Magdiretso sa kaundan

Magdiretso sa listahan sang kaundan

Bulig Gikan sa “Dios nga Nagahatag sang Pagbatas kag Lugpay”

Bulig Gikan sa “Dios nga Nagahatag sang Pagbatas kag Lugpay”

 Bulig Gikan sa “Dios nga Nagahatag sang Pagbatas kag Lugpay”

MGA 2,000 ka tuig na ang nagligad, ang manunulat sang Biblia nga si Pablo naglaragway kay Jehova subong “Dios nga nagahatag sang pagbatas kag lugpay.” (Roma 15:5) Sanglit ginapasalig kita sang Biblia nga si Jehova wala nagabag-o bisan san-o, makasalig kita nga ang Dios nagahatag gihapon sing lugpay sa mga nagaalagad sa iya. (Santiago 1:17) Sa katunayan, ginapakita sang Biblia nga si Jehova nagahatag sing lugpay sa nanuhaytuhay nga mga paagi sa mga tawo nga nagakinahanglan sini. Ano ining pila ka paagi? Nagahatag ang Dios sing kusog sa mga nagapangamuyo sa iya, nga nagapangayo sang iya bulig. Ginapahulag man niya ang matuod nga mga Cristiano nga lugpayan ang ila mga masigkatumuluo. Kag nagahatag si Jehova sing makalilipay nga mga rekord sa iya Pulong, ang Biblia, nga makapalig-on gid ilabi na sa mga nagalalaw bangod namatyan sing anak. Binagbinagon naton sing isa-isa ining tatlo ka paagi sang paglugpay.

“Ginpamatian Sia ni Jehova”

Nagsulat si Hari David tuhoy sa aton Manunuga nga si Jehova: “Magsalig kamo sa iya sa tanan nga tion, O katawhan. Ibubo sa atubangan niya ang inyo tagipusuon. Ang Dios amo ang aton dalangpan.” (Salmo 62:8) Ngaa nagsalig gid si David kay Jehova? Tuhoy sa iya kaugalingon, nagsulat si David: “Ini nga nagaantos nga tawo nagtuaw, kag ginpamatian sia ni Jehova. Kag ginluwas Niya sia gikan sa tanan niya nga kabudlayan.” (Salmo 34:6) Sa kada tion nga makaeksperiensia si David sing kabudlayan, nangamuyo sia pirme sa Dios agod mangayo sing bulig, kag pirme sia ginbuligan ni Jehova. Pasad sa iya naeksperiensiahan nahibaluan ni David nga buligan sia sang Dios sa pagbatas.

Dapat mahibaluan sang nagalalaw nga mga ginikanan nga pabaskugon sila ni Jehova walay sapayan  sang ila daku gid nga pagpangalisod, subong sang ginhimo niya kay David. Makapalapit sila sa dungganon nga “Manugpamati sang pangamuyo,” kag makasalig sila nga magabulig sia. (Salmo 65:2) Si William nga ginbalikwat sa nagligad nga artikulo, nagsiling: “Madamo nga beses nga sang mabatyagan ko nga daw indi na ako makapadayon sa pagkabuhi nga wala ang akon anak, nangayo ako sing bulig kay Jehova. Pirme niya ako ginhatagan sing kusog kag kaisog nga magpadayon sa pagkabuhi.” Kon mangamuyo ka man kay Jehova nga may pagtuo, pabaskugon ka sang dungganon nga Dios sang langit. Kay man, nagasaad si Jehova nga Dios sa mga nagapanikasog sa pag-alagad sa iya: “Ako, si Jehova nga imo Dios, nagauyat sang imo kamot nga tuo, ang Isa nga nagasiling sa imo, ‘Dili ka magkahadlok. Buligan ko gid ikaw.’”—Isaias 41:13.

Ang Bulig sang Matuod nga mga Abyan

Masami nga ang mga namatyan sing gamay pa nga anak nagakinahanglan sing tion sa paglalaw nga isahanon tubtob maghaganhagan ang ila ginabatyag. Apang, indi maalamon kon likawan nila ang pagpakig-upod sa iban sa malawig nga tion. Suno sa Hulubaton 18:1, “ang isa nga nagapain sang iya kaugalingon” mahimo nga mahalitan. Busa, dapat maghalong ang mga nagalalaw nga indi sila mahulog sa siod sang pagpain sang ila kaugalingon.

