Magdiretso sa kaundan

Magdiretso sa listahan sang kaundan

Ginabantayan Kita ni Jehova Para sa Aton Kaayuhan

Ginabantayan Kita ni Jehova Para sa Aton Kaayuhan

 Ginabantayan Kita ni Jehova Para sa Aton Kaayuhan

“Ang mga mata [ni Jehova] nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.”​—2 CRON. 16:9.

1. Ngaa ginausisa kita ni Jehova?

SI Jehova ang himpit nga Amay. Kilala gid niya kita kay bisan gani ang huyog sang aton hunahuna nahibaluan niya. (1 Cron. 28:9) Apang, wala niya kita ginausisa agod pangitaan lamang sing sala. (Sal. 11:4; 130:3) Sa baylo, bangod sang iya gugma, luyag niya kita amligan gikan sa bisan anong butang nga makaguba sang aton kaangtanan sa iya ukon makaupang sa pagtigayon naton sang kabuhi nga walay katapusan.​—Sal. 25:8-10, 12, 13.

2. Ginagamit ni Jehova ang iya kusog para kay sin-o?

2 Si Jehova Labing Gamhanan kag makita niya ang tanan. Gani, sarang niya mabuligan ang mga mainunungon sa iya nga nagapangayo sing bulig, kag sakdagon sila sa tion sang mga pagtilaw. “Ang mga mata [ni Jehova] nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya,” siling sang 2 Cronica 16:9. Talupangda nga ginagamit ni Jehova ang iya kabakod ukon kusog para sa nagaalagad sa iya sing himpit ukon bug-os tagipusuon, ang tagipusuon nga putli kag sinsero ang motibo. Wala sia sing subong sini nga kabalaka sa mga malimbungon ukon mga salimpapaw.​—Jos. 7:1, 20, 21, 25; Hulu. 1:23-33.

 Maglakat Upod sa Dios

3, 4. Ano ang buot silingon sang ‘paglakat upod sa Dios,’ kag ano nga mga halimbawa sa Biblia ang makabulig sa aton nga mahangpan ini?

3 Madamo ang nagapati nga imposible gid para sa Manunuga sang uniberso nga tugutan ang mga tawo nga maglakat upod sa iya sa malaragwayon nga paagi. Apang, amo gid sini ang luyag ni Jehova nga himuon naton. Sa tion sang Biblia, sanday Enoc kag Noe ‘naglakat upod sa Dios.’ (Gen. 5:24; 6:9) “Nagpabilin [si Moises] nga mapag-on subong nga nakakita sa Isa nga di-makita.” (Heb. 11:27) Nangin mapainubuson si Hari David sa paglakat upod sa iya langitnon nga Amay. Sia nagsiling: “Bangod nga [si Jehova] yara sa akon too, indi ako mationg.”​—Sal. 16:8.

4 Siempre pa, indi kita literal nga makapanguyapot sa kamot ni Jehova kag maglakat upod sa iya. Apang, mahimo naton ini sa malaragwayon nga paagi. Paano? Ang salmista nga si Asap nagsulat: “Nagaupud ako sa imo sing dalayon; ginkaptan mo ang akon kamut nga too. Magatuytuy ka sa akon sang imo laygay.” (Sal. 73:23, 24) Buot silingon, nagalakat kita upod kay Jehova kon ginasunod naton ang iya laygay. Panguna naton nga mabaton ini nga laygay paagi sa iya nasulat nga Pulong kag paagi sa “matutom kag mainandamon nga ulipon.”​—Mat. 24:45; 2 Tim. 3:16.

