Ang Pulong ni Jehova Buhi

Talalupangdon nga mga Punto Gikan sa Tulun-an sang Roma

SA IKATLO nga paglakbay ni apostol Pablo subong misyonero sang mga 56 C.E., nag-abot sia sa siudad sang Corinto. Nahibaluan niya didto nga magkatuhay ang pagtamod sang mga Judiyo kag mga Gentil nga mga Cristiano sa Roma. Bangod luyag ni Pablo nga mahiusa sila tanan sing bug-os kay Cristo, nagsulat sia sa ila.

Ginpaathag ni Pablo sa iya sulat sa mga taga-Roma, kon paano magkabuhi ang isa agod mapahayag nga matarong. Ang iya sulat nagabulig sa aton nga madugangan ang aton ihibalo tuhoy sa Dios kag sa iya Pulong, nagapadaku ini sa wala tupong nga kaayo sang Dios, kag nagapadungog sa papel ni Cristo sa aton kaluwasan.​—Heb. 4:12.

GINPAHAYAG NGA MATARONG​—PAANO?

(Roma 1:1–11:36)

“Ang tanan nakasala kag wala makalab-ot sa himaya sang Dios,” sulat ni Pablo. ‘Wala ini sing bayad nga dulot nga ginpahayag sila nga matarong sang wala tupong nga kaayo sang Dios paagi sa paghilway paagi sa gawad nga ginbayad ni Cristo Jesus.’ Nagsiling man sia: “Ang tawo ginapahayag nga matarong paagi sa pagtuo kag indi sa mga buhat sang kasuguan.” (Roma 3:23, 24, 28) Paagi sa pagtuo sa “isa ka buhat sang pagpakamatarong,” mahimo ‘ipahayag nga matarong’ ang hinaplas agod magkabuhi sa langit subong kaupod nga manunubli ni Cristo. Ang mga miembro sang “dakung kadam-an” sang “iban nga mga karnero,” mahimo man ‘ipahayag nga matarong’ subong mga abyan sang Dios, nga may paglaum nga maluwas sa “dakung kapipit-an.”​—Roma 5:18; Bug. 7:9, 14; Juan 10:16; Sant. 2:21-24; Mat. 25:46.

“Magahimo bala kita sang sala bangod wala kita sa idalom sang kasuguan kundi sa idalom sang wala tupong nga kaayo?” pamangkot ni Pablo. “Indi gid ina matabo!” sabat niya. “Mga ulipon kamo . . . , sang sala man nga nagadul-ong sa kamatayon ukon sang pagkamatinumanon nga nagadul-ong sa pagkamatarong,” paathag niya. (Roma 6:15, 16) “Kon ginapatay ninyo ang mga buhat sang lawas paagi sa espiritu, magakabuhi kamo,” siling ni Pablo.​—Roma 8:13.

Sabat sa mga Pamangkot sa Kasulatan:

1:24-32—Ang imoral nga buhat bala nga ginalaragway diri nagapatuhoy sa mga Judiyo ukon sa mga Gentil? Bisan pa mahimo ini mapatuhoy sa mga Judiyo ukon sa mga Gentil, ang ginapatuhuyan gid ni Pablo amo ang mga apostata nga mga Israelinhon sang una. Kay bisan nahibaluan nila ang matarong nga kasuguan sang Dios, “indi nila luyag nga makilala sing sibu ang Dios.” Gani, nangin malaut gid sila.

3:24, 25—Paano natubos sang “gawad nga ginbayad ni Cristo Jesus” ang “mga sala nga nahimo sang nagligad” antes pa ini ginbayad? Natuman ang una nga tagna tuhoy sa Mesias nga narekord sa Genesis 3:15, sang ginpatay si Jesus sa usok sang pag-antos sang 33 C.E. (Gal. 3:13, 16) Sang ginpahayag ni Jehova ini nga tagna, para sa iya, daw subong lang nga nabayaran na ang bili sang gawad bangod pat-od gid nga matuman ang iya mga katuyuan. Gani, pasad sa palaabuton nga halad ni Jesucristo, mahimo na ni Jehova mapatawad ang mga sala sang kaliwatan ni Adan nga nagpakita sing pagtuo sa sina nga saad. Bangod sa gawad, nangin posible man nga mabanhaw ang mga nagkalamatay antes sang panahon sang mga Cristiano.​—Binu. 24:15.

