Ang Iya Kalipay Yara sa Kasuguan ni Jehova

NATAPOS ni Albert D. Schroeder, katapo sang Nagadumala nga Hubon sang mga Saksi ni Jehova, ang iya dutan-on nga kabuhi sang Mierkoles, Marso 8, 2006. Nagaedad sia sing 94 anyos kag naghinguyang sia sing kapin sa 73 ka tuig sa bug-os tion nga pag-alagad.

Si Utod Schroeder natawo sa Saginaw, Michigan, E.U.A., sang 1911. * Sang bata pa sia, madamo sia sing natun-an tuhoy sa Biblia gikan sa iya lola sa iloy, nga amo man ang nagpatudok sa iya sang kakunyag sa pagbasa sang Pulong ni Jehova. Nagtuon sia sing Latin, German, kag electrical engineering sa University of Michigan. Apang, samtang nagatubo ang iya apresasyon sa Kasulatan, nag-untat sia sa pag-eskwela agod mangin bug-os tion nga manugbantala sang Ginharian. Sang 1932 nangin katapo sia sang pamilya Bethel sa Brooklyn, New York.

Sang 1937, sa edad nga 26, ginpadumala kay Utod Schroeder ang hilikuton sang mga Saksi ni Jehova sa Britanya. Ang iya kakugi sa pagbantala nga hilikuton nagpalig-on sa madamo didto nga magsulod sa bug-os tion nga pag-alagad. Ang isa ka bataon nga lalaki nga nakaupod niya sa Bethel sa London amo si John E. Barr. Sang ulihi, magkaupod sila nga nag-alagad subong katapo sang Nagadumala nga Hubon sa sulod sang madamo nga tuig.

Ang mga ginpanghimo ni Utod Schroeder para sa mga Saksi ni Jehova sang tiempo-guerra namutikan. Sang Agosto 1942 gintapok sia gikan sa Britanya. Pagkatapos sang mabudlay nga pagbiyahe sa Atlantiko sang tiempo-guerra, nag-abot sia sa Brooklyn sang Septiembre.

Sadto nga tion, ginapaabot na sang mga alagad ni Jehova nga may isa ka daku nga hilikuton nga pagahimuon pagkatapos sang Bug-os Kalibutan nga Inaway II. Nasorpresa kag nalipay si Utod Schroeder sang nabaton niya ang iya masunod nga asaynment—magbulig sa paghanda sang kurikulum ukon mga kurso nga tun-an para sa Watchtower Bible School of Gilead. Sa sulod sang pila ka tuig, nangin instruktor sia kag nagbulig sa paghanas sa mga misyonero. Indi gid malipatan sang mga estudyante nga gintudluan niya sa Gilead kag sang ulihi sa Kingdom Ministry School ang iya mga gintudlo. Nalipay sia sa pagpatudok sang gugma sa mga kasuguan sang Dios sa iya mga estudyante kag ginpadaku niya ang importansia sang pagkilala kay Jehova.

Sang 1956, napangasawa ni Utod Schroeder si Charlotte Bowin, kag sang 1958 natawo ang ila anak nga lalaki nga si Judah Ben. Si Utod Schroeder isa ka huwaran nga Cristianong bana kag amay. Sang 1974, nangin katapo sia sang Nagadumala nga Hubon kag ginpabaloran gid ang iya paghantop. Isa sia ka mainayuhon kag mapainubuson nga tawo, nga labaw sa tanan, luyag niya nga himayaon ang halangdon nga ngalan sang Dios. Makasalig kita nga nabaton ni Utod Schroeder ang iya langitnon nga padya bilang isa ka hinaplas nga Cristiano nga ‘nalipay gid sa kasuguan ni Jehova.’—Salmo 1:2.

[Nota]

^ par. 3 Ang sugilanon sang kabuhi ni Utod Schroeder mabasa sa Ang Lalantawan, Marso 1, 1988.