Magdiretso sa kaundan

Magdiretso sa listahan sang kaundan

Itudlo kon Ano gid ang Ginatudlo sang Biblia

Itudlo kon Ano gid ang Ginatudlo sang Biblia

 Itudlo kon Ano gid ang Ginatudlo sang Biblia

“Maghimo [kamo] sing mga disipulo sa mga tawo sang tanan nga pungsod, . . . nga nagapanudlo sa ila.”—MATEO 28:19, 20.

1. Ano ang masiling tuhoy sa kon daw ano ka lapnag ang Biblia?

ANG Pulong ni Jehova, ang Balaan nga Biblia, amo ang isa sa pinakadumaan kag pinakalapnag nga ginpanagtag nga libro sa kalibutan. Ang iban nga bahin sini ginbadbad sa kapin sa 2,300 ka lenguahe. Matigayon ini sang kapin sa 90 porsiento sang mga pumuluyo sang duta sa ila lenguahe.

2, 3. (a) Ngaa may kagumon tuhoy sa kon ano ang ginatudlo sang Biblia? (b) Ano nga mga pamangkot ang binagbinagon naton?

2 Minilyon ka tawo ang nagabasa sang Biblia kada adlaw. Ang iban naman madamo nga beses na nga nakabasa sang bug-os nga Biblia. Linibo ka relihioso nga mga grupo ang nagasiling nga ang ila mga panudlo napasad kuno sa Biblia, apang wala sila nagaugyunay sa kon ano ang ginatudlo sini. Nagadugang pa sa kagumon amo ang indi pag-ugyunay sa ulot sang mga miembro sang amo man nga relihion. Ginaduhaduhaan sang iban ang Biblia, ang ginhalinan sini, kag ang mga kabilihanan sini. Ginatamod ini sang madamo subong isa lamang ka sagrado nga libro nga ginagamit sa paghimo sing mga panaad ukon sa pagpanumpa sa pagsugid sang kamatuoran sa korte.

3 Ang matuod, ang Biblia nagaunod sing gamhanan nga pulong sang Dios, ukon mensahe, para sa katawhan. (Hebreo 4:12) Busa, subong mga Saksi ni Jehova, luyag naton nga mahibaluan sang mga tawo kon ano ang ginatudlo sang Biblia. Nalipay kita sa pagtuman sa ginsugo ni Jesucristo sa iya mga sumulunod sang sia nagsiling: “Lakat kamo kag maghimo sing mga disipulo sa mga tawo sang tanan nga pungsod, . . . nga nagapanudlo sa ila.” (Mateo 28:19, 20) Sa aton pangpubliko nga ministeryo, masapwan naton ang bunayag sing tagipusuon nga mga tawo nga naligban bangod sa kinagumon sa relihion nga lapnag sa kalibutan. Luyag nila mahibaluan ang kamatuoran tuhoy sa aton Manunuga kag kon ano ang ginasiling sang Biblia tuhoy sa kahulugan sang kabuhi. Binagbinagon naton ang tatlo ka pamangkot nga ginapaligban sang madamo nga tawo. Sa tagsa ka pamangkot, matalupangdan naton kon ano ang sayop nga ginasiling sang relihioso nga mga lider, kag nian usisaon naton kon ano gid ang ginatudlo sang Biblia. Ang mga pamangkot amo: (1) Nagaulikid bala ang Dios sa aton? (2) Ngaa yari kita diri? (3) Ano ang nagakatabo sa aton kon mapatay kita?

Nagaulikid Bala ang Dios?

4, 5. Ngaa nagapati ang iban nga wala nagaulikid ang Dios sa aton?

4 Unahon naton ang pamangkot, Nagaulikid bala ang Dios sa aton? Makapasubo nga madamo nga tawo ang nagahunahuna nga ang sabat wala. Ngaa amo sini ang ila pagpati? Ang isa ka rason amo nga nagakabuhi sila sa kalibutan nga puno sang dumot, inaway, kag pag-antos. ‘Kon nagaulikid gid man ang Dios,’ siling nila, ‘pat-od nga indi gid niya pagtugutan nga mahanabo ining makahalanusbo nga mga butang.’

