Pagsapo sing Espirituwal nga mga Bahandi sa Guinea

SA SULOD sang mga siglo, gin-atubang sang mga manuglagulad ang risgo nga mapatay ukon madisgrasya sa pagpangita sing bahandi kag manggad. Ang mga maisog nga nakalab-ot sa Guinea, Katundan nga Aprika, nakasapo sing duha ka sahi sang manggad—materyal kag espirituwal. Ang pungsod, nga bugana sa brilyante, bulawan, salsalon, ore, kag de-kalidad nga bauxite (nga amo ang ginahalinan sang aluminyum), ginapuy-an sang kapin sa siam ka milyon ka taga-Guinea.

Walay sapayan nga wala nangibabaw sa sini nga pungsod ang mga relihion sang Cristiandad, ang pagsimba importante, kag madamo ang nagapabalor gid sa espirituwal nga mga bahandi. Ano gid bala ini nga mga bahandi? Sila amo ang matutom nga mga alagad ni Jehova, nga ginlaragway sa Hageo 2:7 subong “ang kalahamut-an nga mga butang sang tanan nga pungsod.”

Espirituwal nga mga Bahandi

Ang pagkutkot sing madalom sa pagpangita sing natago nga mga bahandi nagakinahanglan sing daku nga panikasog. Sing kaanggid, sa Cristianong ministeryo, kinahanglan man ang hanuot nga panikasog agod masapwan ang espirituwal nga mga bahandi. Nagsugod ang pagbantala sang Ginharian sa interyor sang Guinea sang maaga nga bahin sang katuigan 1950 kag nakalab-ot lamang ini sa kapital, sa Conakry, sang maaga nga bahin sang katuigan 1960. Sa karon, may mga 900 ka Saksi ni Jehova na sa 21 ka kongregasyon kag mga grupo sa bug-os nga pungsod.

Nag-abot ang mga misyonero sang 1987 kag nagpanghikot upod sa isa lamang ka kongregasyon sa Conakry. Karon may kapin na sa 20 ka misyonero sa kapital kag sa mga interyor nga bahin sini. Makugi nila nga ginpalig-on ang mga kongregasyon  kag nagpanghikot upod sa lokal nga mga kauturan sa ministeryo.

Si Luc, nga nagapuyo sa Conakry, nalipay gid sang gintun-an niya sa Biblia si Albert, nga isa ka lamharon nga doktor. Ginpangita na ni Albert ang relihioso nga kamatuoran sa nanuhaytuhay nga mga relihion, kag nadalahig sia sa espiritistiko nga mga buhat. May singsing sia nga ginhatag sa iya sang isa ka espiritista nga nagapasalig nga magadala kuno ini sing suerte sa iya. Sa tapos mapaslawan sa iya pagpangita sang matuod nga relihion, ginhaboy ni Albert ang iya singsing kag nangamuyo: “Dios ko, kon nagaluntad ka, buligi ako nga makilala ka kag maalagad ka. Kon indi ko ikaw masapwan, magakabuhi na lang ako suno sa akon mga luyag.” Wala madugay pagkatapos sini, nagduaw si Albert sa balay sang iya magulang nga babayi kag nabatian niya ang isa ka Saksi ni Jehova nga nagadumala sing pagtuon sa Biblia sa iya hinablos nga babayi. Sa gilayon, naghimo sila sing iskedyul agod nga makatuon sia sing Biblia upod kay Luc.

Kada semana, malipayon nga nagalakat si Luc sing kapin sa lima ka kilometro pakadto kag lima ka kilometro pabalik agod dumalahan ang pagtuon. Bisan pa nga manubo lang ang ineskwelahan ni Luc, si Albert , nga gradwado sa isa ka unibersidad, nagdayaw gid sa iya mabakod nga pagtuo sa Kasulatan kag sa iya praktikal nga pag-aplikar sang ihibalo sa Biblia. Nalipay gid si Albert sang nahibaluan niya nga indi Dios ang balasulon sa pag-antos sang katawhan, sa baylo, katuyuan ni Jehova nga tapuson ang tanan nga pag-antos kag himuon ang duta nga isa ka paraiso. (Salmo 37:9-11) Ang kamatuoran sa Biblia kag ang maayong paggawi nga iya naobserbahan sa mga katapo sang kongregasyon nagtandog gid sa tagipusuon ni Albert.

