Magdiretso sa kaundan

Magdiretso sa listahan sang kaundan

“Magpakighidait sa Tanan nga Tawo”

“Magpakighidait sa Tanan nga Tawo”

 “Magpakighidait sa Tanan nga Tawo”

“Kon mahimo, tubtob sa masarangan ninyo, magpakighidait sa tanan nga tawo.”—ROMA 12:18.

1, 2. (a) Ano ang ginpaandam ni Jesus sa iya mga sumulunod? (b) Diin kita makakuha sing laygay kon paano naton dapat atubangon ang pagpamatok?

GINPAANDAMAN ni Jesus ang iya mga sumulunod nga makaatubang sila sing pagpamatok gikan sa mga pungsod sang kalibutan. Sang gab-i antes sia napatay, ginpaathag niya ang rason kon ngaa. Ginsilingan niya ang iya mga apostoles: “Kon kamo bahin sang kalibutan, higugmaon sang kalibutan ang iya. Apang bangod kamo indi bahin sang kalibutan, kundi ginpili ko kamo gikan sa kalibutan, bangod sini ang kalibutan nagadumot sa inyo.”—Juan 15:19.

2 Naeksperiensiahan gid ni apostol Pablo nga matuod ang ginsiling ni Jesus. Sa iya ikaduha nga sulat sa iya kaupod nga si Timoteo, si Pablo nagsiling: “Ginsunod mo sing maayo ang akon panudlo, ang akon dalanon sang kabuhi, ang akon katuyuan, ang akon pagtuo, ang akon pagkamapinasensiahon, ang akon gugma, ang akon  pagbatas, ang mga paghingabot sa akon, ang akon mga pag-antos.” Nian nagdugang pa si Pablo: “Sa katunayan, ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Tim. 3:10-12) Sa kapitulo 12 sang iya sulat sa mga Cristiano sa Roma, naghatag si Pablo sing maalamon nga laygay kon paano nila dapat atubangon ang pagpamatok. Ang iya ginsiling makahatag gid sa aton sing giya sa sining tion sang katapusan.

“Maghimo sang Maayo nga mga Butang”

3, 4. Paano ang laygay sa Roma 12:17 maaplikar (a) sa panimalay nga indi tanan sumilimba ni Jehova? (b) sa aton pagpakig-angot sa aton mga kaingod?

3 Basaha ang Roma 12:17. Ginpaathag ni Pablo nga kon makaatubang kita sing pagpamatok, indi kita dapat magbalos. Importante gid ang pagsunod sa sini nga laygay ilabi na sa mga panimalay nga indi tanan nga miembro sumilimba ni Jehova. Ginalikawan gid sang Cristiano nga tiayon nga magbalos kon hambalan sia ukon himuan sing indi maayo sang iya tiayon. Wala gid sing maayo nga resulta ang ‘pagbalos sang malaut sa malaut.’ Sa baylo, ini nga panimuot makapalala lamang sang sitwasyon.

4 Si Pablo naghatag sing mas maayo nga panugyan: “Maghimo sang maayo nga mga butang sa itululok sang tanan nga tawo.” Sa puluy-an, kon ang asawa nagapakita gihapon sing kaayo sa iya bana bisan pa indi maayo ang ginasiling sini tuhoy sa iya pagtuluuhan, mahimo malikawan ang pagbinaisay. (Hulu. 31:12) Si Carlos, nga isa na karon ka miembro sang pamilya Bethel, nagsugid kon paano nalandas sang iya iloy ang mabaskog nga pagpamatok sang iya amay paagi sa pagpabilin nga malulo kag matinatapon sa ila puluy-an. “Ginapalig-on niya kami sang akon mga utod nga tahuron pirme si Tatay. Ginapilit niya ako nga updan si Tatay sa iya paborito nga hampang bisan pa wala ako nanamian sa sini. Apang, nakabulig ini nga mag-ayo ang buot ni Tatay.” Wala magdugay nagtuon sia sing Biblia kag nagpabawtismo. Paagi sa paghimo sing “maayo nga mga butang sa itululok sang tanan nga tawo,” nalandas man sang mga Saksi ni Jehova ang negatibo nga pagtamod sang mga tawo paagi sa pagbulig sa ila mga kaingod sa tion sang mga kalamidad.