5 Ang isa pa ka rason kon ngaa nagapati ang mga tawo nga wala nagaulikid ang Dios bangod amo sina ang ginapapati sa ila sang ila relihioso nga mga lider. Ano ang masami nga ginasiling sang mga klero kon may kalamidad? Sang napatay ang duha ka gamay nga kabataan sang isa ka iloy bangod sang  aksidente sa salakyan, ang ila ministro nagsiling: “Kabubut-on ini sang Dios. Ang Dios nagakinahanglan sing duha pa ka anghel.” Kon ang mga klero magsiling sini, ang Dios amo gid ang ila ginabasol tungod sa malaut nga mga butang nga nagakatabo. Apang, si disipulo Santiago nagsiling: “Kon yara sa pagtilaw, wala sing isa ang magsiling: ‘Ginatilawan ako sang Dios.’ Kay ang Dios indi matilawan sa malaut nga mga butang kag wala man sia nagatilaw kay bisan sin-o.” (Santiago 1:13) Indi gid si Jehova nga Dios ang nagapahanabo sang kalautan. Sa pagkamatuod, “malayo sa matuod nga Dios nga maghimo sia sing pagkamalaut.”—Job 34:10.

6. Sin-o ang sa likod sang kalautan kag pag-antos sa sini nga kalibutan?

6 Kon amo, ngaa lapnag gid ang kalautan kag pag-antos? Ang isa ka rason amo nga ginsikway sang mga tawo ang Dios subong Manuggahom, kay indi nila luyag magpasakop sa iya matarong nga mga kasuguan kag mga prinsipio. Ang mga tawo wala sing hinalung-ong nga nagpasakop sa Kaaway sang Dios, si Satanas, bangod “ang bug-os nga kalibutan yara sa gahom sang isa nga malauton.” (1 Juan 5:19) Bangod sini nga kamatuoran, madali mahangpan kon ngaa nagakatabo ang malain nga mga kahimtangan. Si Satanas malaut, madumot, madaya, kag mapintas. Gani mapaabot gid naton nga ang kalibutan magapakita man sang mga kinaiya sang manuggahom sini. Indi katingalahan kon ngaa lapnag gid ang kalautan!

7. Ano ang pila ka rason sang aton pag-antos?

7 Ang tawhanon nga pagkadihimpit isa pa ka rason sang aton pag-antos. Ang makasasala nga mga tawo luyag gid nga magdominar sa iban, kag sa masami nagaresulta ini sa mga inaway, pagpigos, kag pag-antos. Ang Manugwali 8:9 nagakaigo nga nagasiling: “Gingamhan sang tawo ang tawo sa iya kasamaran.” Ang dugang pa nga rason sang pag-antos amo “ang tion kag wala ginapaabot nga hitabo.” (Manugwali 9:11) Sa masami, ang mga tawo nagaeksperiensia sing mga kalamidad bangod natabuan sila sa isa ka lugar sa indi husto nga tion.

8, 9. Paano naton napat-od nga nagaulikid gid si Jehova sa aton?

8 Makalulugpay mahibaluan nga si Jehova indi amo ang nagapahanabo sang pag-antos. Apang nagaulikid gid bala ang Dios sa nagakatabo sa aton kabuhi? Makalilipay gid nga huo ang sabat! Nahibaluan naton nga nagaulikid gid si Jehova bangod ang iya inspirado nga Pulong nagasugid sa aton kon ngaa gintugutan niya ang mga tawo nga maglakat sa isa ka malaut nga dalanon. Ang rason sang Dios nagalakip sang duha sa hulusayon: ang iya pagkasoberano kag ang integridad sang mga tawo. Bangod sia ang labing gamhanan nga Manunuga, indi obligado si Jehova nga sugiran kita kon ngaa ginatugutan niya ang pag-antos. Apang, ginasugiran niya kita bangod nagaulikid sia sa aton.

9 Binagbinaga ang dugang pa nga pamatuod nga ang Dios nagaulikid sa aton. “Nasaklaw ang iya tagipusuon” sang napuno sang kalautan ang duta sang panahon ni Noe. (Genesis 6:5, 6) Tuhay bala ang ginabatyag sang Dios karon? Indi, kay wala sia nagabag-o. (Malaquias 3:6) Ginakangil-aran niya ang inhustisya kag wala sia nahamuot nga makita nga nagaantos ang katawhan. Ginatudlo sang Biblia nga  sa dili madugay dulaon sang Dios ang tanan nga kahalitan nga resulta sang paggahom sang tawo kag sang impluwensia sang Yawa. Indi bala ina makapakumbinsi nga pamatuod nga nagaulikid gid ang Dios sa aton?

10. Ano ang ginabatyag ni Jehova tuhoy sa pag-antos sang tawo?

10 Ang mga lider sang relihion nagatudlo sing sayop tuhoy sa Dios kon magsiling sila nga pagbuot sang Dios ang mga trahedya nga nagaabot sa aton. Sa kabaliskaran, luyag gid ni Jehova nga dulaon ang pag-antos sang tawo. “Nagaulikid sia sa inyo,” siling sang 1 Pedro 5:7. Amo gid sina ang ginatudlo sang Biblia!

