Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Ti, tilawi kon masabat mo ang masunod nga mga pamangkot:

• Ano ang apat ka kahulugan sang tinaga nga “kongregasyon” sa Cristianong Griegong Kasulatan?

Ang panguna nga kahulugan sang “kongregasyon” sa Cristianong Griegong Kasulatan amo ang grupo sang hinaplas nga mga Cristiano (sa pila ka teksto nalakip si Cristo). Kon kaisa, “ang kongregasyon sang Dios” nagapatuhoy sa mga Cristiano nga nagakabuhi sa isa ka espesipiko nga hut-ong sang tion. Ang ikatlo nga kahulugan naaplikar sa tanan nga mga Cristiano sa isa ka geograpiko nga duog. Ang ikap-at nga kahulugan mahimo nga nagapatuhoy sa mga Cristiano nga nagahuman sang isa ka lokal nga kongregasyon.—4/15, pahina 21-3.

• San-o natapos ang pagtawag sa mga Cristiano para sa langitnon nga paglaum?

Ang Biblia wala sing espesipiko nga sabat. Ang pagtawag nagsugod sang 33 C.E. kag nagpadayon tubtob sa moderno nga tion. Pagligad sang 1935, ang paghimo disipulo nga hilikuton nasentro na sa pagtipon sa dakung kadam-an. Ang pila ka Cristiano nga nabawtismuhan sa tapos sang 1935 ginsaksihan sang balaan nga espiritu nga langitnon ang ila paglaum, gani indi naton masiling kon san-o gid natapos ang pagtawag sa mga Cristiano para sa langitnon nga paglaum. Ang matuod nga hinaplas nga mga Cristiano wala nagapati nga labaw ang pagtuytoy sang balaan nga espiritu sa ila kag wala man sila nagapaabot nga alagaran sila sang iban. Ano man ang ila paglaum, ang mga Cristiano kinahanglan mangin matutom kag magpadayon sa paghimo sang kabubut-on sang Dios.—5/1, pahina 30-1.

• Sang nanaad si Jepte, handa bala sia nga ihalad ang iya anak nga babayi sa Dios subong halad nga sinunog?

Indi. Ang buot silingon ni Jepte amo nga idulot niya ang isa nga iya masugata sa eksklusibo nga pag-alagad sa Dios, isa ka probisyon sang Mosaikong Kasuguan. (1 Samuel 2:22) Bilang pagkooperar sa saad, nag-alagad sa tabernakulo ang anak nga babayi ni Jepte, isa gid ka daku nga sakripisyo kay nagkahulugan ini nga indi na sia makapamana.—5/15, pahina 9-10.

• Ano ang papel sang codex sa una nga Cristianismo?

Maathag gid nga ang mga Cristiano naggamit anay sing rolyo, ukon linukot, ayhan tubtob sang mga talipuspusan sang nahaunang siglo C.E. Sang masunod nga siglo, ginbaisan sang mga sumalakdag sang mga codex kag sang mga sumalakdag sang mga linukot kon diin sa duha ang gamiton. Nagapati ang mga eksperto nga naglapnag ang codex bangod sang paggamit sang mga Cristiano sa sini.—6/1, pahina 14-15.

• Ano ang Gezer nga Kalendaryo?

Amo ini ang isa ka gamay nga apog nga tapitapi nga natukiban sang 1908 sa lokasyon sang siudad sang Gezer. Madamo ang nagapati nga isa ini ka binalaybay nga ginhimo sang isa ka bata para sa eskwelahan. Ginlaragway sang tapitapi ang simple nga bersion sang tuigan nga siklo sang pagpanguma nga nagasugod sa pagtipon sang mga patubas sa bulan sang Septiembre/Oktubre, kag nagsambit ini sang nanuhaytuhay nga mga patubas kag mga hilikuton sa pagpanguma.—6/15, pahina 8.

• Ano ang buot silingon sang pagpakasala batok sa balaan nga espiritu?

Mahimo nga makasala ang isa batok sa balaan nga espiritu ni Jehova, isa ka sala nga wala na sing kapatawaran. (Mateo 12:31) Dios ang nagapat-od kon bala nakahimo kita sing sala nga indi na mapatawad, kag mahimo niya kuhaon ang iya espiritu sa aton. (Salmo 51:11) Apang, kon nagakasubo gid kita bangod sa sala nga nahimo naton, mahimo nga ginapakita sini nga nagahinulsol gid kita kag busa wala makasala batok sa balaan nga espiritu.—7/15, pahina 16-17.

• Ngaa namangkot pa si Hari Saul kay David kon kay sin-o sia anak kay nag-updanay na sila anay? (1 Samuel 16:22; 17:58)

Indi lamang interesado si Saul sa paghibalo kon ano ang ngalan sang amay ni David. Bangod nakilala ni Saul nga si David mabakod sing pagtuo kag maisog kay nalutos niya si Goliat, luyag mahibaluan ni Saul kon ano nga sahi sang tawo ang nagpadaku kay David. Mahimo nga ginpamensaran ni Saul nga kuhaon man subong hangaway si Jesse, ukon ang iban pa nga katapo sang iya pamilya.—8/1, pahina 31.