Pagkabuhi nga May Mapuslanon nga Katuyuan sa Kabuhi

“Ang tagsa ka butang nga may ginhawa magdayaw sa GINOO.”—SALMO 150:6.

1. Ilaragway ang pagpangita sang isa ka pamatan-on nga lalaki sing katuyuan sa kabuhi.

“NAGTUON ako sing medisina bangod luyag ko magbulig sa mga tawo. Nagpati man ako nga ang dungog kag ang daku nga maganar ko kon mangin doktor ako magapahalipay sa akon,” hinumdom ni Seung Jin, nga nagdaku sa Korea. * “Apang narealisar ko sang ulihi nga diutay man lang gali ang mabulig sang isa ka doktor sa mga tawo. Gani, nagtuon ako sing painting, apang pila lang ang nakabenepisyo sa sini, kag pamatyagan ko maiyaiyahon ako kay ako lang ang nalipay sa ginahimo ko. Amo kon ngaa, nagmaestro ako apang narealisar ko sang ulihi nga ang ginatudlo ko mga katunayan lamang, indi ang panuytoy nga makapahalipay gid sa mga tawo.” Kaangay sang madamo, ginapangita ni Seung Jin ang mapuslanon nga katuyuan sa kabuhi.

2. (a) Ano ang kahulugan sang pagkabuhi nga may katuyuan sa kabuhi? (b) Paano naton nahibaluan nga may katuyuan ang Manunuga kon ngaa gintuga niya kita diri sa duta?

2 Ang pagkabuhi nga may matuod nga katuyuan sa kabuhi nagakahulugan nga may rason ka sa pagkabuhi, may maathag ka nga tulumuron sa kabuhi, kag may yara ka isa ka panguna nga tulumuron sa kabuhi nga imo gid ginahimud-usan. Matigayon gid bala sang mga tawo ini nga katuyuan? Huo! Ang katunayan nga ginhatagan kita sing kinaalam, konsiensia, kag ikasarang sa pagpangatarungan nagapahangop nga may mapuslanon nga katuyuan ang Manunuga kon ngaa gintuga niya kita diri sa duta. Busa, masapwan naton ang matuod nga katuyuan sa kabuhi paagi lamang sa pagkabuhi nga nahisanto sa katuyuan sang Manunuga.

3. Ano ang nadalahig sa katuyuan sang Dios para sa mga tawo?

3 Ginasugid sang Biblia nga ang katuyuan sang Dios para sa aton nagadalahig sa madamo nga mga butang. Halimbawa, ang pagtuga sang Dios sa aton sa makatilingala nga paagi isa gid ka pamatuod sang iya di-makagod nga gugma. (Salmo 40:5; 139:14) Sa amo, ang pagkabuhi suno sa katuyuan sang Dios nagakahulugan nga higugmaon man naton sing di-makagod ang iban. (1 Juan 4:7-11) Nagakahulugan man ini nga sundon naton ang mga instruksion sang Dios, nga nagabulig sa aton sa pagkabuhi nahisanto sa iya mahigugmaon nga katuyuan.—Manugwali 12:13; 1 Juan 5:3.

4. (a) Ano ang kinahanglanon agod makasapo kita sing matuod nga katuyuan sa kabuhi? (b) Ano ang pinakadaku nga katuyuan nga mahimud-usan sang bisan sin-o?

 4 Katuyuan man sang Dios nga magkabuhi ang mga tawo sing malipayon kag mahidaiton sa isa kag isa kag sa mga sapat. (Genesis 1:26; 2:15) Apang, ano ang dapat naton himuon agod mangin malipayon kita, may kalig-unan, kag malinong? Subong sang isa ka bata nga nagabatyag sing kalipay kag kalig-unan kon yara sa tupad niya ang iya mga ginikanan, kinahanglan naton ang maayo nga kaangtanan sa aton langitnon nga Amay agod makasapo kita sing matuod nga katuyuan sa kabuhi. (Hebreo 12:9) Ginahimo sang Dios nga posible ini nga sahi sang kaangtanan sa iya paagi sa pagtugot nga mangin suod kita sa iya kag paagi sa pagpamati sa aton mga pangamuyo. (Santiago 4:8; 1 Juan 5:14, 15) Kon ‘maglakat kita upod sa Dios’ nga may pagtuo kag mangin mga abyan niya, makahatag kita sing kalipay kag kadayawan sa aton langitnon nga Amay. (Genesis 6:9; Hulubaton 23:15, 16; Santiago 2:23) Amo ini ang pinakadaku nga katuyuan nga mahimud-usan sang bisan sin-o. Nagsulat ang salmista: “Ang tagsa ka butang nga may ginhawa magdayaw sa GINOO.”—Salmo 150:6.

