa ila “di-matarong nga manggad.” (Luc. 16:9) Wala ini nagapahangop nga sarang naton mabakal ang pagpakig-abyan ni Jesus ukon ni Jehova. Kundi, paagi sa paggamit naton sang aton materyal nga mga pagkabutang sa pagsakdag sang intereses sang Ginharian, mapamatud-an naton ang aton pagpakig-abyan kag gugma, indi lamang sa pulong, kundi “paagi sa buhat kag kamatuoran.” (1 Juan 3:16-18) Ginahatag naton inang pinansial nga pagsakdag kon nagapakigbahin kita sa pagbantala nga hilikuton, kon nagaamot kita sing kuarta para sa pagtukod kag pagmentinar sang aton duog tilipunan, kag kon nagahatag kita sing pinansial nga amot para sa bug-os kalibutan nga pagbantala nga hilikuton. Gamay man ukon daku ang aton ginaamot, pat-od gid nga ginaapresyar ni Jehova kag ni Jesus ang aton malipayon nga paghatag.—2 Cor. 9:7.

18. Ngaa dapat naton tumanon ang pasad sa Biblia nga panuytoy nga ginahatag sang mga gulang sang kongregasyon?

18 Ang ikatlo nga paagi nga mapamatud-an naton nga abyan kita ni Cristo amo ang pagkooperar sa panuytoy nga ginahatag sang mga gulang sang kongregasyon. Ining mga lalaki gintangdo sang balaan nga espiritu sa idalom sang panuytoy ni Cristo. (Efe. 5:23) “Mangin matinumanon sa mga nagapanguna sa inyo kag mangin mapinasakupon,” sulat ni apostol Pablo. (Heb. 13:17) Kon kaisa, mahimo mabudlayan kita sa pagtuman sa pasad sa Biblia nga mga laygay nga ginahatag sang mga gulang sa aton kongregasyon. Ayhan nakita naton ang ila kasawayan, kag bangod sini mahimo kita mabudlayan sa pagbaton sang ila laygay. Apang, si Cristo, ang Ulo sang kongregasyon, nalipay sa paggamit sining di-himpit nga mga tawo. Gani, ang aton pagtamod sa ila awtoridad may direkta nga epekto sa aton pagpakig-abyan kay Cristo. Kon ginapalampas naton ang mga kasawayan  sang mga gulang kag malipayon nga ginasunod ang ila mga panuytoy, ginapamatud-an naton ang aton gugma kay Cristo.

Diin Kita Makasapo sang Maayo nga mga Abyan?

19, 20. Ano ang masapwan naton sa sulod sang kongregasyon, kag ano ang masunod naton nga binagbinagon?

19 Si Jesus padayon nga nagaatipan sa aton indi lamang paagi sa mahigugmaon nga mga gulang kundi paagi man sa pag-aman sa aton sing espirituwal nga mga iloy kag mga utod nga lalaki kag babayi sa sulod sang kongregasyon. (Basaha ang Marcos 10:29, 30.) Sang nagsugod ka sa pagpakig-angot sa organisasyon ni Jehova, ano ang nangin reaksion sang imo mga paryente? Maayo kuntani kon ginsuportahan nila ang imo mga panikasog nga mangin suod sa Dios kag kay Cristo. Apang nagpaandam si Jesus nga kon kaisa “ang mga kaaway sang tawo amo ang mga katapo mismo sang iya panimalay.” (Mat. 10:36) Daw ano gid ka makalulugpay nga mahibaluan nga sa sulod sang kongregasyon, makasapo kita sang mga tawo nga mas suod pa sa aton sangsa aton utod sa unod!—Hulu. 18:24.

20 Makita naton sa panamyaw ni Pablo sa katapusan nga bahin sang iya sulat sa kongregasyon sa Roma nga madamo sia sing nangin suod nga mga abyan didto. (Roma 16:8-16) Ginhinakpan ni apostol Juan ang iya ikatlo nga sulat sa sining mga pulong: “Ipalab-ot man ang akon panamyaw sa tagsa ka abyan.” (3 Juan 14) Maathag nga madamo man sia sing nangin suod nga mga abyan. Paano naton mailog ang halimbawa ni Jesus kag sang iya una nga mga disipulo sa pagpalambo kag paghupot sing maayo nga pagpakig-abyan sa aton espirituwal nga mga kauturan? Binagbinagon naton ang sabat sa masunod nga artikulo.

Paano Mo Sabton?

• Ano nga halimbawa ang ginpakita ni Jesus subong isa ka maayo nga abyan?

• Ano ang reaksion sang mga disipulo sa pagpakig-abyan ni Jesus?

• Paano naton mapamatud-an nga mga abyan kita ni Cristo?

[Mga Pamangkot sa Pagtinuon]

[Retrato sa pahina 14]

Interesado si Jesus sa ginahunahuna kag ginabatyag sang iya mga abyan

[Mga Retrato sa pahina 16]

Paano naton mapakita nga luyag naton mangin abyan si Cristo?