Ngaa Yari Kita Diri?

11. Ano sa masami ang ginasiling sang mga relihion sang kalibutan tuhoy sa pagkabuhi sang tawo sa duta?

11 Binagbinagon naton karon ang ikaduha nga pamangkot nga ginapaligban sang madamo, Ngaa yari kita diri? Ang masami nga sabat sang mga relihion sang kalibutan amo nga ang tawo nagaluntad lamang sa duta sing temporaryo. Ginatamod nila ang aton duta subong isa lamang ka duog nga ginadulugan sing makadali, sa paglakbay padulong sa iban nga duog. Sayop nga ginatudlo sang iban nga mga klerigo nga laglagon sang Dios ini nga planeta sa pila ka adlaw. Subong resulta sini nga mga panudlo, madamo nga tawo ang nangatarungan nga mapinagusto na lang sila, total mapatay man sila gihapon. Ano gid ang ginatudlo sang Biblia tuhoy sa kon ngaa yari kita diri?

12-14. Ano ang ginatudlo sang Biblia may kaangtanan sa katuyuan sang Dios para sa duta kag para sa mga tawo?

12 May makalilipay nga katuyuan ang Dios para sa duta kag para sa mga tawo. “Wala [sia] magtuga sini sa walay pulos” kundi “naghuman sini agod puy-an.” (Isaias 45:18) Dugang pa, “ginpasad [ni Jehova] ang duta sa malig-on nga mga duog sini; indi ini mationg tubtob sa tion nga walay latid, ukon sing dayon.” (Salmo 104:5) Ini nga ihibalo tuhoy sa katuyuan sang Dios para sa duta kag para sa mga tawo makabulig sa aton agod mahangpan kon ngaa yari kita diri.

13 Ginapakita sang Genesis kapitulo 1 kag 2 nga ginhanda gid sing maayo ni Jehova ang duta agod puy-an sang tawo. Pagkatapos sang tion sang pagpanuga sa aton duta, ang tanan nga butang “tama gid kaayo.” (Genesis 1:31) Ginpapuyo sang Dios ang una nga lalaki kag babayi, sanday Adan kag Eva, sa matahom nga hardin sang Eden kag gin-amanan sila sing bugana nga manamit nga mga pagkaon. Ginsugo ang una nga mag-asawa: “Magmabungahon kamo kag magbuad kag tugbon ninyo ang duta kag gamhan ini.” Magapanganak sila sing himpit nga mga anak, pasangkaron nila ang ila hardin nga puluy-an sa bug-os nga duta, kag dumalahan nila sing mahigugmaon ang mga kasapatan.—Genesis 1:26-28.

14 Katuyuan ni Jehova nga may isa ka himpit nga pamilya sang mga tawo nga magapuyo sa duta sing dayon. Ang Pulong sang Dios nagsiling: “Ang matarong magapanag-iya sang duta, kag magapuyo sila sing dayon sa sini.” (Salmo 37:29) Huo, gintuga ang mga tawo agod mabuhi sing dayon sa Paraiso sa duta. Amo ini ang katuyuan sang Dios, kag amo gid ini ang ginatudlo sang Biblia!

Ano ang Nagakatabo sa Aton sa Kamatayon?

15. Ano ang ginatudlo sang kalabanan nga mga relihion tuhoy sa nagakatabo sa aton kon mapatay kita?

15 Binagbinagon naton karon ang ikatlo nga pamangkot nga ginapaligban sang madamo: Ano ang nagakatabo sa aton kon mapatay kita? Ang kalabanan nga mga relihion sa kalibutan nagatudlo nga may isa ka butang sa sulod sang tawo nga padayon  nga nagakabuhi kon mapatay ang lawas. Ang iban nga mga relihion nagapati gihapon nga ginasilutan sang Dios ang mga malauton paagi sa pagpaantos sa ila sing dayon sa kalayuhon nga impierno. Apang amo bala ini ang kamatuoran? Ano gid ang ginatudlo sang Biblia tuhoy sa kamatayon?

16, 17. Suno sa Biblia, ano ang kahimtangan sang mga patay?

16 Ang Pulong sang Dios nagsiling: “Ang mga buhi nakahibalo nga mapatay sila; apang nahanungod sa mga patay, wala sila makahibalo sing bisan ano, ukon may suhol pa sila.” Sanglit ang patay ‘wala makahibalo sing bisan ano,’ indi sila makabati, makakita, makahambal, makabatyag, ukon makahunahuna. Indi na sila makabaton sing suhol. Paano abi sila makabaton? Indi na gani sila makasarang sing bisan ano nga hilikuton ukon trabaho! Isa pa, “ang ila gugma kag ang ila dumot kag ang ila kaimon nadula na,” kay indi na sila makapabutyag sing bisan ano nga balatyagon.—Manugwali 9:5, 6, 10.

