Isa ka Eskwelahan nga ang mga Gradwado Sini Nagabulig sa mga Tawo sa Bug-os nga Kalibutan

SA SOBRA sa 98,000 ka kongregasyon sang mga Saksi ni Jehova sa kapin sa 200 ka kadutaan, ginatudluan sang Dios ang mga tawo gikan sa tanan nga sahi sang pagkabuhi. Ang panguna nga tulun-an amo ang Biblia, kag ang tulumuron sini nga edukasyon amo agod buligan ang mga indibiduwal nga mag-uswag sa espirituwal paagi sa pagtuon kon ano ang kabubut-on sang Dios kag kon paano ini sundon. Ang mga nakatigayon sini nga edukasyon nakabenepisyo sing daku. Ginatudlo man nila sa iban ang ila natun-an, nahisanto sa sugo ni Jesucristo nga maghimo sing mga disipulo.—Mateo 28:19, 20.

Bilang dugang sa programa sang pagtudlo sa ila mga kongregasyon, ang mga Saksi ni Jehova nagtukod sing pila ka pinasahi nga mga eskwelahan. Ang isa sini amo ang Ministerial Training School. Nagsugod ini sang Oktubre 1987 sa Pittsburgh, Pennsylvania, E.U.A. Ang una nga klase may yara 24 ka nagahambal sing Ingles nga mga estudyante. Sugod sadto ginhiwat ini sa 21 ka hambal sa 43 ka kadutaan. Sa karon, ang soltero nga mga gulang kag mga ministeryal nga alagad halin sa kapin sa 90 ka pungsod nakaeskwela na. Pagkatapos sang walo ka semana nga kurso, ang mga gradwado gindestino sa mga lugar diin may yara kinahanglanon, ayhan sa ila kaugalingon nga pungsod ukon sa mga pungsod sa luwas. Sang talipuspusan sang 2005, kapin sa 22,000 ka Cristiano nga mga ministro ang nakatapos sa pagtuon. Ang ila mapainubuson nga kapisan sa pagpasanyog sa mga intereses sang Ginharian kag sa pagbulig sa iban ginpakamaayo sing bugana.—Hulubaton 10:22; 1 Pedro 5:5.

 Kahimusan Agod Makaeskwela

Agod makaeskwela sa Ministerial Training School, ang kalabanan nga mga estudyante kinahanglan nga magpangabay sing bakasyon gikan sa ila part-time ukon full-time nga trabaho. Problema ini kon kaisa. Sa Hawaii, ang duha ka Cristiano nga lalaki nga gin-agda nga mag-eskwela kinahanglan nga magpangayo sing pahanugot nga makabakasyon gikan sa ila trabaho subong mga maestro. May pagsalig sa Dios nga nagsumiter sila sang ila pangabay, kag nagpaathag kon ngaa luyag nila mag-eskwela kag kon paano sila mabuligan sini. Ginpasugtan sila nga duha.

Sa madamo nga hitabo, ang mga Saksi nga nagpangabay sing bakasyon ginsilingan nga wala na sila sing trabaho sa pagbalik nila. Ginpili nila nga makabaton sing paghanas gikan sa organisasyon ni Jehova, bisan pa nagkahulugan ini nga madulaan sila sing trabaho. Ang pila sa ila ginpabalik sa trabaho sang ila mga amo sang makatapos na sila. Ini nga determinasyon nga makaeskwela malaragway sing malip-ot sa sining paagi: Isumiter ang imo pangabay, ipangamuyo ini kay Jehova, kag itugyan ang tanan sa iya.—Salmo 37:5.

“Gintudluan ni Jehova”

Ang walo ka semana nga kurso sang eskwelahan nagalakip sang tul-id nga pagtuon sa Biblia. Ang mga estudyante nagatuon kon paano ginaorganisar ang katawhan ni Jehova sa paghimo sang kabubut-on sang Dios kag kon paano nila gamiton ang Biblia sing mas epektibo sa ila pag-alagad sa latagon, sa mga miting sa kongregasyon, kag sa mga asambleya.

