Ano ang Imo Ihatag Agod Mabuhi sing Dayon?

“Ano ang ihatag sang isa ka tawo bilang kabaylo sang iya kalag?”​—MAT. 16:26.

1. Ngaa ginsikway ni Jesus ang ginhambal ni Pedro?

DAW indi makapati si apostol Pedro sa iya nabatian. Ang iya pinalangga nga Lider, si Jesucristo, nagsiling “sing maathag gid” nga sa indi madugay magaantos Sia kag mapatay! Bangod ginahunahuna gid ni Pedro ang kaayuhan ni Jesus, ginhambalan niya sia: “Maluoy ka sa imo kaugalingon, Ginuo; indi gid ini matabo sa imo.” Gintalikdan ni Jesus si Pedro kag nagtulok sa iban nga disipulo. Mahimo nga pareho man sini ang ila pagtamod. Nian ginsilingan niya si Pedro: “Palayo sa akon, Satanas! Kasandaran ka sa akon, bangod nagahunahuna ka, indi sang panghunahuna sang Dios, kundi sang iya sang mga tawo.”​—Mar. 8:32, 33; Mat. 16:21-23.

2. Paano ginpaathag ni Jesus kon ano ang ginapaabot sa matuod nga mga disipulo?

2 Ang masunod nga ginhambal ni Jesus mahimo nakabulig kay Pedro nga mahangpan ang rason kon ngaa namatok si Jesus sa iya ginhambal. ‘Gintawag ni Jesus ang kadam-an upod sa iya mga disipulo’ kag nagsiling: “Kon ang bisan sin-o luyag magsunod sa akon, ipanghiwala niya ang iya kaugalingon kag pas-anon ang iya usok sang pag-antos kag padayon nga magsunod sa akon. Kay ang bisan sin-o nga luyag magluwas sang iya kalag madulaan sini; apang ang bisan sin-o nga madulaan sang iya kalag tungod sa akon kag sa maayong balita magaluwas sini.” (Mar. 8:34, 35) Gingamit diri ni Jesus ang tinaga nga “kalag” sa pagpatuhoy sa “kabuhi.” Maathag nga wala lamang niya ginapatuhuyan ang iya nagahilapit nga paghalad sang iya kabuhi kundi ginpaabot man niya nga ang mga luyag magsunod sa iya mangin handa sa pagsakripisyo sang ila kabuhi sa pag-alagad sa Dios. Kon himuon nila ini, mabaton nila ang bugana nga padya.​—Basaha ang Mateo 16:27.

3. (a) Ano ang ginpamangkot ni Jesus sa mga nagapamati sa iya? (b) Ano ang mahimo madumduman sang mga tagpalamati ni Jesus sa iya ikaduha nga pamangkot?

3 Sadto nga tion, nagpautwas man si Jesus sing duha ka makapahunahuna nga pamangkot: “Ano gid ang mabenepisyo sang isa ka tawo kon  maangkon niya ang bug-os nga kalibutan kag madula ang iya kalag?” kag, “Ano gid ang ihatag sang isa ka tawo bilang kabaylo sang iya kalag?” (Mar. 8:36, 37) Ang una nga pamangkot mahapos lang sabton sang mga tawo. Wala gid sing pulos nga maangkon sang tawo ang bug-os nga kalibutan kon madula niya ang iya kabuhi, ukon kalag. Ang mga pagkabutang mapuslanon lamang kon buhi ang tawo nga nagapanag-iya sini. Ang ikaduha nga pamangkot ni Jesus nga, “Ano gid ang ihatag sang isa ka tawo bilang kabaylo sang iya kalag?” mahimo nga magpahanumdom sa iya mga tagpalamati sa panumbungon ni Satanas sang adlaw ni Job: “Ang tanan nga iya sang tawo ihatag niya tungud sa iya kabuhi.” (Job 2:4) Para sa mga wala nagaalagad kay Jehova, mahimo matuod ang ginsiling ni Satanas. Madamo ang handa sa paghimo sang tanan, bisan maghimo pa sing malain agod lamang mabuhi. Apang tuhay ang pagtamod sang mga Cristiano.