Apang, subong nga ang wala pa naproseso nga brilyante nagakinahanglan sing mahalungon nga pagtabas sang isa ka eksperto sa sini agod nga mag-igpat, dapat bag-uhon man ni Albert ang iya malain nga mga paggawi agod nga mapahisuno ang iya kabuhi sa matarong nga mga talaksan sang Dios. Gin-untatan na niya ang pagpakig-angot sa mga espiritista, pagpahubog, kag pagpanahor. Apang, ginbudlayan gid si Albert sa pag-untat sa pagpanigarilyo. Sang ulihi, sang hanuot sia nga nangayo sing bulig kay Jehova, nagmadinalag-on sia sa paglandas sini. Anom ka bulan sang ulihi, nagpakasal sila sang iya ginapuyopuyo. Nagtuon man sa Biblia ang  iya asawa. Karon lunsay na sila nga mga bawtismado nga alagad ni Jehova.

Si Martin isa man ka espirituwal nga brilyante. Nagtuon sia sa Biblia sa Guéckédou sang 15 anyos sia. Ang iya Katoliko nga mga ginikanan nagpamatok sa iya pagtambong sa mga miting sang mga Saksi ni Jehova. Ginguba nila ang mga literatura sa Biblia ni Martin, ginkastigo sia, kag ginpalayas sia sa ila balay. Subong nga ang isa ka brilyante naporma bangod sang grabe nga pressure sa karbon, naglig-on man ang gugma ni Martin sa kamatuoran sa Biblia bangod sang pagpamatok. Sang ulihi, naghumok ang panimuot sang iya mga ginikanan, kag nagpauli sia sa ila balay. Ano ang nagpabag-o sa panimuot sang iya mga ginikanan? Natalupangdan nila nga tuhay gid ang paggawi ni Martin sangsa iya mga manghod, nga nangin mga rebelyuso kag nadalahig sa seksuwal nga imoralidad. Kumbinsido nga ang bag-o nga pagtuluuhan ni Martin may maayo nga epekto sa iya, ginaabiabi na sang iya amay ang mga katapo sang kongregasyon sa ila balay. Madamong beses nga nagpasalamat ang iloy ni Martin sa mga kauturan sa tanan nga nabulig nila sa iya anak. Nabawtismuhan si Martin sa edad nga 18 kag sang ulihi nag-eskwela sia sa Ministerial Training School kag karon isa na ka espesyal payunir nga ministro.

Espirituwal nga Manggad Gikan sa Iban nga Pungsod

Bisan pa nga ginaeksport sang Guinea ang madamo sini nga dunang manggad, ang pila sang iya espirituwal nga mga manggad “gikan sa iban nga pungsod.” Madamo nga tawo ang nagsaylo diri halin sa iban pa nga pungsod sang Aprika, masami bangod sang kapigaduhon. Ang iban nagsaylo agod makapalagyo sa walay untat kag mapintas nga inaway.

Si Ernestine, nga taga-Cameroon, nag-abot sa Guinea 12 ka tuig na ang nagligad. Nagtuon sia upod sa mga Saksi ni Jehova kag nagatambong sa mga miting sa sulod sang madamo nga tinuig, apang wala sia nagapabawtismo. Sang 2003, naglumawlumaw ang iya mata samtang nagatan-aw sia sa bawtismo sa isa ka sirkito nga asambleya sang mga Saksi ni Jehova. Bangod ginakonsiensia, nangamuyo sia kay Jehova: “Singkuentay uno anyos na ako karon, kag wala gid ako sang nahimo nga  maayo para sa imo. Luyag ko mag-alagad sa imo.” Pagkatapos sini, nagpanghikot si Ernestine nahisuno sa iya mapainubuson nga pangamuyo. Ginpaathag niya sa lalaki nga iya ginapuyopuyo nga mahimo lamang sila magpadayon sa pag-updanay kon mapakasal sila. Nagpasugot ang lalaki, kag sang ulihi nagtululagay ang iya luha sa kalipay sang bawtismuhan sia sang Nobiembre 2004.

