Relihion—Sin-o ang Dapat Magpili, Ako Ukon ang Akon mga Ginikanan?

SA Poland, madamo nga tawo ang nagapangatarungan sa mga Saksi ni Jehova, “Ginmat-an ko na ini nga relihion, kag indi ko na ini pag-islan tubtob mapatay ako.” Ginapakita sini nga madamo ang nagapanubli sang relihion sang ila ginikanan. Amo man bala sina ang panimuot sang mga tawo sa inyo lugar? May sayop bala sa sina? Kon amo sina ang panimuot sang mga tawo, ang relihion mangin isa na lamang ka pormalidad kag tradisyon sang pamilya. Mahimo man bala ini matabo sa mga Saksi ni Jehova nga nakatuon sing kamatuoran sa ila mga ginikanan ukon sa ila mga lolo kag lola?

Indi amo sini ang natabo kay Timoteo, nga ginpadaku sang iya matutom nga iloy kag lola nga magtuo kag maghigugma sa matuod nga Dios. Natun-an ni Timoteo ang balaan nga sinulatan “kutob sa [iya] pagkalapsag.” Sa pagligad sang tion, napamatud-an ni Timoteo nga ang Cristianismo amo gid ang matuod nga relihion paagi sa bulig sang iya iloy kag lola. “Nabuyok [si Timoteo] nga patihan” ang iya mga nabatian tuhoy kay Jesucristo gikan sa Kasulatan. (2 Tim. 1:5; 3:14, 15) Ginpabaloran niya ang ihibalo sa Biblia nga nabaton niya sa iya iloy kag lola, kag gin-aplikar niya ini sa iya kabuhi. Gani bisan pa ginahimo karon sang Cristianong mga ginikanan ang ila bug-os nga masarangan agod buligan ang ila kabataan nga mangin alagad ni Jehova, dapat nga ang mga kabataan mismo ang magapalambo sina nga handum.—Mar. 8:34.

Dapat nga ang kada isa kumbinsido gid sa iya ginapatihan agod maalagad niya si Jehova sing kinabubut-on kag magpabilin nga matutom bisan ano man ang matabo. Sa amo, ang iya pagtuo mangin malig-on kag makapanggamot sing maayo.—Efe. 3:17; Col. 2:6, 7.

Ang Papel sang Kabataan

“Nagapati gid ako nga matuod ang relihion sang mga Saksi ni Jehova,” siling ni Albert, * nga nagdaku sa pamilya nga Saksi, “pero nabudlayan gid ako nga sundon ang ila ginapahimo sa akon.” Kon isa ikaw ka pamatan-on, mahimo nga amo man sina ang imo ginabatyag. Ngaa indi ka manikasog nga hibaluon kon ano gid bala ang ginapahimo sang Dios sa aton kag sa amo mangin malipayon ka sa paghimo sini? (Sal. 40:8) “Nagsugod ako sa pagpangamuyo,” siling ni Albert. “Mabudlay ini sa umpisa. Kinahanglan ko pa piliton ang akon kaugalingon. Apang wala magdugay, nabatyagan ko nga dapat ko himuon ang husto agod mangin kahalamut-an ako sa mata sang Dios. Naghatag ini sa akon sing kusog nga maghimo sing mga pagbag-o.” Paagi sa pagpalambo sing suod nga kaangtanan kay Jehova, mangin mahapos para sa imo nga  himuon ang iya mga ginapatuman.—Sal. 25:14; Sant. 4:8.

Hunahunaa nga nagahampang ka sang chess, scrabble ukon basketbol. Ano abi kon wala ka sing ideya sa sini nga hampang ukon indi ka maayo maghampang sini? Mahimo gid nga madali ka lang matak-an. Apang, kon kabalo ka sa sini nga hampang kag sagad ka na sa sini, basi ikaw pa gani ang manghagad nga maghampang sini pirme. Amo man ini kon tuhoy sa Cristianong mga hilikuton. Kon wala kita sing ideya kon ano ang ginahambalan, madali lang kita matak-an. Gani tilawi nga maghanda para sa Cristianong mga miting kag magpakigbahin sa sini. Kon himuon mo ini, mapalig-on mo ang iban, ano man ang imo edad!—Heb. 10:24, 25.

Ang imo interes magalambo pa gid kon ginasugid mo sa iban ang imo mga ginapatihan. Apang, gugma ang dapat magapahulag sa imo sa paghimo sini, kag indi bangod napilitan ka lang. Pamangkuta ang imo kaugalingon: ‘Ngaa gusto ko sugiran ang iban tuhoy kay Jehova? Ngaa ginahigugma ko si Jehova?’ Kinahanglan makilala mo si Jehova subong isa ka mahigugmaon nga Amay. Sia nagsiling paagi kay Jeremias: “Pangitaon ninyo ako kag makita ako; kon pangitaon ninyo ako sa bug-os ninyo nga tagiposoon.” (Jer. 29:13, 14) Paano mo ini mahimo? “Kinahanglan ko bag-uhon ang akon panimuot,” siling ni Jakub. “Sugod sang bata pa ako nagatambong na ako sa mga miting kag nagaupod sa pagbantala, pero nangin rutina lang ini sa akon. Apang sang nakilala ko na sing lubos si Jehova kag nangin suod ang akon kaangtanan sa iya, nagtudok sa akon ang kamatuoran.”