4. Ngaa may mas madalom nga kahulugan sa mga Cristiano ang mga pamangkot ni Jesus?

4 Nahibaluan naton nga wala magkari si Jesus sa duta agod hatagan kita sing maayong panglawas, manggad, kag malawig nga kabuhi sa sini nga kalibutan. Nagkari sia agod matigayon naton ang kahigayunan nga mabuhi sing dayon sa bag-ong kalibutan, kag ini ang sahi sang kabuhi nga ginapabaloran gid naton. (Juan 3:16) Mahangpan sang isa ka Cristiano nga ang buot silingon sang una nga pamangkot ni Jesus amo, “Ano gid ang mabenepisyo sang isa ka tawo kon maangkon niya ang bug-os nga kalibutan kon indi man lang niya matigayon ang kabuhi nga dayon?” Ang sabat, Wala gid sing pulos! (1 Juan 2:15-17) Agod masabat naton ang ikaduha nga pamangkot ni Jesus, maayo nga pamangkuton naton ang aton kaugalingon, ‘Daw ano ka daku ang akon handa nga isakripisyo karon agod mapat-od ang akon paglaum nga mabuhi sa bag-ong kalibutan?’ Ang aton sabat sa sini nga pamangkot, nga makita sa aton pagkabuhi, magapadayag kon daw ano kabakod ina nga paglaum sa aton tagipusuon.​—Ipaanggid ang Juan 12:25.

5. Paano naton matigayon ang regalo nga kabuhi nga dayon?

5 Siempre pa, wala ginpahangop ni Jesus nga ang kabuhi nga dayon bayad sa aton pinangabudlayan. Ang kabuhi, bisan ang aton kabuhi subong sa sining sistema sang mga butang, isa ka regalo. Indi naton ini mabakal, ukon matigayon paagi sa pagpangabudlay. Ang lamang nga paagi agod matigayon naton ang regalo nga kabuhi nga dayon amo ang “pagtuo kay Cristo Jesus” kag kay Jehova, ang ‘manugpadya sa mga nagapangita sa iya sing hanuot.’ (Gal. 2:16; Heb. 11:6) Bisan pa sa sini, dapat mapamatud-an ang aton pagtuo paagi sa mga buhat, kay “ang pagtuo nga wala sing mga buhat patay.” (Sant. 2:26) Gani, kon pamalandungan pa gid naton ang pamangkot ni Jesus, mas maayo nga binagbinagon naton sing serioso kon daw ano kadaku ang handa naton isakripisyo sa sining sistema sang mga butang kag kon ano ang handa naton himuon para sa pag-alagad kay Jehova agod ipakita nga buhi ang aton pagtuo.

“Ang Cristo Wala Magpahamuot sa Iya Kaugalingon”

6. Ano ang gin-una ni Jesus?

6 Wala gintuon ni Jesus ang iya igtalupangod kon ano ang matanyag sang kalibutan sa iya, kundi  sa mas importante nga mga butang. Ginsikway man niya ang pagsulay nga magtigayon sing materyal nga mga butang. Nagsakripisyo sia kag nagtuman sa Dios. Sa baylo nga pahamut-an ang iya kaugalingon, sia nagsiling: “Pirme ko ginahimo ang mga butang nga kalahamut-an sa [Dios].” (Juan 8:29) Daw ano ka daku ang ginsakripisyo ni Jesus agod mapahamut-an ang Dios?

7, 8. (a) Ano ang ginsakripisyo ni Jesus, kag ano ang iya padya? (b) Ano ang dapat naton ipamangkot sa aton kaugalingon?

7 Sa isa ka higayon, ginsilingan ni Jesus ang iya mga disipulo: “Ang Anak sang tawo nagkari, indi agod alagdon, kundi agod mag-alagad kag ihatag ang iya kalag subong gawad nga kabaylo sang madamo.” (Mat. 20:28) Antes pa sini, ginsilingan ni Jesus ang iya mga sumulunod nga sa indi madugay ‘ihatag niya ang iya kalag,’ amo nga ginpalig-on sia ni Pedro nga mangin mainayuhon sa iya kaugalingon. Apang wala magpadala si Jesus. Kinabubut-on niya nga ginhatag ang iya kalag, ang iya himpit nga kabuhi para sa katawhan. Bangod nangin di-makagod sia, natigayon ni Jesus ang iya padya. Ginbanhaw kag “ginbayaw sia sa tuo sang Dios.” (Binu. 2:32, 33) Busa nangin maayo gid sia nga halimbawa sa aton.

