Magdiretso sa kaundan

Magdiretso sa listahan sang kaundan

Pagkabuhi nga Nahisanto sa Katuyuan sang Dios Karon

Pagkabuhi nga Nahisanto sa Katuyuan sang Dios Karon

 Pagkabuhi nga Nahisanto sa Katuyuan sang Dios Karon

“Napatay [si Cristo] tungud sa tanan, agud nga ang mga nagakabuhi indi na magkabuhi nga sa ila kaugalingon.”—2 CORINTO 5:15.

1. Isaysay ang naeksperiensiahan sang isa ka misyonero sa iya teritoryo.

“AMON ang una nga sibilyan nga salakyan nga nagsulod sa isa ka nabaw-ing nga minuro sang Aprika pagkatapos sang isa ka inaway sibil didto,” siling ni Aaron nga isa ka misyonero. * “Nautod ang amon komunikasyon sa isa ka gamay nga kongregasyon didto, kag dapat namon atipanon ang mga kauturan didto. Dugang sa mga pagkaon, mga panapton, kag mga literatura tuhoy sa Biblia, nagdala man kami sing isa ka kopya sang video nga Jehovah’s Witnesses—The Organization Behind the Name. * Madamo gid nga interesado ang nagdugok sa pagtan-aw sini sa sulusinehan sang minuro—isa ka daku nga payag nga may VCR kag TV—amo kon ngaa duha gid ka beses nga ginpasalida namon ini. Subong resulta sang tagsa ka pagpasalida, madamo ang nagbaton sing pagtuon sa Biblia. Maathag nga takus gid ang tanan namon nga panikasog.”

2. (a) Ngaa nagdesisyon ang mga Cristiano nga gamiton ang ila kabuhi sa pag-alagad sa Dios? (b) Ano nga mga pamangkot ang binagbinagon naton karon?

2 Ngaa nagpakabudlay si Aaron kag ang iya mga kaupod? Bangod, subong pasalamat sa gawad nga halad ni Jesucristo, gindedikar nila ang ila kabuhi sa Dios kag luyag nila gamiton ini nahisanto sa katuyuan sang Dios. Kaangay nila, nagdesisyon ang tanan nga dedikado nga mga Cristiano nga “indi na magkabuhi nga sa ila kaugalingon” kundi himuon ang tanan nga masarangan nila “tungud sa maayong balita.” (2 Corinto 5:15; 1 Corinto 9:23) Nakahibalo sila nga kon malaglag na ang sistema sang mga butang karon, wala na sing pulos ang tanan nga kuarta kag kadungganan. Gani, luyag nila gamiton ang ila kabuhi kag kapagros nahisanto sa katuyuan sang Dios. (Manugwali 12:1) Paano naton mahimo ini? Paano kita makatigayon sing kinahanglanon nga kaisog kag kusog agod mahimo naton ini? Kag ano nga mga kahigayunan sa pag-alagad ang bukas sa aton?

Progresibo kag Praktikal nga mga Tikang

3. Ano nga sadsaran nga mga tikang ang kinahanglanon sa paghimo sang kabubut-on sang Dios?

3 Para sa matuod nga mga Cristiano, ang paghimo sang kabubut-on sang Dios isa ka tubtob kabuhi nga hilikuton. Masami nga nagasugod ini paagi sa sadsaran nga mga tikang subong sang pagpalista sa Teokratikong Eskwelahan Para sa Ministeryo, pagbasa sang Biblia adlaw-adlaw, pagpakigbahin sa pagbantala nga hilikuton, kag pag-uswag padulong sa bawtismo. Samtang nagauswag kita, ginatandaan naton ang ginsiling ni apostol Pablo: “Himoa ining mga katungdanan, ukuri ini sila, agud nga ang imo pag-uswag makita sang tanan.” (1 Timoteo 4:15) Ini nga pag-uswag indi paghimaya sa kaugalingon kundi isa ka palatandaan sang aton determinasyon nga himuon ang kabubut-on sang Dios sing bug-os tagipusuon. Ang aton paghimo sini isa ka ebidensia nga luyag naton nga ang Dios ang magtuytoy sang aton tanan nga ginahimo, kay mas labaw gid ang kaalam sang Dios sangsa aton.—Salmo 32:8.

