Magdiretso sa kaundan

Magdiretso sa listahan sang kaundan

Ang Gugma ni Cristo Nagapahulag sa Aton nga Maghigugma

Ang Gugma ni Cristo Nagapahulag sa Aton nga Maghigugma

 Ang Gugma ni Cristo Nagapahulag sa Aton nga Maghigugma

“Ginhigugma niya ang mga iya nga yari sa kalibutan, padayon niya nga ginhigugma sila tubtob sa katapusan.”—JUAN 13:1.

1, 2. (a) Ngaa talalupangdon gid ang gugma ni Jesus? (b) Ano nga mga aspekto sang gugma ang aton pagabinagbinagon sa sini nga artikulo?

SI Jesus nagpahamtang sing himpit nga halimbawa sang gugma. Ginpakita niya ang gugma sa tanan nga paagi—sa iya paghambal, paggawi, pagpanudlo, kag sa iya paghalad sang iya kabuhi. Nagpakita si Jesus sing gugma sa mga tawo nga iya nakilala, ilabi na gid sa iya mga disipulo, tubtob sa iya kamatayon.

2 Ang talalupangdon nga gugma nga ginpakita ni Jesus isa gid ka maayo nga halimbawa para sa iya mga sumulunod. Mapahulag kita nga ipakita ang amo man nga gugma sa aton mga kauturan kag subong man sa iban. Sa sini nga artikulo, binagbinagon naton kon ano ang matun-an sang mga gulang sa kongregasyon kay Jesus tuhoy sa pagpakita sing gugma sa mga nakasala, bisan sa mga nakakomiter sing mabug-at nga sala. Binagbinagon man naton kon paano ang gugma ni Jesus magapahulag sa mga Cristiano nga buligan ang iban sa tion sang kabudlayan, kalamidad, kag balatian.

3. Bisan pa nakahimo sing mabug-at nga sala si Pedro, paano sia ginpakig-angutan ni Jesus?

3 Sang gab-i antes napatay si Jesus, makatlo ka beses nga ginpanghiwala sia sang iya apostol nga si Pedro. (Mar. 14:66-72) Pero sang nakapanumbalik na si Pedro, subong sang gintagna ni Jesus, ginpatawad sia ni Jesus. Gintugyanan pa gani ni Jesus si Pedro sing mabug-at nga mga responsibilidad. (Luc. 22:32; Binu. 2:14; 8:14-17; 10:44, 45) Ano ang matun-an naton sa panimuot ni Jesus sa mga nakahimo sing mabug-at nga mga sala?

Magpakita sing Tulad-Cristo nga Gugma sa mga Nakasala

4. Sa ano nga kahimtangan ilabi na nga dapat ipakita ang tulad-Cristo nga panimuot?

4 Ang isa sa mga kahimtangan nga mabudlay magpakita sing tulad-Cristo nga panimuot amo ang pagpakig-angot sa isa nga nakahimo sing mabug-at nga sala, sa sulod man sang pamilya ukon sa kongregasyon. Makapasubo nga samtang nagahilapit na ang katapusan nga mga adlaw sang sistema ni Satanas, ang espiritu sang kalibutan padayon nga nagahalit sa moral sang mga tawo. Bata man kita ukon tigulang, ang malain nga panimuot sang kalibutan sa moral mahimo magpaluya sang aton determinasyon nga maghimo sing maayo. Sang unang siglo, may pila nga kinahanglan isikway sa Cristianong kongregasyon, kag ang iban naman ginsabdong. Amo man sini ang nagakatabo karon. (1 Cor. 5:11-13; 1 Tim. 5:20) Apang, kon ang mga gulang nga nagauyat sini nga problema magpakita sing tulad-Cristo nga gugma, daku ang mabulig sini sa isa nga nakasala.

5. Paano mailog sang mga gulang ang panimuot ni Cristo sa mga nakasala?

5 Kaangay ni Jesus, dapat gid huptan sang mga gulang ang matarong nga mga talaksan ni Jehova sa tanan nga tion. Paagi sa paghimo sini, mapakita nila ang kalulo, kaayo, kag gugma kaangay sang ginpakita ni Jehova. Kon ang isa nga nakasala “boong sing tagiposoon” kag matuod nga “mahinulsulon,” mahapos para sa mga gulang nga “pasibuon ina nga tawo sa espiritu sang kalulo.” (Sal. 34:18; Gal. 6:1) Apang kamusta naman ang mga rebelyuso kag indi mahinulsulon, paano sila dapat pakig-angutan?