Pag-atubang sa Pagpamatok Paagi sa “Masingkal nga mga Baga”

5, 6. (a) Ano ang buot silingon sang pagtumpi sang “masingkal nga mga baga” sa ulo sang aton kaaway? (b) Magsugid sing lokal nga eksperiensia nga nagapakita kon paano ang pag-aplikar sa laygay sang Roma 12:20 may maayo nga mga resulta.

5 Basaha ang Roma 12:20. Sang ginsulat ni Pablo ini nga mga pulong, mahimo nga ginahunahuna niya ang Hulubaton 25:21, 22: “Kon gutum ang imo kaaway, hatagi sia sing kalan-on; kag kon ginauhaw sia, hatagi sia sing tubig nga imnun; kay magatumpi ka sing mga baga sa iya olo, kag ang GINOO magabalus sa imo.” Kon binagbinagon naton ang laygay ni Pablo sa Roma kapitulo 12, makasiling kita nga ang malaragwayon nga mga baga wala nagapahangop nga silutan naton ukon pakahuy-an ang mga nagapamatok sa aton. Kundi, ining hulubaton—kag ang kaanggid nga pinamulong ni Pablo sa mga taga-Roma—mahimo nagapatuhoy sa dumaan nga mga pamaagi  sang pagtunaw sang mga metal. Ang ika-19 nga siglo nga Ingles nga iskolar nga si Charles Bridges nagsiling: “Tumpihi sang baga ang matig-a nga metal kag indi lamang ini pag-ibutang sa ibabaw sang kalayo. Diutay lamang nga tagipusuon ang tuman katig-a nga indi maghumok kon pakitaan sing mapailubon, masinakripisyuhon kag mainit nga gugma.”

6 Kaangay sang mahimo sang “masingkal nga mga baga,” ang maayo nga mga buhat mahimo magpahumok sa matig-a nga tagipusuon sang mga nagapamatok kag magpatahaw sang ila kaakig. Paagi sa maayo nga mga buhat, mangin maayo ang pagtamod sang mga tawo sa katawhan ni Jehova kag sa mensahe sang Biblia nga ila ginabantala. Si apostol Pablo nagsulat: “Hupti nga maayo ang inyo paggawi sa tunga sang mga pungsod, agod bisan nagahambal sila batok sa inyo nga malauton kamo, himayaon nila ang Dios sa adlaw sang iya pag-usisa bangod sang inyo maayong mga buhat nga nasaksihan mismo nila.”—1 Ped. 2:12.

“Magpakighidait sa Tanan nga Tawo”

7. Ano nga paghidait ang ginbilin ni Cristo sa iya mga disipulo, kag ginapahulag kita sini nga himuon ang ano?

7 Basaha ang Roma 12:18. Sa katapusan nga gab-i nga kaupod ni Jesus ang iya mga apostoles, nagsiling sia sa ila: “Ginabilin ko sa inyo ang paghidait, ginahatag ko sa inyo ang akon paghidait.” (Juan 14:27) Ang paghidait nga ginbilin ni Cristo sa iya mga disipulo amo ang nasulod nga kalinong nga ila naagom kon mabatyagan nila nga ginahigugma sila kag ginakahamut-an ni Jehova nga Dios kag sang iya pinalangga nga Anak. Ining nasulod nga paghidait amo dapat ang magapahulag sa aton nga magkabuhi sing mahidaiton upod sa iban. Ang matuod nga mga Cristiano mga mahigugmaon sa paghidait kag manugpahidait.—Mat. 5:9.

