Magdiretso sa kaundan

Magdiretso sa listahan sang kaundan

Ang mga Gradwado sang Gilead Nakabaton sing Makatalandog nga Instruksion

Ang mga Gradwado sang Gilead Nakabaton sing Makatalandog nga Instruksion

 Ang mga Gradwado sang Gilead Nakabaton sing Makatalandog nga Instruksion

SANG Septiembre 9, 2006, ginhiwat ang gradwasyon sang ika-121 nga klase sang Watchtower Bible School of Gilead sa Watchtower Educational Center sa Patterson, New York. Isa ini ka makapalig-on nga programa.

Ginbuksan ni Geoffrey Jackson, nga katapo sang Nagadumala nga Hubon sang mga Saksi ni Jehova, ang programa paagi sa pag-abiabi sa 56 ka naggradwar kag sa 6,366 ka tumalambong gikan sa bug-os nga kalibutan. Ginbinagbinag niya ang Salmo 86:11, nga nagasiling: “Tudlui ako, O Jehova, sang imo dalanon. Magalakat ako sa imo kamatuoran. Bug-usa ang akon tagipusuon sa pagkahadlok sa imo ngalan.” Ginpatalupangod ni Utod Jackson ang tatlo ka importante nga butang nga ginpadaku sa sini nga bersikulo. Sia nagsiling: “Sa una nga dinalan, ginpadaku ang instruksion; sa ikaduha nga dinalan, ang aplikasyon; kag sa ikatlo, ang motibasyon. Importante ining tatlo ka butang ilabi na gid sa inyo nga mga misyonero kon magkadto na kamo sa inyo mga asaynment.” Dayon, ginpakilala niya ang serye sang mga pamulongpulong kag mga interbyu nga nagapadaku sining tatlo ka butang.

Makapalig-on nga mga Instruksion

Si William Malenfant, nga katapo sang talapuanan sang ulong talatapan, nagbinagbinag sang tema nga “Ang Labing Maayo nga Pagkabuhi nga Matigayon.” Ginpatalupangod niya ang halimbawa ni Maria, nga utod ni Marta. Sang isa ka okasyon nga nagduaw si Jesus sa ila balay, ginpili ni Maria nga maglingkod sa tiilan ni Jesus kag gin-una niya ini. Ginsilingan ni Jesus si Marta: “Ginpili ni Maria ang maayo nga bahin, kag indi ini pagkuhaon sa iya.” (Lucas 10:38-42) “Hunahunaa ninyo ini,” siling sang humalambal. “Tubtob san-o indi malipatan ni Maria nga naglingkod sia sa tiilan ni Jesus kag namati sa dalayawon nga espirituwal nga mga kamatuoran—ini bangod naghimo sia sing maayo nga pagpili.” Pagkatapos mahatagan sing komendasyon ang mga naggradwar bangod sang ila maayo nga espirituwal nga mga pagpili, sia nagsiling: “Ang inyo mga ginpili nagdul-ong sa inyo sa labing maayo nga pagkabuhi nga matigayon.”

Masunod si Anthony Morris, nga katapo sang Nagadumala nga Hubon, nagpadaku sang tema nga “Isuklob Ninyo si Ginuong Jesucristo,” pasad sa Roma 13:14. Paano naton mahimo ini? Gintudlo ni Utod Morris ang footnote sa sini nga bersikulo sa Reference Bible, nga nagasiling: “Iluga ang paggawi sang Ginuo.” Gani, nagakahulugan ini sang pag-ilog sa halimbawa kag disposisyon ni Jesus. “Pahamtang ang katawhan kon kaupod nila si Jesus,” siling sang humalambal, “bangod may yara sia sinsero nga interes sa ila, kag mabatyagan nila ini.” Dayon ginbinagbinag sang humalambal kon paano ang mga estudyante nakatigayon sing bastante nga ihibalo sa ila klase sa Gilead “agod . . . mahangpan . . . ang kasangkaron kag kalabaon kag kataason kag kadalumon” sang kamatuoran, subong sang ginsiling sang Efeso 3:18. Apang ginpahanumdom niya sa ila ang bersikulo 19, nga padayon nga nagasiling: “Kag agod makilala ang gugma ni Cristo nga nagalabaw gid sa ihibalo.” Ginpalig-on ni Utod Morris ang mga estudyante: “Samtang padayon ninyo nga ginahimo ang inyo personal nga pagtuon, pamalandungi ninyo kon  paano ninyo mailog ang mahigugmaon nga kaawa ni Cristo kag ‘masul-ob gid ang Ginuong Jesucristo.’”