6. Ano ang dapat likawan sang mga gulang kon nagapakig-angot sa mga nakasala, kag ngaa?

 6 Kon ang makasasala nagasikway sa laygay sang Kasulatan ukon nagabasol sa iban sa iya ginhimo nga sala, ang mga gulang kag ang iban mahimo magbatyag sing kaugot. Bangod nahibaluan nila ang halit nga nahimo sang isa nga nakasala, mahimo masulay sila nga ipautwas ang ila nabatyagan parte sa mga ginhimo ukon panimuot sang isa nga nakasala. Apang, ang kaakig makahalalit gid kag wala ini nagapabanaag sang “hunahuna ni Cristo.” (1 Cor. 2:16; basaha ang Santiago 1:19, 20.) Bisan pa nagpaandam si Jesus sing prangka sa pila ka tawo sang iya panahon, wala gid sia naghambal sing bisan ano bangod sa dumot ukon sa tuyo nga masakitan ang iban. (1 Ped. 2:23) Sa baylo, ginapabatyag niya sa mga nakasala nga mahimo sila maghinulsol kag magpanumbalik kay Jehova. Sa pagkamatuod, ang isa sa panguna nga rason kon ngaa nagkari si Jesus sa kalibutan amo ang “pagluwas sa mga makasasala.”—1 Tim. 1:15.

7, 8. Ano dapat ang magatuytoy sa mga gulang sa pag-uyat sang hudisyal nga mga kaso?

7 Paano ang halimbawa ni Jesus sa sini nga bahin makaapektar sa aton pagtamod sa mga kauturan nga dapat disiplinahon sa kongregasyon? Dumduma nga ang Makasulatanhon nga kahimusan tuhoy sa hudisyal nga pagdisiplina sa sulod sang kongregasyon nagaamlig sa panong, kag mahimo magpahulag sa nakasala nga maghinulsol. (2 Cor. 2:6-8) Makapasubo nga ang pila wala nagahinulsol kag kinahanglan nga i-disfellowship, pero makapalig-on nga mahibaluan nga madamo sa ila ang nanumbalik sang ulihi kay Jehova kag sa iya kongregasyon. Kon ang mga gulang nagapakita sing tulad-Cristo nga panimuot, mas mahapos para sa nakasala nga maghinulsol kag magpanumbalik. Sa ulihi, mahimo nga indi na madumduman sang iban nga nakasala ang tanan nga Makasulatanhon nga laygay sang mga gulang, pero pat-od nga indi gid nila malipatan ang pagtahod kag gugma nga ginpakita sang mga gulang sa ila.

8 Gani, dapat ipakita sang mga gulang “ang mga bunga sang espiritu,” ilabi na ang tulad-Cristo nga gugma, bisan pa indi pagbatunon sang mga nakasala ang laygay sang Kasulatan. (Gal. 5:22, 23) Indi sila dapat magpadasudaso sa pagdesisyon nga i-disfellowship ang nakasala. Dapat nila ipakita nga luyag nila nga makapanumbalik kay Jehova ang mga nakasala. Gani, kon ang isa nga nakasala  maghinulsol sa ulihi, subong sang ginahimo sang kalabanan, magapasalamat gid sia kay Jehova kag sa “dulot nga mga lalaki” nga nagbulig sa iya nga mangin mahapos ang pagpanumbalik sa kongregasyon.—Efe. 4:8, 11, 12.