5. Paano ni Jehova ginabantayan subong isa ka Amay ang mga mainunungon sa iya, kag ano dapat ang aton pagtamod sa iya?

5 Bangod hamili kay Jehova ang mga nagalakat upod sa iya, ginabantayan, ginatatap, ginaamligan, kag ginatudluan niya sila subong mahigugmaon nga Amay. Nagsiling ang Dios: “Ton-an ko ikaw kag tudloan ikaw sang dalanon nga dapat mo laktan; laygayan ko ikaw nga ang akon mata yara sa ibabaw nimo.” (Sal. 32:8) Pamangkuta ang imo kaugalingon: ‘Mahanduraw ko bala ang akon kaugalingon nga nagalakat kag ginadapit ni Jehova, samtang nagapamati ako sa iya kag ginatulok niya ako sing mahigugmaon? Bangod nahibaluan ko nga ginabantayan ako ni Jehova, nagaapektar bala ini sa akon panghunahuna, hambal, kag buhat? Kag kon makasala ako, mabatyagan ko bala nga si Jehova, isa ka Dios nga indi malayo kag indi mapintas kundi mahigugmaon, mapinalanggaon, kag maluluy-on nga Amay nga luyag magbulig sa mga mahinulsulon agod makapasag-uli sa iya?’​—Sal. 51:17.

6. Ngaa mas maayo pa si Jehova sangsa tawhanon nga mga ginikanan?

6 Kon kaisa, mahimo kita buligan ni Jehova agod indi kita makasayop. Halimbawa, mahimo makita niya nga ang aton malimbungon nga tagipusuon nagahandum sang mga butang nga indi nagakaigo. (Jer. 17:9) Sa sini nga kahimtangan, mas mauna pa sia sa pagbulig sa aton sangsa aton tawhanon nga mga ginikanan kay ang iya masanag nga mga mata makakita kon ano gid kita, kag mausisa niya ang aton mga panghunahuna. (Sal. 11:4; 139:4; Jer. 17:10) Binagbinaga ang reaksion sang Dios sa nangin panimuot ni Baruc, ang sekretaryo kag suod nga abyan ni manalagna Jeremias.

Isa Gid ka Amay kay Baruc

7, 8. (a) Sin-o si Baruc, kag ano ang sayop nga panimuot ang amat-amat nga nagtubo sa iya tagipusuon? (b) Subong isa ka Amay, paano ginpakita ni Jehova ang iya pag-ulikid kay Baruc?

7 Si Baruc isa ka eksperto nga escriba nga matutom nga nag-alagad upod kay Jeremias sa ila nangin mabudlay nga asaynment nga amo ang pagpahayag sang paghukom ni Jehova sa Juda. (Jer. 1:18, 19) May tion nga si Baruc, nga mahimo naghalin sa prominente nga pamilya, naghingamo sing “mga butang nga dalagku,” para sa iya kaugalingon. Mahimo nga gintugutan niya ang makagod nga ambisyon ukon handum nga magmanggaranon nga maglambo sa iya hunahuna. Ano man ang kabangdanan, nakita ni Jehova ang sayop nga panimuot nga amat-amat nga nagtubo sa tagipusuon ni Baruc. Paagi kay Jeremias, gilayon ini nga gintadlong ni Jehova nga nagasiling kay Baruc: “Ikaw nagsiling, ‘Kailo ako karon! Kay ang GINOO nagdugang sing kasubu sa akon kasakit; ginalapyo ako sa akon pag-ugayong, kag wala ako sing pahuway.’” Nian nagsiling ang Dios: “Nagapangita ka bala sing mga butang nga dalagku tungud sa imo kaugalingon? Dili sila pagpangitaa.”​—Jer. 45:1-5.

8 Wala gin-akigan ni Jehova si Baruc, sa baylo, subong isa ka Amay, mahigugmaon niya sia nga gintadlong. Nakita sang Dios nga bisan pa sayop ang mga handum ni Baruc, indi malaut ukon malimbungon  ang iya tagipusuon. Nahibaluan man ni Jehova nga malapit na lang ang katapusan sang Jerusalem kag Juda, gani indi niya luyag nga mag-untat sa pag-alagad si Baruc. Busa, agod mapasag-uli ang iya alagad, ginpahanumdom sia sang Dios nga ‘magadala sia sing malaut sa tanan nga unud,’ nga nagasiling pa gid nga kon mangin maalamon si Baruc, indi sia mapatay. (Jer. 45:5) Daw subong bala nga nagsiling ang Dios: ‘Baruc, hunahunaa sing maayo kon ano ang matabo sa makasasala nga Juda kag Jerusalem sa indi madugay. Magpabilin ka nga matutom agod indi ka mapatay! Amligan ko ikaw.’ Maathag nga nalab-ot ni Jehova ang tagipusuon ni Baruc kay nagbag-o ang iya panimuot kag naluwas sia sang ginlaglag ang Jerusalem pagligad sang 17 ka tuig.