Nagapamilinbilin nga Laygay Sang mga Instruktor Sang Gilead

Ang masunod nga pamulongpulong ginhatag ni Wallace Liverance nga instruktor sang Gilead, nga ang iya tema ginpasad sa Hulubaton 4:7. Nagsiling sia nga bisan pa importante gid ang diosnon nga kaalam, dapat man kita “magkuha sing paghangop,” nga nagadalahig sa pagtingob sa mga katunayan kag nian hibaluon kon paano ini naangot sa isa kag isa agod nga mahangpan ang kahulugan sang isa ka butang. Ginpakita sang humalambal nga ang pagkuha sing paghangop nagadala sing kalipay. Halimbawa, sang panahon ni Nehemias, ‘ginpaathag sang mga Levinhon ang kasuguan’ kag “ginhatagan ini sing kahulugan.” Pagkatapos, ang katawhan ‘nagkalipay sing daku, kay nahangpan nila ang mga pulong nga ginpahayag sa ila.’ (Nehemias 8:7, 8, 12) Si Utod Liverance naghinakop: “Ang kalipay amo ang  resulta sang paghangop sa gin-inspirar sang espiritu nga Pulong sang Dios.”

“Sin-o Gid ang Imo Kaaway?” amo ang tema nga ginbinagbinag ni Mark Noumair, nga isa pa ka instruktor sang Gilead. Sa inaway, madamo nga soldado ang napatay bangod di-hungod nga natiruhan sang ila man kaupod. “Kamusta naman sa espirituwal nga inaway nga aton ginapakigbahinan?” pamangkot niya. “Kon indi kita maghalong, mahimo kita magumon kon sin-o gid ang aton kaaway kag mahimo naton mapilasan ang aton kaupdanan.” Ang kahisa mahimo magpagumon sa iban. Bangod sini gintinguhaan ni Hari Saul nga patyon si David, nga iya masigkasumilimba, samtang sa katunayan ang mga Filistinhon ang ila kaaway. (1 Samuel 18:7-9; 23:27, 28) Ang humalambal nagdugang: “Ano abi kon nagaalagad ka upod sa isa ka misyonero nga mas maayo sa madamong paagi? Pilasan mo bala ang imo masigkasoldado sing masakit nga mga pinamulong ukon batunon sing mahidaiton ang katunayan nga ang iban magalabaw sa imo sa nanuhaytuhay nga paagi? Ang pagtalupangod sa kakulangan sang iban mahimo magapagumon lamang sa aton kon sin-o gid ang aton kaaway. Batui ang matuod nga kaaway, si Satanas.”

Makalilipay nga mga Eksperiensia kag Impormatibo nga mga Interbyu

Ang masunod nga bahin, “Himua ang Hilikuton Sang Isa ka Ebanghelisador,” ginhatag sang instruktor sang Gilead nga si Lawrence Bowen kag may yara ini mga interbyu kag mga eksperiensia. Ginpaathag niya nga ang footnote sang 2 Timoteo 4:5 sa Reference Bible nagasiling, himua ang hilikuton “sang isa ka misyonero.” Ang humalambal nagdugang: “Nagakaigo ini, bangod ang panguna nga hilikuton sang ginhanas sa Gilead nga misyonero amo ang pagbantala sang maayong balita, kag ginahimo ini sini nga klase bisan diin man nila masalapuan ang mga tawo.” Ang pila ka makalilipay nga mga eksperiensia gin-akto liwat.