17 Ang ginasiling sang Biblia tuhoy sa sini nga topiko simple kag maathag—ang patay wala na nagakabuhi sa iban pa nga duog. Wala na sing nagagua sa aton lawas kon mapatay kita kag padayon nga nagakabuhi kag nagaliton sa iban nga lawas, subong sang ginasiling sang mga nagapati sa reinkarnasyon. Mahimo naton ini mailustrar sa sining paagi: Ang aton kabuhi daw kaangay sang kalayo sang kandila. Kon mapalong ang kalayo, wala ini sing ginakadtuan. Wala na ini nagaluntad.

18. Sa tion nga matun-an sang isa ka estudyante sa Biblia nga ang mga patay wala na gali sing nahibaluan nga bisan ano, ano ang iya mahimo ihinakop?

18 Binagbinaga ang mga epekto sining isa ka simple apang makapakumbinsi nga kamatuoran. Sa tion nga matun-an sang isa ka estudyante sa Biblia nga ang mga patay wala na gali sing bisan ano nga nahibaluan, makahinakop sia gilayon nga bisan daw ano pa ka madinumtanon ang napatay niya nga mga katigulangan sang buhi pa sila, indi nila sia karon matublag. Mahangpan man niya gilayon nga ang iya napatay nga hinigugma indi na makabati, makakita, makahambal, makabatyag, ukon makahunahuna. Busa, wala sila nagaantos sa indi maagwanta nga kasubo sa purgatoryo ukon nagaantos sa isa ka kalayuhon nga duog. Apang, ginatudlo sang Biblia nga ang mga patay nga yara sa handumanan sang Dios banhawon. Daw ano gid ka makalilipay nga paglaum!—Juan 5:28, 29.

Isa ka Bag-o nga Libro nga Magamit Naton

19, 20. Subong mga Cristiano, ano ang aton salabton, kag ano nga bulig sa pagtuon sa Biblia ang gindesinyo ilabi na agod gamiton naton sa ministeryo?

19 Ginbinagbinag naton ang tatlo lamang sa mga pamangkot nga masami ginapaligban sang madamo nga tawo. Sa tagsa ka pamangkot, maathag kag direkta ang ginatudlo sang Biblia. Makalilipay gid nga ipaambit ini nga mga kamatuoran sa mga tawo nga luyag makahibalo kon ano ang ginatudlo sang Biblia! Apang, ang bunayag sing tagipusuon nga mga tawo madamo pa sing importante nga mga pamangkot nga nagakinahanglan sing makapakumbinsi nga mga sabat. Subong mga Cristiano, salabton naton nga buligan sila nga makita ang mga sabat sa sini nga mga pamangkot.

20 Isa ka hangkat ang pagtudlo sang Makasulatanhon nga kamatuoran sing maathag apang makagalanyat sa tagipusuon. Agod maatubang ini nga hangkat, “ang matutom kag mainandamon nga ulipon” nag-aman sing isa ka libro nga gindesinyo ilabi na para gamiton naton sa aton Cristianong ministeryo. (Mateo 24:45-47) Ining 224-ka pahina nga libro may tig-ulo nga Ano Gid ang Ginatudlo Sang Biblia?

21, 22. Ano ang pila ka talalupangdon kag pinasahi nga mga bahin sang libro nga Ano Gid ang Ginatudlo Sang Biblia?

 21 Ining libro nga ginpagua sang 2005/06 nga “Diosnon nga Pagkamatinumanon” Distrito nga Kombension sang mga Saksi ni Jehova, may nanuhaytuhay nga talalupangdon kag pinasahi nga mga bahin. Halimbawa, may yara ini lima ka pahina nga introduksion nga gindesinyo agod buligan kita nga makasugod sing mga pagtuon sa Biblia sa puluy-an. Masapwan mo nga mahapos lang hinun-anunan ang mga laragway kag mga teksto sa introduksion. Magamit mo man ang materyal sa sini nga seksion agod tudluan ang mga estudyante sa pagpangita sang mga kapitulo kag mga bersikulo sa Biblia.