9. Ano ang imo sabat sa ginpautwas nga mga pamangkot?

9 Samtang ginapamalandungan mo ang kasaysayan ni Baruc, binagbinaga ang masunod nga mga pamangkot kag mga kasulatan: Ano ang ginapakita sang pagpakig-angot sang Dios kay Baruc tuhoy kay Jehova kag sa iya balatyagon sa iya mga alagad? (Basaha ang Hebreo 12:9.) Bangod nagakabuhi kita sa sining makahalanguyos nga mga tion, ano ang matun-an naton sa laygay sang Dios kay Baruc kag sa reaksion ni Baruc? (Basaha ang Lucas 21:34-36.) Bilang pag-ilog kay Jeremias, paano mapadayag sang Cristianong mga gulang ang kabalaka ni Jehova sa iya mga alagad?​—Basaha ang Galacia 6:1.

Ginailog sang Anak ang Gugma sang Amay

10. Paano si Jesus ginsangkapan agod mangin Ulo sang Cristianong kongregasyon?

10 Antes sang panahon sang mga Cristiano, ginpakita ni Jehova ang iya gugma sa iya katawhan paagi sa iya mga manalagna kag sa iban pa nga matutom niya nga mga alagad. Sa karon, ginapakita gid ini nga gugma sang Ulo sang Cristianong kongregasyon, nga amo si Jesucristo. (Efe. 1:22, 23) Amo nga sa tulun-an sang Bugna, ginlaragway si Jesus subong kordero nga may “pito ka mata, nga ang mga mata nagakahulugan sang pito ka espiritu sang Dios nga ginpadala sa bug-os nga duta.” (Bug. 5:6) Si Jesus may himpit nga paghantop bangod ginhatag sa iya ang balaan nga espiritu sang Dios. Makita man niya kon ano gid kita, kag mahibaluan niya ang tanan nga nagakatabo.

11. Ano ang papel ni Cristo, kag paano ang iya panimuot sa aton nagapadayag man sa panimuot sang iya Amay?

11 Kaangay ni Jehova, si Jesus indi man kaangay sang isa ka pulis nga nagatan-aw gikan sa langit. Mahigugmaon nga ginausisa niya kita subong sang isa ka amay. Ang isa sa mga titulo ni Jesus nga “Amay nga Nagapadayon” nagapahanumdom sa aton sa iya papel sa paghatag  sing kabuhi nga walay katapusan sa tanan nga nagatuo sa iya. (Isa. 9:6) Dugang pa, subong Ulo sang Cristianong kongregasyon, mapahulag ni Cristo ang mga hamtong sa espirituwal nga mga Cristiano ilabi na ang mga gulang sa paghatag sing lugpay ukon laygay sa mga nagakinahanglan sini.​—1 Tes. 5:14; 2 Tim. 4:1, 2.

12. (a) Ano ang ginapakita sang mga sulat sa pito ka kongregasyon sa Asia Minor tuhoy kay Jesus? (b) Paano mailog sang mga gulang ang pag-ulikid ni Cristo sa panong sang Dios?

12 Ang tudok nga pag-ulikid ni Cristo sa panong makita sa mga sulat para sa mga gulang sa pito ka kongregasyon sa Asia Minor. (Bug. 2:1–3:22) Ginpakita ni Jesus sa sini nga mga sulat nga nakahibalo sia sa mga nagakatabo sa tagsa ka kongregasyon kag nagakabalaka sia sa iya mga sumulunod. Labi na gid nga maaplikar ini sa aton subong kay ang mga palanan-awon sa Bugna natuman sa tion sang “Adlaw sang Ginuo.” * (Bug. 1:10) Masami nga ginapabutyag ni Cristo ang iya gugma paagi sa mga gulang nga nagaalagad subong mga manugbantay sang kongregasyon. Mapahulag niya ining “mga dulot nga mga lalaki” sa paglugpay, pagpalig-on, ukon paglaygay kon kinahanglanon. (Efe. 4:8; Binu. 20:28; basaha ang Isaias 32:1, 2.) Ginatamod mo bala ang panikasog sang mga gulang subong pagpabutyag sang gugma ni Cristo sa imo?

