“Dapat Namon Tumanon ang Dios Subong Manuggahom sa Baylo Sang mga Tawo”

‘Indi Kami Mag-untat sa Pagpamulong Tuhoy kay Jesus’

ANG tuig 33 C.E., kag ang duog amo ang daku kaayo nga korte sang pungsudnon nga hukmanan sang mga Judiyo sa Jerusalem. Diri imbestigahan sang Sanhedrin ang 12 ka sumulunod ni Jesucristo. Ngaa? Bangod nagabantala sila tuhoy kay Jesus. Sanday apostol Pedro kag Juan nagatindog sa atubangan sang korte sa ikaduha nga tion. Nahauna nga bista naman ini para sa iban nga mga apostoles.

Ginpaalinton sang mataas nga saserdote sa 12 ka apostoles ang tuhoy sa mando anay sang korte sang una nga ginbista sanday apostol Pedro kag Juan. Sang ginmanduan sila sadto nga mag-untat sa pagpanudlo tuhoy kay Jesus, nagsabat sila: “Kon matarong sa itululok sang Dios ang magpamati sa inyo sa baylo nga sa Dios, kamo ang maghukom. Apang para sa amon, indi kami mahimo mag-untat sa paghambal tuhoy sa mga butang nga amon nakita kag nabatian.” Pagkatapos mangamuyo nga hatagan sing kaisog, ang mga disipulo ni Jesus padayon nga nagbantala sing maayong balita.—Binuhatan 4:18-31.

Nakahibalo ang mataas nga saserdote nga ang iya nagligad nga pamahog walay pulos amo nga nagsiling sia sa sining ikaduha nga bista: “Ginmanduan gid namon kamo nga indi na magpanudlo sa sini nga ngalan, apang, yari karon! ginpuno ninyo ang Jerusalem sang inyo panudlo, kag luyag gid ninyo nga kami ang manabat sa dugo sini nga tawo.”—Binuhatan 5:28.

Mabakod nga Determinasyon

Nagsabat sing maisugon, si Pedro kag ang iban pa nga mga apostoles nagsiling: “Dapat namon tumanon ang Dios subong manuggahom sa baylo sang mga tawo.” (Binuhatan 5:29) Huo, sa baylo nga tumanon ang mga tawo lamang, dapat naton tumanon si Jehova kon ang sugo sang tawo supak sa iya mga sugo. *

Ang pinamulong sang mga apostoles nga nagapahayag sang ila katutom sa Dios dapat nga magkumbinsi sa mga katapo sang Sanhedrin. Kon pamangkuton tuhoy sa pagkamatinumanon sa Dios, ining mga lider sang mga Judiyo dapat magsabat sing nagahiliugyon: “Tumanon [ninyo] ang Dios.” Ti, wala bala sila nagapati nga ang Dios amo ang Soberano nga Ginuo sang uniberso?

Bilang tiglawas sang tanan nga apostoles, si Pedro nagsiling nga bahin sa ila ministeryo, tumanon nila ang Dios sa baylo sang mga tawo. Gani, ginpamatud-an niya nga indi husto ang panumbungon nga ang mga apostoles indi matinumanon. Gikan sa maragtas mismo sang ila pungsod, nahibaluan sang mga katapo sang Sanhedrin nga may mga tion nga matarong gid nga tumanon ang Dios sa baylo sang mga tawo. Sang gin-amligan nga buhi sang duha ka partera sa Egipto ang mga bata nga lalaki nga nabun-ag sa Hebreo nga mga babayi, nahadlok sila sa Dios kag indi kay Paraon. (Exodo 1:15-17) Sang gin-ipit nga mag-ampo, gintuman ni Hari Ezequias si Jehova, indi si Hari Senaquerib. (2 Hari 19:14-37) Ginapadaku sang Hebreo nga Kasulatan, nga sa sini may madalom nga ihibalo ang mga katapo sang Sanhedrin, nga ginapaabot ni Jehova nga tumanon sia sang iya katawhan.—1 Samuel 15:22, 23.

Ang Pagkamatinumanon May Padya

Isa ka katapo sang mataas nga hukmanan ang napahulag sang pinamulong nga “dapat namon tumanon ang Dios subong manuggahom sa baylo sang mga tawo.” Sa isa ka pribado nga sesyon, ginhaylo ni Gamaliel, nga isa ka respetado gid  nga hukom sa Sanhedrin, ang korte nga pamatian ang iya maalamon nga laygay. Paagi sa pagsambit sang nagligad nga mga halimbawa, ginpakita ni Gamaliel nga indi maalamon nga hilabtan ang ginahimo sang mga apostoles. Naghinakop sia paagi sa pagsiling: “Indi ninyo paghilabti ini nga mga lalaki, kundi pabay-i ninyo sila; . . . basi masapwan pa kamo nga nagapakig-away mismo sa Dios.”—Binuhatan 5:34-39.

Bangod sang makatarunganon nga pinamulong ni Gamaliel, nakumbinsi ang mataas nga hukmanan nga buy-an ang mga apostoles. Bisan pa ginbunal sila, ang mga apostoles wala gid nahadlok sa natabo sa ila. Sa baylo, ang rekord sang Biblia nagsiling: “Adlaw-adlaw sa templo kag sa mga balay nagpadayon sila nga walay untat sa pagpanudlo kag sa pagbantala sing maayong balita tuhoy sa Cristo, si Jesus.”—Binuhatan 5:42.

Ginpadyaan gid ang mga apostoles bangod sang pagpahayag nila sing malig-on nga ang awtoridad sang Dios amo ang pinakamataas sa tanan! Amo man sini ang panimuot sang matuod nga mga Cristiano sa karon. Ang mga Saksi ni Jehova padayon nga nagatamod kay Jehova subong ang ila Supremo nga Manuggahom. Kon ginasugo nga supakon ang sugo sang Dios, nagasabat sila kaangay sang mga apostoles: “Dapat namon tumanon ang Dios subong manuggahom sa baylo sang mga tawo.”

[Nota]

^ par. 7 Tan-awa ang 2006 Calendar of Jehovah’s Witnesses, Septiembre/Oktubre.

[Kahon/Retrato sa pahina 9]

NAPALIGBAN MO NA BALA?

Paano nahibaluan sang manunulat sang Ebanghelyo nga si Lucas ang ginsiling ni Gamaliel sa Sanhedrin sa isa ka pribado nga sesyon? Mahimo nga direkta nga ginsugid sang Dios kay Lucas ang ginsiling ni Gamaliel. Ayhan ginsugiran ni Pablo (isa anay sa mga estudyante ni Gamaliel) si Lucas tuhoy sa ginsiling ni Gamaliel. Ukon basi ginpamangkot ni Lucas ang isa ka mahinuklugon nga miembro sang mataas nga korte.