6:3-5—Ano ang buot silingon sang ginbawtismuhan kay Cristo Jesus kag ginbawtismuhan sa iya kamatayon? Sang gintangdo ni Jehova ang mga sumulunod ni Cristo paagi sa balaan nga espiritu, nahiusa na sila kay Jesus. Nangin miembro sila sang lawas ni Cristo nga amo ang kongregasyon sang hinaplas nga mga Cristiano nga si Cristo amo ang Ulo. (1 Cor. 12:12, 13, 27; Col. 1:18) Amo ini ang buot silingon sang ginbawtismuhan sila kay Cristo Jesus. Ang mga hinaplas nga mga Cristiano “ginbawtismuhan [man] sa kamatayon [ni Cristo],” bangod ginhalad man nila ang ila kabuhi kag ginsikway ang paglaum nga mabuhi sing walay  katapusan diri sa duta. Bisan pa nga nagsakripisyo sila, ang ila kamatayon indi makagawad sang sala kaangay ni Jesus. Mangin bug-os ang pagbawtismo sa ila sa kamatayon ni Cristo kon mapatay na sila kag mabanhaw agod magkabuhi sa langit.

7:8-11—Paano “nakakita sang kahigayunan ang sala” paagi sa kasuguan? Bangod sa Kasuguan narealisar sang mga tawo kon daw ano sila ka makasasala. Gani makita nila nga nakasala sila sa nanuhaytuhay nga paagi kag mas madamo ang napamatud-an nga mga makasasala. Busa, makasiling kita nga ang sala nakakita sing kahigayunan paagi sa Kasuguan.

Mga Leksion Para sa Aton:

1:14, 15. Madamo sang rason kon ngaa dapat kita magmakugi sa pagbantala sing maayong balita. Ang isa amo nga may utang kita kag obligasyon nga buligan ang mga tawo nga makatigayon sing maayo nga kaangtanan sa Dios bangod ginbakal sila sang dugo ni Jesus.

1:18-20. ‘Wala sing ibalibad’ ang mga tawo nga di-diosnon kag di-matarong bangod ang di-kitaon nga kinaiya sang Dios maathag nga makita sa iya tinuga.

2:28; 3:1, 2; 7:6, 7. Kon ang ginpahayag ni Pablo daw nakasaklaw sa mga Judiyo, ginapasundan niya ini dayon sing makapahaganhagan nga mga pulong. Isa ini ka maayo nga halimbawa kon paano naton ipresentar ang sensitibo nga mga topiko sing mataktikanhon kag malantipon.

3:4. Kon magsumpakilay ang ginasiling sang tawo kag ang ginasiling sang Dios sa iya Pulong, “masapwan [naton] nga maminatud-on ang Dios” kon magsalig kita sa mensahe sang Biblia kag magkabuhi suno sa kabubut-on sang Dios. Mabuligan man naton ang iban nga makita ang pagkamaminatud-on sang Dios kon mangin makugi kita sa pagbantala tuhoy sa Ginharian kag paghimo-disipulo nga hilikuton.

4:9-12. Ginpahayag na si Abraham nga matarong bangod sa iya pagtuo antes pa sia gintuli sa edad nga 99. (Gen. 12:4; 15:6; 16:3; 17:1, 9, 10) Paagi sa sini, maathag nga ginpakita sang Dios kon paano ang isa mangin matarong sa atubangan niya.

4:18. Ang paglaum importante nga bahin sang pagtuo, bangod ang aton pagtuo napasad sa paglaum.​—Heb. 11:1.

5:18, 19. Ginpakita ni Pablo sa malip-ot kag lohiko nga paagi kon paano si Jesus nangin kaangay ni Adan, paagi sa pagpaathag kon paano “ihatag [sang isa ka tawo] ang iya kalag subong gawad nga kabaylo sang madamo.” (Mat. 20:28) Sundon naton ining halimbawa sang malip-ot kag lohiko nga pagtudlo.​—1 Cor. 4:17.

7:23. Ang mga bahin sang aton lawas subong sang aton mga kamot, mga tiil, kag aton dila mahimo ‘magdala sa aton nga bihag sa kasuguan sang sala.’ Gani, dapat naton bantayan ang sayop nga paggamit sini.

8:26, 27. Kon yara kita sa makalilibog nga sitwasyon kag wala kita makahibalo kon ano ang aton ipangamuyo, “ang espiritu mismo nagapangabay para sa aton.” Kon mangamuyo kita kaangay sa mga pangamuyo nga narekord sa Biblia, subong “nagapamati sang pangamuyo,” tamdon ini ni Jehova, nga naghalin sa aton.​—Sal. 65:2.

8:38, 39. Ang mga kalamidad, malaut nga mga espiritu nga tinuga, kag tawhanon nga panguluhan, indi makapahamulag sang gugma sang Dios sa aton, kag sang aton gugma sa iya.

9:22-28; 11:1, 5, 17-26. Madamo nga tagna tuhoy sa pagpasag-uli sang Israel ang natuman sa kongregasyon sang hinaplas nga mga Cristiano, nga ang mga miembro sini ‘gintawag indi lamang gikan sa mga Judiyo kundi gikan man sa mga pungsod.’