Bulig sa Husto nga Tion

13-15. Ano ang pila ka paagi nga ginasabat sang Dios ang aton mga pangamuyo? Maghatag sing mga halimbawa.

13 Nakapangamuyo ka na bala sing hugot agod mangayo sing bulig kag nabaton ang mga sabat paagi sa makapalig-on nga pagduaw sang hamtong nga Cristiano? (Sant. 5:14-16) Ukon ayhan, paagi sa isa ka pamulongpulong sa Cristianong miting, ukon sa impormasyon gikan sa aton mga publikasyon? Sa masami, ginasabat ni Jehova ang mga pangamuyo sa sining mga paagi. Halimbawa, pagkatapos makapamulongpulong ang isa ka gulang, ginpalapitan sia sang isa ka utod nga babayi nga nangin biktima sang inhustisya sang nagligad lang nga sinemana. Sa baylo nga magyamo sang iya problema, hanuot sia nga nagpasalamat sa pila ka mga punto sa kasulatan nga ginpadaku sa pamulongpulong. Nahisanto gid ini sa iya kahimtangan kag nalugpayan gid sia. Malipayon gid sia nga nagtambong sia sadto nga miting!

14 Tuhoy sa bulig nga natigayon paagi sa pangamuyo, binagbinaga ang halimbawa sang tatlo ka priso. Nakatigayon sila sing ihibalo sang kamatuoran sa Biblia samtang yara sa prisuhan kag nangin di-bawtismado nga manugbantala. Bangod sa natabo nga kinagamo, ginkuha ang pila ka pribilehiyo sang mga priso sa sini nga prisuhan. Bangod sini, nagprotesta ang mga priso. Nagplano sila nga pagkatapos sang pamahaw sa sunod nga adlaw, indi nila pag-ibalik ang mga pinggan bilang pagprotesta. Nabutang sa alang-alang ang tatlo ka di-bawtismado nga manugbantala. Kon magbuylog sila sa protesta, malapas nila ang laygay sa Biblia nga mabasa sa Roma 13:1. Kon indi naman sila magbuylog, maakig sa ila ang ila kaupod nga mga priso.

15 Bangod indi sila makaistoryahanay, tagsatagsa sa ila nangamuyo sing kaalam. Pagkaaga, nahibaluan nila nga tatlo nga pareho ang ila desisyon nga indi na lang mamahaw. Sang ginkolekta  sang guardia ang mga pinggan, wala sang ibalik ang tatlo ka lalaki. Malipayon gid sila kay malapit sa ila ang “nagapamati sang pangamuyo”!​—Sal. 65:2.

Atubanga ang Palaabuton nga May Pagsalig

16. Paano ang pagbantala nagapakita nga nagaulikid si Jehova sa mga tulad-karnero?

16 Ang isa pa ka pamatuod sang pag-ulikid ni Jehova sa mga tawo nga may bunayag sing tagipusuon, diin man sila nagapuyo, amo ang pagbantala sa bug-os kalibutan. (Gen. 18:25) Masami nga ginagamit ni Jehova ang mga anghel sa pagtuytoy sa iya mga alagad sa tulad karnero nga mga tawo bisan pa sa mga lugar nga wala pa mabantalaan. (Bug. 14:6, 7) Halimbawa, paagi sa isa ka anghel, gintuytuyan sang Dios si Felipe, nga isa ka ebanghelisador, nga masalapuan ang Etiopianhon nga opisyal, kag mapaathag ang Kasulatan sa iya. Ano ang resulta? Ginbaton sang tawo ang maayong balita kag nangin bawtismado nga sumulunod ni Jesus. *​—Juan 10:14; Binu. 8:26-39.