Magpakita sing Tulad-Cristo nga Gugma sa Tion sang Katapusan

9. Maghatag sing isa ka halimbawa nga nagpakita si Jesus sang gugma sa iya mga disipulo sa praktikal nga paagi.

9 Ginrekord ni Lucas ang tumalagsahon nga gugma nga ginpakita ni Jesus sa praktikal nga paagi. Nahibaluan ni Jesus nga magaabot ang tion nga palibutan sang Romano nga mga soldado ang Jerusalem kag kibunon ang mga tawo diri agod indi makapalagyo. Mahigugmaon nga ginpaandaman ni Jesus ang iya mga disipulo: “Kon makita ninyo nga ginalibutan ang Jerusalem sang nagakampo nga kasuldadusan, nian hibalua ninyo nga ang paghapay sa iya malapit na.” Ano ang dapat nila himuon? Abanse nga naghatag si Jesus sing maathag kag espesipiko nga mga instruksion. “Nian ang mga yara sa Judea magpalagyo sa mga bukid, kag ang mga yara sa sulod niya maggua, kag ang mga yara sa kaumhan indi na magsulod sa iya; bangod amo ini ang mga adlaw sa pagpadapat sing katarungan, agod matuman ang tanan nga nasulat.” (Luc. 21:20-22) Sang ginpalibutan sang Romano nga mga soldado ang Jerusalem sang 66 C.E., ang mga matinumanon nagsunod sa sini nga mga instruksion.

10, 11. Paano ang pagbinagbinag sa pagpalagyo sang mga Cristiano sang una gikan sa Jerusalem makabulig sa aton nga mangin handa sa “dakung kapipit-an”?

10 Sang nalagyo ang mga Cristiano sa Jerusalem, kinahanglan nila nga ipakita ang tulad-Cristo nga gugma sa isa kag isa, subong nga si Cristo nagpakita man sing gugma sa ila. Kinahanglan nila ipaambit sa kada isa kon ano ang yara sa ila. Magluwas sa kalaglagan sang Jerusalem, ang tagna ni Jesus may daku pa nga katumanan sa palaabuton. Sia nagtagna: “May dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo liwat.” (Mat. 24:17, 18, 21) Mahimo kita makaatubang sing mga kabudlayan kag kapigaduhon antes kag sa tion sang “dakung kapipit-an” nga malapit na mahanabo. Apang ang tulad-Cristo nga panimuot magabulig sa aton nga malandas ini.

11 Sa sina nga tion, kinahanglan naton sundon ang halimbawa ni Jesus sa pagpakita sang di-makagod nga gugma. Sa sini nga bahin, si Pablo naglaygay: “Pahamut-an sang kada isa sa aton ang iya isigkatawo sa kon ano ang maayo sa pagpabakod sa iya. Kay bisan ang Cristo wala magpahamuot sa iya kaugalingon . . . Karon kabay nga ang Dios nga nagahatag sang pagbatas kag lugpay magtugot nga matigayon ninyo ang panimuot sang hunahuna pareho sang iya ni Cristo Jesus.”—Roma 15:2, 3, 5.

12. Ano nga sahi sang gugma ang dapat naton palambuon karon, kag ngaa?

 12 Si Pedro, nga ginpakitaan ni Jesus sang gugma, nagpalig-on man sa mga Cristiano nga magpalambo sing “di-salimpapaw nga utudnon nga pagpalangga,” kag magpakita sing “pagkamatinumanon sa kamatuoran.” Dapat sila ‘maghigugmaanay sing hanuot gikan sa tagipusuon.’ (1 Ped. 1:22) Sa karon, mas kinahanglan naton nga palambuon ang tulad-Cristo nga mga kinaiya bangod nagabaskog na gid ang mga pag-ipit sa katawhan sang Dios. Indi kita dapat magsalig sa bisan ano nga elemento sa sini nga kalibutan, bangod maathag nga nakita na naton karon kon daw ano kahuyang ang pinansial nga kahimtangan sang kalibutan. (Basaha ang 1 Juan 2:15-17.) Sa baylo, samtang nagahilapit ang katapusan sini nga sistema, dapat mangin suod pa gid kita kay Jehova kag sa isa kag isa, nga nagapalambo sang suod nga pagpakig-abyan sa sulod sang kongregasyon. Si Pablo naglaygay: “Sa utudnon nga gugma magpakita kamo sang mapinalanggaon nga balatyagon sa isa kag isa. Sa pagpadungog sa isa kag isa manguna kamo.” (Roma 12:10) Kag ini nga punto ginpadaku pa gid ni Pedro paagi sa pagsiling: “Labaw sa tanan, maghigugmaanay kamo sing tudok, bangod ang gugma nagatabon sang madamo nga sala.”—1 Ped. 4:8.

13-15. Paano ginpakita sang pila ka kauturan ang tulad-Cristo nga gugma pagkatapos sang kalamidad?