Ano ang Imo Katuyuan sa Kabuhi?

5. Ngaa indi maalamon nga unahon ang materyal nga mga butang?

5 Ang isa ka bahin sang katuyuan sang Dios para sa aton amo ang pag-atipan naton sa aton kaugalingon kag sa aton pamilya. Nagalakip ini sang pag-atipan sa aton pisikal kag espirituwal nga mga kinahanglanon. Apang, kinahanglan nga mangin balanse kita sa sini, agod nga indi matabunan sang sekular nga mga butang ang mas importante nga espirituwal nga mga butang. (Mateo 4:4; 6:33) Makapasubo nga madamo ang nagahimud-os halos para lamang sa materyal nga mga butang. Apang, indi ini maalamon. Ginapakita sang surbe kasan-o lang sa mga milyonaryo sa Asia nga madamo sa ila ang “nagabatyag nga wala sing kalig-unan kag nagakabalaka, bisan pa kilala sila sa katilingban kag madinalag-on bangod sang ila natipon nga manggad.”—Manugwali 5:11.

6. Ano ang ginalaygay ni Jesus tuhoy sa paghimud-os sa manggad?

6 Naghambal si Jesus tuhoy sa “paglimbong sang manggad.” (Marcos 4:19) Paano nagalimbong ang manggad? Mahimo nga magdumdom ang mga tawo nga malipayon sila kon may manggad sila, apang indi ini matuod. “Ang nagahigugma sang pilak indi mabusug sing pilak,” siling sang maalam nga si Hari Solomon. (Manugwali 5:10) Apang mahimo bala himud-usan ang materyalistiko nga mga tulumuron kag makaalagad gihapon sa Dios sing bug-os kalag? Indi. Nagpaathag si Jesus: “Wala sing tawo nga makaalagad sa duha ka agalon; kay magadumut sia sa isa kag magahigugma sa isa, ukon magadampig sia sa isa kag magatamay sa isa. Indi kamo makaalagad sa Dios kag sa manggad.” Ginlaygayan ni Jesus ang iya mga sumulunod nga magtipon, indi sing materyal nga mga butang sa duta, kundi sing “mga bahandi sa langit,” buot silingon, maghimo sing maayo nga ngalan sa Dios, nga “nakahibalo sang inyo kinahanglan sa wala pa kamo magpangayo sa iya.”—Mateo 6:8, 19-25.

7. Paano kita ‘makapanguyapot sing malig-on sa matuod nga kabuhi’?

7 Sang ginsulatan ni apostol Pablo ang iya masigkamanugpangabudlay nga si Timoteo, naghatag sia sing mabaskog nga laygay bahin sini. Ginsingganan niya si Timoteo: “Sugua ang mga manggaranon . . . nga . . . ipahamtang ang ila paglaum, indi sa wala kapat-uran nga manggad, kundi sa Dios, nga bugana nga nagahatag sa aton sang tanan nga butang agod malipay kita . . . , mangin maalwan, handa sa pagpaambit, mahalungon nga nagatipon para sa ila kaugalingon sang maayo nga sadsaran para sa palaabuton subong ila bahandi, agod makapanguyapot sila sing malig-on sa matuod nga kabuhi.”—1 Timoteo 6:17-19, NW.

Ano ang “Matuod nga Kabuhi”?

8. (a) Ngaa ginahimud-usan sang madamo ang manggad kag kadungganan? (b) Ano ang wala marealisar sini nga mga tawo?

8 Para sa madamo nga tawo, ang ekspresyon nga “matuod nga kabuhi” nagalaragway sa isa ka sahi sang kabuhi nga maluho kag mahuyugon sa kalipayan. Ang isa ka pamantalaan sa Asia nagsiling: “Ginahandum sang mga tawo ang mga butang nga makita nila sa mga pelikula ukon TV, kag nagadalamguhanon sila sang ila sarang matigayon.” Ginahimud-usan sang madamo ang manggad kag  kadungganan subong amo ang ila katuyuan sa kabuhi bangod ginatamod nila ini nga amo ang matuod nga kabuhi. Madamo ang nagabalewala sang ila pagkapamatan-on, ikaayong-lawas, pamilya, kag espirituwal nga mga prinsipio matigayon lamang ini nga mga butang. Pila lamang ang nakarealisar nga ang sahi sang kabuhi nga ginapakita sang media resulta lamang sang “espiritu sang kalibutan”—ang nagapangibabaw nga panghunahuna nga nagaimpluwensia sa kalabanan sang binilyon ka pumuluyo sa duta kag nagapahulag sa ila sa paghikot batok sa katuyuan sang Dios para sa aton. (1 Corinto 2:12; Efeso 2:2) Indi katingalahan nga madamo gid karon ang indi malipayon!—Hulubaton 18:11; 23:4, 5.

