Mga Kasal nga Dungganon sa Itululok sang Dios kag sang Tawo

“May punsion sa kasal nga ginhiwat sa Cana . . . Si Jesus kag ang iya mga disipulo gin-agda man sa punsion sa kasal.”—JUAN 2:1, 2.

1. Ano ang ginapatalupangod sang kasaysayan tuhoy kay Jesus sa Cana?

SI JESUS, ang iya iloy, kag ang iya pila ka disipulo nakahibalo gid sang kalipay nga mahatag sang isa ka dungganon nga kasal sa tunga sang katawhan sang Dios. Ginhimo pa gani ni Cristo nga pinasahi ang isa ka kasal paagi sa paghimo sang iya una nga narekord nga milagro didto, nga nagdugang pa gid sa kalipay sa sadtong okasyon. (Juan 2:1-11) Mahimo nga nakatambong ka na kag nasadyahan gid sa mga kasal sang mga Cristiano nga luyag mag-alagad kay Jehova subong malipayon nga mag-asawa. Ukon ayhan ginahandum mo nga subong man sini ang imo kasal ukon luyag mo buligan ang imo abyan nga mangin madinalag-on ang iya kasal. Ano ang makabulig agod mangin madinalag-on ang isa ka kasal?

2. Anong impormasyon ang ginaunod sang Biblia tuhoy sa mga kasal?

2 Nasapwan sang mga Cristiano nga makabulig gid ang laygay sang inspirado nga Pulong sang Dios kon ang lalaki kag babayi nagaplano nga magpakasal. (2 Timoteo 3:16, 17) Matuod, ang Biblia wala nagasambit sing detalyado nga mga pamaagi para sa kasal sang isa ka Cristiano. Makatarunganon lamang ini bangod sa tagsa ka duog kag panahon, nanuhaytuhay ang mga kustombre kag bisan gani ang legal nga mga ginapatuman. Halimbawa, sa dumaan nga Israel wala sing pormal nga seremonya sang kasal. Sa adlaw sang kasal, ginadala sang nobyo ang iya nobya sa iya balay ukon sa balay sang iya amay. (Genesis 24:67; Isaias 61:10; Mateo 1:24) Ining publiko nga tikang amo na ang kasal, nga wala sing pormal nga seremonya nga kinaandan sa madamo nga mga kasal karon.

3. Sa anong okasyon sa Cana nga si Jesus nagdugang sa kasadya?

3 Nahibaluan sang mga Israelinhon nga ina nga tikang amo na ang kasal. Sa tapos sini, mahimo sila magtambong sa punsion, subong sang ginhinambitan sa Juan 2:1. Madamong mga bersion sang Biblia ang nagbadbad sini nga bersikulo sing kaangay sini: “May isa ka kasal sa Cana.” Apang ang orihinal nga tinaga maathag nga ginbadbad nga  “punsion sa kasal” ukon “sinalusalo sa kasal.” * (Mateo 22:2-10; 25:10; Lucas 14:8) Ang kasaysayan maathag nga nagapakita nga si Jesus nagtambong kag nagdugang sa kasadya sa punsion sang isa ka Judiyo nga kasal. Apang, ang ginapadaku amo nga ang ginakabig nga kasal sadto tuhay sa kinaandan nga kasal karon.

4. Ano nga sahi sang kasal ang luyag sang pila ka Cristiano, kag ngaa?

4 Sa madamo nga pungsod karon, dapat sundon sang mga Cristiano nga luyag magpakasal ang pila ka legal nga mga kinahanglanon. Kon nahimo na nila ini, mahimo na sila magpakasal sa bisan ano nga legal kag ginabaton nga pamaagi. Mahimo nga isa ini ka diutay kag simple nga seremonya nga ginadumalahan sang isa ka huwes, meyor ukon ministro nga awtorisado sang Estado. Ginpili sang iban nga magpakasal sa sini nga pamaagi, ayhan nagapangabay sa pila ka himata ukon Cristianong mga abyan nga magtambong subong legal nga mga saksi ukon ayhan magbuylog lamang sa kalipay sining importante nga okasyon. (Jeremias 33:11; Juan 3:29) Sing kaanggid, mahimo pakamaayuhon sang iban nga mga Cristiano nga indi maghiwat sing dalagku nga punsion nga magakinahanglan sing daku nga pagplano kag gasto. Sa baylo mahimo nga magahanda sila sing isa ka diutay nga sinalusalo upod sa pila ka mga abyan. Ano man ang aton luyag sa sini nga bahin, dapat naton dumdumon nga ang iban nga hamtong nga mga Cristiano mahimo may mga pagtamod nga tuhay sangsa aton.—Roma 14:3, 4.