8. Paano kita mangin manugpahidait sa puluy-an kag sa aton kongregasyon?

8 Ang isa ka paagi nga mangin manugpahidait kita sa sulod sang pamilya amo ang pagsolbar gilayon sang mga di-paghangpanay sa baylo nga tugutan ini nga maglala. (Hulu. 15:18; Efe. 4:26) Naaplikar man ini sa Cristianong kongregasyon. Gin-angot ni apostol Pedro ang pagpangita sang paghidait sa pagpugong sang dila. (1 Ped. 3:10, 11) Pagkatapos maghatag sing malig-on nga laygay tuhoy sa nagakaigo nga paggamit sang dila kag sa paglikaw sa kahisa kag pagkamaawayon, si Santiago nagsulat man: “Ang kaalam nga gikan sa hitaas una sa tanan putli, dayon mahidaiton, makatarunganon, handa sa pagtuman, puno sang kaluoy kag maayong mga bunga, wala sing ginapasulabi, indi salimpapaw. Dugang pa, ang bunga sang pagkamatarong may binhi nga ginsab-ug sa mahidaiton nga mga kahimtangan para sa mga nagapakighidait.”—Sant. 3:17, 18.

9. Samtang ginatinguhaan naton nga “magpakighidait sa tanan nga tawo,” ano ang dapat naton dumdumon?

9 Sa iya ginsiling sa Roma 12:18, wala lamang ginapatuhuyan ni Pablo ang pagpakighidait sa sulod sang pamilya kag sa kongregasyon. Nagsiling sia nga dapat kita “magpakighidait sa tanan nga tawo.” Nalakip sa sini ang aton mga kaingod, katrabaho, kaeskwela, kag mga tawo nga aton  masalapuan sa ministeryo. Apang, si Pablo naghatag sing kondisyon: “Kon mahimo, tubtob sa masarangan ninyo.” Buot silingon sini nga dapat naton himuon ang aton bug-os nga masarangan nga “magpakighidait sa tanan nga tawo” apang indi tubtob sa punto nga makompromiso na naton ang matarong nga mga prinsipio sang Dios.

Ang Pagtimalos Iya ni Jehova

10, 11. Ano ang buot silingon sang ekspresyon nga ‘pabay-an ini sa kasingkal sang Dios,’ kag ngaa nagakaigo ini?

10 Basaha ang Roma 12:19. Bisan pa nagaatubang kita “sa mga masinupakon” sa aton hilikuton kag sa aton mensahe, lakip na sa direkta nga mga nagapamatok, ‘ginapunggan naton ang aton kaugalingon sa idalom sang malaut’ kag nagagawi “nga may kalulo.” (2 Tim. 2:23-25) Ginalaygayan ni Pablo ang mga Cristiano nga indi magbalos kundi ‘pabay-an ini sa kasingkal sang Dios.’ Subong mga Cristiano, nahibaluan naton nga wala kita sing kinamatarong nga magbalos. Ang salmista nagsulat: “Untati ang kaakig, kag bayai ang kasingkal! Dili ka magkaakig, ini nagapadulong lamang sa malaut nga buhat.” (Sal. 37:8) Kag si Solomon naglaygay: “Dili ka magsiling, ‘Ako magatimalus sang malaut’; hulata ang GINOO, kag sia magaluwas sa imo.”—Hulu. 20:22.

11 Kon himuan kita sing malain sang mga manugpamatok, ang pinakamaayo nga himuon amo nga itugyan kay Jehova ang pagsilot sa ila kon nakita niya nga kinahanglanon ini. Agod ipakita nga ang ginapatuhuyan niya amo ang kasingkal ni Jehova, si Pablo nagsiling: “Nasulat na: ‘Akon ang pagtimalos; ako ang magabalos, siling ni Jehova.’” (Ipaanggid ang Deuteronomio 32:35.) Kon magbalos kita, ginaagaw naton ang papel ni Jehova. Dugang pa, kon magbalos kita, ginapakita naton nga kulang ang aton pagtuo sa saad ni Jehova: “Ako ang magabalos.”