Ang mahinadlukon sa Dios nga mga abyan makabulig gid sa mga nagakalisod. Ang Hulubaton 17:17 nagasiling: “Ang matuod nga kaupod nagahigugma sa tanan nga tion, kag isa ka utod nga natawo kon may kapiutan.” Si Lucy, nga ginsambit man sa nagligad nga artikulo, nakaeksperiensia sing paglugpay sang matuod nga mga abyan sang mapatay ang iya anak nga lalaki. Tuhoy sa iya mga abyan sa kongregasyon, nagsiling sia: “Nakabulig gid ang ila mga pagduaw, bisan pa kon kaisa diutay lang ang ginasiling nila. Ang isa ko ka abyan nagaduaw kon isahanon lamang ako. Nahibaluan niya nga yara lang ako sa balay nga nagahibi, kag masami nga nagakadto sia kag maghibi upod sa akon. Ang isa ko pa ka abyan nagatelepono sa akon kada adlaw agod palig-unon ako. Ang iban pa gid nagaagda sa amon nga magkaon sa ila balay, kag padayon nga ginahimo nila ini.”

Bisan pa indi madali madula ang tudok nga pagbakho sang namatyan sing anak nga mga ginikanan, ang pangamuyo sa Dios kag ang pagpakig-upod sa matuod nga Cristiano nga mga abyan makalugpay gid sa mga nagalalaw.  Naeksperiensiahan sang madamo nga Cristiano nga mga ginikanan nga namatyan sing anak nga wala sila ginapabay-an ni Jehova. Huo, “ginaayo [ni Jehova] ang mga may buong nga tagipusuon, kag ginabugkusan niya ang ila masakit nga mga bahin.”—Salmo 147:3.

Mga Rekord sa Biblia nga Makalugpay

Dugang sa pangamuyo kag makapalig-on nga paghiliupod, ang nasulat nga Pulong sang Dios makalugpay sa mga nagalalaw. Ginapakita sang mga rekord sa Biblia nga si Jesus may tudok nga handum kag ikasarang sa pagdula sang pagbakho sang namatyan nga mga ginikanan paagi sa pagbanhaw sa mga patay. Ini nga mga rekord makalugpay gid sa mga nagalalaw. Binagbinagon naton ang duha sini nga mga rekord.

Ginalaragway sang Lucas kapitulo 7 kon ano ang natabo sang masugata ni Jesus ang isa ka prosesyon sang lubong sa siudad sang Nain. Ilubong sang mga tawo ang bugtong nga anak nga lalaki sang isa ka babayi nga balo. Ang bersikulo 13 nagasiling: “Sang nakita sang Ginuo ang babayi, napahulag sia sang kaluoy sa iya, kag nagsiling sia sa iya: ‘Indi ka na maghibi.’”

Wala sing mangisog nga magsiling sa isa ka iloy sa lubong sang iya anak nga untatan ang paghibi. Apang, ngaa nagsiling sina si Jesus? Bangod nahibaluan niya nga indi madugay madula na ang kalisod sang iloy. Nagpadayon ang rekord sa pagsugid: “Nagpalapit [si Jesus] kag gintandog ang tulungtungan sang patay, kag ang mga nagadala sini nagdulog, kag nagsiling sia: ‘Pamatan-on, nagasiling ako sa imo, Bangon ka!’ Kag ang patay nagpungko kag naghambal, kag ginhatag niya sia sa iya iloy.” (Lucas 7:14, 15) Sadto nga tion, mahimo gid nga naghibi liwat ang iloy, apang sini nga tion naghibi sia bangod sa kalipay.