9. Ano ang indi gid mahimo sang mga tawo, kag ngaa?

9 Ano naman ang masiling sa mga tawo nga nagapakabudlay para sa kaayuhan sang iban, agod madula ang gutom, balatian, kag inhustisya? Masami nga madamo ang makabenepisyo sa ila dalayawon kag masinakripisyuhon nga mga panikasog. Apang, bisan ano pa ang ila himuon, indi gid nila mahimo nga mangin matarong ang sistema sang mga butang karon. Ngaa? Bangod ang matuod, “ang bug-os nga kalibutan yara sa gahum sang malauton” nga amo si Satanas kag indi niya luyag nga magbag-o ini.—1 Juan 5:19.

10. San-o matigayon sang mga matutom ang “matuod nga kabuhi”?

10 Makapasubo gid kon ang ginalauman lamang sang isa ka tawo amo ang kabuhi sa kalibutan karon! “Kon ang paglaum ta kay Cristo sa sining kabuhi lamang, labi kakailo kita sa tanan nga tawo,” sulat ni Pablo. “Magkaon kita kag mag-inum, kay buwas mapatay kita” amo ang panimuot sang mga tawo nga nagapati nga ang kabuhi tubtob lamang sa karon. (1 Corinto 15:19, 32) Apang may palaabuton kita, kay ‘suno sa saad sang Dios nagahulat kita sing bag-ong mga langit kag bag-ong duta diin nagapuyo ang pagkamatarung.’ (2 Pedro 3:13) Sa sina nga tion, matigayon sang mga Cristiano ang “matuod nga kabuhi,” buot silingon, ang “kabuhi nga walay katapusan” sa kahimpitan, sa langit ukon sa idalom sang mahigugmaon nga paggahom sang Ginharian nga panguluhan sang Dios!—1 Timoteo 6:12.

11. Ngaa ang paghimo sang kabubut-on sang Dios paagi sa pagsakdag sa iya Ginharian amo ang mapuslanon nga katuyuan sa kabuhi?

11 Ang Ginharian sang Dios lamang ang makalubad sa mga problema sang katawhan. Sa amo, ang paghimo sang kabubut-on sang Dios paagi sa pagsakdag sa iya Ginharian amo lamang ang labing mapuslanon nga katuyuan sa kabuhi nga mahimud-usan  sang isa. (Juan 4:34) Samtang ginahimo naton ini, makatigayon kita sing hamili nga kaangtanan sa aton langitnon nga Amay. Malipayon man kita kay kaupod naton sa pag-alagad sa Dios ang minilyon naton ka kauturan sa Cristianong kongregasyon, nga may pareho man nga katuyuan sa kabuhi.

Husto nga mga Sakripisyo

12. Ipaanggid ang kabuhi sa kalibutan karon sa “matuod nga kabuhi.”

12 Ang kalibutan karon “nagataliwan kag ang kailigbon sini,” siling sang Biblia. Ang tanan nga bahin sang kalibutan ni Satanas, lakip ang kadungganan kag manggad sini, pagalaglagon, “apang ang nagahimo sang kabubut-on sang Dios nagapadayon sa gihapon.” (1 Juan 2:15-17) Tuhay sa walay kasiguruhan nga manggad, umalagi nga kadungganan, kag hapaw lamang nga pagpangalipay sang sistema karon, ang “matuod nga kabuhi”—ang kabuhi nga walay katapusan sa idalom sang Ginharian sang Dios—permanente kag takus sa aton mga sakripisyo, kon husto lamang nga mga sakripisyo ang himuon naton.

13. Paano ang isa ka mag-asawa naghimo sing husto nga mga sakripisyo?

13 Binagbinaga si Henry kag si Suzanne. Nagatuo gid sila sa saad sang Dios nga kon unahon mo sa imo kabuhi ang Ginharian, mabaton mo ang bulig sang Dios. (Mateo 6:33) Gani, nagdesisyon sila nga magsaylo sa mas barato nga balay kag isa lang sa ila ang magtrabaho, agod nga makahinguyang sila sing kapin nga tion sa pag-alagad sa Dios upod sa ila duha ka anak nga babayi. (Hebreo 13:15, 16) Indi mahangpan sang ila nagaulikid nga abyan ang ila desisyon. Ginsingganan niya si Suzanne: “Amiga, kon luyag mo mag-istar sa mas matahom nga balay, dapat may isakripisyo ka gid.” Apang, nahibaluan ni Henry kag ni Suzanne nga ang pag-una kay Jehova “may saad sang kabuhi karon kag sa palaabuton.” (1 Timoteo 4:8; Tito 2:12) Ang ila duha ka anak nga babayi nangin makugi nga mga regular payunir. Bilang isa ka pamilya, wala sila sing nawasi nga mapuslanon nga butang. Sa baylo, daku gid ang ila nabenepisyo sa ila pagpanikasog nga matigayon ang “matuod nga kabuhi.”—Filipos 3:8; 1 Timoteo 6:6-8.