17. Ngaa indi kita dapat magkabalaka sing sobra tuhoy sa aton palaabuton?

17 Samtang nagahilapit ang katapusan sang sistema sang mga butang, ang gintagna nga “pamuno sang pagpasakit” magapadayon. (Mat. 24:8) Halimbawa, ang presyo sang pagkaon mahimo magmahal bangod madamo ang nagakinahanglan sini, malain nga klima, ukon krisis sa ekonomiya. Mahimo nga mangin mabudlay pa gid ang pagpangita sing trabaho, kag piliton pa gid sang amo ang mga trabahador nga dugangan ang ila tion sa pagtrabaho. Ano man ang matabo, ang tanan nga nagauna sang espirituwal nga mga butang kag nagahupot sing ‘simple nga mata,’ wala nagakabalaka sing sobra. Nahibaluan nila nga ginahigugma sila sang Dios kag tatapon niya sila. (Mat. 6:22-34) Halimbawa, binagbinaga kon paano ginsakdag ni Jehova si Jeremias sang ginlaglag ang Jerusalem sang 607 B.C.E.

18. Paano ginpamatud-an ni Jehova ang iya gugma kay Jeremias sang nalikupan na ang Jerusalem?

18 Sa tion nga nalikupan sang Babilonianhon ang Jerusalem, nabilanggo si Jeremias sa Luwang sang Bantay. Paano sia nakatigayon sing pagkaon? Kon hilway sia, makapangita sia kuntani sini. Apang, nagadepende lamang sia sa mga tawo sa iya palibot nga ang kalabanan naugot sa iya! Bisan pa sa sini, wala nagsalig si Jeremias sa tawo kundi sa Dios nga nagsaad sa iya nga tatapon sia. Gintuman bala ni Jehova ang iya saad? Huo! Ginpat-od niya nga makatigayon si Jeremias sing “isa ka bilog nga tinapay . . . tubtub nga ang tanan nga tinapay sang banwa naorot.” (Jer. 37:21) Sanday Jeremias, Baruc, Ebed-melec, kag iban pa, nakaluwas sa gutom, balatian kag kamatayon.​—Jer. 38:2; 39:15-18.

19. Ano dapat ang aton determinasyon samtang ginaatubang naton ang palaabuton?

19 Huo, “ang mga mata ni Jehova nagatulok sa mga matarong, kag ang iya mga dulunggan nagapamati sa ila pag-ampo.” (1 Ped. 3:12) Nalipay ka bala kay ginabantayan ka sang imo langitnon nga Amay? Nagabatyag ka bala nga luwas sa peligro kag may kalig-unan kay nahibaluan mo nga ginabantayan ka niya para sa imo kaayuhan? Gani, mangin determinado nga magpadayon sa paglakat upod sa Dios ano man ang matabo sa aton. Mapat-od naton nga pirme bantayan ni Jehova ang mga mainunungon sa iya.​—Sal. 32:8; basaha ang Isaias 41:13.

[Mga footnote]

^ par. 12 Bisan pa ang mga sulat para gid sa hinaplas nga mga sumulunod ni Cristo, naaplikar gihapon ini sa tanan nga alagad sang Dios.

^ par. 16 Ang isa pa ka halimbawa sang panuytoy sang Dios, masapwan sa Binuhatan 16:6-10. Mabasa naton diri nga si Pablo kag ang iya mga kaupod ‘gindumilian sang balaan nga espiritu’ sa pagbantala sa Asia kag Bitinia. Sa baylo, ginpakadto sila sa Macedonia, sa diin madamo nga tawo ang nagbaton sang ila mensahe.

Mapaathag Mo Bala?

• Paano naton mapakita nga ‘nagalakat kita upod sa Dios’?

• Paano ginpakita ni Jehova ang iya gugma kay Baruc?

• Subong Ulo sang Cristianong kongregasyon, paano ginpadayag ni Jesus ang mga kinaiya sang iya Amay?

• Paano naton mapakita nga nagasalig kita sa Dios sa sining makahalanguyos nga mga tion?

[Mga Pamangkot sa Pagtinuon]

[Mga piktyur sa pahina 9]

Kaangay sang ginpakita ni Jeremias kay Baruc, ginapakita man sang mga gulang ang pag-ulikid ni Jehova

[Piktyur sa pahina 10]

Paano si Jehova mahimo mag-aman sing bulig sa husto nga tion?