4. Paano naton malandas ang wala sing basehan nga pagpangalag-ag?

4 Apang, ang pagpangalag-ag ukon tuman nga kabalaka sa kaugalingon mahimo makasablag sa aton pag-uswag sa aton pag-alagad sa Dios. (Manugwali 11:4) Gani, antes naton mabatyagan ang kalipay sa pag-alagad sa Dios kag sa pagbulig sa iban, mahimo nga dapat naton anay landason ang aton mga kabalaka. Halimbawa, nagaplano si Erik nga magsaylo sa isa ka kongregasyon nga may tuhay nga lenguahe. Apang may ginakabalak-an sia: ‘Batunon ayhan nila ako? Masahuan ko ayhan ang mga kauturan didto?’ Sang makasaylo na si Erik sa sini nga kongregasyon, nag-asoy sia: “Narealisar ko sang ulihi nga dapat mas  kabalak-an ko ang kauturan sa baylo sang akon kaugalingon. Nagdesisyon ako nga untatan ini nga pagkabalaka kag himuon lang kon ano ang masarangan ko. Nangamuyo ako sa Dios nga buligan niya ako kag gindayon ko ang akon plano. Malipayon gid ako karon nga nagaalagad upod sa sini nga kongregasyon.” (Roma 4:20) Huo, kon alagdon naton ang Dios kag buligan ang iban sing bug-os tagipusuon tubtob sa masarangan naton, mangin malipayon gid kita.

5. Ngaa kinahanglan ang maayo nga pagplano agod magkabuhi kita nahisanto sa katuyuan sang Dios? Iilustrar.

5 Agod magmadinalag-on kita sa pagkabuhi nahisanto sa katuyuan sang Dios, dapat man naton planuhon sing maayo ang aton kabuhi. Maalamon nga ginalikawan naton ang sige nga pagpangutang nga mahimo mag-ulipon sa aton sa sistema sang mga butang karon kag malimitehan ang aton kahilwayan sa paghimo sang hilikuton sang Dios. Ginapahanumdom kita sang Biblia: “Ang nagahulam alagad sa nagapahulam.” (Hulubaton 22:7) Ang pagsalig kay Jehova kag ang pag-una sa espirituwal nga mga butang makabulig sa aton sa paghupot sing balanse nga pagtamod sa mga butang. Halimbawa, si Guoming kag ang iya duha ka utod nga babayi nagapuyo upod sa ila iloy sa isa ka duog nga mataas ang arkila sa mga balay kag mabudlay makakita sing permanente nga trabaho. Paagi sa pagkinot kag pagbuligay sa galastuhan, wala sila mawad-i sang mga kinahanglanon sa kabuhi, bisan pa indi tanan sa ila nagatrabaho. “Kon kaisa, pareho kami tanan nga wala sing trabaho,” siling ni Guoming. “Walay sapayan sini, padayon kami nga nakapayunir kag naatipan gihapon namon ang amon iloy. Nagapasalamat kami nga indi luyag ni Nanay nga mag-untat kami sa pagpayunir agod lamang mapagustuhan namon sia sa materyal.”—2 Corinto 12:14; Hebreo 13:5.