Ang isa ka mainapresyahon nga gradwado nagsulat sa isa ka estudyante nga wala pa makaeskwela: “Maeksperiensiahan mo ang pinakamaayo gid nga pagtuon. Ang kasulatan nga nagasiling nga ‘gintudluan ni Jehova’ labi pa gid nga may kahulugan. Ang bug-os nga eksperiensia nagadihon kag nagaputli sang tagipusuon kag personalidad agod mailog sing labi pa ang halimbawa ni Cristo Jesus. Matigayon mo ang labing makalilipay nga eksperiensia sa imo kabuhi kon mag-eskwela ka.”—Isaias 54:13.

Mga Ebanghelisador, mga Manugbantay, kag mga Manunudlo

Ang mga gradwado sa Ministerial Training School nagaalagad karon sa 117 ka kadutaan. Nagalakip ini sa mga kapuluan sa Atlantiko, Caribbean, kag Pasipiko subong man sa kalabanan nga mga pungsod nga may mga sanga talatapan sang mga Saksi ni Jehova. Nagareport ang mga sanga nga ang ginahimo sang mga estudyante sa pag-ebanghelyo, pagbantay, kag pagtudlo nagapamatuod nga nakabaton sila sing maayo nga paghanas. Gintudluan sila kon paano gamiton sing mas epektibo ang Biblia sa ministeryo sa latagon. (2 Timoteo 2:15) Kon nagasabat sang mga pamangkot sang tagbalay, masami man nila nga ginagamit ang libro nga Reasoning From the Scriptures * kag ginahanas ang iban nga mga manugbantala sang Ginharian nga himuon man ini. Ang kakugi sang mga gradwado makalalaton, kag ang ila ginahimo nagapabakod sang mga kongregasyon.

Pribilehiyo sang mga gulang sa kongregasyon nga ‘bantayan ang panong,’ sa amo nagabulig sa pag-atipan sa espirituwal nga mga kinahanglanon sang iban. (1 Pedro 5:2, 3) Ang isa ka gulang nagsiling tuhoy sa kahimusan: “Nagapasalamat kami nga ang sanga talatapan nagapadala sing nahanas sing maayo nga mga utod agod buligan kami sa pagtuman sang amon katungdanan nga bantayan ang panong sang Dios.” Ang isa ka sanga sa Malayo nga Sidlangan nagkomento man: “Ang mga gradwado tuman ka mainawaon. Mapisan sila kag ginatahod sang kongregasyon. Nakilal-an sila kag ginapabaloran gid bangod sang ila pagkamapainubuson, pagkamainabyanon, kag kakugi. Masinakripisyuhon sila kag malipayon nga nagasaylo sa mga kongregasyon nga nagakinahanglan sing mga manugbantay.” (Filipos 2:4) Ginapabakod nila ang ila mga masigkatumuluo kag nagakabagay sila nga hatagan sing komendasyon.—1 Corinto 16:18.

Dugang pa, ginabuligan sang mga instruktor sang Ministerial Training School ang mga estudyante sa pagpauswag sang ila ikasarang subong mga manugpamulongpulong sa publiko. Paagi sa pag-aplikar sa mga panugda kag laygay sa ila, madamo nga gradwado ang ginagamit sang ulihi sa mga programa sa sirkito nga asambleya kag distrito  nga kombension. Ang isa ka manugtatap sang sirkito nagsiling nga ang mga gradwado nagahatag sing “ekselente nga mga pamulongpulong kag maayo sila magpaathag sang mga punto.”—1 Timoteo 4:13.

Nag-uswag sing daku ang kalidad sang pagtudlo sa mga miting sang kongregasyon sa isa ka pungsod sa Aprika pagkatapos nga ginhiwat didto ang Ministerial Training School kag gintangdo sa latagon ang mga gradwado. Ang mga gulang nga nakaeskwela nagabulig sa pag-ebanghelyo, pagbantay, kag pagtudlo, sa amo nagapabakod sang mga kongregasyon sa espirituwal.—Efeso 4:8, 11, 12.

Nag-uswag nga Pagtatap sa Kongregasyon

Sa madamo nga duog, madamo pa nga mga gulang kag mga ministeryal nga alagad ang kinahanglan. Ang iban nga mga kongregasyon wala gid kuntani sing mga gulang kon wala sila ginpadalhan sing isa ka gradwado gikan sa Ministerial Training School. Gani, madamo nga gradwado ang ginapadala sa mga lugar nga may amo sini nga mga kinahanglanon.