22 Ang estilo sang pagsulat sa sini nga libro simple kag maathag. Daku gid nga panikasog ang ginhimo agod malab-ot ang tagipusuon sang estudyante paagi sa pagdalahig sa iya tubtob posible. Ang kada kapitulo may pila ka nagabukas nga mga pamangkot kag may kahon nga ginatig-uluhan “Ang Ginatudlo Sang Biblia.” Ang kahon nagaunod sang Makasulatanhon nga mga sabat sa nagabukas nga mga pamangkot. Ang matahom nga mga laragway kag mga kapsion subong man ang mga halimbawa kag mga ilustrasyon sa sini nga publikasyon magabulig sa mga estudyante nga mahangpan ang bag-o nga mga ideya. Bisan pa ang panguna nga kaundan sang libro ginhuptan nga simple, may yara apendise nga magatugot sa imo nga mabinagbinag ang 14 ka importante nga topiko sing mas detalyado kon ang estudyante nagakinahanglan sing dugang nga impormasyon.

23. Paano mo gamiton ang Ginatudlo Sang Biblia nga libro sa mga pagtuon sa Biblia?

23 Ang libro nga Ginatudlo Sang Biblia gindesinyo agod buligan kita nga tudluan ang mga tawo nga may nanuhaytuhay nga tinun-an kag relihion. Kon ang estudyante wala pa sing ihibalo sa Biblia, mahimo ninyo matuptupan ang isa ka kapitulo sing kapin sa isa ka sesyon sang pagtuon. Indi pagtuptupi ang materyal sing padali, apang panikasugi nga lab-uton ang tagipusuon sang estudyante. Kon indi niya mahangpan ang isa ka ilustrasyon nga gingamit sa libro, ipaathag ini ukon maggamit sang iban pa nga ilustrasyon. Maghanda sing maayo, himua ang imo bug-os nga masarangan nga gamiton ang libro sing epektibo, kag mangamuyo sa Dios nga buligan ka nga ‘magamit sing husto ang pulong sang kamatuoran.’—2 Timoteo 2:15.

Magpasalamat Kamo sa Inyo Hamili nga mga Pribilehiyo

24, 25. Anong hamili nga mga pribilehiyo ang ginhatag ni Jehova sa iya katawhan?

24 Ginhatagan ni Jehova ang iya katawhan sing hamili nga mga pribilehiyo. Ginbuligan niya kita nga matun-an ang kamatuoran tuhoy sa iya. Indi gid naton dapat pasapayanan ina nga pribilehiyo! Ang matuod, ginlikom sang Dios ang iya mga katuyuan sa mga matinaastaason kag ginpahayag ini sa mga mapainubuson. Tuhoy sini, si Jesus nagsiling: “Nagadayaw ako sing dayag sa imo, Amay, Ginuo sang langit kag duta, bangod gintago mo ini nga mga butang gikan sa mga maalam kag mga intelihente kag ginpahayag ini sa gamay nga mga bata.” (Mateo 11:25) Tumalagsahon gid nga kadungganan nga malakip sa mga mapainubuson nga nagaalagad sa Soberano sang Bug-os nga Uniberso, si Jehova.

25 Ginhatagan man kita sang Dios sing pribilehiyo nga tudluan ang iban tuhoy sa iya. Dumduma nga nagpaalinton sing sayop nga impormasyon ang mga nagtudlo sing kabutigan tuhoy sa iya. Busa, madamo nga tawo ang may sayop gid nga pagkakilala kay Jehova, nagahunahuna sila nga wala sia nagaulikid kag wala sing balatyagon. Handa ka bala, kag nalangkag pa gani, nga tadlungon ining sayop nga pagkakilala? Luyag mo bala nga mahibaluan sang tanan nga bunayag sing tagipusuon ang kamatuoran tuhoy sa Dios? Busa ipakita ang imo diosnon nga pagkamatinumanon paagi sa makugi nga pagbantala kag paagi sa pagtudlo sa iban kon ano ang ginasiling sang Kasulatan tuhoy sa importante nga mga topiko. Dapat matun-an sang mga nagapangita sing kamatuoran kon ano gid ang ginatudlo sang Biblia.

Ano ang Imo Sabat?

• Ano ang pamatuod nga nagaulikid ang Dios sa aton?

• Ngaa yari kita diri?

• Ano ang nagakatabo sa aton kon mapatay kita?

• Ano nga pinasahi nga mga bahin sang libro nga Ginatudlo Sang Biblia ang imo gid naluyagan?

[Mga Pamangkot sa Pagtinuon]

[Piktyur sa pahina 22]

Ginatudlo sang Biblia nga ang pag-antos dulaon

[Credit Line]

Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures

[Piktyur sa pahina 23]

Ang mga matarong magakabuhi sing dayon sa Paraiso