Pagkamaluluy-on sa Isa ka Mapintas nga Kalibutan

ANG isa ka tawo sa Burundi nagamasakit sing malubha nga malaria. Kinahanglan madala sia gilayon sa ospital. Apang, wala sing salakyan nga magamit. Ginbuligan sia sang duha niya ka suod nga abyan nga lalaki. Ginpasakay nila sia sa bisikleta kag lima ka oras nga gintulod sa alagyan nga taklaron kag batuhon. Dayon ginpasakay nila sia sa bus kag gindala sa pinakamalapit nga ospital. Pagligad sang pila ka adlaw, naumpawan sia.

Sa pihak naman nga bahin sang kalibutan, sa tapos magwaswas ang Bagyo Katrina sa bahin sang Gulpo nga sakop sang Estados Unidos sang Agosto 2005, ang grupo sang mga boluntaryo may nakita nga isa ka balay nga natumbahan sang mga kahoy. Indi kilala sining mga boluntaryo ang tag-iya sang balay, pero bug-os nga adlaw nga ginpanglagari kag ginpanguha nila ang natumba nga mga kahoy. ‘Daku gid ang pasalamat ko sa sini nga mga [tawo],’ siling sang tag-iya.

Ang kapintas kag kasingki masami nga daw ginapadaku gid sang media. Amo nga daw natabunan na ang mga balita tuhoy sa ginapakita nga mga buhat sang kaluoy ukon kaawa adlaw-adlaw. Apang, indi buot silingon nga ang mga tawo wala nagakinahanglan sang gugma, pagpalangga, kag kahanuklog. Kinahanglan gid naton ang kaluoy! Ini nga handum mas kinaandan sa panahon sang Paskua kay madamo ang nagahambal kag nagaamba tuhoy sa ‘paghidait kag maayong kabubut-on sa mga tawo.’—Lucas 2:14, King James Version.

 Indi mahapos magpakita sing pagkamaluluy-on sa sining di-mainabyanon kag di-maabiabihon nga kalibutan. Ang lapnag nga panimuot karon amo nga kon luyag mo magmadinalag-on, dapat matig-a ka sing balatyagon kag indi maluluy-on. Madamo ang nagapati sa kredo nga ang pagkamapintas mas maayo sangsa pagkamaluluy-on. Ang kakagod kag pagkamaiyaiyahon nagapugong sa isa sa pagpakita sing pagkamaluluy-on.

Bangod sini, ginauna sang madamo ang ila kaugalingon nga wala sing patugsiling sa balatyagon kag kaayuhan sang iban. Ang mga baganihan sa isport kag kalingawan masami nga ginalaragway subong “tunay nga mga lalaki” (mga macho) nga indi mainulikdon. Amo man sini ang ginapakita sang pulitikal nga mga gumalahom.

Gani, maalamon nga mamangkot kita: Ngaa dapat kita mangin mahinuklugon? May benepisyo bala ang pagkamaluluy-on? Ano ang makabulig sa aton nga magpakita sing kaluoy? Sabton ini sa masunod nga artikulo.

[Piktyur sa pahina 3]

•Ang pagpakita bala sing kaluoy isa ka kaluyahon?

•May benepisyo bala ang pagkamaluluy-on?

•Paano ka makapakita sing kahanuklog?