Kadalag-an​—Ano ang Imo Talaksan Sini?

SI Jesse Livermore ginatamod sang iban subong ang labing madinalag-on nga negosyante sang stock sa Wall Street, kag kilala nga maayo magkapot sang negosyo. Bangod sini, nakatipon sia sing daku nga manggad. Nagasuksok sia sing labing matahom nga mga amerikana, nagapuyo sa mansion nga may 29 ka hulot, kag nagasakay sa itom nga Rolls-Royce nga ginamaneho sang iya kaugalingon nga drayber.

Si David * determinado man nga magmadinalag-on. Subong bise-presidente kag nagadumala sang isa ka daku nga graphics firm, may kahigayunan sia nga mangin isa ka presidente sa kompanya. Makagalanyat gid ang kamanggaran kag kadungganan. Apang, nagdesisyon si David nga maghalin sa kompanya. “Nahibaluan ko nga indi ko na matigayon liwat ining daku sing kita nga trabaho,” siling ni David. Sa banta mo nagsayop ayhan si David sa iya desisyon?

Madamo ang nagapati nga dapat magtigayon sing manggad, kabantugan, ukon kadungganan agod magmadinalag-on. Apang, ang mga tawo nga bugana sa materyal mahimo nagabatyag gihapon nga may kulang kag wala sing katuyuan ang kabuhi. Maathag nga amo gid sini ang kahimtangan ni G. Livermore. Bisan pa manggaranon sia, ang iya kabuhi puno sing kasakit, kapaslawan, kag kasubo. Nakaeksperiensia sia sing kapung-aw, indi madinalag-on nga mga pag-asawahay, kag indi sila suod sang iya mga anak nga lalaki. Sang ulihi, sang halos naubos na ang iya manggad, si G. Livermore nagkadto sa isa ka ilimnan sa isa ka malahalon nga hotel kag nanganduhoy tuhoy sa iya mga kapaslawan. Nag-order sia sing ilimnon, ginkuha ang iya  malahalon nga kuwaderno, kag nagsulat sing pamilinbilin sa iya asawa. Sang maubos niya ang iya ilimnon, nagsulod sia sa medyo madulom nga hulot kag naghikog.

Sa pagkamatuod, nanuhaytuhay ang kabangdanan sang paghikog, apang ginapakita sining eksperiensia nga matuod ang ginasiling sang Biblia: “Ang mga determinado nga mangin manggaranon . . . nagbuno sang ila kaugalingon sing madamo nga kasakit.”—1 Timoteo 6:9, 10.

Indi ayhan sayop nga talaksan sang kadalag-an ang kamanggaran, posisyon, ukon kadungganan? Sa banta mo madinalag-on ka bala? Ngaa? Ano ang imo ginagamit nga talaksan sang imo sabat? Ano ang nagaimpluwensia sa imo pagtamod tuhoy sa kadalag-an? Ginabinagbinag sang masunod nga mga artikulo ang masaligan nga mga laygay nga nagbulig sa minilyon nga magmadinalag-on. Tan-awon naton kon paano ka man mangin madinalag-on.

[Footnote]

^ par. 3 Gin-islan ang ngalan.