 Sang isa pa ka higayon, ginpalapitan si Jesus sang isa ka tawo nga ang iya ngalan amo si Jairo, agod mangayo sing bulig para sa iya 12 anyos nga anak nga babayi nga nagamasakit sing grabe. Apang dugaydugay, nag-abot ang balita nga patay na ang iya anak nga babayi. Nagkasubo gid si Jairo sa sini nga balita, apang ginsingganan sia ni Jesus: “Indi ka magkahadlok, magtuo ka lamang.” Sa puluy-an sang pamilya, nagsulod si Jesus agod kadtuan ang wala sing kabuhi nga dalagita. Gin-uyatan ni Jesus ang kamot sang dalagita kag nagsiling: “Inday, ginasiling ko sa imo, Bangon ka!” Ano ang natabo? ‘Sa gilayon ang dalagita, nagbangon kag naglakat.’ Ano ang reaksion sang iya mga ginikanan? “Nahayanghag sila kag nagkalipay sing daku.” Sang ginhakos nanday Jairo kag sang iya asawa ang ila anak, tudok gid ang ila kalipay. Daw nagadamgo lamang sila.—Marcos 5:22-24, 35-43.

Ginapakita sining detalyado nga mga rekord sa Biblia tuhoy sa pagkabanhaw sang mga kabataan kon ano ang mapaabot sang nagalalaw nga mga ginikanan karon. Nagsiling si Jesus: “Magaabot ang tion nga ang tanan nga yara sa handumanan nga mga lulubngan makabati sang iya tingog kag magagua.” (Juan 5:28, 29) Katuyuan ni Jehova nga hatagan sang iya Anak sing kabuhi ang mga napatay. Minilyon ka napatay nga kabataan ang “makabati sang iya tingog” kon maghambal sia sa ila: “Ginasiling ko sa imo, Bangon ka!” Ang napatay nga mga kabataan magalakat liwat kag magahambal. Kag kaangay ni Jairo kag sang iya asawa, ang mga ginikanan sang napatay nga mga kabataan ‘mahayanghag kag magkalipay sing daku.’

Kon namatyan ka sing anak, palihug indi pagkalipati nga sarang mabayluhan ni Jehova sing kalipay ang imo kalisod paagi sa pagkabanhaw. Agod makabenepisyo sa sining matahom nga paglaum, tumana ang laygay sang salmista: “Pangitaa si Jehova kag ang iya kusog. Pangitaa ninyo pirme ang iya nawong. Dumduma ang iya makatilingala nga mga buhat nga iya ginhimo, ang iya mga milagro.” (Salmo 105:4, 5) Huo, alagda ang matuod nga Dios nga si Jehova, kag simbaha sia sa paagi nga nahamut-an niya.

Ano ang mangin resulta dayon kon ‘pangitaon mo si Jehova’? Makabaton ka sing kusog paagi sa pagpangamuyo sa Dios, malugpayan ka sang mahigugmaon nga pag-ulikid sang matuod nga Cristiano nga mga kaupod, kag mapalig-on ka paagi sa pagtuon sing Pulong sang Dios. Dugang pa, sa malapit nga palaabuton, maeksperiensiahan mo ang ‘makatilingala nga mga buhat kag mga milagro’ nga himuon ni Jehova para sa imo dayon nga kaayuhan kag sang imo man napatay nga mga anak.

[Kahon sa pahina 5]

“Pakadtua Diri ang Babayi nga Namatyan sing Duha ka Anak”

Sanday Kehinde kag Bintu, mag-asawa nga mga Saksi ni Jehova nga taga-Nigeria, namatyan sing duha ka anak sa isa ka aksidente sa salakyan. Sugod sang matabo ini nga aksidente, nagabakho gid sila. Walay sapayan sini, ginapabaskog sila sang ila pagsalig kay Jehova, kag padayon gihapon nga ginapaambit nila sa ila mga isigkatawo ang mensahe sang paglaum nga ginahatag sang Biblia.

Natalupangdan sang iban ang kalinong kag kabakod nga ginapakita nanday Kehinde kag Bintu. Isa ka adlaw ginsilingan ni Gng. Ukoli ang isa sa mga abyan ni Bintu: “Pakadtua man diri ang babayi nga namatyan sing duha ka anak kag nagabantala gihapon sing mensahe sang Biblia. Luyag ko mahibaluan kon ano ang nagapabaskog sa iya.” Sang mag-abot si Bintu sa balay ni Gng. Ukoli, ginsilingan sia: “Luyag ko mahibaluan kon ngaa nagabantala ka gihapon tuhoy sa Dios nga amo ang nagpatay sa imo mga anak. Ginkuha sang Dios ang akon bugtong nga anak nga babayi. Halin sadto, indi na ako interesado sa Dios.” Gingamit ni Bintu ang Biblia agod ipaathag ang rason kon ngaa nagakapatay ang mga tawo kag kon ngaa makalaum gid kita nga banhawon ang aton napatay nga mga hinigugma.—Binuhatan 24:15; Roma 5:12.