Madamo nga sanga ang nagreport nga ini nga mga lalaki “pamilyar gid sa mga kahimusan sang organisasyon,” “maukod sa ila responsibilidad,” “nagabulig sa iban nga apresyahon kag tahuron ang organisasyon ni Jehova,” kag “nagaamot sa kainit kag espirituwalidad sang ila mga kongregasyon.” Ini bangod ginasunod sang mga gradwado sa eskwelahan ang Pulong sang Dios kag wala sila nagasandig sa ila kaugalingon nga paghangop ukon wala nila ginatamod ang ila kaugalingon nga mga maalam. (Hulubaton 3:5-7) Ini nga mga lalaki nangin espirituwal nga mga dulot sa mga kongregasyon nga ginpadalhan sa ila.

Pag-alagad sa Naligwin nga mga Teritoryo

Ang iban nga mga gradwado nga gintangdo subong mga espesyal payunir nagabulig sa naligwin nga mga grupo agod mangin mga kongregasyon. Bilang pasalamat sa bulig nila, ang isa ka gulang sa naligwin nga lugar sang Guatemala nagsiling: “Sa sulod sang 20 ka tuig nabalaka ako kon paano tatapon ining daku kaayo nga teritoryo. Masami ko ini ginapangamuyo. Ang mga utod nga nag-eskwela sa Ministerial Training School ginhanas sing maayo sa pagpamulongpulong kag subong man sa mga kahimusan sa organisasyon, kag nalipay gid ako nga makita nga ini nga duog mahigugmaon karon nga ginatatap.”

Natun-an sang mga gradwado nga mangin epektibo sa mga teritoryo diin kinahanglan nga maglakbay sila sing malayo sa kabukiran agod makadtuan ang nagalinapta nga mga minuro. Didto madasig sila nga nagatukod kag nagaorganisar sing naligwin nga mga grupo, bisan pa nga wala ini anay mahimo sang iban. Halimbawa, isa ka gulang sa Niger ang nagpangayo sing bulig sa mga gradwado bangod nagapati sia nga makabulig sila sing daku sa iya lugar. Mahimo mas mahapos para sa di-minyo nga mga lalaki ang mag-alagad subong mga espesyal payunir kag mga manugtatap sang sirkito ilabi na sa naligwin nga mga lugar. Kaangay ni apostol Pablo, dapat nila atubangon ang ‘mga katalagman sa mga suba kag mga tulisan, mga katalagman sa kahanayakan,’ kag mga di-kasulhayan para sa ila kaugalingon kag subong man ang mga kabalaka para sa mga kongregasyon nga ila ginaalagaran.—2 Corinto 11:26-28.

Pagbulig sa mga Pamatan-on

Ang Kasulatan nagalaygay sa mga pamatan-on nga dumdumon ang ila Manunuga. (Manugwali 12:1) Ang makugi nga mga gradwado sa Ministerial Training School maayo gid nga halimbawa para sa Cristiano nga mga pamatan-on. Sang nag-abot ang duha ka gradwado sa isa ka kongregasyon sa Estados Unidos, ang kabug-usan nga oras nga ginhinguyang sang mga kauturan sa ministeryo nagdoble. Dugang pa, ang kadamuon sang mga regular payunir, ukon bug-os tion nga mga manugbantala sang Ginharian, nagdugang halin sa 2 tubtob sa 11. Amo ini ang kinaandan nga nagakatabo sa madamo nga kongregasyon.

Ang mga gradwado nagapalig-on man sa lamharon nga mga lalaki nga binagbinagon ang pag-eskwela sa Ministerial Training School. Nagpahulag ini sa pila nga indi pa mga ministeryal nga alagad nga tinguhaan nga lab-uton ina nga pribilehiyo. Ginatawag sang sanga sang Netherlands ang mga gradwado sa Ministerial Training School subong “buhi nga mga halimbawa para sa mga pamatan-on nga lalaki nga nagapamensar kon ano ang himuon sa ila kabuhi.”