6. Ano nga halimbawa ang nagapakita nga sarang naton mapahisanto ang aton kabuhi sa katuyuan sang Dios?

6 Kon masako ka gid sa sekular nga mga paghimud-os—sa pinansial ukon sa iban pa nga butang—mahimo nga dapat ka maghimo sing daku nga mga pagpasibu sa kabuhi agod mauna mo ang katuyuan sang Dios. Masami nga indi ini madali himuon, kag indi ka dapat mangampo kon sa primero malugaw-an ka. Binagbinaga si Koichi, nga nabuyo sa paglingawlingaw. Tin-edyer pa lang si Koichi sang nagatuon na sia sa Biblia, apang adik sia sa mga video game sa sulod sang madamo nga tinuig. Isa ka adlaw, nagsiling si Koichi sa iya kaugalingon: ‘Ano ang ginahimo mo sa imo kabuhi? Treintahon ka na, kag ang imo kabuhi wala gihapon sing mapuslanon nga katuyuan!’ Ginpadayon liwat ni Koichi ang iya pagtuon sa Biblia kag nagpabulig sia sa kongregasyon. Bisan pa amat-amat lang ang iya pagbag-o, wala sia mangampo. Paagi sa hanuot gid nga pagpangamuyo kag mahigugmaon nga bulig sang iban, nalandas niya sang ulihi ang iya pagka-adik sa mga video game. (Lucas 11:9) Sa karon, malipayon si Koichi nga nagaalagad subong isa ka ministeryal nga alagad.

Mangin Balanse

7. Ngaa dapat kita mangin balanse sa paghimo sang hilikuton sang Dios?

7 Dapat gid kita manikasog, agod magkabuhi kita nahisanto sa katuyuan sang Dios. Indi kita dapat mangin uyaya ukon tamaran sa paghimo sini. (Hebreo 6:11, 12) Apang, indi luyag ni Jehova nga masobrahan kita sing kakapoy—sa lawas, sa hunahuna, ukon sa emosyon. Ginahimaya naton ang Dios kag ginapakita man naton nga balanse kita kon mapainubuson nga ginabaton naton nga indi naton matuman ang hilikuton sang Dios kon sa aton lang kusog. (1 Pedro 4:11) Nagasaad si Jehova nga hatagan niya kita sing kinahanglanon nga kusog agod mahimo naton ang iya kabubut-on, apang indi naton dapat pagpiliton ang aton kaugalingon sa paghimo sing mga butang nga wala niya ginapaabot sa aton. (2 Corinto 4:7) Agod padayon kita nga makaalagad sa Dios nga wala ginakapoy, dapat naton bahinbahinon ang paggamit sang aton kusog.

8. Ano ang natabo sang ginhimud-usan sang isa ka pamatan-on nga Cristiano nga ihatag ang iya labing maayo sa iya trabaho kag kay Jehova, kag ano nga pagpasibu sa iya kabuhi ang ginhimo niya?

8 Halimbawa, si Ji Hye nga taga-Korea, duha ka tuig nga nagtrabaho sa kompanya nga nagakinahanglan sang iya daku gid nga tion samtang nagapayunir sia. “Gintinguhaan ko nga ihatag ang akon labing maayo kay Jehova kag sa akon trabaho,” siling niya, “apang lima lang ka oras ang tulog ko kada gab-i. Sang ulihi, nakapoy na ang akon hunahuna para sa espirituwal nga mga butang, kag amat-amat nga nadula ang akon kalipay sa pag-alagad kay Jehova.” Agod maalagad niya si Jehova sing ‘bug-os tagiposoon, kalag, hunahuna, kag kusug,’ nangita si  Ji Hye sing iban nga trabaho nga wala nagakinahanglan sang iya daku gid nga tion. (Marcos 12:30) “Walay sapayan sang pang-engganyo sang akon pamilya nga pilion ko ang daku sing sueldo nga trabaho, ginhimud-usan ko nga unahon ang katuyuan sang Dios,” siling niya. “Makaigo gihapon ang akon sueldo para sa akon kinahanglanon nga mga butang, subong sang presentable nga mga panapton. Kag kanami sang pamatyag ko nga husto ang tulog ko! Malipayon ako sa akon ministeryo, kag mas malig-on ang akon espirituwalidad karon. Amo sini bangod indi ako masyado nadayag sa mga pangganyat kag mga pangdisturbo sang kalibutan.”—Manugwali 4:6; Mateo 6:24, 28-30.