Indi ‘Paggamita Sing Bug-os ang Kalibutan’

14. Ano nga mga trahedya ang mahimo matabo kon malipatan naton ang aton matuod nga katuyuan?

14 Apang, makatalagam gid kon malipatan naton ang aton matuod nga katuyuan kag maghugak ang aton pagpanguyapot sa “matuod nga kabuhi.” Mahimo nga ‘malumsan kita sang mga paghimud-os kag sang mga manggad kag sang mga kalipayan sang kabuhi.’ (Lucas 8:14) Ang wala ginapunggan nga mga handum para sa materyal nga mga butang kag ang “paghimud-os sining kabuhi” makadul-ong sa paghinguyang sing sobra nga tion sa sistema sang mga butang karon. (Lucas 21:34) Makapasubo nga ang iban nalatnan pa gani sang handum nga magmanggaranon nga amo ang lapnag karon kag “nagtalang gikan sa pagtoo kag nagsuntok sang ila mga tagiposoon sing madamung kasakitan,” amo nga nadula pa gani nila ang ila hamili nga kaangtanan kay Jehova. Makapasubo gid ini nga resulta bangod wala sila ‘magpanguyapot sing malig-on sa kabuhi nga walay katapusan’!—1 Timoteo 6:9, 10, 12, NW, Hulubaton 28:20.

15. Paano nakabenepisyo ang isa ka pamilya bangod wala nila ‘gingamit sing bug-os ang kalibutan’?

15 Ginlaygayan ni Pablo “ang mga nagagamit sang kalibutan [nga mangin] subong sang mga wala nagagamit sini sing bug-os.” (1 Corinto 7:31, NW) Ginpamatian ini nanday Keith kag Bonnie. “Manugtapos na ako sa pagkadentista sang mangin isa ako sa mga Saksi ni Jehova,” asoy ni Keith. “May pililian ako. Daku ang maganar ko kon magbaton ako sing madamo nga pasyente, apang makasablag ini sa amon pag-alagad sa Dios. Nagdesisyon ako nga limitehan ang mga pasyente nga akon batunon agod nga may dugang ako nga tion para sa espirituwal kag emosyonal nga kaayuhan sang amon pamilya, nga sang ulihi naglakip sa amon lima ka anak nga babayi. Bisan pa talagsa lang kami may ekstra nga kuarta, nakatuon kami sa pagkinot, kag wala gid kami makulangi sang mga butang nga ginakinahanglan namon. Suod kag malipayon ang amon pamilya. Sang ulihi, nagpayunir kami tanan. Sa karon, ang amon mga anak nga babayi may mga bana na kag malipayon sila. Ang tatlo sa ila may mga anak na man. Malipayon man ang ila pamilya, bangod padayon nga ginauna nila ang katuyuan ni Jehova.”

 Ginauna ang Katuyuan sang Dios

16, 17. Ano nga mga halimbawa sang may ikasarang nga mga tawo ang ginapakita sang Biblia, kag ano ang madumduman sa ila?

16 Ginapakita sang Biblia ang halimbawa sang mga nagkabuhi kag sang mga wala magkabuhi suno sa katuyuan sang Dios. Ang mga leksion gikan sa sini nga mga halimbawa naaplikar sa tanan nga tawo walay sapayan sang ila edad, mga kultura, kag mga kahimtangan. (Roma 15:4; 1 Corinto 10:6, 11) Nagtukod si Nimrod sing dalagku nga mga siudad, apang ginhimo niya ini subong pagpamatok kay Jehova. (Genesis 10:8, 9) Sa pihak nga bahin, madamo ang nagpakita sing maayo nga mga halimbawa. Halimbawa, walay sapayan sang posisyon ni Moises subong isa ka dungganon nga tawo sa Egipto, wala niya ini ginhimo nga katuyuan sa iya kabuhi. Sa baylo, ginkabig niya ang iya espirituwal nga mga pribilehiyo subong “daku pa nga manggad sang sa mga bahandi sa Egipto.” (Hebreo 11:26) Mahimo gid nga ginbulong ni Lucas nga isa ka doktor si Pablo kag ang iban pa. Apang, ang pinakadaku nga nahimo ni Lucas para sa iban amo ang iya pag-ebanghelyo kag pagsulat sing pila ka tulun-an sa Biblia. Si Pablo naman, nakilala, indi subong eksperto sa Kasuguan, kundi subong isa ka misyonero, isa ka “apostol sa mga pungsod.”—Roma 11:13, NW.