5. Ngaa madamo nga mga Cristiano ang luyag nga may pamulongpulong sa ila kasal, kag ano ang ginapakita sini?

5 Luyag sang kalabanan nga Cristianong magnobyahanay nga may yara pasad sa Biblia nga pamulongpulong sa ila kasal. * Ginakilala nila nga si Jehova amo ang ginhalinan sang pag-asawahay kag gin-aman niya sa iya Pulong ang maalamon nga laygay kon paano magmadinalag-on kag magmalipayon ang pag-asawahay. (Genesis 2:22-24; Marcos 10:6-9; Efeso 5:22-33) Kag luyag sang kalabanan nga magnobyahanay nga magbuylog ang ila Cristianong mga abyan kag himata sa sining malipayon nga okasyon. Apang, paano naton tamdon ang nanuhaytuhay nga legal nga mga kinahanglanon, mga pamaagi, kag kinaandan na nga lokal nga mga kustombre? Binagbinagon sini nga artikulo ang mga kahimtangan sa nanuhaytuhay nga duog. Ang iban mahimo tuhay gid sa imo nahibaluan ukon sa ginahimo sa inyo duog. Walay sapayan, makita mo ang pila ka kaanggid nga mga prinsipio ukon aspekto nga importante sa mga alagad sang Dios.

Dungganon nga Pag-asawahay​—Legal nga Pag-asawahay

6, 7. Ngaa dapat naton hatagan sing igtalupangod ang legal nga mga kinahanglanon sa pagpakasal, kag paano naton ini mapakita?

6 Bisan pa nga si Jehova ang nagpatok sang pag-asawahay, ang tawhanon nga panguluhan may pila ka awtoridad sa mga tikang nga pagahimuon sang magapakasal. Nagakaigo ini. Si Jesus nagsiling: “Ibayad ninyo kay Cesar ang mga butang nga iya ni Cesar, apang sa Dios ang mga butang nga iya sang Dios.” (Marcos 12:17) Sing kaanggid, si apostol Pablo nagsugo: “Ang tagsa ka tawo magpasakop sa superyor nga mga awtoridad, kay wala sing awtoridad nga indi paagi sa Dios; ang nagaluntad nga mga awtoridad ginbutang sang Dios sa ila relatibo nga mga posisyon.”—Roma 13:1; Tito 3:1.

7 Sa kalabanan nga pungsod, si Cesar, ukon ang gobierno, ang nagapat-od kon sin-o ang kalipikado nga magpakasal. Busa, kon ang duha ka Cristiano nga suno sa Kasulatan hilway sa pagminyo magdesisyon nga magpakasal, ginatuman gid nila ang lokal nga mga kasuguan tuhoy sa pag-asawahay. Ayhan nalakip sa sini ang pagkuha sing lisensia, pagpakasal sa awtorisado sang gobierno nga manugkasal, kag pagparehistro sang kasal. Sang ginpatuman ni Cesar Augusto nga “magparehistro,” sanday Maria kag Jose nagtuman, kag naglakbay pa Jerusalem “agod magparehistro.”—Lucas 2:1-5.

