Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Ti, tilawi kon masabat mo ang masunod nga mga pamangkot:

• Ano ang matun-an naton gikan sa ilustrasyon ni Jesus tuhoy sa mapiliton nga tagbalay? (Lucas 11:5-10)

Ginapakita sini nga ilustrasyon ang dapat nga panimuot naton kon nagapangamuyo kita. Dapat kita magpamilit, ukon padayon nga magpangayo, ilabi na sing balaan nga espiritu sang Dios. (Lucas 11:11-13)—12/15, pahina 20-2.

• Ano nga leksion ang ginatudlo sa aton sang ilustrasyon ni Jesus tuhoy sa balo nga babayi kag hukom? (Lucas 18:1-8)

Ginapadaku sini nga dapat kita magpangamuyo. Indi kaangay sa hukom, si Jehova matarong kag luyag niya nga buligan kita. Dugang pa, dapat may pagtuo kita nga kaangay sa pagtuo sang balo nga babayi sa ilustrasyon.—12/15, pahina 26-8.

• Ngaa ginsilingan ni apostol Pablo ang mga Cristiano sa Corinto nga “magpasangkad”? (2 Corinto 6:11-13)

Ang pila sa Corinto mahimo nga wala sing apresasyon sa ila mga masigkatumuluo kay indi sila maalwan. Dapat kita magtinguha nga palambuon ang matuod nga apresasyon sa aton mga masigkatumuluo kag manikasog nga makasugod sing bag-o nga mga pag-abyanay.—1/1, pahina 9-11.

• Ano nga pagpat-in ang ginapatuhuyan sa Bugna 7:3?

Kon ang mga Cristiano haplasan sang Dios sing balaan nga espiritu, nabaton nila ang nahauna nga pagpat-in. Apang ang Bugna 7:3 nagapatuhoy sa katapusan nga pagpat-in, kon ining mga ginhaplasan napamatud-an na nga bug-os nga nagpakita sang ila pagkamainunungon.—1/1, pahina 30-1.

• Ano ang matun-an sang mga ginikanan sa rekord sang Biblia tuhoy kay Samuel?

Una, dapat nila tudluan ang ila kabataan sing pulong sang Dios, kay pat-od nga gintudluan si Samuel sang iya mga ginikanan. Dugang pa, dapat nila palig-unon ang ila kabataan nga himuon nga karera ang pag-alagad kay Jehova.—1/15, pahina 16.

• Paano naton mapakita nga malipayon kita samtang nagahulat kay Jehova?

‘Ginahulat naton . . . ang adlaw ni Jehova,’ kag ginapaabot ang kaumpawan kon laglagon na niya ang di-diosnon nga mga tawo. (2 Pedro 3:7, 12) Bisan pa luyag na gid ni Jehova nga dulaon ang tanan nga kalautan, nagapugong sia anay agod maluwas niya ang mga Cristiano sa paagi nga magahimaya sang iya ngalan. Dapat kita magsalig nga nahibaluan ni Jehova kon san-o gid ang nagakaigo nga tion sa paghikot, kag samtang wala pa ini, dapat kita mangin masako sa pagdayaw sa iya. (Salmo 71:14, 15)—3/1, pahina 17-18.

• Tigpitopito bala ukon tigpito ka paris sang matinlo nga sapat ang ginpasulod ni Noe sa arka?

Ginsugo si Noe nga ‘magkuha sing tigpitopito’ sa tagsa ka matinlo nga sapat. (Genesis 7:1, 2) Sa Hebreo, ang tinaga nga “tigpitopito” literal nga mabasa sing “pito pito.” Ini nga paagi sa paghambal wala nagakahulugan sing pito ka paris, subong sang ginapakita sang iban nga teksto sa Biblia. Maathag nga nagkuha si Noe sing tigpito sa tagsa ka sapat, tatlo ka paris kag isa pa nga gamiton niya sa ulihi sa paghalad. (Genesis 8:20)—3/15, pahina 31.

• Ngaa dapat ‘panilagan’ sang mga Cristiano ang resulta sang pagtuo sang mga gulang, nga amo ang nagapanguna?

Ginaagda kita ni apostol Pablo nga ‘panilagan,’ ukon obserbahan sing maayo, ang resulta sang matutom nga paggawi sang mga gulang kag ilugon ang halimbawa sang ila pagtuo. (Hebreo 13:7) Ginahimo naton ini bangod amo ini ang ginasugo sang Pulong sang Dios nga himuon naton. Dugang pa, kumbinsido kita nga ang mga gulang nagakabalaka sa mga intereses sang Ginharian kag sa aton kaayuhan.—4/1, pahina 28.