12. San-o madayag ang kasingkal ni Jehova, kag paano?

12 Sa una nga bahin sang iya sulat sa mga taga-Roma, si Pablo nagsiling: “Ang kasingkal sang Dios ginapahayag gikan sa langit batok sa tanan nga pagkadidiosnon kag pagkadimatarong sang mga tawo nga nagapugong sa kamatuoran sa di-matarong nga paagi.” (Roma 1:18) Ang kasingkal ni Jehova madayag gikan sa langit paagi sa iya Anak sa “dakung kapipit-an.” (Bug. 7:14) “Pamatuod ini sang matarong nga paghukom sang Dios,” subong sang ginpaathag ni Pablo sa isa pa niya ka inspirado nga sulat: “Ginapatalupangod sini nga matarong sa bahin sang Dios nga balusan sing kapipit-an ang mga nagahatag sang kapipit-an sa inyo, apang, sa inyo nga nagaantos sang kapipit-an, kapahuwayan kaupod namon sa pagpahayag ni Ginuong Jesus gikan sa langit upod sa iya gamhanan nga mga anghel sa nagadabdab nga kalayo, samtang ginatimalusan niya ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus.”—2 Tes. 1:5-8.

Dauga ang Malaut Paagi sa Maayo

13, 14. (a) Ngaa wala kita nagakatingala kon makaatubang kita sing mga pagpamatok? (b) Paano naton mapakamaayo ang mga nagahingabot sa aton?

13 Basaha ang Roma 12:14, 21. Kon nagasalig kita sing bug-os nga tumanon ni Jehova ang iya mga katuyuan, mahapos sa aton nga magkonsentrar sa mga hilikuton nga ginapahimo niya sa aton—ang pagbantala “sa bug-os napuy-an nga duta” sang “maayong balita sang ginharian.” (Mat. 24:14) Nahibaluan naton nga maakig ang aton mga kaaway sa aton Cristianong mga hilikuton kay ginpaandaman kita ni Jesus: “Dumtan kamo sang tanan nga pungsod tungod sa akon ngalan.” (Mat. 24:9) Bangod sini, wala kita nagakatingala ukon naluyahan sing buot kon makaatubang kita sang mga pagpamatok. Si apostol Pedro nagsulat: “Mga hinigugma, indi kamo matingala sa pagpanunog sa tunga ninyo, nga nagakatabo sa inyo subong pagtilaw, nga subong bala nga makatilingala nga butang ang nahanabo sa inyo. Sa baylo, padayon kamo nga magkasadya kay mga umalambit kamo sa mga pag-antos ni Cristo.”—1 Ped. 4:12, 13.

14 Sa baylo nga magdumot sa mga nagahingabot sa aton, ginatinguhaan naton nga tudluan sila, bangod nahibaluan naton nga ang pila sa ila nagapanghikot nga wala sing hinalung-ong. (2 Cor. 4:4) Ginatinguhaan naton nga sundon ang laygay ni Pablo: “Padayon nga pakamaayuha ang mga nagahingabot sa inyo; magpakamaayo kag indi magpakamalaut.” (Roma 12:14) Ang isa  ka paagi nga mapakamaayo naton ang mga nagapamatok sa aton amo ang pagpangamuyo para sa ila. Si Jesus nagsiling sa iya Sermon sa Bukid: “Padayon nga higugmaa ang inyo mga kaaway, himui sang maayo ang mga nagadumot sa inyo, pakamaayuha ang mga nagapakamalaut sa inyo, ipangamuyo ang mga nagainsulto sa inyo.” (Luc. 6:27, 28) Si apostol Pablo nakahibalo base sa iya eksperiensia nga ang isa nga manughingabot mahimo mangin isa ka matutom nga disipulo ni Cristo kag mangin isa ka makugi nga alagad ni Jehova. (Gal. 1:13-16, 23) Sa isa pa niya ka sulat, si Pablo nagsiling: “Kon ginatamay, nagapakamaayo kami; kon ginahingabot, nagabatas kami; kon ginapakahuy-an, nagahambal kami sing mainayuhon.”—1 Cor. 4:12, 13.