8. Ano nga kinabatasan ang wala ginahimo sang mga Saksi ni Jehova, kag ngaa?

8 Kon ang duha ka Cristiano magpakasal sa legal kag ginakilala nga paagi, ini nga pag-upuray balido  sa itululok sang Dios. Busa, ang mga Saksi ni Jehova wala nagapakasal liwat paagi sa paghimo sing madamong legal nga seremonya, kag wala man nila ginasulit ang mga panumpa sa kasal, halimbawa sa ika-25 ukon ika-50 nga anibersaryo sang kasal sang mag-asawa. (Mateo 5:37) (Wala ginakilala sang iban nga simbahan ang legal nga seremonya sang kasal sa sibil, kay suno sa ila ang kasal indi balido kon indi pari ukon klero ang maghimo sang ritwal ukon magdeklarar nga ang magnobyahanay mag-asawa na.) Sa madamong kadutaan, ginaawtorisar sang gobierno nga magkasal ang isa ka ministro sang mga Saksi ni Jehova. Kon posible ina, ayhan luyag niya nga lakipan ini sang isa ka pamulongpulong sa kasal sa Kingdom Hall. Amo ini ang lokal nga duog sang matuod nga pagsimba kag nagakaigo nga duog para sa isa ka pamulongpulong tuhoy sini nga kahimusan, nga ginpatok ni Jehova nga Dios.

9. (a) May kaangtanan sa pagpakasal sa sibil, ano ang mahimo nga luyag himuon sang Cristianong magnobyahanay? (b) Paano mahimo nga ang mga gulang may bahin sa mga plano sa kasal?

9 Sa iban nga mga pungsod, ginapatuman sang kasuguan nga ang magnobyahanay mapakasal sa isa ka opisina sang gobierno, subong sang city hall, ukon sa atubangan sang awtorisado nga opisyal sang gobierno. Ginatuman sang mga Cristiano inang legal nga tikang kag masami nga luyag nila nga sundan ini dayon sang isa ka pamulongpulong para sa kasal sa Kingdom Hall sa sina man nga adlaw ukon pagkadason nga adlaw. (Indi nila luyag nga magligad pa ang pila ka adlaw sa ulot sang sibil nga seremonya kag sang pamulongpulong sa Biblia, bangod kasado na sila sa atubangan sang Dios kag sang tawo, lakip ang Cristianong kongregasyon.) Kon ang magnobyahanay nga magapakasal sa sibil luyag nga may pamulongpulong sa Kingdom Hall, dapat sila mangayo sing pahanugot sa mga gulang nga katapo sang Komite sang Pag-alagad sa Kongregasyon. Luwas sa pagpat-od nga ang magnobyahanay may maayo nga reputasyon, pat-uron sining mga manugtatap nga ang oras sang kasal indi magsablag sa regular nga mga miting kag naiskedyul nga mga programa sa Kingdom Hall. (1 Corinto 14:33, 40) Repasuhon man nila ang mga paghanda nga luyag himuon sa Kingdom Hall nga ginpangabay sang magnobyahanay kag magadesisyon kon bala ipahibalo ang paggamit sini.

10. Kon sa sibil ginhimo ang pagpakasal, paano ini magaapektar sa pamulongpulong sa kasal?

10 Ang gulang nga magapamulongpulong sa kasal magatinguha nga himuon ang pamulongpulong nga mainabyanon, makapalig-on sa espirituwal, kag dungganon. Kon ang magnobyahanay ginkasal sa sibil, dapat pat-uron sang gulang nga nakasal sila suno sa kasuguan ni Cesar. Kon ang sumpa sang pag-asawahay wala ginhimo sa sibil nga seremonya, mahimo nga luyag sang bag-ong kasal nga himuon ini sa tion sang pamulongpulong. * Kon ginlakip sa sibil nga seremonya ang mga sumpa apang luyag sang bag-ong kasal nga magsumpa sa atubangan ni Jehova kag sang kongregasyon, ihambal nila ini sa mga tinaga nga nagapakita nga sila nakasumpaanay na, nga sila “gintingob” na.—Mateo 19:6; 22:21.