17 Si David madumduman gid, indi subong isa ka kumander sa militar ukon musikero kag manugkomposo, kundi subong isa ka ‘lalaki nga kalahamut-an sa tagipusuon sang Dios.’ (1 Samuel 13:14, NW) Kilala naton si Daniel, indi bangod sang iya posisyon subong isa ka opisyal sa panguluhan sang Babilonia, kundi bangod sang iya pag-alagad subong isa ka matutom nga manalagna ni Jehova; si Ester, indi subong isa ka reyna sang Persia, kundi subong isa ka halimbawa sa kaisog kag pagtuo; sanday Pedro, Andres, Santiago kag Juan, indi subong madinalag-on nga mga mangingisda, kundi subong mga apostoles ni Jesus. Kag subong pinakamaayo nga halimbawa, ginakilala naton si Jesus, indi subong “panday,” kundi subong “ang Cristo.” (Marcos 6:3; Mateo 16:16) Ini sila tanan nakahangop nga bisan ano pa ang ila mga ikasarang, mga pagkabutang, ukon posisyon, dapat nga nasentro ang ila kabuhi, indi sa ila sekular nga mga karera, kundi sa ila pag-alagad sa Dios. Nahibaluan nila nga ang labing dungganon kag labing makalilipay nga katuyuan sa kabuhi amo ang mangin mahinadlukon sa Dios.

18. Paano nagdesisyon ang isa ka pamatan-on nga Cristiano nga gamiton ang iya kabuhi, kag ano ang iya narealisar sang ulihi?

18 Si Seung Jin, nga ginsambit sa umpisa sini nga artikulo, nakadangat man sa sini nga paghangop. “Sa baylo nga ihugod ang akon bug-os nga kusog sa medisina, painting, ukon sa pagmaestro, nagdesisyon ako nga gamiton ang akon kabuhi nahisanto sa akon dedikasyon sa Dios,” paathag niya. “Nagaalagad ako karon kon diin kinahanglan gid ang mga manunudlo sing Biblia, kag ginabuligan ko ang mga tawo nga makalakat sa banas padulong sa kabuhi nga walay katapusan. Pagdumdom ko anay mahapos lang ang mangin bug-os tion nga ministro. Indi gali, kay nagatinguha ako gihapon nga pauswagon ang akon personalidad kag ang akon ikasarang sa pagtudlo sa mga tawo nga may lainlain nga mga kultura. Narealisar ko na karon nga ang paghimo sang katuyuan ni Jehova nga mangin aton katuyuan, amo lamang ang mapuslanon nga dalanon sang pagkabuhi.”

19 Subong mga Cristiano, ginhatagan kita sing makaluwas-kabuhi nga ihibalo kag sing paglaum sa kaluwasan. (Juan 17:3) Gani, ‘dili naton pagbatunon sa walay pulos ang bugay sang Dios.’ (2 Corinto 6:1) Sa baylo, gamiton naton ang aton hamili nga mga adlaw kag mga tuig sang kabuhi sa pagdayaw kay Jehova. Ipalapnag naton ang ihibalo nga nagahatag sing matuod nga kalipay karon kag magadul-ong sa kabuhi nga walay katapusan. Kon himuon naton ini, maeksperiensiahan naton nga matuod ang ginsiling ni Jesus: “May kapin nga kalipay sa paghatag sangsa pagbaton.” (Binuhatan 20:35, NW) Nian, masapwan naton ang matuod nga katuyuan sa kabuhi.

[Footnote]

^ par. 1 Gin-islan ang iban nga mga ngalan.

Mapaathag Mo Bala?

• Ano ang labing dungganon nga katuyuan sa kabuhi?

• Ngaa indi maalamon ang pagkabuhi para lamang sa materyal nga mga butang?

• Ano ang “matuod nga kabuhi” nga ginasaad sang Dios?

• Paano naton magamit ang aton kabuhi para sa katuyuan sang Dios?

[Mga Pamangkot sa Pagtinuon]

19. Paano naton masapwan ang matuod nga katuyuan sa kabuhi?

[Mga piktyur sa pahina 18]

Dapat maghimo ang mga Cristiano sing husto nga mga sakripisyo