13 Sa bug-os nga kalibutan, ang mga Saksi ni Jehova nakilal-an sa pagpakita sing tulad-Cristo nga gugma. Binagbinaga ang mga Saksi nga nagboluntaryo sa pagbulig pagkatapos sang pagpanghalit sang bagyo sa nabagatnan nga mga bahin sang Estados Unidos sang 2005. Bangod napahulag sila sa halimbawa ni Jesus, kapin sa 20,000 ang nagboluntaryo. Madamo sa ila ang nagbiya sang ila komportable nga mga balay kag maayo nga mga trabaho agod buligan ang ila mga utod nga nabiktima.

14 Sa isa ka lugar nga ginbagyuhan, ang tubig nga halin sa dagat nagtuga sing baha nga naglab-ot sing mga 80 kilometros pailaya, kag nagdalom sing tubtob 10 metros. Sang naghubas na ang tubig, mga 30 porsiento sang tanan nga balay kag bilding nga ginbahaan ang nagkalaguba. Nian, nag-alabot ang boluntaryo nga mga Saksi nga may ihibalo sa pagtukod gikan sa lainlain nga pungsod, nga may dala nga mga kagamitan kag mga materyales sa pagtukod, kag handa sa paghimo sang bisan ano nga trabaho. Ang duha ka mag-utod nga babayi nga mga balo, nag-impaki sang ila mga gamit kag ginbutang ini sa ila pick-up kag nagbiyahe sing kapin sa 3,000 kilometros agod magbulig. Ang isa sa ila nagpabilin didto agod padayon nga magbulig sa relief committee kag mag-alagad subong regular payunir.

15 Kapin sa 5,600 ka balay sang mga Saksi kag sang iban pa ang nakay-o ukon napatindog liwat. Ano ang ginbatyag sang mga Saksi nga ginpakitaan sining tumalagsahon nga gugma? Isa ka utod nga babayi nga nagub-an sang balay ang nagsaylo sa isa ka salakyan nga ginhimo nga gamay nga balay, apang nagatulo ang atop sini kag guba pa ang iya lulutuan. Ginpatindugan sia sang mga kauturan sing gamay apang komportable nga balay. Samtang nagatindog sia sa atubangan sang iya matahom kag bag-o nga balay, naghibi sia nga nagapasalamat kay Jehova kag sa mga kauturan. Ang kalabanan sang mga Saksi nga nagub-an sang balay nag-istar sa temporaryo nga mga puluy-an sa sulod sang isa ka tuig ukon kapin pa bisan napatindog na liwat ang ila  mga balay. Ngaa? Agod madayunan anay sang mga boluntaryo ang ila bag-o nga balay. Isa gid ka tumalagsahon nga pagpakita sang tulad-Cristo nga gugma!

Magpakita sing Tulad-Cristo nga Panimuot sa mga Nagamasakit

16, 17. Paano naton mapakita ang tulad-Cristo nga panimuot sa mga nagabalatian?

16 Pila lamang sa aton ang nakaeksperiensia sing dalagku nga mga kalamidad. Pero halos kita tanan mahimo mag-atubang sang mga problema nga tuga sang aton balatian ukon sa pagbalatian sang mga miembro sang aton pamilya. Ang panimuot nga ginpakita ni Jesus sa mga nagabalatian isa ka halimbawa para sa aton. Nagbatyag sia sing kaluoy sa ila bangod sa iya gugma. Sang gindala sa iya sang kadam-an ang mga nagabalatian, “gin-ayo niya ang tanan nga may malain nga kahimtangan.”—Mat. 8:16; 14:14.

17 Sa karon, ang mga Cristiano wala sing gahom sa pagpang-ayo kaangay ni Jesus, apang pareho kay Jesus maluluy-on man sila sa mga nagamasakit. Paano nila ini ginapakita? Ang isa sini amo ang pag-ilog sang mga gulang sa gugma nga ginpakita ni Jesus paagi sa paghimo sing mga kahimusan sa pagbulig sa mga nagabalatian sa sulod sang kongregasyon, subong sa pagsunod sa prinsipio nga narekord sa Mateo 25:39, 40. * (Basaha.)