11. Sa pila ka duog, paano ginahimo ang pagkasal, kag ano ang epekto sini sa pamulongpulong sa kasal?

11 Sa pila ka duog, mahimo nga wala na ginapatuman sang kasuguan ang pagpakasal paagi sa bisan ano nga seremonya, bisan gani ang sa atubangan sang isa ka opisyal sang gobierno. Ang pagpresentar nila sang isa ka napirmahan nga pormas sang rehistrasyon sang kasal sa isa ka opisyal, amo na ang kasal. Sa tapos sini, ginrehistro ang sertipiko sa kasal. Sa sining paagi ang magnobyahanay ginkabig na nga mag-asawa, ang petsa sa sertipiko amo ang petsa sang ila kasal. Subong sang ginsambit sa ibabaw, mahimo nga luyag sang bag-ong kasal nga sundan dayon ining rehistrasyon sang isa ka pasad sa Biblia nga pamulongpulong sa Kingdom Hall. Ang isa ka hamtong sa espirituwal nga utod nga lalaki nga ginpili nga magahatag sing pamulongpulong magapahibalo sa tanan nga tumalambong nga ang magnobyahanay  kasado na bangod sang rehistrasyon nga bag-o lang natapos. Ang ano man nga panumpa, dapat himuon suno sa balayan nga makita sa parapo 10 kag sa footnote sini. Ang mga tumalambong sa Kingdom Hall magakalipay upod sa mag-asawa kag makabenepisyo sa laygay nga ginhatag gikan sa Pulong sang Dios.—Ambahanon ni Solomon 3:11.

Kasal sa Sibil kag Suno sa Kustombre

12. Ano ang kasal suno sa kustombre, kag ano ang ginapanugda nga himuon pagkatapos sini nga sahi sang kasal?

12 Sa iban nga mga pungsod, ang magnobyahanay mahimo magpakasal suno sa kustombre (ukon, pangtribo) nga paagi sa pagpakasal. Wala ini nagapatuhoy sa duha ka indibiduwal nga naga-live-in, ukon sa pagpuyopuyo nga ginakilala sa iban nga lokalidad apang indi gid legal nga pag-asawahay. * Ginapatuhuyan naton ang pagkasal suno sa ginakilala sang publiko nga kustombre sang isa ka tribo ukon sang duog. Mahimo malakip sa sini ang pagbayad kag pagbaton sing dote, nga sa sini ang magnobyahanay nakasal sing legal kag sing Makasulatanhon. Ginatamod sang gobierno ining kasal suno sa kustombre subong nagakaigo, legal, kag balido. Busa, masami nga posible nga irekord ukon irehistro ang kasal suno sa kustombre nga natabo, kag sa paghimo sini, ang bag-ong kasal makabaton sing opisyal nga sertipiko. Ang rehistrasyon makahatag sing legal nga proteksion sa bag-ong kasal ukon sa asawa kon mabalo sia kag sa mangin mga kabataan. Ang kongregasyon magapalig-on sa kay bisan sin-o nga nagpakasal suno sa kustombre nga iparehistro ini gilayon. Sing makawiwili, daw ginapakita nga sa Mosaikong Kasuguan, ang pagpakasal kag pagbun-ag opisyal nga ginarekord.—Mateo 1:1-16.

13. Pagkatapos sang kasal suno sa kustombre, ano ang nagakaigo kon tuhoy sa pamulongpulong sa kasal?

 13 Ang magnobyahanay nga legal nga ginkasal suno sa sini nga kustombre nangin mag-asawa na kon inang pagkasal mahanabo. Subong sang ginsambit kaina, ang mga Cristiano nga naghimo sinang legal nga pagpakasal mahimo maluyag nga may pamulongpulong, upod ang mga panumpa sa kasal nga hiwaton sa Kingdom Hall. Kon himuon ini, ipahibalo sang humalambal nga ang magtiayon kasado na suno sa kasuguan ni Cesar. Isa lamang ka pamulongpulong ang himuon. Isa lang ka kasal, sa sini nga kaso ang balido kag legal nga kasal suno sa kustombre (pangtribo), kag isa ka Makasulatanhon nga pamulongpulong. Ang paghimo sining duha ka aspekto nga indi magdugay kon posible, ayhan sa pareho nga adlaw, nagabulig nga mapadunggan ang Cristianong pag-asawahay sa komunidad.