Sugod sang maaga nga bahin sang katuigan 1990, linibo ka mga refugee gikan sa Liberia kag Sierra Leone ang nagdangop sa Guinea, lakip na ang ginatos ka mga alagad ni Jehova. Wala magdugay pag-abot nila sa isa ka kampo sang mga refugee, naghimos ang mga kauturan sang regular nga mga miting, nag-organisar sang pagbantala, kag nagpatindog sang Kingdom Hall. Ang iban nangin mga alagad ni Jehova sa mga kampo sang refugee. Isa sa ila amo si Isaac. Pagkatapos sang iya bawtismo, may kahigayunan si Isaac nga makabalik sa iya anay trabaho sa isa ka daku nga kompanya sa Liberia. Sa baylo nga magpauli, nagpabilin sia sa kampo sang mga refugee sa Lainé subong isa ka regular payunir. Nagpaathag sia: “Karon wala na ako sing amo nga dapat pa lisensiahan kon magtambong sa mga miting ukon asambleya. Hilway ako sa pag-alagad kay Jehova.” Sang Disiembre 2003, isa ka distrito nga kombension ang ginhiwat sa sining naligwin nga kampo para sa 150 ka Saksi nga nagapuyo sa tunga sang 30,000 ka refugee. Sing makalilipay, 591 ang nagtambong, lakip ang 9 ka apa nga nakapanginpulos sa programa paagi sa sign language. Dose ang nabawtismuhan. Gin-apresyar gid sang mga kauturan ang mga panikasog nga makahiwat sing espirituwal nga sinalusalo para sa ila.

Ang “Kalahamut-an nga mga Butang” Naghimo sing mga Pagbag-o

Wala sing balagbag nga daw indi gid malandas sang mga nagapangita sing bulawan kag brilyante. Apang, labi pa gid ka makalilipay nga makita ang pagtinguha sang mga bag-uhan sa paglandas sang tanan nga mga balagbag agod maalagad si Jehova. Binagbinaga ang kahimtangan ni Zainab.

Sa edad nga 13, napilitan si Zainab nga magpaulipon. Gikan sa isa ka pungsod nga iya ginapuy-an sa Katundan nga Aprika, gindala sia sa Guinea. Sang 20 anyos sia, nabatian niya ang mensahe sang Biblia. Nalangkag gid sia sa pag-aplikar sang iya natun-an.

Ang pagtambong sa Cristiano nga mga pagtilipon para sa pagsimba mabudlay para kay Zainab. Apang ginaapresyar gid niya ang mga miting kag determinado gid sia nga tambungan ini. (Hebreo 10:24, 25) Ginatago niya ang iya mga libro sa gua agod nga agyon na lang niya ini kon magkadto sia sa mga miting. Madamo nga bes nga ginkastigo sia sang iya “mga tag-iya” bangod sa pagtambong sa sining espirituwal nga mga pagtilipon.

Nagbag-o sang ulihi ang mga kahimtangan, kag nahilway si Zainab. Gilayon nga nagtambong sia sa tanan nga miting, nga nagbulig sa iya agod mag-uswag sing madasig sa espirituwal. Ginbalibaran niya ang isa ka daku sing sueldo nga trabaho nga mahimo mag-upang sa iya sa pagtambong sa mga miting agod makatigayon sing Cristianong panudlo. Nagpalista sia sa Teokratikong Eskwelahan Para sa Ministeryo, nangin di-bawtismado nga manugbantala sang Ginharian, kag sang ulihi ginsimbuluhan ang iya dedikasyon kay Jehova paagi sa bawtismo sa tubig. Sa tapos makapabawtismo, nag-auxiliary payunir sia gilayon. Pagligad sang anom ka bulan, nag-aplay sia subong regular payunir nga ministro.

Sa tapos nga makatambong sa pila ka miting, ang isa ka interesado nagsiling: “Indi ko mabatyagan nga imol ako kon ari ako diri.” Samtang ang madamo nga tawo interesado lamang sa materyal nga manggad sang Guinea, yadtong nagahigugma kay Jehova nalangkag gid sa pagpangita sang espirituwal nga mga manggad. Huo, “ang kalahamut-an nga mga butang sang tanan nga pungsod” nagdugok sa putli nga pagsimba kay Jehova karon!

[Kahon sa pahina 8]

GUINEA-2005

Pinakamataas nga Kadamuon sang mga Saksi: 883

Pagtuon sa Biblia: 1,710

Nagtambong sa Memoryal: 3,255

[Mapa sa pahina 8]

(Para sa aktual nga pormat, tan-awa ang publikasyon)

GUINEA

Conakry

SIERRA LEONE

LIBERIA

[Retrato sa pahina 9]

Sanday Albert kag Luc

[Retrato sa pahina 9]

Kingdom Hall sa Conakry

[Retrato sa pahina 10]

Si Ernestine

[Retrato sa pahina 10]

Si Martin

[Retrato sa pahina 10]

Si Zainab

[Credit Line sang retrato sa pahina 8]

USAID