10:10, 13, 14. Ang aton gugma sa Dios kag sa aton isigkatawo, subong man ang aton malig-on nga pagtuo kay Jehova kag sa iya mga saad, magapahulag sa aton nga magmakugi sa Cristianong pagministeryo.

11:16-24, 33. Nabalanse gid sing maayo ang “kaayo kag katigdas sang Dios”! Huo, “ang Igang, ang iya binuhatan himpit; kay ang tanan niyang dalanon katarungan.”​—Deut. 32:4.

MAGKABUHI SUNO SA GINPAHAYAG NGA MATARONG

(Roma 12:1–16:27)

“Busa mga kauturan, ginahingyo ko sa inyo tungod sa kaawa sang Dios,” siling ni Pablo, “nga ipresentar ninyo ang inyo lawas nga isa ka halad nga buhi, balaan, kalahamut-an sa Dios.” (Roma 12:1) “Busa,” ukon tungod ang mga Cristiano ginpahayag nga matarong bangod sa ila pagtuo, ang  masunod nga mga pulong ni Pablo dapat magpabag-o sang ila pagtamod sa ila kaugalingon, sa iban, kag sa mga may awtoridad sa gobierno.

“Ginasilingan ko ang tagsatagsa sa inyo dira nga indi maghunahuna sing labaw tuhoy sa iya kaugalingon sangsa dapat niya hunahunaon” sulat ni Pablo. “Ang inyo gugma mangin indi salimpapaw,” laygay niya. (Roma 12:3, 9) “Ang tagsa ka kalag magpasakop sa superyor nga mga awtoridad.” (Roma 13:1) Tuhoy sa mga butang may kaangtanan sa konsiensia, ginpalig-on niya ang mga Cristiano nga ‘indi maghukom sa isa kag isa.’​—Roma 14:13.

Sabat sa mga Pamangkot sa Kasulatan:

12:20—Paano naton ‘matumpi ang masingkal nga mga baga’ sa ulo sang kaaway? Sa panahon sang Biblia, ang wala pa maulay nga metal (ore) ginabutang sa hurno kag ginabutangan ini sing mga uling sa ibabaw kag sa idalom. Ang ginpasingkal nga mga baga sa ibabaw sang hurno amo ang nagatunaw sa matig-a nga metal, kag nagapain ang higko. Sing kaanggid, ginabutangan naton sing mga baga ang ulo sang aton kaaway paagi sa paghimo sing maayo nga mga buhat sa iya, agod matunaw ang iya katig-a kag mapagua ang iya mas maayo nga mga kinaiya.

12:21—Paano naton ‘padayon nga madaug ang malaut paagi sa maayo’? Ang isa ka paagi amo ang pagtuman sa ginhatag sang Dios nga buluhaton nga pagbantala sang maayong balita sing maisugon, tubtob matapos ini suno sa kabubut-on ni Jehova.​—Mar. 13:10.

13:1—Sa ano nga paagi nga ang superyor nga mga awtoridad “ginbutang sang Dios sa ila relatibo nga mga posisyon”? Ang sekular nga mga awtoridad “ginbutang sang Dios sa ila relatibo nga mga posisyon” bangod ginpahanugutan niya sila nga maggahom, kag sa pila ka kahimtangan nahibaluan ni Jehova sing abanse ang ila paggahom. Ginpamatud-an ini sang mga tagna sa Biblia tuhoy sa pila ka mga manuggahom.

Mga Leksion Para sa Aton:

12:17, 19. Kon nagabalos kita sa malaut, ginabutang naton sa aton mga kamot ang mga butang nga dapat itugyan kay Jehova. Gani, kon “magbalos [kita] sang malaut sa malaut,” mangin matinaastaason kita!

14:14, 15. Indi dapat naton pagtanyagan ang aton utod sing pagkaon ukon ilimnon nga makasaklaw ukon makapasandad sa iya.

14:17. Ang maayo nga kaangtanan sa Dios wala lamang napasad sa kon ano ang ginakaon ukon ginainom sang isa kag kon ano nga pagkaon ukon ilimnon ang ginalikawan niya. Kundi, naangot ini sa pagkamakatarunganon, paghidait, kag kalipay.

15:7. Dapat naton abiabihon sing walay pinilian ang tanan nga mga sinsero nga nagapangita sing kamatuoran sa kongregasyon kag ipaambit ang mensahe tuhoy sa Ginharian sa tanan nga tawo nga aton masugata.

[Mga piktyur sa pahina 31]

Matubos bala sang gawad ang mga sala nga nahimo antes pa ginbayad ini?