14. Ano ang himuon sang isa ka Cristiano kon posible nga magpakasal sa sibil ukon suno sa kustombre?

14 Sa pila ka mga kadutaan diin ginakilala nga legal ang kasal suno sa kustombre, may mga kahimusan para sa sibil (ukon, suno sa kasuguan) nga pagkasal. Ang kasal sa sibil masami ginahimo sa atubangan sang opisyal sang gobierno, kag mahimo ini maglakip sa mga panumpa sa kasal kag pagpirma sang rehistrasyon. Ginapili sang pila ka Cristiano ang kasal sa sibil sangsa kasal suno sa kustombre. Indi na kinahanglan nga duha gid ka kasal ang himuon; ang ano man sa sining duha ka pamaagi, legal. Ang ginsiling sang parapo 9 kag 10 tuhoy sa isa ka pamulongpulong kag mga panumpa sa kasal naaplikar man sa kasal sa sibil. Ang panguna nga butang amo nga ang magnobyahanay ginkasal sa paagi nga nagapadungog sa atubangan sang Dios kag sang tawo.—Lucas 20:25; 1 Pedro 2:13, 14.

Paghupot Sang Kadungganan sa Kasal

15, 16. Paano ang pagpadungog importante nga bahin sang kasal?

15 Sang mag-utwas ang problema sa pag-asawahay sang hari sang Persia, ang puno nga manuglaygay nga si Memucan naghatag sing laygay nga may mapuslanon nga epekto—‘nga ang tanan nga asawa magpadungog sa ila mga bana.’ (Ester 1:20) Sa Cristianong pag-asawahay, ining laygay indi na dapat imando sang bisan sin-o man nga tawhanon nga hari; luyag sang mga asawa magpadungog sa ila mga bana. Sing kaanggid, ang Cristianong mga bana nagahatag sa ila mga asawa sing dungog kag nagadayaw sa ila. (Hulubaton 31:11, 30; 1 Pedro 3:7) Ang pagpadungog sa aton pag-asawahay indi lamang himuon pagkatapos sang madamo nga tinuig. Dapat ini ipakita gilayon, halin sa adlaw sang kasal padayon.

16 Indi lamang ang lalaki kag ang babayi—ang bana kag ang asawa—ang dapat magpakita sing pagpadungog sa adlaw sang kasal. Kon magpamulongpulong ang Cristianong gulang sa adlaw sang kasal, ining pamulongpulong dapat man magpakita sang pagpadungog. Ang pamulongpulong dapat ipatungod sa magtiayon. Subong bahin sang pagpadungog sa ila, ang humalambal indi dapat maghambal sing kaladlawan ukon mga sugidsugid. Indi niya dapat pag-ilakip ang mga obserbasyon nga tuman ka personal nga mahimo magpakahuya sa magtiayon kag sa mga tagpalamati. Sa baylo, tinguhaan niya nga mangin mainabyanon kag makapalig-on, nga ginapadaku ang Ginhalinan sang pag-asawahay kag ang Iya talalupangdon nga laygay. Huo, ang talahuron nga diskurso sa kasal makaamot sa kasal nga nagapadungog kay Jehova nga Dios.

17. Ngaa may legal nga aspekto ang Cristiano nga mga kasal?

17 Mahimo nga nasapwan mo sa sining artikulo ang madamo nga punto tuhoy sa legal nga mga detalye sang kasal. Ang pila ka aspekto mahimo nga indi direkta nga naaplikar sa inyo duog. Apang, dapat nahibaluan naton tanan nga importante gid nga ang mga kahimusan sa kasal sa tunga sang mga Saksi ni Jehova nagapakita sing pagtahod sa lokal nga mga kasuguan, para sa mga ginapatuman ni Cesar. (Lucas 20:25) Ginapalig-on kita ni Pablo:  “Ihatag sa tanan ang mga natungod sa ila, sa iya nga nagapatuman sing buhis, ang buhis; sa iya nga nagapatuman sing balayran, ang bayad; . . . sa iya nga nagapatuman sing pagpadungog, ini nga pagpadungog.” (Roma 13:7) Huo, nagakaigo gid nga ang mga Cristiano, halin sa adlaw sang kasal, magpadungog sa kahimusan nga ginpatok sang Dios karon.