Ang masunod nga programa may duha ka bahin nga gindumalahan nanday Michael Burnett kag Scott Shoffner, nga mga katapo sang pamilya Bethel. Gin-interbyu nila ang mga katapo sang Komite sang Sanga gikan sa Australia, Barbados, Korea, kag Uganda. Ang ginsiling sang mga katapo sang komite nagapakita kon daw ano nga panikasog ang ginhimo agod atipanon ang kinahanglanon sang mga misyonero, lakip na ang pag-aman sa ila sing nagakaigo nga dalayunan kag pag-atipan sa kapagros. Ginpadaku sang mga katapo sang komite nga ang madinalag-on nga mga misyonero handa nga makigbagay sa lokal nga mga kahimtangan.

Makapahulag kag Makatalandog nga Konklusion

Ang panguna nga diskurso sa programa amo ang pamulongpulong nga “Kahadluki ang Dios kag Hatagi Sia Sing Himaya,” nga ginpresentar ni John E. Barr, isa ka madugay na nga katapo sang Nagadumala nga Hubon. Ginbinagbinag niya ang Bugna 14:6, 7, nga aton mabasa: “Nakita ko ang isa pa ka anghel nga nagalupad sa tunga sang kalangitan, kag may yara sia wala katapusan nga maayong balita nga ipahayag subong makalilipay nga balita sa mga nagapuyo sa duta, kag sa tagsa ka pungsod kag tribo kag hambal kag katawhan, nga nagasiling sa mabaskog nga tingog: ‘Kahadluki ninyo ang Dios kag hatagi sia sing himaya, bangod nag-abot na ang oras sang iya paghukom.’”

Ginpalig-on ni Utod Barr ang mga estudyante nga dumdumon ang tatlo ka butang tuhoy sa sini nga anghel. Una, dapat niya ipahayag ang walay katapusan nga maayong balita nga si Cristo nagagahom na karon nga may bug-os nga awtoridad sa Ginharian. Ang humalambal nagsiling: “Kumbinsido gid kita nga ining paglingkod natabo sang 1914. Gani ining makalilipay nga balita dapat ibantala sa bug-os nga duta.” Ikaduha, ang anghel nagsiling: “Kahadluki ang Dios.” Ginpaathag sang humalambal nga dapat buligan ang ila mga estudyante sa Biblia nga mapalambo ang pagtahod kag kahadlok sa Dios agod indi sila maghimo sang bisan ano nga butang nga wala niya nahamut-an. Ikatlo, ang anghel nagsugo: ‘Hatagi ang Dios Sing Himaya.’ “Indi gid ninyo pagkalimti,” ginpalig-on ang mga estudyante, “nga nagaalagad kita para sa kahimayaan sang Dios, indi sang aton.” Nian sang ginbinagbinag “ang oras sang paghukom,” si Utod Barr nagsiling: “Diutay na lang nga tion ang nabilin kag ipadapat na ang katapusan nga paghukom. Madamo sa aton teritoryo ang dapat pa makabati sang mensahe sang maayong balita antes mangin ulihi na ang tanan.”

Sa sining mga pinamulong nga nagaalingawngaw sa ila palamatin-an, ginhatagan sing diploma ang 56 ka naggradwar kag ginpadala sa nanuhaytuhay nga duog sa kalibutan. Natandog gid ang tagipusuon sang mga naggradwar kag sang tanan nga nagtambong sang makapahulag nga laygay nga ila nabaton sa sining makalilipay nga adlaw.

[Kahon sa pahina 17]

ESTADISTIKA SANG KLASE

Kadamuon sang mga pungsod nga gintiglawas: 6

Kadamuon sang pungsod nga ginpadalhan: 25

Kadamuon sang mga estudyante: 56

Promedyo nga edad: 35.1

Promedyo nga tuig sa kamatuoran: 18.3

Promedyo nga tuig sa bug-os tion nga ministeryo: 13.9

[Piktyur sa pahina 18]

Ika-121 nga Naggradwar nga Klase sang Watchtower Bible School of Gilead

Sa listahan sa ubos, ang mga raya nanumeruhan halin sa atubangan pa likod, kag ang mga ngalan nalista halin sa wala pa tuo sa tagsa ka raya.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.