Ang Tawo nga Naghigugma sa Kabuhi kag Katawhan

SANG Martes, Abril 18, 2006, natapos ni Daniel Sydlik, nga madugay na nga katapo sang Nagadumala nga Hubon sang mga Saksi ni Jehova, ang iya dutan-on nga kabuhi. Nagaedad sia sing 87 kag nag-alagad sia subong katapo sang pamilya Bethel sa Brooklyn, New York, sing halos 60 ka tuig.

Si Utod Dan, subong amo ang mainanggaon nga tawag sa iya sang iya suod nga mga abyan, nag-abot sa Bethel sang 1946. Antes sini, nag-alagad sia subong espesyal nga payunir sa California kag napriso man sia sang tion sang Bug-os Kalibutan nga Inaway II bangod sa iya Cristianong neutralidad. Ang iya eksperiensia sa sining mga tinion maathag nga ginsaysay sa sugilanon sang iya kabuhi, nga naggua sa Hunyo 1, 1985 nga Ang Lalantawan, nga may tig-ulo nga “Daw Ano ka Hamili ang Imo Pagpakig-abyan, O Dios!”

Si Utod Sydlik kilala nga mapainubuson kag mahapos palapitan nga tawo. Kon magdumala sia sing agahan nga pagsimba para sa pamilya Bethel, ang iya positibo nga panimuot kag gugma sa kabuhi masami nga ginapakita sa iya nagabukas nga mga tinaga: “Maayo gid ang magkabuhi kag alagaron ang buhi nga Dios.” Subong manugpamulongpulong sa publiko, ginapalig-on niya ini nga pagtamod sa iban, nga nagahatag sang mga pamulongpulong nga may tema subong sang “Malipayon ang Katawhan nga ang Ila Dios si Jehova,” “Pagpabanaag Sang Kalipay ni Jehova,” “Hupti nga Nagasiga ang Kalayo Sang Espiritu Sang Dios,” kag “Ang Labing Maayo nga mga Butang Magaabot.”

Sang 1970, ginpangasawa ni Utod Sydlik si Marina Hodson, nga taga-Inglaterra, nga iya ginlaragway nga “isa ka dulot gikan sa Dios.” Magkaupod sila nga nag-alagad kay Jehova sing kapin sa 35 ka tuig.

Sa mga tinuig ni Utod Sydlik sa Bethel, nag-alagad sia sa nanuhaytuhay nga departamento, lakip na sa imprintahan kag Writing Department. Nagtrabaho man sia sa estasyon sang radyo nga WBBR. Nian, sang Nobiembre 1974, gintangdo sia nga katapo sang Nagadumala nga Hubon kag sang ulihi nagpanghikot sia upod sa Personnel Committee kag Writing Committee.

Sa sulod sang kapin sa 30 ka tuig nga pagpanghikot ni Utod Sydlik sa Personnel Committee nabatyagan gid ang iya tudok nga gugma sa mga tawo. Madamo ang iya ginpalig-on sa iya mabaskog nga tingog kag pirme niya ginapatalupangod ang aton hamili nga pribilehiyo nga maalagad si Jehova. Masami nga ginapadaku niya nga ang matuod nga kalipay wala nasandig sa iban nga butang, kundi sa aton kaangtanan kay Jehova kag sa aton pagtamod sa kabuhi.

Bisan pa nga ginakahidlawan gid si Utod Sydlik sang panimalay Bethel, ang iya halimbawa sang paghigugma sa kabuhi kag katawhan magapabilin. Napat-od naton nga lakip sia sa mga ginapatuhuyan sang Bugna 14:13: “Malipayon ang mga nagakapatay nga nahiusa sa Ginuo kutob karon. Huo, ang espiritu nagasiling, papahuwaya sila sa ila pagpangabudlay, kay ang ila mga ginhimo nagaupod sa ila.”