8 Ginlaygayan ni apostol Pablo ang mga Cristiano sa Roma nga “indi magpahamuot” sa ila kaugalingon kag ginpahanumduman sila nga “bisan ang Cristo wala magpahamuot sa iya kaugalingon.” (Roma 15:1-3) Gani, daw ano kasangkad nga maaplikar naton ang laygay sang apostol kag daw ano ka daku ang aton handa nga isakripisyo agod mailog si Cristo?

Luyag ni Jehova nga Ihatag Naton ang Aton Pinakamaayo

9. Sa pagkamatuod, ano ang ginhimo sang isa ka Cristiano sang gindedikar niya ang iya kaugalingon sa Dios?

9 Sa Israel sang una, ginapatuman sang Mosaikong Kasuguan nga hilwayon ang Hebreo nga mga ulipon sa iya ikapito ka tuig nga pagpangalagad ukon sa tuig sang Jubileo. Apang, kon ginahigugma gid sang ulipon ang iya agalon, mahimo man sia magpabilin sa iya agalon sa bug-os niya nga kabuhi. (Basaha ang Deuteronomio 15:12, 16, 17.) Amo man sini ang aton desisyon sang gindedikar naton ang aton kaugalingon sa Dios. Kinabubut-on kita nga nagsugot nga tumanon ang Dios, indi ang aton mga huyog. Bangod sini, ginapakita naton ang aton tudok nga gugma kay Jehova kag ang aton handum nga alagdon sia sing dayon.

10. Sa anong paagi nga ginapanag-iyahan kita sang Dios, kag paano ini nagaapektar sa aton mga hunahuna kag mga buhat?

10 Kon nagatuon ka subong sing Biblia upod sa mga Saksi ni Jehova, nagabantala sing maayong balita, kag nagatambong sa Cristianong mga miting, takus ka gid dayawon. Nagalaum kami nga sa indi madugay idedikar mo ang imo kaugalingon kay Jehova kag mamangkot man subong sang ginpamangkot sang Etiopianhon kay Felipe: “Ano ang nagapugong sa akon sa pagpabawtismo?” (Binu. 8:35, 36) Ang imo kaangtanan sa Dios mangin kaangay sang mga Cristiano nga ginsulatan ni Pablo: “Indi na kamo natungod sa inyo kaugalingon, kay ginbakal kamo sa daku nga bili.” (1 Cor. 6:19, 20) Langitnon man ang aton paglaum ukon dutan-on, kon gindedikar na naton ang aton kaugalingon kay Jehova, sia na ang nagapanag-iya sa aton. Gani, importante gid nga punggan naton ang aton makagod nga mga handum kag ‘indi na magpaulipon sa mga tawo’! (1 Cor. 7:23) Daku gid nga pribilehiyo nga mangin matutom nga alagad ni Jehova kag magpagamit suno sa iya nahamut-an!

11. Ano ang ginpalig-on nga ihalad sang mga Cristiano, kag ano gid ang buot silingon sini subong sang gin-ilustrar sang mga halad sa Mosaikong Kasuguan?

11 Ginlaygayan ni Pablo ang iya masigkatumuluo: “Ipresentar ninyo ang inyo lawas nga isa ka halad nga buhi, balaan, kalahamut-an sa Dios, isa ka sagrado nga pag-alagad lakip ang inyo ikasarang sa pagpangatarungan.” (Roma 12:1) Ini nga laygay mahimo nga nagpahanumdom sa Judiyo nga mga Cristiano sa mga halad nga bahin sang ila pagsimba antes sila nangin sumulunod ni Jesus. Nakahibalo sila nga sa Mosaikong Kasuguan, ang mga sapat nga ihalad kay Jehova dapat nga pinakamaayo. Ang may diperensia wala ginabaton. (Mal. 1:8, 13) Amo man sini kon ginahalad naton ang aton lawas subong “halad nga buhi.” Ginahatag naton kay Jehova ang aton pinakamaayo, indi ang salin pagkatapos naton napaayawan ang aton personal nga mga handum. Sang gindedikar naton ang aton kaugalingon sa Dios, bug-os nga ginhatag naton ang aton “kalag,” ang aton kabuhi, lakip na ang aton kusog, mga pagkabutang, kag mga abilidad. (Col. 3:23) Paano naton ini maaplikar sa aton kabuhi?