18. Ano pa nga bahin sang kasal ang takus hatagan sing igtalupangod, kag sa diin naton masapwan ang impormasyon tuhoy sa sini nga butang?

18 Madamo nga Cristianong kasal ang ginasundan sang sosyal nga pagtinipon—punsion sa kasal, sinalusalo, ukon kinaon. Dumduma nga ginpili ni Jesus nga magtambong sa isa sa sining punsion. Kon may amo sini nga pagtinipon, paano ang laygay gikan sa Biblia makabulig sa aton nga mapat-od nga ini man nagapadungog sa Dios kag nagapadayag sing maayo sa bag-ong kasal kag sa Cristianong kongregasyon? Binagbinagon ini sang masunod nga artikulo. *

[Mga Footnote]

^ par. 3 Amo man nga tinaga ang mahimo gamiton sa sinalusalo nga wala sing kaangtanan sa kasal.—Ester 9:22, Septuagint.

^ par. 5 Ginagamit sang mga Saksi ni Jehova ang isa ka 30 minutos nga balayan para sa diskurso sa kasal nga may tig-ulo nga “Dungganon nga Pag-asawahay sa Itululok Sang Dios.” Ang espirituwal nga mga laygay sa sini ginkuha sa libro nga Ang Sekreto Sang Kalipay sa Pamilya kag sa iban pa nga mga publikasyon sang mga Saksi ni Jehova. Ini nga paghinun-anon mapuslanon para sa nagapakasal kag sa tanan nga nagatambong sa kasal.

^ par. 10 Luwas kon lain ang ginapatuman sang lokal nga kasuguan, ining panumpa nga nagapadungog sa Dios amo ang ginagamit. Para sa nobyo: “Ako [ngalan sang nobyo] nagakuha sa imo [ngalan sang nobya] nga mangin akon ginpakaslan nga asawa, agod higugmaon kag agod palanggaon suno sa kasuguan sang Dios nga nahamtang sa Balaan nga Kasulatan para sa Cristianong mga bana, tubtob nga kita lunsay nagakabuhi nga magkaupod sa duta suno sa kahimusan sang Dios sa pag-asawahay.” Para sa nobya: “Ako [ngalan sang nobya] nagakuha sa imo [ngalan sang nobyo] nga mangin akon ginpakaslan nga bana, agod higugmaon kag agod palanggaon kag hanuot nga tahuron, suno sa kasuguan sang Dios nga nahamtang sa Balaan nga Kasulatan para sa Cristianong mga asawa, tubtob nga kita lunsay nagakabuhi nga magkaupod sa duta suno sa kahimusan sang Dios sa pag-asawahay.”

^ par. 12 Ang Watchtower nga Mayo 1, 1962, pahina 287, may komento tuhoy sa pagpuyopuyo.

^ par. 18 Tan-awa man ang artikulo nga “Himua nga Labi ka Malipayon kag Dungganon ang Adlaw Sang Imo Kasal,” sa pahina 28.

Madumduman Mo Bala?

• Ngaa dapat kita mangin interesado sa legal kag espirituwal nga mga aspekto sang kasal?

• Kon magpakasal ang duha ka Cristiano sa sibil nga seremonya, ano nga kahimusan sa kongregasyon ang ayhan luyag nila himuon sa gilayon?

• Ngaa ang mga pamulongpulong sa kasal himuon sa Kingdom Hall?

[Mga Pamangkot sa Pagtinuon]

[Retrato sa pahina 18]

Sa kasal sang Israelinhon sang una, ginadala sang nobyo ang nobya sa iya balay ukon sa balay sang iya amay

[Retrato sa pahina 21]

Pagkatapos sang kasal suno sa kustombre, mahimo luyag sang mga Cristiano nga may pamulongpulong sa Kingdom Hall