Pagkatapos sang ila paghambalanay, nagsiling si Gng. Ukoli: “Nagdumdom ako anay nga kon mapatay ang mga tawo ginakuha na sila sang Dios. Nahibaluan ko na karon ang matuod.” Namat-od sia nga magtuon sing Biblia upod sa mga Saksi ni Jehova agod makatuon sing dugang pa tuhoy sa mga saad sang Dios.

[Kahon sa pahina 6]

‘Luyag Ko Magbulig, Apang Indi Ako Makahibalo Kon Paano’

Bisan pa nagabakho ang mga ginikanan kag ang mga utod sang napatay nga bata, mahimo nga mag-alang-alang gihapon ang ila mga abyan. Luyag nila makabulig sa pamilya apang nahangawa sila nga basi madugangan pa ang pagbakho sang pamilya sa ila isiling ukon himuon. Yari ang pila ka panugda para sa mga tawo nga nagasiling, ‘Luyag ko magbulig, apang indi ako makahibalo kon paano.’

❖ Indi paglikawi ang mga namatyan bangod lamang indi ka pat-od kon ano ang isiling ukon himuon. Mapalig-on sila bisan kon magkadto ka lang. Nabudlayan ka bala kon ano ang ihambal? Ang isa ka hakos kag sinsero nga pagsiling “Ginakasubo ko ang natabo sa imo anak” magapahibalo sa ila nga nagapakigsimpatiya ka sa ila. Nahangawa ka bala nga kon maghibi ka, basi madugangan pa ang ila kalisod? Ang Biblia nagasiling: “Maghibi upod sa mga tawo nga nagahibi.” (Roma 12:15) Ginapakita sang imo paghibi nga nagakasubo man ikaw, kag makalugpay ina.

❖ Magboluntaryo. Makaluto ka bala sing simple lang nga kalan-on para sa pamilya? Mahugasan mo bala ang nagtumpok nga mga hulugasan? Mahimo bala nga ikaw ang mamalaklon sang ila ipabakal? Indi magsiling, “Pahibal-a lang ako kon may kinahanglan kamo.” Ini nga mga pulong, bisan pa ginasiling sing sinsero, magapatimaan sa madamo nga namatyan nga mga ginikanan nga masako ikaw, gani wala ikaw sing tiempo sa pagbulig sa ila. Sa baylo, pamangkuta sila “Ano ang sarang ko mahimo agod makabulig ako sa inyo subong?” kag pagkatapos himua ang ila ginapangabay. Apang likawi nga atrebihan ang pribado nga mga bahin sang ila puluy-an ukon ang ila kabuhi.

❖ Likawi ang pagsiling, “Nahangpan ko ang imo ginabatyag.” Lainlain ang reaksion sang tagsa ka tawo sa pagkapatay sang iya hinigugma. Bisan pa kon namatyan ka man sing anak, indi mo nahibaluan sing eksakto gid kon ano ang ila ginabatyag.

❖ Madugaydugayan pa antes mangin normal liwat ang pagsinalayo sang pamilya. Padayuna ang pagbulig tubtob sa masarangan mo. Sa primero, masami nga madamo ang nagabulig sa namatyan nga pamilya, apang dugang pa nga bulig ang kinahanglan nila. Mangin alerto sa kon ano ang kinahanglanon nila sa masunod nga mga semana kag mga bulan. *

[Footnote]

^ par. 29 Para sa dugang pa nga impormasyon kon paano buligan ang mga nagalalaw sa pagkapatay sang isa ka anak, tan-awa ang kapitulo nga “Paano ang Iban Makabulig?” pahina 20-4 sang brosyur nga Kon Ang Isa nga Ginahigugma Mo Mapatay, nga ginabalhag sang mga Saksi ni Jehova.

[Mga piktyur sa pahina 7]

Ginapakita sang mga rekord sa Biblia nga si Jesus may gahom kag handum nga banhawon ang napatay nga mga kabataan