 Gamita sing Maalamon ang Imo Tion

12, 13. Ano ang isa ka paagi nga mahatag naton ang aton pinakamaayo kay Jehova?

12 Ang isa ka paagi nga mahatag naton kay Jehova ang aton pinakamaayo amo ang maalamon nga paggamit sang aton tion. (Basaha ang Efeso 5:15, 16.) Nagakinahanglan ini sing pagpugong sa kaugalingon. Ang impluwensia sang kalibutan kag ang aton napanubli nga pagkadihimpit nagabuyok sa aton nga gamiton lang ang aton tion para sa paglingawlingaw ukon para sa personal nga bentaha. Matuod, ang “tagsa ka butang may panag-on,” lakip na ang paglingawlingaw kag pagtrabaho nga makabulig sa aton sa pagtuman sang aton Cristianong mga obligasyon. (Man. 3:1) Apang, ang isa ka dedikado nga Cristiano dapat mangin balanse kag maalamon sa paggamit sang iya tion.

13 Sang nagduaw si Pablo sa Atenas, natalupangdan niya nga “ang tanan nga taga-Atenas kag ang mga dumuluong nga nagapuyo didto wala sing ginahimo sa ila bakante nga tion kundi nagasugid ukon nagapamati sa bag-o nga butang.” (Binu. 17:21) Sa karon, madamo man ang nagauyang sang ila tion. Ang moderno nga mga tublag nagalakip sang pagtan-aw sing TV, paghampang sa kompyuter, kag pag-Internet. Nagadamo pa gid ang mga butang nga nagatublag kag nagauyang sang aton tion. Kon magpadala kita sa sini, mahimo mapatumbayaan naton ang aton espirituwal nga mga kinahanglanon. Mahimo pa gani kita maghunahuna nga wala na kita sing tion sa paghimo sang “mas importante nga mga butang,” nga may kaangtanan sa pag-alagad kay Jehova.​—Fil. 1:9, 10.

14. Ano nga mga pamangkot ang kinahanglan gid naton binagbinagon?

14 Busa, subong dedikado nga alagad ni Jehova, pamangkuta ang imo kaugalingon, ‘Ang akon bala iskedyul kada adlaw nagalakip sang pagbasa sing Biblia, pagpamalandong, kag pagpangamuyo?’ (Sal. 77:12; 119:97; 1 Tes. 5:17) ‘Nagaiskedyul bala ako sing tion sa paghanda para sa Cristianong mga miting? Ginapalig-on ko bala ang iban paagi sa pagkomento sa tion sang mga miting?’ (Sal. 122:1; Heb. 2:12) Nagsiling ang Pulong sang Dios nga si Pablo kag si Bernabe naghinguyang “sing malawig nga tion sa paghambal nga may kaisog paagi sa awtoridad ni Jehova.” (Binu. 14:3) Mapasibu mo bala ang imo mga kahimtangan agod makahinguyang ‘sing mas malawig nga tion,’ sa pagbantala, ayhan sa pagpayunir?​—Basaha ang Hebreo 13:15.

15. Paano ginagamit sang mga gulang ang ila tion sing maalamon?

15 Sang nagduaw si apostol Pablo kag si Bernabe sa kongregasyon sa Antioquia, “naghinguyang sila sing malawig nga tion upod sa mga disipulo,” agod palig-unon sila. (Binu. 14:28) Sa karon, ginagamit man sang mahigugmaon nga mga gulang ang ila daku nga tion sa pagpalig-on sa iban. Luwas sa ila pagbantala, nagapangabudlay man ang mga gulang sa pagtatap sa panong, pagpangita sang nadula nga karnero, pagbulig sa may balatian, kag pagtatap sa madamo pa nga mga hilikuton sa kongregasyon. Kon bawtismado ka nga utod nga lalaki, ginatugot bala sang imo mga kahimtangan nga lab-uton ang dugang pa nga mga pribilehiyo sa pag-alagad?

