Mga Pamangkot Gikan sa mga Bumalasa

San-o matapos ang pagtawag sa mga Cristiano para sa langitnon nga paglaum?

Ang Biblia wala sing espesipiko nga sabat sa sini nga pamangkot. Nahibaluan naton nga ang paghaplas sa mga disipulo ni Jesus nga may paglaum nga makabaton sing langitnon nga palanublion nagsugod sang 33 C.E. (Binuhatan 2:1-4) Nahibaluan man naton nga sang patay na ang mga apostoles, ang matuod nga hinaplas nga Cristiano nga “trigo” ‘nagtubo sing dungan’ sa huwad nga mga Cristiano, nga “mga gamhon.” (Mateo 13:24-30) Nian, sugod sang katuigan 1800, nangin aktibo liwat ang hinaplas nga mga Cristiano. Sang 1919, ginsugdan ang pag-ani sa “alanyon sang duta,” lakip ang pagtipon sa katapusan nga mga katapo sang mga hinaplas.—Bugna 14:15, 16.

Sugod sang talipuspusan sang katuigan 1800 tubtob 1931, ang panguna nga katuyuan sang pagbantala nga hilikuton amo ang pagtipon sa nabilin nga mga katapo sang lawas ni Cristo. Sang 1931 ang mga Estudyante sa Biblia nagbaton sang pasad sa Biblia nga ngalan nga Mga Saksi ni Jehova, kag sa Nobiembre 15, 1933, nga gua sang The Watchtower, ginpahayag ang pagtamod nga ining pinasahi nga ngalan amo ang “denario” nga ginapatuhuyan sa parabola ni Jesus nga narekord sa Mateo 20:1-16. Ginpatihan nga ang 12 ka oras nga ginsambit sa parabola nagahisanto sa 12 ka tuig sugod sang 1919 tubtob 1931. Sa sulod sang mga tinuig pagkatapos sini, ginpatihan nga ang pagtawag para sa langitnon nga Ginharian natapos sang 1931 kag ang gintawag nga mangin mga masigkamanunubli ni Cristo sang 1930 kag 1931 amo ang “naulihi” nga gintawag. (Mateo 20:6-8) Apang, sang 1966 ginpahayag ang bag-o nga paghangop sa sini nga parabola, kag nangin maathag nga wala ini sing kaangtanan sa katapusan sang pagtawag sa mga hinaplas.

Sang 1935, ang “dakung kadam-an” sa Bugna 7:9-15 nahangpan nga ginahuman sang “iban nga mga karnero,” nga mga Cristiano nga may dutan-on nga paglaum, nga pagatipunon sa “katapusan nga mga adlaw” kag amo ang grupo nga makalampuwas sa Armagedon. (Juan 10:16; 2 Timoteo 3:1; Bugna 21:3, 4) Pagkatapos sini nga tuig, ang katuyuan sang paghimo disipulo nga hilikuton amo na ang pagtipon sa dakung kadam-an. Busa pagligad labi na sang 1966, ginpatihan nga ang langitnon nga pagtawag natapos sang 1935. Daw matuod gid ini sang ang halos tanan  nga nabawtismuhan pagkatapos sang 1935 nagpati nga dutan-on ang ila paglaum. Sugod sadto, ginpatihan nga kon may tawgon gani para sa langitnon nga paglaum, tal-us sia sa hinaplas nga Cristiano nga wala magpabilin nga matutom.

Maathag nga kon ang isa ka hinaplas di-mahinulsulon nga magpalayo sa kamatuoran, may ginabulos sa iya si Jehova. (Roma 11:17-22) Apang, mahimo nga pila lang ang matuod nga mga hinaplas nga wala nagpabilin nga matutom. Sa pihak nga bahin, sa pagligad sang tion, may pila ka Cristiano nga nabawtismuhan sa tapos sang 1935 nga ginsaksihan sang balaan nga espiritu nga langitnon ang ila paglaum. (Roma 8:16, 17) Gani, ginapakita sini nga indi naton masiling kon san-o gid matapos ang pagtawag sa mga Cristiano para sa langitnon nga paglaum.

Paano tamdon ang isa ka tawo nga ginpahulag sang iya tagipusuon sa pagsiling nga sia isa ka hinaplas kag nagaambit sa mga emblema kon Memoryal? Indi sia dapat paghukman. Salabton niya ini kay Jehova. (Roma 14:12) Apang, ang matuod nga hinaplas nga mga Cristiano wala nagapangayo sing pinasahi nga igtalupangod. Nahibaluan nila nga indi bangod hinaplas sila may yara na sila pinasahi nga “paghangop,” nga labaw gid bisan gani sa pila ka eksperiensiado nga mga katapo sang dakung kadam-an. Wala man sila nagapati nga labaw ang pagtuytoy sang balaan nga espiritu sa ila sangsa ila kaupod nga iban nga mga karnero kag wala man sila nagapaabot nga alagaran sang iban ukon bangod nagaambit sila sa mga emblema mas mataas sila sangsa gintangdo nga mga gulang sa kongregasyon. Mapainubuson nga ginadumdom nila nga ang iban nga hinaplas nga mga lalaki sang unang siglo indi gani kalipikado nga mag-alagad subong gulang ukon ministeryal nga alagad. (1 Timoteo 3:1-10, 12, 13; Tito 1:5-9; Santiago 3:1) Ang iban nga hinaplas nga mga Cristiano maluya pa gani sa espirituwal. (1 Tesalonica 5:14) Kag ang mga kauturan nga babayi, bisan pa hinaplas, wala nagatudlo sa kongregasyon.—1 Timoteo 2:11, 12.

Busa, ang hinaplas nga mga Cristiano kag ang kaupod nila nga iban nga mga karnero nagapanikasog nga magpabilin nga mabakod sa espirituwal, nagapalambo sing mga bunga sang espiritu kag nagapanghikot para sa paghidait sang kongregasyon. Ang tanan nga Cristiano, hinaplas man ukon iban nga mga karnero, nagapangabudlay sing lakas sa pagbantala sing maayong balita kag paghimo sing mga disipulo sa idalom sang pagtuytoy sang Nagadumala nga Hubon. Malipayon nga ginahimo ini sang hinaplas nga mga Cristiano tubtob kabubut-on sang Dios nga magapabilin sila diri sa duta subong mga alagad ni Jehova.