15. Ano ang pinakamaayo nga paagi nga madaug naton ang malaut paagi sa maayo?

15 Ginatuman gid sang matuod nga mga Cristiano ang nagahingapos nga bersikulo sang Roma kapitulo 12: “Indi ka magpadaug sa malaut, kundi padayon nga dauga ang malaut paagi sa maayo.” Si Satanas nga Yawa amo ang ginhalinan sang tanan nga kalautan. (Juan 8:44; 1 Juan 5:19) Sa bugna nga ginhatag kay apostol Juan, ginpahayag ni Jesus nga “gindaug [sang iya hinaplas nga mga kauturan si Satanas] bangod sa dugo sang Kordero kag bangod sa pulong sang ila pagpanaksi.” (Bug. 12:11) Ginapakita sini nga ang pinakamaayo nga paagi nga madaug naton si Satanas kag ang iya malain nga impluwensia sa sining sistema sang mga butang amo ang paghimo sing maayo paagi sa aton pagpanaksi nga hilikuton—ang pagbantala sang maayong balita sang Ginharian.

Magkasadya sa Paglaum

16, 17. Ano ang ginatudlo sa aton sang Roma kapitulo 12 tuhoy sa (a) kon paano naton dapat gamiton ang aton kabuhi? (b) kon paano kita dapat maggawi sa sulod sang kongregasyon? (c) kon paano naton dapat pakig-angutan ang mga nagapamatok sa aton?

16 Ang aton malip-ot nga pagbinagbinag sa kapitulo 12 sang sulat ni Pablo sa mga Cristiano sa Roma nagpahanumdom sa aton sang madamo nga butang. Natun-an naton nga subong dedikado nga mga alagad ni Jehova, dapat handa kita maghimo sing mga sakripisyo. Sa bulig sang espiritu sang Dios, kinabubut-on kita nga nagasakripisyo bangod ang aton ikasarang sa pagpangatarungan nagakumbinsi sa aton nga amo ini ang kabubut-on sang Dios. Mainit kita sa espiritu kag makugi naton nga ginagamit ang aton nanuhaytuhay nga mga dulot. Nagaalagad kita sing mapainubuson kag sing maugdang, nga ginahimo ang aton labing masarangan agod mahuptan ang aton Cristianong paghiusa. Ginasunod naton ang dalanon sang pagkamaabiabihon kag ginapakita ang matuod nga empatiya.

17 Ang Roma kapitulo 12 nagahatag man sa aton sing madamo nga laygay kon paano dapat atubangon ang pagpamatok. Indi kita dapat magbalos. Dapat naton pakitaan sing kaayo ang mga nagapamatok sa aton. Tubtob posible, basta wala sing nalapas nga prinsipio sa Biblia, dapat gid naton tinguhaan nga mangin mahidaiton sa tanan nga tawo. Naaplikar ini sa sulod sang pamilya, sa sulod sang kongregasyon, sa aton mga kaingod, sa trabaho, sa eskwelahan, kag sa aton pagministeryo. Bisan pa makaatubang kita sang direkta nga pagpamatok, ginahimo naton ang aton bug-os nga masarangan nga daugon ang malaut paagi sa maayo, nga ginadumdom nga ang pagtimalos iya ni Jehova.

18. Ano ang tatlo ka panugyan nga makita sa Roma 12:12?

18 Basaha ang Roma 12:12. Dugang pa sa sining maalamon kag praktikal nga mga laygay, naghatag si Pablo sang tatlo ka panugyan. Ini tanan indi naton mahimo kon wala ang bulig ni Jehova amo kon ngaa nagpanugyan sa aton si apostol Pablo nga “magpadayon sa pagpangamuyo.” Magabulig ini sa aton nga sundon ang iya dugang pa nga laygay nga “magbatas sa idalom sang kapipit-an.” Labaw sa tanan, dapat naton huptan sing malig-on sa aton hunahuna ang mga saad ni Jehova para sa aton kag “magkasadya sa paglaum” nga mabuhi sing walay katapusan, sa langit man ukon sa duta.

Bilang Pagrepaso

• Paano naton atubangon ang mga pagpamatok?

• Sa ano nga mga aspekto dapat naton tinguhaan nga mangin manugpahidait, kag paano?

• Ngaa indi kita dapat magtimalos?

[Mga Pamangkot sa Pagtinuon]

[Retrato sa pahina 8]

Ang paghatag sang praktikal nga bulig sa aton mga kaingod mahimo makadula sang ila negatibo nga pagtamod sa aton

[Retrato sa pahina 9]

Ginatinguhaan mo bala nga mangin manugpahidait sa sulod sang kongregasyon?