9. Paano ang aton panikasog makaapektar sa mga tawo sa latagon?

9 Indi tanan makaalagad sa Dios subong bug-os tion nga ebanghelisador. Kon nabudlayan ka bangod sang imo katigulangon, mapigaw nga panglawas, ukon iban pa nga mga limitasyon, dumduma nga ginaapresyar ni Jehova ang imo katutom kag ang bisan ano nga tinagipusuon nga pag-alagad nga mahatag mo. (Lucas 21:2, 3) Indi naton dapat pagpakadiutayon ang mahimo mangin epekto sa iban sang aton mga panikasog, bisan pa limitado lamang ini. Halimbawa, pananglit nagpamalaybalay kita sa pila ka balay kag wala sing bisan isa nga nagpakita sing interes sa aton mensahe. Paglumbos naton, mahimo nga hambalan sang mga tagbalay sa sulod sang pila ka oras ukon pila ka adlaw ang aton pagduaw, bisan pa wala sing isa sa ila nga nagbukas sang ganhaan sa aton! Wala naton ginapaabot nga mamati ang tanan sa maayong balita sang Ginharian, apang mahimo nga ang iban sa ila mamati. (Mateo 13:19-23) Mahimo nga mamati ang iban sa ulihi kon magbag-o ang mga kahimtangan sa kalibutan ukon sa ila kabuhi. Kon ano man, paagi sa paghimo sang masarangan naton sa pagbantala sing maayong balita sa mga tawo, ginahimo naton ang hilikuton sang Dios. ‘Mga masigkamanugpangabudlay kita sang Dios.’—1 Corinto 3:9, NW.

10. Ano ang sarang mahimo sang tanan sa kongregasyon?

10 Dugang pa, mabuligan naton tanan ang aton mga paryente kag ang aton espirituwal nga mga kauturan. (Galacia 6:10) Ang aton maayo nga impluwensia sa iban mahimo nga mangin tudok kag padayon. (Manugwali 11:1, 6) Kon maukod nga ginahimo sang mga gulang kag sang mga ministeryal nga alagad ang ila mga katungdanan, mabuligan nila ang mga kauturan sa kongregasyon nga mangin malig-on ang ila kaangtanan kay Jehova, kag labi pa nga nagapagsik sila sa pag-alagad sa Dios. Ginapasalig kita nga kon ‘bugana ang aton buluhaton sa Ginoo,’ ang aton pagpangabudlay “indi walay pulus.”—1 Corinto 15:58.

 Paghimo sang Katuyuan sang Dios Subong Isa ka Karera

11. Magluwas sa pag-alagad upod sa lokal nga kongregasyon, ano pa nga mga kahigayunan ang mahimo bukas sa aton?

11 Subong Cristiano, malipayon kita nga nagakabuhi, kag luyag naton himayaon ang Dios sa tanan nga butang nga ginahimo naton. (1 Corinto 10:31) Kon maukod kita sa pagbantala sing maayong balita sang Ginharian kag sa pagtudlo sa iban nga tumanon nila ang tanan nga butang nga ginsugo ni Jesus, madamo nga makalilipay nga mga kahigayunan sang pag-alagad ang mangin bukas sa aton. (Mateo 24:14; 28:19, 20) Magluwas sa pag-alagad upod sa lokal nga kongregasyon, may iban pa nga mga kahigayunan diin mahimo nga kinahanglan ang dugang pa nga mga manugbantala, ayhan sa iban nga teritoryo, lenguahe, ukon pungsod. Ang kalipikado nga mga gulang kag mga ministeryal nga alagad nga mga soltero pa mahimo nga agdahon nga mag-eskwela sa Ministerial Training School, kag pagkatapos, mag-alagad sa mga kongregasyon diin kinahanglan ang bulig sang hamtong nga mga Cristiano, ayhan sa ila mismo pungsod ukon sa luwas. Ang mga mag-asawa nga yara sa bug-os tion nga pag-alagad mahimo kalipikado nga hanason sa Gilead agod magmisyonero sa iban nga mga pungsod. Kag kinahanglan gihapon ang mga boluntaryo para sa nanuhaytuhay nga mga buluhaton sa Bethel subong man para sa pagtukod kag pagmentinar sang mga tilipunan kag mga sanga talatapan.