18. Paano ginpakita sang duha ka utod nga babayi ang ila matuod nga gugma sa utod, kag ano ang nangin resulta?

18 Siempre, indi man kinahanglan nga mangin gulang ang isa agod makahimo sia sing maayo sa iban. Binagbinaga ang kahimtangan ni Charlene, nga isa ka utod nga 44 anyos kag may kanser. Ginsilingan sia nga napulo na lang ka adlaw ang nabilin sa iya kabuhi. Sang nakita sang duha ka utod nga sanday Sharon kag Nicolette kon daw ano kabudlay para sa iya bana ang pag-atipan sa iya, nagboluntaryo sila nga magbulig sa pag-atipan kay Charlene sa katapusan nga mga inadlaw sang iya kabuhi. Naglawig pa ang iya kabuhi sing anom ka semana, apang padayon nga ginpakita sang duha ka utod ang ila gugma tubtob sa iya kamatayon. “Mabudlay gid kon nahibaluan mo nga indi na sia mag-ayo,” siling ni Sharon. “Pero, ginpabakod kami ni Jehova. Bangod sining eksperiensia, nangin suod pa gid kami kay Jehova kag sa isa kag isa.” Ang bana ni Charlene nagsiling: “Indi ko gid malipatan ang kaayo kag pagsuporta sining duha ka pinalangga nga utod. Bangod sa ila putli nga motibo kag positibo nga panimuot, nangin mahapos sa akon matutom nga asawa nga si Charlene nga atubangon ang kamatayon kag naghatag man ini sa akon sing kabakod nga kinahanglan ko gid sadto nga mga tion. Indi ko gid malipatan ang ila ginhimo. Ang ila pagkamasinakripisyuhon nagpabakod sang akon pagtuo kay Jehova kag sang akon gugma sa aton bug-os nga paghiliutod.”

19, 20. (a) Anong lima ka aspekto sang panimuot ni Cristo ang aton ginbinagbinag? (b) Ano ang determinado mo nga himuon?

19 Sa sining serye sang tatlo ka artikulo, nabinagbinag naton ang lima ka aspekto sang panimuot ni Jesus kag kon paano naton mailog ang iya panimuot kag paggawi. Dapat mangin ‘malulo kita kag mapainubuson sing tagipusuon,’ kaangay ni Jesus. (Mat. 11:29) Kabay nga tinguhaan man naton nga ipakita ang kaayo sa iban, walay sapayan sang ila di-kahimpitan kag mga kaluyahon. Mangin maisog kita sa paghimo sang tanan nga ginapatuman ni Jehova, bisan pa nagaatubang kita sing mga pagtilaw.

20 Kabay nga ipakita naton ang tulad-Cristo nga gugma sa tanan naton nga kauturan “tubtob sa katapusan,” subong sang ginhimo ni Jesus. Ini nga gugma nagapakilala sa aton subong matuod nga mga sumulunod ni Jesus. (Juan 13:1, 34, 35) Huo, dapat nga “padayon ninyo nga ipakita ang inyo utudnon nga gugma.” (Heb. 13:1) Indi magpangalag-ag! Gamita ang imo kabuhi sa pagdayaw kay Jehova kag sa pagbulig sa iban! Pakamaayuhon gid ni Jehova ang imo hanuot nga mga panikasog.

[Nota]

^ par. 17 Tan-awa ang artikulo nga “Indi Lamang Magsiling: ‘Magpainit-init kag Magkaon sing Maayo’” sa Oktubre 15, 1986 nga Ang Lalantawan.

Mapaathag Mo Bala?

• Paano mapakita sang mga gulang ang tulad-Cristo nga panimuot sa mga nakasala?

• Ngaa importante gid nga ilugon naton ang gugma ni Cristo sa sining tion sang katapusan?

• Paano naton mailog ang panimuot ni Cristo sa mga nagamasakit?

[Mga Pamangkot sa Pagtinuon]

[Retrato sa pahina 17]

Luyag sang mga gulang nga makapanumbalik kay Jehova ang mga nakasala

[Retrato sa pahina 18]

Paano ginpakita sang mga Cristiano nga nagbiya sa Jerusalem ang panimuot ni Cristo?

[Retrato sa pahina 19]

Ang mga Saksi ni Jehova nakilal-an sa pagpakita sang tulad-Cristo nga gugma