Ang pag-upod sa makapalig-on nga mga kaupdanan makaamot man sing daku sa imo kalipay sa ministeryo. “Maglakat upud sa maalam nga mga tawo kag manginmaalam ka,” siling sang Biblia. (Hulu. 13:20) Gani makig-abyan sa mga kauturan nga may espirituwal nga mga tulumuron kag malipayon nga nagaalagad kay Jehova. Si Jola nagsiling: “Napalig-on gid ako sang nagpakig-abyan ako sa mga pamatan-on nga may espirituwal nga mga tulumuron. Sugod sadto malipayon na ako nga nagapakigbahin sing regular sa ministeryo.”

Ang Papel sang mga Ginikanan

“Daku gid ang akon pasalamat sa akon mga ginikanan kay gintudluan nila ako tuhoy kay Jehova,” siling ni Jola. Huo, daku gid ang impluwensia sang mga ginikanan sa desisyon sang ila kabataan. Si apostol Pablo nagsulat: “Mga amay, . . . padayon sila [ang inyo kabataan] nga padakua sa disiplina kag nagatuytoy nga panghunahuna ni Jehova.” (Efe. 6:4) Maathag nga ginapakita sini nga laygay nga ang papel sang mga ginikanan amo ang pagtudlo sa ila kabataan sang dalanon ni Jehova, kag indi sang ila kaugalingon nga dalanon. Sa baylo nga ipilit sa imo kabataan kon ano ang imo gusto, mas maayo nga buligan mo sila nga himuon nga tulumuron ang pagkabuhi suno sa mga katuyuan ni Jehova!

Mahimo mo mapatudok sa imo kabataan ang mga pulong ni Jehova kag “hambali ninyo ini kon ara kamo sa inyo balay, kag kon nagalakat kamo, kon nagahigda kamo kag kon magbangon kamo.” (Deut. 6:6, 7, Ang Pulong sang Dios) “Pirme namon ginaistoryahan ang lainlain nga bahin sang bug-os tion nga pag-alagad,” siling ni Ewa kag Ryszard, mga ginikanan sang tatlo ka bata nga lalaki. Ano ang resulta? “Gamay pa sila, gusto na nila nga magpalista sa Teokratikong Eskwelahan Para sa Ministeryo, dayon nangin manugbantala sila, kag wala  madugay nagdesisyon sila nga magpabawtismo. Sang ulihi, nangin Bethelite ang iban sa ila kag ang iban nagpayunir.”

Importante gid ang maayo nga halimbawa sang ginikanan. Si Ryszard nagsiling, “Determinado kami nga indi magkabuhi sing doble kara—nga lain ang ginapakita sa balay kag lain man sa kongregasyon.” Gani, pamangkuta ang imo kaugalingon: ‘Ano nga halimbawa ang ginapakita ko sa akon kabataan? Makita bala nila sa amon ang matuod nga gugma kay Jehova? Makita bala nila ini nga gugma sa akon mga pangamuyo kag sa akon regular nga personal nga pagtuon? Makita man bala nila ini sa akon panimuot sa pagbantala, kalingawan, kag materyal nga mga butang kag sa akon ginasiling tuhoy sa iban nga katapo sang kongregasyon?’ (Luc. 6:40) Madali mamutikan sang imo kabataan kon wala mo ginatuman ang imo ginahambal.

Kinahanglan gid ang disiplina sa pagpadaku sa mga kabataan. Apang, ang balaan nga Pulong sang Dios nagsiling sa aton: “Hanasa ang bata sa dalanon nga dapat niya paglaktan.” (Hulu. 22:6) Si Ewa kag si Ryszard nagsiling, “Ginhatagan gid namon sing tion ang kada isa sang amon kabataan nga matun-an sa Biblia.” Siempre, ang mga ginikanan amo ang nakahibalo kon bala kinahanglan gid nga isaisahon nga tun-an sa Biblia ang ila kabataan. Ano man ang kahimtangan, kinahanglan nga hatagan sing tion ang tagsa ka kabataan. Nagakinahanglan ini sang pagkamapasibusibuon kag pagkamakatarunganon. Halimbawa, sa baylo nga hambalan lang sila nga ang isa ka partikular nga musika malain, ngaa indi mo pag-ipakita sa ila ang mga prinsipio sa Biblia nga nadalahig sa sini, sa amo makahimo sila sing maalamon nga desisyon?