12, 13. (a) Paano ikaw makadesisyon kon ano nga pribilehiyo sang pag-alagad ang himud-usan mo? (b) Iilustrar kon paano ang eksperiensia nga mapalambo sa isa ka pribilehiyo mahimo mapuslan sa iban naman nga pribilehiyo.

12 Ano nga sahi sang pag-alagad ang dapat mo himud-usan? Subong isa ka dedikado nga alagad ni Jehova, dapat ka pirme mangayo sa iya kag sa iya organisasyon sing panuytoy. Ang iya “maayo nga espiritu” magabulig sa imo sa paghimo sing husto nga desisyon. (Nehemias 9:20, NW) Masami nga pagkatapos sang isa ka pribilehiyo, lain naman nga pribilehiyo ang mangin bukas sa imo, kag mahimo nga ang eksperiensia kag kalantip nga matigayon mo sa isa ka pribilehiyo, magamit mo man sa masunod nga pribilehiyo nga basi ihatag sa imo.

13 Halimbawa, si Dennis kag ang iya asawa nga si Jenny, regular nga nagabulig sa pagtukod sing mga Kingdom Hall. Sang mahalitan sang Bagyo Katrina ang nabagatnan nga Estados Unidos, nagboluntaryo sila nga magbulig didto. Nagreport si Dennis: “Nalipay gid kami nga ang kalantip nga natun-an namon sa pagtukod sing mga Kingdom Hall nagamit namon sa pagbulig sa aton mga kauturan. Makatalandog gid ang apresasyon nga ginpakita sang amon mga ginbuligan. Ang iban nga mga organisasyon may limitado lamang nga kadalag-an sa ila pagbulig sa mga tawo nga mapatindog liwat ang ila mga balay. Kapin na sa 5,300 ka balay kag pila ka Kingdom Hall ang nakay-o na ukon natukod liwat sang  mga Saksi ni Jehova. Nakita ini sang mga tawo, amo nga nagapakita na sila karon sing interes sa aton mensahe.”

14. Ano ang mahimo mo kon handum mo nga magsulod sa bug-os tion nga ministeryo?

14 Mahimo ka bala magkabuhi nahisanto sa katuyuan sang Dios paagi sa pagpili sang bug-os tion nga ministeryo subong imo karera? Kon amo sina ang himuon mo, pat-od nga makabaton ka sing madamo nga pagpakamaayo. Kon wala ini ginatugot sang imo kahimtangan karon, makahimo ka ayhan sing mga pagpasibu? Iluga si Nehemias sang ginhandum gid niya ang isa ka importante nga buluhaton. Nangamuyo sia: “O Jehova, palihug . . . ihatag ang kadalag-an sa imo alagad.” (Nehemias 1:11, NW) Pagkatapos, upod ang pagsalig sa “nagapamati sa pangamuyo,” maghimo ka sing buhat nga nagahisanto sa imo pangamuyo. (Salmo 65:2) Antes pakamaayuhon ni Jehova ang imo panikasog nga mag-alagad sa iya sing dugang pa, dapat anay nga himuon mo ina nga mga panikasog. Kon nakadesisyon ka na nga magsulod sa bug-os tion nga ministeryo, tumana ina nga desisyon. Samtang nagaligad ang tion, mangin hanas ka, kag magadugang ang imo kalipay.

Mapuslanon Gid nga Kabuhi

15. (a) Paano kita makabenepisyo paagi sa pagpakigsugilanon sa madugay na nga mga alagad sang Dios kag pagbasa sang ila mga sugilanon sa kabuhi? (b) Isaysay ang isa ka sugilanon sa kabuhi nga nakapalig-on gid sa imo.