16. Ano ang pila ka paagi nga ‘makahimo kita sing maayo sa mga may labot sa aton sa pagtuo’?

16 Madamo ang nangin malipayon sa pagbulig sa mga biktima sang mga kalamidad. Halimbawa, ang isa ka Bethelite nga babayi nga nagaedad sing mga 65, makapila nga naglakbay sing malayo agod magbulig sa mga biktima sang kalamidad. Ngaa gingamit niya ang iya bakasyon sa pagbulig sa mga  biktima? Nagsiling sia: “Bisan wala ako sing pinasahi nga mga ikasarang, isa gid ka pribilehiyo nga makabulig. Napalig-on gid ako nga makita ang mabakod nga pagtuo sang mga kauturan nga nadulaan sang mga pagkabutang.” Dugang pa, sa bug-os nga kalibutan, linibo ang nagabulig sa pagpatindog sing mga Kingdom Hall kag mga Assembly Hall. Paagi sa pagpakigbahin sa sini nga mga hilikuton, kinabubut-on kita nga ‘nagahimo kon ano ang maayo sa mga may labot sa aton sa pagtuo.’​—Gal. 6:10.

“Ako Kaupod Ninyo sa Tanan nga Adlaw”

17. Ano ang imo handa nga ihatag agod matigayon ang kabuhi nga dayon?

17 Malapit na lang ang kalaglagan sang katilingban sang tawo nga napahilayo sa Dios. Wala kita makahibalo kon san-o gid ini matabo. Apang, nahibaluan naton nga “malip-ot na lang ang nabilin nga tion” kag “ang danyag sini nga kalibutan nagabag-o.” (Basaha ang 1 Corinto 7:29-31.) Ini nga ihibalo nagahatag pa gid sing rason kon ngaa importante ang pamangkot ni Jesus nga, “Ano gid ang ihatag sang isa ka tawo bilang kabaylo sang iya kalag?” Pat-od gid nga himuon naton ang bisan ano nga mga sakripisyo nga ginapangabay ni Jehova agod matigayon ang “matuod nga kabuhi.” (1 Tim. 6:19) Gani kinahanglan gid nga tumanon naton ang laygay ni Jesus nga ‘padayon nga magsunod sa iya’ kag ‘pangitaon anay ang ginharian.’​—Mat. 6:31-33; 24:13.

18. Ano ang aton masaligan, kag ngaa?

18 Ang matuod indi pirme mahapos ang pagsunod kay Jesus, kag suno sa paandam niya, may pila sa iya mga sumulunod ang mapatay sa sining sistema sang mga butang. Bisan pa sa sini, kaangay ni Jesus, indi kita magpasulay nga mangin ‘mainayuhon sa aton kaugalingon.’ Nagatuo kita sa pasalig nga ginhatag niya sa iya hinaplas nga mga sumulunod sang unang siglo: “Ako kaupod ninyo sa tanan nga adlaw tubtob sa katapusan sang sistema sang mga butang.” (Mat. 28:20) Kabay pa nga gamiton naton sing bug-os ang aton tion kag ikasarang sa sagrado nga pag-alagad. Kon himuon naton ini, ginapakita naton nga nagasalig kita nga amligan kita ni Jehova sa daku nga kapipit-an ukon banhawon sa bag-ong kalibutan. (Heb. 6:10) Paagi sa sini, mapakita naton nga ginapabaloran gid naton ang regalo nga kabuhi.

Ano ang Imo mga Sabat?

• Paano ginpakita ni Jesus nga handa gid sia sa pag-alagad sa Dios kag sa tawo?

• Ngaa kinahanglan isikway sang isa ang iya kaugalingon, kag paano niya ini himuon?

• Sa dumaan nga Israel, ano lamang nga sahi sang halad ang ginabaton ni Jehova, kag ano ang ginatudlo sini sa aton karon?

• Sa ano nga mga paagi magamit naton sing maalamon ang aton tion?

[Mga Pamangkot sa Pagtinuon]

[Mga piktyur sa pahina 26]

Ginahimo pirme ni Jesus ang mga butang nga makapahamuot sa Dios

[Piktyur sa pahina 28]

Ang mainapresyahon nga mga Israelinhon naghatag sang ila pinakamaayo sa pagsakdag sa matuod nga pagsimba

[Mga piktyur sa pahina 29]

Ginapahamut-an naton ang Dios paagi sa maalamon nga paggamit sang aton tion