 Pag-alagad sa Dumuluong-Hambal nga mga Kongregasyon

Sa madamo nga kadutaan, ang pagbantala sing maayong balita sa mga tawo sa ila tumandok nga hambal padayon nga nagauswag. Ang mga gradwado sa Ministerial Training School masami nga nagatuon sing iban pa nga mga hambal kag nagaalagad sa mga teritoryo nga may madamo sing pumuluyo halin sa iban nga mga pungsod. Sa Belgium, halimbawa, kinahanglan ang mas madamo nga manugbantala sing Ginharian para sa mga nagahambal sing Albaniano, Persiano, kag Ruso.

Ang dumuluong sing hambal nga mga kongregasyon kag mga grupo sa Alemanya, Britanya, Estados Unidos, Italya, Mexico, kag iban pa nga kadutaan nakabenepisyo na sing daku gikan sa mga nagalakbay nga manugtatap, mga gulang, kag mga ministeryal nga alagad nga gradwado sa Ministerial Training School. Ang sanga sa Korea nagreport nga ang “kapin sa 200 ka gradwado daku gid nga bulig sa dumuluong sing hambal nga mga kongregasyon kag mga grupo.”

Pag-alagad sing Mapainubuson sa Iban nga Katungdanan

Magluwas sa pag-alagad sa dumuluong sing hambal nga mga grupo kag mga kongregasyon, ang mga gradwado sa Ministerial Training School nagaalagad subong mga gulang, mga ministeryal nga alagad, kag mga nagalakbay nga manugtatap. Ang iban nagaalagad sa iban nga mga pungsod, ayhan sa kinahanglanon gid nga mga katungdanan sa Service Department sa isa ka sanga. Ang mga nakatuon sing kalantip sa konstruksion mahimo makigbahin sa programa sa pagtukod sing mga Kingdom Hall.

Ang pagdamo sang mga kongregasyon kag mga sirkito sa bug-os nga kalibutan nagakahulugan sang dalayon nga pagkinahanglan sing mas madamo pa nga mga nagalakbay nga manugtatap. Agod mapun-an ini nga kinahanglanon, ang pinili nga mga gradwado sa Ministerial Training School nagabaton sing napulo ka semana nga paghanas para sa nagalakbay nga hilikuton kag pagkatapos sini, nagaalagad subong tal-us ukon regular nga mga manugtatap sang sirkito. Mga 1,300 ka gradwado ang nagaalagad karon subong mga nagalakbay nga manugtatap sa 97 ka pungsod. Sa isa ka pungsod sa Aprika, 55 porsiento sang mga nagalakbay nga manugtatap ang gradwado sa Ministerial Training School. Sa isa pa ka pungsod sa Aprika, 70 porsiento sila.

Sa Australia, Canada, Estados Unidos, Europa, kag Malayo nga Sidlangan, ginatos ka gradwado sa eskwelahan ang gindestino sa iban nga mga pungsod para sa espesipiko nga mga kinahanglanon. Sa sining paagi, ang mga benepisyo gikan sa eskwelahan naglab-ot sa bug-os nga kalibutan.

Paagi sa iya Anak nga si Jesucristo, si Jehova nagbangon sing mga ebanghelisador, manugbantay, manunudlo, kag iban pa nga nagapauswag sang mga intereses sang Ginharian sa sining katapusan nga mga adlaw. Posible bala nga magadamo pa ang katawhan sang Dios? Siempre! Gani dapat pirme panikasugan sang dedikado nga mga lalaki nga lab-uton ang dugang pa nga responsibilidad. (Isaias 60:22; 1 Timoteo 3:1, 13) Ang Ministerial Training School nagahatag sa mga gulang kag mga ministeryal nga alagad sing kahigayunan nga masangkapan agod mapauswag ang ila ministeryo, kag makabulig ini sing daku sa ila kaugalingon kag sa iban pa sa bug-os nga kalibutan.

[Nota]

^ par. 11 Ginbalhag sang mga Saksi ni Jehova.

[Mga retrato sa pahina 10]

Ang Ministerial Training School nagapasanyog sang mga intereses sang Ginharian sa bug-os nga kalibutan

[Mga retrato sa pahina 13]

Handum mo bala nga mag-eskwela sa Ministerial Training School kag magbulig sa iban?