Mahimo nga nahibaluan sang imo kabataan kon ano ang ginapaabot mo sa ila, kag daw ginatuman ka man nila. Pero, kinahanglan nga lab-uton mo ang ila tagipusuon. Dumduma, “ang laygay sa tagiposoon sang tawo kaangay sang tubig nga madalum, apang ang tawo nga mahangponon nagasag-ub sini.” (Hulu. 20:5) Panilagi ang imo mga kabataan kag bantayi kon may mga problema sa ila tagipusuon, kag maghulag dayon. Ipakita sa ila nga nabalaka ka kag pamangkuta sila sang nagakaigo nga mga pamangkot, nga wala dayon nagahukom. Pero likawi nga mangusisa sing sobra. Kon magpakita ka sing matuod nga kabalaka, malab-ot mo ang ila tagipusuon kag mahapos mo sila mabuligan.

 Ang Papel sang Kongregasyon

Subong isa ka alagad sang Dios, mabuligan mo bala ang mga pamatan-on sa kongregasyon nga maapresyar ang kamatuoran nga gintudlo sa ila sang ila mga ginikanan? Bisan pa ang mga ginikanan amo ang may salabton sa paghanas sa ila kabataan, ang iban nga katapo sang kongregasyon, ilabi na ang mga gulang, makabulig man. Importante gid ini ilabi na sa mga pamilya nga isa lang ka ginikanan ang Saksi.

Paano mabuligan sang mga gulang ang mga pamatan-on nga higugmaon si Jehova kag mabatyagan nila nga ginapabaloran sila kag ginaapresyar? Si Mariusz, nga isa ka manugtatap sang isa ka kongregasyon sa Poland nagsiling: “Dapat istoryahon pirme sang mga gulang ang mga pamatan-on. Indi lamang kon may mga problema sila kundi sa iban man nga kahigayunan. Mahimo nila sila updan sa ministeryo, istoryahon pagkatapos sang miting, ukon hagaron nga mamahaw.” Mahimo mo umpisahan ang pagsugilanunay paagi sa pagpamangkot kon ano ang masiling nila sa kongregasyon. Kon ang mga pamatan-on hilway nga makapabutyag sa mga gulang, magasuod sila sa kongregasyon kag mabatyagan nila nga bahin sila sini.

Kon isa ikaw ka gulang, nagapakig-istorya ka bala sa mga pamatan-on sa inyo kongregasyon? Bisan pa isa na karon ka gulang si Albert nga ginsambit kaina, nakaeksperiensia man sia sing nanuhaytuhay nga pagtilaw sang pamatan-on pa sia. Nagsiling sia, “Subong isa ka pamatan-on, kinahanglan ko ang pagbisita kag pagpalig-on sang mga gulang.” Mapakita man sang mga gulang nga interesado sila sa mga pamatan-on paagi sa pagpangamuyo para sa ila espirituwal nga kaayuhan.—2 Tim. 1:3.

Makabenepisyo gid ang mga pamatan-on kon nagapakigbahin sila sa mga hilikuton sang kongregasyon. Kay kon indi, mahimo nga mabuyo sila sa mga butang sa kalibutan. Kamo nga mas may edad sa ila, puede bala ninyo sila maupdan sa pagministeryo kag makig-abyan sa ila? Maghatag sing tion sa paglingawlingaw upod sa mga pamatan-on, sa amo magasuod sila kag magasalig sa imo. Si Jola nagsiling: “Nagpakita sing personal nga interes sa akon ang isa ka payunir nga babayi. Sugod sang nakaupod ko sia sa ministeryo, nabatyagan ko na ang kalipay sa pagbantala.”

Ang Imo Personal nga Desisyon

Mga pamatan-on, pamangkuta ang inyo kaugalingon: ‘Ano ang akon mga tulumuron? Kon wala pa ako nabawtismuhan, may tulumuron bala ako nga magpabawtismo? Ang imo gugma kay Jehova amo ang dapat nga magpahulag sa imo nga magpabawtismo kag indi bangod gusto mo lang pahamut-an ang imo pamilya.

Huo, kabay nga si Jehova mangin matuod mo nga Abyan kag pakabahandion mo ang kamatuoran. Si Jehova nagsiling paagi kay manalagna Isaias: “Dili ka magkahangawa, kay ako ang imo Dios.” Kon magpabilin ka nga abyan ni Jehova, indi ka niya pagpabay-an. Palig-unon ka gid niya kag ‘alay-ayon sang iya too nga kamut sang iya pagkamatarung.’—Isa. 41:10.

[Nota]

^ par. 6 Gin-islan ang pila ka ngalan.

[Retrato sa pahina 4]

Hantupa kon ano ang yara sa tagipusuon sang imo bata

[Retrato sa pahina 6]

Ang imo gugma kay Jehova amo ang dapat nga magpahulag sa imo nga magpabawtismo