15 Ano nga mga resulta ang mapaabot mo kon magkabuhi ka nahisanto sa katuyuan sang Dios? Makigsugilanon sa madugay na nga mga alagad ni Jehova, ilabi na ang mga madugay na sa bug-os tion nga ministeryo. Makalilipay gid kag mapuslanon ang ila kabuhi! (Hulubaton 10:22) Sugiran ka nila nga ginbuligan gid sila ni Jehova bisan sa mabudlay nga mga kahimtangan sa pagtigayon sang mga butang nga ginkinahanglan gid nila kag madamo pa. (Filipos 4:11-13) Halin sang 1955 tubtob sang 1961, ginbalhag sang The Watchtower ang mga sugilanon sa kabuhi sang matutom nga mga kauturan sa idalom sang tig-ulo nga “Pursuing My Purpose in Life.” Halin sadto, ginatos pa ka sugilanon sa kabuhi ang ginbalhag. Ang tagsa ka sugilanon sa kabuhi nagapaalinton sing makugi kag malipayon nga espiritu nga nagapahanumdom sa aton sang masapwan sa tulun-an sang mga Binuhatan sa Biblia. Kon basahon mo ining makakulunyag nga mga sugilanon sa kabuhi, mapahulag ka sa pagsiling, ‘Amo ina ang kabuhi nga luyag ko!’

16. Ngaa mapuslanon kag makalilipay ang kabuhi sang isa ka Cristiano?

16 Si Aaron, nga ginsambit kaina sa umpisa, naghinumdom: “Sa Aprika anay, masami ako makasumalang sing mga pamatan-on nga nagaadbenturar sa pagpangita sing katuyuan sa kabuhi. Napaslawan ang kalabanan sa ila. Apang kami naman, nagapanghikot para sa katuyuan sang Dios paagi sa pagbantala sing maayong balita sang Ginharian, kag malipayon kami sa amon makahalangkat apang mapuslanon nga kabuhi. Naeksperiensiahan gid namon nga may kapin nga kalipay sa paghatag sangsa pagbaton.”—Binuhatan 20:35.

17. Ngaa dapat kita magkabuhi nga nahisanto sa katuyuan sang Dios karon?

17 Kamusta ka naman? Ano nga katuyuan ang ginahimud-usan mo? Kon wala ka sing espirituwal nga tulumuron, mahimo nga sal-utan ini sang iban nga mga tulumuron. Uyangan mo bala ang imo hamili nga kabuhi paagi sa pagpabalor sa mga butang nga ginatanyag sang malaut nga sistema sang mga butang ni Satanas karon? Sa indi na lang madugay kon magbunal na ang “dakung kapipit-an,” ang materyal nga mga manggad kag mga posisyon sa kalibutan mangin walay pulos. Ang mangin importante amo ang aton kaangtanan kay Jehova. Magapasalamat gid kita nga ginhugod naton ang aton kabuhi sa pag-alagad sa Dios kag sa pagbulig sa iban kag nagkabuhi kita nga nahisanto sa katuyuan sang Dios sa aton kabuhi!—Mateo 24:21, NW; Bugna 7:14, 15, NW.

[Mga Footnote]

^ par. 1 Gin-islan ang iban nga mga ngalan.

^ par. 1 Ginabalhag sang mga Saksi ni Jehova.

Mapaathag Mo Bala?

• Paano ginatamod ni Jehova ang aton pag-alagad sa iya?

• Paano ang pagkapraktikal kag pagkabalanse makabulig sa aton sa pag-alagad sa Dios kag sa pagbulig sa iban?

• Ano nga mga kahigayunan sang pag-alagad ang bukas sa aton?

• Paano mangin mapuslanon gid ang aton kabuhi karon?

[Mga Pamangkot sa Pagtinuon]

[Mga Piktyur sa pahina 23]

Dapat kita mangin balanse agod padayon kita nga makaalagad kay Jehova sing bug-os kalag

[Mga piktyur sa pahina 24]

May madamo nga paagi ang sagrado nga pag-alagad